ᑐᙵᓱᒃᑎᑦᑎᓂᖓ ᒥᓂᔅᑕᕆᔭᐅᔫᑉ ᐊᕙᑎᓕᕆᓂᕐᒧᑦ

ᒥᓂᔅᑕ ᑕᐃᕕᑎ ᐊᕿᐊᕈᖅ

ᑕᐃᕕᑎ ᐊᕿᐊᕈᖅ ᓂᕈᐊᖅᑕᐅᓚᐅᖅᑐᖅ ᓂᕈᐊᕕᒡᔪᐊᖅᑎᓪᓗᒋᑦ ᐊᒃᑑᕙ 30, 2017-ᖑᑎᓪᓗᒍ, ᑭᒡᒐᖅᑐᐃᓂᐊᕐᓗᓂ ᓂᕈᐊᖅᑕᐅᒪᕕᖓᓐᓂ ᖁᑦᑎᒃᑑᑉ ᓂᕈᐊᖅᑕᐅᓪᓗᓂ ᑕᓪᓕᒪᒋᓕᖅᑕᖓᓂ ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ ᓄᓇᕗᒥ.

ᒥᔅᑐ ᐊᕿᐊᕈᖅ ᓂᕈᐊᖅᑕᐅᖃᑕᐅᓚᐅᖅᑐᖅ ᒥᓂᔅᑕᐃᑦ ᑲᑎᒪᔨᖏᓐᓄᑦ ᓄᕕᐱᕆ 17, 2017−ᒥ, ᓄᓇᕗᒻᒥ ᓯᕗᒃᑲᖅᑕᖅᑎᒃᓴᑦ ᓂᕈᐊᖅᑕᐅᓕᖅᑎᓪᓗᒋᑦ. ᒥᓂᔅᑕ ᐊᕿᐊᕈᖅ ᐊᖏᖅᑎᑕᐅᓕᓚᐅᖅᑐᖅ ᒥᓂᔅᑕᖃᕐᕕᖕᒧᑦ ᓄᕕᐱᕆ 21, 2017−ᖑᑎᓪᓗᒍ. ᒥᓂᔅᑕᐅᔪᖅ ᑮᓇᐅᔭᓕᕆᓂᕐᒧᑦ, ᒥᓂᔅᑕᐅᓪᓗᓂᓗ ᐃᖅᑲᓇᐃᔭᖅᑏᑦ ᐊᑦᑕᓇᔾᔭᐃᖅᓯᒪᓂᖏᓐᓄᑦ ᑮᓇᐅᔾᔭᒃᓵᖏᓐᓄᓪᓗ ᑲᒥᓴᒧᑦ, ᒥᓂᔅᑕᐅᖕᒥᔪᖅ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᑲᑎᒪᔨᖏᓐᓄᑦ ᐊᒻᒪ ᒥᓂᔅᑕᐅᒋᓪᓗᓂ ᐃᒥᐊᓗᖕᓂᒃ ᓚᐃᓴᑖᖅᑎᑦᑎᔨᖏᑦᑕ ᑲᑎᒪᔨᖏᓐᓄᑦ.

ᒥᔅᑕ ᐊᕿᐊᕈᖅ ᐱᕈᖅᓯᒪᔪᖅ ᐊᐅᓱᐃᑦᑐᕐᒥ, ᑲᓇᑕᐅᑉ ᓄᓇᖁᑎᖏᓐᓂ ᖁᕝᕙᓯᖕᓂᖅᐹᖑᔪᖅ ᓄᓇᓕᖕᓂ. ᐅᓄᑲᓪᓚᒃᑐᓂᒃ ᐊᔾᔨᒌᖏᑦᑐᓂ ᐃᖅᑲᓇᐃᔭᖃᑦᑕᖅᓯᒪᔪᖅ, ᐱᖃᓯᐅᑎᓪᓗᒍ ᐊᖓᔪᖅᑳᖑᓂᕐᒧᑦ ᑎᒃᑯᐊᖅᑕᐅᓯᒪᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᓐᓄᑦ. ᑖᒃᑯᐊ ᐱᖃᓯᐅᔾᔨᓯᒪᕗᑦ ᐅᑯᓂᖓ ᐊᖓᔪᖅᑳᖑᓪᓗᓂ ᐋᔩᖅᑐᓄᑦ ᐱᓕᕆᐊᒃᓴᓂᒃ ᑎᒍᓯᕙᓪᓕᐊᓂᕐᒧᑦ ᒐᕙᒪᑐᖃᒃᑯᓐᓂᑦ, ᑐᖏᓕᕆᓯᒪᔭᖓ ᒥᓂᔅᑕᐅᑉ ᐱᓕᕆᕕᖓᓐᓄᑦ ᓄᓇᓕᖕᓄᑦ ᒐᕙᒪᒃᑯᓐᓄᓪᓗ ᐱᔨᑦᓯᖅᑎᒃᑯᓐᓄᑦ, ᑐᖏᓕᕆᓯᒪᔭᖓ ᒥᓂᔅᑕᐅᑉ ᐱᓕᕆᕕᖓᓐᓄᑦ ᐊᕙᑎᓕᕆᔨᒃᑯᑦ ᐊᒻᒪᓗ ᑐᖏᓕᕆᓯᒪᔭᖓ ᒥᓂᔅᑕᐅᑉ ᐊᐅᓚᑦᓯᔨᒃᑯᓐᓄᑦ ᐊᒻᒪᓗ ᑎᑎᕋᖅᑎᐅᖃᑦᑕᖅᓯᒪᔪᖅ ᒥᓂᔅᑕᐃᑦ ᑲᑎᒪᔨᖏᓐᓄᑦ.

ᒥᔅᑕ ᐊᕿᐊᕈᖅ ᓄᓇᓕᖕᓂ ᐊᑭᓕᖅᓱᖅᑕᐅᒐᓂ ᐱᓕᕆᖃᑦᑕᖅᓯᒪᔪᖅ ᕿᓂᖅᑎᓄᑦ ᐸᖅᓴᐃᔨᓄᑦ ᐊᒻᒪ ᑲᑎᒪᔨᐅᖃᑦᑕᖅᓯᒪᔪᖅ ᐊᐅᓱᐃᑦᑐᕐᒥᐅᑦ ᐊᐃᕕᖅ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᓐᓄᑦ.

ᒥᔅᑕ ᐊᕿᐊᕈᖅ ᖁᕕᐊᒋᔭᖃᖅᑐᖅ ᐊᖑᓇᓱᖕᓂᕐᒥᒃ ᐊᒻᒪᓗ ᐃᖃᓗᒐᓱᐊᕐᓂᕐᒥᒃ.

ᑕᐃᕕᑎ ᐊᒻᒪᓗ ᑭᐅᕈ ᐊᕿᐊᕈᖅ ᐅᐱᒍᓱᑦᑎᐊᖅᑑᒃ ᐅᑯᓂᖓ ᕿᑐᕐᖓᖏᓐᓂᒃ ᐊᐃᒥ, ᑯᕆᔅᑏᓐ, ᒐᒪᐃᓕ, ᕼᐅᑉ, ᒥᓂ, ᐱᓃᓇ ᐊᒻᒪᓗ ᓵᒻᓴᓐ.