You are here

ᓂᕈᐊᒐᒃᓴᓕᐅᖁᔨᓂᖅ ᑲᖏᕐᑑᒑᐱᖕᒧᑦ, ᑭᒻᒥᕈᑦ, ᐃᖃᓗᐃᑦ ᐊᒻᒪᓗ ᓴᓂᑭᓗᐊᕐᒧᑦ ᒥᕐᖑᐃᖅᓯᕐᕕᒃᑯᑦ ᑲᑎᒪᔨᕋᓛᒃᓴᖏᓐᓂᑦ

ᓄᕕᐱᕆ 29, 2022

ᑭᒃᑯᑐᐃᓐᓇᕐᓄᑦ ᑐᓴᒐᒃᓴᖅ
ᓂᕈᐊᒐᒃᓴᓕᐅᖁᔨᓂᖅ ᑲᖏᕐᑑᒑᐱᖕᒧᑦ, ᑭᒻᒥᕈᑦ, ᐃᖃᓗᐃᑦ ᐊᒻᒪᓗ ᓴᓂᑭᓗᐊᕐᒧᑦ ᒥᕐᖑᐃᖅᓯᕐᕕᒃᑯᑦ ᑲᑎᒪᔨᕋᓛᒃᓴᖏᓐᓂᑦ

ᓄᓇᕗᒻᒥ ᒥᕐᖑᐃᖅᓯᕕᖕᓂ ᖃᐅᔨᒪᔭᖃᖅᐱᑦ? ᐱᓕᕆᖃᑕᐅᔪᒪᖃᑦᑕᖅᐱᑦ ᐃᓄᐃᑦ ᐃᓕᖅᑯᓯᖏᓐᓂᒃ, ᐃᑦᑕᕐᓂᓴᓕᕆᓂᕐᒥᒃ, ᐅᕝᕙᓘᓐᓃᑦ ᐳᓚᕋᖅᑐᓕᕆᓂᕐᒥᒃ? ᐃᑲᔪᖃᑕᐅᔪᒪᕕᑦ ᐊᐅᓚᑕᐅᓂᖓᓂ ᐃᖃᓗᐃᑦ ᑰᖓᓄᑦ ᐊᒻᒪᓗ ᖃᐅᒻᒫᕐᕖᑦ ᓄᓇᕗᒻᒥᑦ ᒥᕐᖑᐃᖅᓯᕐᕕᖕᒧᑦ ᐃᖃᓗᖕᓂᑦ, ᐊᒡᒍᑦᑎᓐᓂ ᓄᓇᕗᒻᒥᑦ ᒥᕐᖑᐃᖅᓯᕐᕕᒃ ᑲᖏᕐᑑᒑᐱᖕᒥᑦ, ᑲᑕᓐᓂᓕᒃ ᓄᓇᕗᒻᒥᑦ ᒥᕐᖑᐃᖅᓯᕐᕕᒃ ᑭᒻᒥᕈᒻᒥ/ᐃᖃᓗᐃᑦ, ᐅᕝᕙᓘᓐᓃᑦ ᑭᙶᓗᒃ ᓄᓇᕗᑦ ᒥᕐᖑᐃᖅᓯᕐᕕᒃ ᓴᓂᑭᓗᐊᕐᒥᑦ?

ᐊᖏᕈᕕᑦ, ᐃᓂᖃᑐᐃᓐᓇᕆᐊᖃᖅᐳᑎᑦ ᓄᓇᓕᖕᓂ ᐸᕐᓇᐃᔩᑦ ᐊᐅᓚᑦᑎᔩᓪᓗ ᑲᑎᒪᔨᕋᓛᖏᓐᓂ. ᑖᒃᑯᐊ ᑲᑎᒪᔨᕋᓛᑦ ᐅᖃᐅᔾᔨᖃᑦᑕᖅᑐᑦ ᓄᓇᕗᒻᒥ ᒐᕙᒪᒃᑯᓐᓂ ᓇᐅᒃᑯᑐᐃᓐᓈᖅᑐᓅᖓᔪᓄᑦ ᐸᕐᓇᐃᔪᓂᒃ, ᐋᖅᑭᒃᓯᒪᓕᖅᑎᑦᑎᔪᓂᒃ, ᐊᐅᓚᑦᑎᔪᓂᒃ, ᐊᒻᒪ ᐊᐅᓚᑦᑎᔨᐅᖃᑕᐅᔪᓂᒃ ᑖᒃᑯᓇᓂ ᒥᕐᖑᐃᖅᓯᕐᕕᖕᓂ.

ᐃᕝᕕᓯᐅᑕᐅᖅᑰᔨᒋᒍᖕᓂ, ᑐᓂᓯᖁᔭᐅᒐᓗᐊᖅᐳᑎᑦ ᑐᒃᓯᕋᐅᒻᒥᒃ ᑕᑕᑎᕆᐊᓕᖕᒥᒃ ᐊᒻᒪᓗ ᑲᑎᒪᔨᐅᖃᑕᐅᓂᕐᒧᑦ ᐱᔪᒥᓴᐅᑎᒥᒃ ᑎᑎᕋᖅᑕᑎᓪᓗ ᖄᖓᓐᓂᒃ ᓇᓗᓇᐃᖅᓯᒪᓗᓂ ᖃᓄᐃᒻᒪᑦ ᐃᓱᒪᒋᔭᐅᔪᒪᖕᒪᖔᖅᐱᑦ. ᐱᓇᔫᑎᑦ ᑎᑎᕋᕐᕕᒃᓴᐃᑦ ᐊᑐᐃᓐᓇᐅᔪᑦ ᐊᕙᑎᓕᕆᔨᒃᑯᑦ ᐃᑭᐊᖅᑭᕕᖓᓐᓂ. 

ᐆᒃᑐᕐᓂᐊᕐᓗᑎᒃ ᐃᓕᑦᑎᒃᑲᓐᓂᕈᒪᒍᕕᓪᓘᓐᓃᑦ ᖃᐅᔨᒋᐊᕐᕕᒋᒍᑦ ᒫᑎᓴᓐ ᖁᐊᕋᖅ ᐅᕙᓂ  MQuaraq3@gov.nu.ca ᐅᖃᓗᒃᓗᑎᓪᓘᓐᓃᑦ 867-975-7784. ᐃᓱᓕᕝᕕᒃᓴᖓ ᑎᓯᐱᕆ 9, 2022-ᒥᑦ.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᐋᓕᒃᓵᑐᕆᐊ ᐅᐊᑉ
ᑐᓴᐅᒪᔪᓕᕆᔨᒃᑯᓐᓄᑦ ᐊᐅᓚᑦᑎᔨ, ᐃᓕᓐᓂᐊᕐᓂᕐᒧᑦ ᑐᓴᐅᒪᑎᑦᑎᔨᓄᓪᓗ
ᐊᕙᑎᓕᕆᔨᒃᑯᑦ
867-975-7761
AWebb6@gov.nu.ca