ᖁᕕᐊᓲᑎᒋᖁᔭᐅᕗᖅ ᓄᓇᕐᔪᐊᑉ ᐃᑲᕐᕋᖓ ᐆᒻᒪᖅᑯᑎᒥᒃ ᐊᑐᑦᑎᐊᕐᓂᒃᑯᑦ!

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᑦ

ᖁᕕᐊᓲᑎᒋᖁᔭᐅᕗᖅ ᓄᓇᕐᔪᐊᑉ ᐃᑲᕐᕋᖓ ᐆᒻᒪᖅᑯᑎᒥᒃ ᐊᑐᑦᑎᐊᕐᓂᒃᑯᑦ!

ᓄᓇᕗᑦ ᒐᕙᒪᒃᑯᑦ ᑐᙵᓱᒃᑎᑦᑎᕗᑦ ᓄᓇᕗᒥᐅᓂᒃ ᓄᓇᕐᔪᐊᑉ ᐃᑲᕐᕋᖓᓂ ᖁᕕᐊᓲᑎᖃᖅᑎᓪᓗᒋᑦ, ᓯᕙᑖᕐᕕᖕᒥ, ᒫᑦᓯ 25, 8:30−ᒥ 9:30-ᒧᑦ ᐅᓐᓄᒃᑯᑦ.

ᓄᓇᕐᔪᐊᑉ ᐃᑲᕐᕋᖓ ᐊᕐᕌᒍᑕᒫᑦ ᐱᓕᕆᐊᖑᕙᒃᐳᖅ ᓄᓇᕐᔪᐊᕐᒥᑦ ᐃᓄᖕᓂᑦ, ᓄᓇᓕᖕᓂᑦ, ᓇᖕᒥᓂᖃᖅᑎᐅᔪᓂᓪᓗ ᖃᒥᙶᑎᑦᑎᓪᓗᑎᒃ ᐊᑐᙱᑦᑐᓂᒃ ᐃᑲᕐᕋᒧᑦ ᐊᑕᐅᓯᕐᒧᑦ ᐅᔾᔨᖅᓱᖅᐹᓪᓕᖅᑎᑦᑎᓇᓱᐊᕐᓗᑎᒃ ᐊᕙᑎᑦᑎᓐᓂ ᐊᑲᐃᓪᓕᐅᕈᑕᐅᔪᓂᒃ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐆᒻᒪᖅᑯᑎᑐᓗᐊᙱᓐᓂᕐᒥᓪᓗ.

ᐊᕙᑎᓕᕆᔨᒃᑯᑦ − ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᓕᕆᖃᑎᒌᖃᑦᑕᖅᐳᑦ ᓴᖅᑭᔮᖅᑎᑦᑎᓇᓱᒡᓗᑎᒃ ᐱᒻᒪᕆᐅᓂᖓᓂᒃ ᐆᒻᒪᖅᑯᑎᒥᒃ ᐊᑐᙱᓐᓂᖅᓴᐅᓂᕐᒥᒃ ᐊᖏᕐᕋᑦᑎᓐᓂ ᐊᒻᒪ ᓄᓇᓕᖕᓂ ᐆᒻᒪᖅᑯᑎᒥᒃ ᐊᑐᑦᑎᐊᕐᓂᕐᒧᑦ ᐱᓕᕆᐊᖑᑎᑕᐅᔪᒥᑦ.

ᒫᑦᓯ 20−ᒥᑦ 25−ᒧᑦ, 2023−ᒥᑦ, ᐃᓚᐅᖁᔨᕗᒍᑦ ᖃᐅᑕᒫᑦ ᐱᓕᕆᐊᓂᑦ ᐅᔾᔨᖅᓱᖅᐹᓪᓕᖅᑎᑦᑎᓂᕐᒥᑦ ᐆᒻᒪᖅᑯᑎᑐᓗᐊᙱᓐᓂᕐᒥᑦ, ᐆᒻᒪᖅᑯᑎᑐᓗᐊᙱᓐᓂᕐᒥᑦ ᐊᑐᓗᐊᙱᓐᓂᕐᒥᓪᓗ ᐆᒻᒪᖅᑯᑎᓂᑦ:

• ᑕᑯᓂᐊᕐᓗᒋᑦ ᐃᓄᖕᓄᑦ ᑐᓴᒐᒃᓴᓄᑦ ᕿᓪᓚᔾᔪᒐᕗᑦ ᐃᓕᑦᑎᒃᑲᓐᓂᕈᒪᒍᕕᑦ ᐆᒻᒪᖅᑯᑎᐅᑉ ᒥᒃᓵᓄᑦ.
• ᐆᒻᒪᖁᑎᓄᑦ ᐅᔾᔨᕈᓱᓕᖅᑎᑦᑎᖃᑕᐅᒋᑦ ᐊᑐᕐᓗᑎᑦ ᑕᖅᓴᓕᖕᒥᒃ ᐆᔭᐅᔭᕐᒥᑦ ᐱᖓᔪᐊᖑᓕᖅᐸᑦ.
• ᑎᑎᕋᕐᓗᑎᑦ ᓄᓇᕐᔪᐊᑉ ᐃᑲᕐᕋᖓᓂᑦ ᐅᓪᓗᕐᒥᑦ ᐱᒋᐊᓵᖅᑎᓪᓗᒋᑦ, ᐅᓪᓗᑐᐃᓐᓇᕐᒥᑦ, ᐃᓕᓐᓂᐊᕐᕕᖕᓂᑦ ᐃᖅᑲᓇᐃᔭᕐᕕᖕᒥᓪᓘᓐᓃᑦ.

ᐊᕙᑎᑦᑎᓐᓂᒃ ᑲᒪᑦᑎᐊᕐᓂᖅ ᐱᔾᔪᑎᒋᓪᓗᒍ, ᐊᕙᑎᓕᕆᔨᒃᑯᑦ ᑎᓕᐅᕆᕗᑦ ᓄᓇᕗᒥᐅᓂᒃ ᐃᑭᑦᑕᖅᑐᓂᒃ ᖃᒥᑦᑎᖃᑦᑕᖁᔨᓪᓗᑎᒃ ᓯᓚᐅᑉ ᐱᐅᔪᓐᓃᖅᐸᓪᓕᐊᓂᖓ ᑲᑦᑐᖓᔾᔫᒥᓂᐊᕐᒪᑦ, ᖁᓪᓕᕐᒥ ᐃᑯᒻᒪᓪᓗᑎᒃ, ᓇᑉᐸᖅᑕᓄᑦ ᐃᑯᒪᓗᑎᒃ ᐅᓐᓄᒍᒻᒥᑕᕐᓗᑎᒃ, ᐊᖅᓴᕐᓃᑦ ᖁᙱᐊᕐᓗᒋᑦ, ᐅᓂᒃᑳᑲᑕᓪᓗᑎᓪᓘᓐᓃᑦ ᐱᒻᒪᕆᐅᓂᖓᓂᒃ ᑲᒪᒋᔭᕆᐊᖃᕐᓂᖏᑦ ᐊᒃᑐᐊᔪᑦ ᓄᓇᒧᑦ ᐊᕐᕌᒍᒐᓵᓗᖕᓄᑦ ᐊᒡᒋᖅᑐᓄᑦ. 

ᑐᓴᖅᑕᐅᑎᓪᓗᒋᑦ ᐅᓂᒃᑲᐅᓯᑎᑦ ᖃᕆᑕᐅᔭᒃᑯᑦ ᐅᑯᐊ ᐊᑐᕐᓗᒋᑦ #EnergyWiseNU #EarthHourNU.

ᑐᑭᓯᒃᑲᓐᓂᕈᒪᒍᕕᑦ ᑕᒪᑐᒥᖓ ᓄᓇᐅᑉ ᐃᑲᕐᕋᖓᓄᑦ, ᐅᕗᙵᕐᓗᑎᑦ https://www.earthhour.org/.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓖᑲᓐ ᑖᒪᔅ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᑐᓴᐅᒪᑎᑦᑎᓂᕐᒧᑦ
ᐊᕙᑎᓕᕆᔨᒃᑯᑦ
867-975-7761
LThomas8@gov.nu.ca