ᐅᖃᓚᐅᑎᓯᐅᑏᑦ

You are here

ᓴᓂᑭᓗᐊᕐᒥ ᐱᖦᓚᙱᓴᖅᑐᖃᕋᓱᒋᓐᓈᔪᑦ/ᓯᖏᖅᓯᒪᓇᓱᒋᓐᓈᔪᑦ

ᐄᐳᕈ 24, 2018

ᐃᓄᐃᑦ ᐋᓐᓂᐊᓕᖁᔭᐅᙱᖦᖢᑎᒃ ᑐᓴᖅᑕᐅᔪᒃᓴᖅ

ᓴᓂᑭᓗᐊᕐᒥ ᐱᖦᓚᙱᓴᖅᑐᖃᕋᓱᒋᓐᓈᔪᑦ/ᓯᖏᖅᓯᒪᓇᓱᒋᓐᓈᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓂᑭᓗᐊᕐᒥᐅᓂᒃ ᑐᓴᖁᔨᕗᑦ ᑎᕆᒐᓂᐊᒡᒎᖅ ᕿᒻᒥᕐᓂᒃ ᑮᓯᒋᐊᖃᑦᑕᕐᓂᕋᖅᑕᐅᖕᒪᑕ ᓄᓇᓕᖕᓂ ᐱᖦᖤᙱᓴᕋᓱᒋᔭᐅᔪᓂᒃ/ᓯᖏᖅᓯᒪᓇᓱᒋᔭᐅᔪᓂᒃ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ ᑎᕆᒐᓂᐊᕐᒧᑦ ᕿᒻᒥᕐᒧᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᖃᓄᐃᓕᐅᖅᑕᐅᓂᕆᔭᐃᓪᓗ ᐅᖃᐅᓯᕆᑲᐅᑎᒋᓗᒍ. ᐃᓅᓕᓴᖅᑕᐅᓯᑲᐅᑎᒋᒋᐊᓕᒃ. ᐆᒪᔪᒥᒃ ᑕᑯᒍᕕᑦ ᐃᓕᖅᑯᓯᖅᓱᙱᑦᑐᒥᒃ, ᐅᕐᕈᔮᖅᑐᒥᒃ, ᖃᓂᐊᒍᑦ ᖃᐳᐊᒃᑐᒥᒃ, ᐊᓂᖅᓵᖅᑐᒡᒐᖅᑐᒥᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᔪᒥᒃ, ᓱᖁᑎᒋᑦᑕᐃᓕᒍᒃ ᐅᖃᐅᓯᕆᓗᒍᓗ ᐆᒪᔪᕐᓂᐊᖅᑎᒧᑦ.

ᑎᕆᒐᓂᐊᖅ ᓂᐊᖅᑭᕆᒐᓗᐊᖅᐸᑦ ᐅᓇᖅᑰᔨᔪᓐᓇᖅᐳᖅ. ᓄᑕᖅᑲᑦ ᐱᙳᐊᖃᑎᖃᕆᐊᖃᙱᑦᑐᑦ ᑎᕆᒐᓂᐊᓂᒃ ᐊᓯᖏᓐᓂᒡᓘᓐᓃᑦ ᐆᒪᔪᓂᒃ. ᕿᒻᒦᑦ ᓯᓚᒥᐅᑕᑦ ᐃᐱᖅᓯᒪᑏᓐᓇᕐᓗᒋᑦ, ᖃᐅᔨᓴᖅᐸᒡᓗᒋᓪᓗ ᐱᐅᓯᖏᑦ ᐊᓯᔾᔨᙱᒃᑲᓗᐊᕐᒪᖔᑕ ᐊᒻᒪ ᐱᖦᖤᙱᓴᓕᙱᒃᑲᓗᐊᕐᒪᖔᑕ.

ᑎᕆᒐᓂᐊᑦ ᐊᒻᒪ ᐊᒪᕈᐃᑦ ᐱᖦᖤᙱᓴᓲᖑᕗᑦ/ᓯᖏᖅᓯᒪᓲᖑᕗᑦ ᓄᓇᕗᒻᒥ, ᓯᐊᒻᒪᒃᑎᕈᓐᓇᖅᖢᑎᒡᓗ ᕿᒻᒥᓄᑦ ᑮᔭᐅᓐᓂᕌᖓᑕ ᐱᖦᖤᙱᓴᖅᑐᒧᑦ/ᓯᖏᖅᓯᒪᔪᒧᑦ ᑎᕆᒐᓂᐊᒧᑦ ᐅᕝᕙᓘᓐᓃᑦ ᐊᒪᖅᑯᒧᑦ. ᐃᓄᐃᑦ ᐱᖦᖤᙱᓴᖅᑐᒧ/ᓯᖏᖅᓯᒪᔪᒧᑦ ᑮᔭᐅᓐᓂᖅᐸᑕ, ᑕᓪᓕᒃᑕᐅᓐᓂᖅᐸᑕ ᐅᕝᕙᓘᓐᓃᑦ ᐊᓗᐱᖅᑕᐅᓐᓂᖅᐸᑕ ᐊᐃᑦᑐᕐᓗᒡᕕᐅᔪᓐᓇᖅᑐᑦ. ᐃᓄᖕᒥ ᐱᖦᖤᙱᓴᖅᑐᖃᓕᕈᓐᓇᕐᒥᔪᖅ ᐱᖦᖤᙱᓴᖅᑐᕕᓂᐅᑉ ᐊᒥᐊᓂᒃ ᐊᒥᓕᕆᔪᖃᕐᓂᖅᐸᑦ, ᑭᓪᓕᖃᕐᓗᓂ.

ᑕᑯᒍᕕᑦ ᑎᕆᒐᓂᐊᒥᒃ ᐊᒪᖅᑯᒥᒡᓘᓐᓃᑦ ᓄᓇᓕᖕᓂᑦ, ᕿᒻᒦᓪᓘᓐᓃᑦ ᐊᐳᖅᑕᐅᓯᒪᒃᐸᑦ ᑎᕆᒐᓐᓂᐊᒧᑦ ᐊᒪᖅᑯᒧᓪᓘᓐᓃᑦ, ᐆᒪᔪᓕᕆᔨᒧᑦ ᐅᖃᓗᑲᐅᑎᒋᓗᑎᑦ ᐅᕗᖓ 867-266-8098 ᐊᕕᒃᑐᖅᓯᒪᔪᓂᑦ ᐊᕙᑎᓕᕆᔨᒧᓪᓘᓐᓃᑦ ᐅᕗᖓ 867-645-8071.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᔪᐊᑕᓐ ᑯᓐᓂᖅ
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
jkonek@gov.nu.ca