ᐅᖃᓚᐅᑎᓯᐅᑏᑦ

You are here

ᑎᓴᒪᑦ ᐊᑐᖅᑕᐅᕙᓪᓕᐊᕙᒃᑐᑦ ᓂᕿᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᑦ

ᐊᒃᑐᐸ 09, 2018

ᒐᕙᒪᒃᑯᓐᓂᑦ ᐃᓄᖕᓄᑦ ᑐᓴᒐᒃᓴᖅ

ᑎᓴᒪᑦ ᐊᑐᖅᑕᐅᕙᓪᓕᐊᕙᒃᑐᑦ ᓂᕿᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᐃᑎᑦᑎᔪᒪᕗᑦ ᑭᒃᑯᑐᐃᓐᓇᓂᒃ ᐱᒻᒪᕆᐊᓘᓂᖓᓂᒃ ᓂᕿᒧᑦ ᖁᐊᖅᓵᕐᓇᖅᑕᐃᓕᒪᕙᖕᓂᖅ ᑕᒪᑐᒪᓂ ᖁᔭᓕᓐᓇᒧᑦ ᐱᓇᓱᐊᕈᓯᐅᑉ ᓄᙳᒋᔭᖓᓂ.

ᐅᕝᕙ ᑎᓴᒪᐃᑦ ᐊᔪᕐᓇᙱᑦᑐᑦ ᐊᑐᖅᑕᐅᔪᓐᓇᖅᑐᑦ ᑲᒪᒋᔭᖃᕐᓂᐊᕐᓗᓂ ᓂᕿᒥᒃ ᑲᒪᒋᑦᑎᐊᕐᓗᒍ:

ᐅᐊᓴᕐᓂᖅ:

  • ᐊᒡᒐᑎᑦ ᐅᐊᓴᕐᓗᒋᑦ ᐅᐊᓴᐅᑎᒧᑦ ᐆᓇᔪᒃᑐᒥ ᐃᒪᕐᒥ ᓂᕿᓕᕆᓚᐅᙱᓐᓂᕐᓂ ᓂᕿᓕᕆᐊᓂᒃᓯᒪᓕᕈᕕᓪᓗ.
  • ᓴᓗᒻᒪᖅᓴᕐᓗᒋᑦ ᖁᐱᕐᕈᓄᓪᓗ ᑐᖁᓴᐃᔾᔪᑎᓅᕐᓗᒋᑦ ᐊᒡᒍᐃᕝᕖᑦ ᓂᕿᓄᑦ, ᑭᐳᐃᑦ ᖄᖏᑦ ᓂᕿᓕᐅᕈᑏᓪᓗ.
  • ᐅᐊᓴᕐᓗᒋᑦ ᓄᑖᑦᑎᐊᑦ ᓰᕐᓇᖅᑐᑦ ᓰᕐᓇᙱᑦᑐᓪᓗ ᐱᕈᖅᑐᕕᓃᑦ ᐱᓕᕆᐊᕆᓚᐅᙱᓐᓂᕐᓂ ᓂᕆᔭᐅᓚᐅᙱᓐᓂᖏᓐᓂᓗ.

 ᐊᕕᒃᑐᕐᓗᒋᑦ:

  • ᑕᒪᒃᑯᐊ ᒥᑭᒐᐃᑦ ᓂᖀᑦ, ᐊᕿᒡᒋᖅᔪᐊᓂᙶᖅᑐᑦ, ᐃᒪᕐᒥᐅᑕᐃᑦ ᐃᔅᓯᖏᓪᓗ ᐊᕕᒃᑐᖅᓯᒪᕙᒡᓗᒋᑦ
  • ᐃᓕᓯᓚᐅᖅᓯᒪᔾᔮᙱᓚᑎᑦ ᐆᓯᒪᔪᓂᒃ ᓂᕿᓂᒃ ᐅᐊᓴᖅᓯᒪᙱᑦᑐᓄᑦ ᓂᕐᕆᓯᓄᑦ.
  • ᐊᑐᖅᐸᒡᓗᑎᑦ ᐊᓯᖏᓐᓂᒃ ᐊᒡᒍᐃᕝᕕᖕᓂᒃ , ᐊᒡᒍᐃᕝᕕᖕᒥᒃ ᐱᕈᖅᑐᕕᓂᕐᓄᑦ ᓄᓇᒥᙶᖅᑐᓄᓪᓗ ᐱᕈᖅᑐᓄᑦ, ᐊᓯᐊᓂᒡᓗ ᐊᒡᒍᐃᕝᕕᖃᖅᐸᒡᓗᑎᑦ ᓂᕿᒧᑦ ᒥᑭᒐᕐᒧᑦ, ᑎᖕᒥᐊᓄᑦ ᐃᒪᕐᒥᐅᑕᓄᓪᓘᓐᓃᑦ ᓂᕆᔭᐅᕙᒃᑐᓄᑦ.

 ᐃᒐᓂᖅ:

  • ᐃᒐᓗᒋᑦ ᓂᖀᑦ ᐆᓐᓇᕐᓂᖃᕐᓗᑎᒃ ᑐᖁᕋᐃᓪᓚᕆᒍᓐᓇᖅᑐᒥᒃ ᖁᐊᖅᓵᕐᓇᕈᓐᓇᖅᑐᓂᒃ ᖁᐱᕐᕈᕋᓛᓂᒃ:
    • ᐃᒻᒧᒃᓯᐅᒐᓂᙶᖅᑐᑦ, ᑰᑰᓯᓂᙶᖅᑐᑦ ᓰᐱᙵᙶᖅᑐᓪᓗ: 71°C (160°F)
    • ᐊᕿᒡᒋᕐᔪᐊᑦ ᐊᒻᒪᓗ ᐊᕿᒡᒋᕐᔪᐊᖑᓂᖅᓴᐃᑦ 85°C (185°F)
    • ᐃᖃᓗᐃᑦ ᐊᒻᒪᓗ ᐅᕕᓗᐃᑦ/ᐊᒻᒨᒪᔪᐃᑦ: 74°C (165°F)
    • ᐊᒥᐊᒃᑯᒋᔭᐅᔪᑦ ᐊᓕᒍᕐᒥᓗ ᓂᕿᓕᐅᖅᑕᐅᓯᒪᔪᑦ 74°C (165°F)
  • ᑎᖕᒥᐊᑦ, ᒪᓐᓂᓖᑦ ᓂᕆᔭᒃᓴᐃᑦ ᐊᓕᒍᕐᒥ ᐆᑕᐅᔪᑦ ᐊᒥᐊᒃᑯᐃᓪᓗ ᐆᑕᐅᖏᓐᓇᔭᕆᐊᖃᖅᐳᑦ ᐆᓇᖅᓯᖅᑎᖅᑕᐅᒃᑲᓐᓂᓗᑎᒡᓘᓐᓃᑦ ᖁᐱᕐᕈᐃᑦ ᑐᖁᑎᑦᑐᒪᓪᓗᒋᑦ.
  • ᐆᑦᑎᐊᕐᓗᒋᑦ ᓯᖃᓪᓕᓯᒪᔪᑦ ᓂᖀᑦ ᑭᓯᐊᓂ ᐃᔅᓯᖏᑦ ᐃᓱᕈᓐᓃᖅᐸᑕ.
  • ᒥᓯᕋᐃᑦ, ᖃᔪᒃᓴᐃᑦ ᖃᔪᐃᓪᓗ ᖃᓛᖅᑎᑉᐸᒡᓗᒋᑦ ᐆᓇᓯᖅᑎᖅᑕᐅᒃᑲᓐᓂᓕᕌᖓᑕ.

 ᓂᒡᓕᑦᑎᕐᓗᒍ:

  • ᓂᕿᓂᒃ ᐃᒡᓗᕈᓯᐅᑉ ᐆᓇᕐᓂᖓᓃᑎᑦᑎᖃᑦᑕᙱᓪᓗᓂ ᖁᐊᖅᓵᕐᓇᖅᑐᓂᒃ ᖁᐱᕐᕈᓂᒃ ᐱᕈᕐᕕᐅᖁᓇᒋᑦ.
  • ᓂᖀᑦ ᓱᕈᑐᐃᓐᓇᕆᐊᓖᑦ ᓂᒡᓕᓇᖅᑐᒃᑯᕕᖕᒧᐊᓯᑲᐅᑎᒋᕙᒡᓗᒋᑦ ᖁᐊᒃᑯᕕᖕᒧᓪᓘᓐᓃᑦ ᓂᐅᕕᖅᑕᐅᕌᓂᒃᓯᓕᑐᐊᕌᖓᑕ.
  • ᓂᖀᑦ ᐊᐅᒃᓯᖅᐸᒡᓗᒋᑦ ᓂᒡᓕᓇᖅᑐᒃᑯᕕᖕᒥ 4°C−ᒥ, ᐅᕝᕙᓘᓐᓃᑦ ᓂᒡᓕᓇᖅᑐᒧᑦ ᐃᒪᕐᒧᑦ ᑯᕕᑎᑕᐅᔪᒧᑦ (ᐊᐅᒃᓰᓃᖅ ᓂᒡᓕᓇᖅᑐᒃᑯᕕᖕᒥ ᐅᓪᓘᖕᓄᑦ ᒪᕐᕉᖕᓅᑐᐃᓐᓇᕆᐊᖃᖅᐳᖅ ᐊᐅᑦᑎᐊᖁᓗᒍ, ᑕᐃᒪᐃᓐᓂᖓᓄᓪᓗ ᐱᕙᒌᔭᖅᓯᒪᕙᒌᕐᓂᖅ ᐱᒻᒪᕆᐊᓘᕗᖅ). ᐊᐅᒃᓰᓚᐅᖅᓯᒪᔾᔮᙱᓚᑎᑦ ᐃᒡᓗᕈᓯᐅᑉ ᐆᓇᕐᓂᖓᓂ.
  • ᓂᒡᓕᓇᖅᑐᒃᑯᕕᖕᒧᐊᖅᐸᒡᓗᒋᑦ ᖁᐊᖅᑎᑉᐸᒡᓗᒋᓪᓘᓐᓃᑦ ᓱᕈᔭᑦᑐᑦ ᓂᖀᑦ ᐋᖅᑭᒃᓱᖅᓯᒪᕙᒌᖅᑐᓪᓘᓐᓃᑦ ᓂᖀᑦ (ᓲᑉᓗ ᓂᕿᓕᐅᕐᕕᖕᓂ ᐊᓐᓂᔾᔭᐅᕙᒃᑐᑦ ᐊᒥᐊᒃᑯᐃᓪᓗ) ᐃᑲᕐᕌᒃ ᒪᕐᕉᒃ ᐃᓗᐊᓂ.

ᑐᑭᓯᒋᐊᒃᑲᓐᓂᕈᒪᔪᖃᕈᓂ, ᐅᖄᓚᕕᐅᔪᓐᓇᖅᑐᑦ ᐊᕕᒃᑐᖅᓯᒪᔪᓂᒃ ᐊᕙᑎᖃᑦᑎᐊᕋᓱᐊᖅᑐᓕᕆᔨᒃᑯᑦ ᐱᓕᕆᔨᖓᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᒐᕕᓐ ᓴᑦᑕᓐ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
gsutton@gov.nu.ca