ᐅᖃᓚᐅᑎᓯᐅᑏᑦ

You are here

ᐱᖓᓱᓂᒃ ᓄᑖᓂᑦ ᓄᕙᒃᔪᐊᕐᓇᖅ-19−ᒧᑦ ᐱᑕᖃᓕᕐᐳᖅ ᐊᕐᕕᐊᓂ

ᕕᕝᕗᐊᓕ 11, 2021

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ

ᐱᖓᓱᓂᒃ ᓄᑖᓂᑦ ᓄᕙᒃᔪᐊᕐᓇᖅ-19−ᒧᑦ ᐱᑕᖃᓕᕐᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 11, 2021) − ᐅᓪᓗᒥ, ᓄᓇᕗᑦ ᐱᖓᓱᓂᒃ ᓇᓗᓇᐃᖅᑕᐅᓯᒪᓪᓚᑦᑖᖅᑐᓂᑦ ᓄᕙᒃᔪᐊᕐᓇᖅ-19−ᖃᕐᓂᖏᓐᓂᒃ. 9-ᖑᕗᑦ ᓇᓗᓇᐃᖅᑕᐅᓯᒪᕗᑦ ᓄᕙᒡᔪᐊᕐᓇᓖᑦ ᓄᓇᕗᒻᒥ, ᑕᒪᕐᒥᒡᓗ ᐊᕐᕕᐊᒦᖦᖢᑎᒃ.

“ᓱᕋᒍᓐᓇᑕᐃᓐᓇᕋᔭᖅᐸᕗᑦ ᓇᒧᙵᖅᑎᑕᐅᕙᓪᓕᐊᓂᖓ ᓄᕙᒡᔪᐊᕐᓇᖅ-19 ᐊᑐᐃᓐᓇᖅᐸᒡᓗᑕ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ, ᐊᔪᕐᓇᙱᓐᓂᓕᒫᖓᒍᑦ ᐊᖏᕐᕋᖅᓯᒪᕙᒡᓗᑕ ᐊᑐᖅᐸᒡᓗᑕᓗ ᒪᑐᐊᓂᒃ,” ᑕᐃᒪᓐᓇ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥᐅᖅ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ ᐅᖃᖅᖢᓂ. “ᑎᓕᐅᖅᐸᒃᑲ ᐊᕐᕕᐊᕐᒥᐅᑦ ᓴᙲᓐᓇᖁᓪᓗᒋᑦ ᑕᐅᑐᒐᖃᐃᓐᓇᖁᓪᓗᒋᓪᓗ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᑕᒪᕐᒥᑦᑎᐊᖅ ᓄᓇᓕᖕᒥᐅᑦ. ᐱᓕᕆᖃᑎᒌᒡᓗᑕ, ᓄᖅᑲᖅᑎᑦᑎᓂᐊᖅᐳᒍᑦ ᓯᐊᒻᒪᒃᐸᓪᓕᐊᓂᖓᓂᒃ ᑕᒪᑐᒪ ᓄᕙᒡᔪᐊᕐᓇᖅ-19,"

ᑕᒪᕐᒥᑦᑎᐊᖅ ᑕᐃᒃᑯᐊ ᐃᓄᐃᑦ ᖃᓄᐃᙱᑉᐳᑦ, ᐅᐸᒃᑕᐅᑦᑕᐃᓕᒪᓪᓗᑎᒡᓗ ᐊᖏᕐᕋᒥᓂ ᐊᐴᑎᖃᑎᖃᖅᓯᒪᓂᕐᒧᓪᓗ ᑐᔾᔭᖅᓯᕙᓪᓕᐊᓂᖅ ᑲᔪᓰᓐᓇᖅᖢᓂ. ᕕᕗᐊᕆ 11−ᖑᓚᐅᕐᓂᖓᓂᑦ, ᐊᕐᕕᐊᕐᒥ ᖃᐅᔨᓴᖅᓯᓂᖅ ᓴᖅᑭᑎᑦᑎᓯᒪᕗᖅ 1952−ᓂᒃ ᐱᑕᖃᙱᓐᓂᕋᐃᔪᓂᒃ ᖃᐅᔨᓴᕐᓂᕐᓂᒃ.

ᓄᓇᕗᒻᒥᑦ ᑐᐊᕕᕐᓇᖅᑐᓕᕆᔨᒃᑯᖏᑦ ᐃᑲᔪᖅᑐᐃᔪᑦ ᓄᓇᓕᖕᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᒌᒃᑯᖏᓐᓂᑦ. ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 12-ᒥ ᐱᒋᐊᕐᓗᓂ ᐃᓄᖕᓄᑦ ᐊᒃᑐᐊᑲᑕᖁᔭᐅᙱᑦᑐᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ. ᖃᐅᔨᒋᐊᖁᔭᐅᕗᑦ ᐋᓐᓂᐊᕕᖏᓐᓄᑦ ᐃᖃᓗᖕᓂᓪᓘᓐᓃᑦ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᕐᓂᐊᕐᓗᑎᒃ ᖃᐅᔨᓇᓱᖕᓂᖕᓂᑦ ᖃᐅᔨᓴᕐᓂᖕᓂᓪᓗ. ᑎᑭᑦᑐᖃᕈᓐᓇᙱᑦᑐᖅ ᐊᐅᓪᓚᖅᑐᖃᕈᓐᓇᕋᓂᓗ ᐊᕐᕕᐊᓂᑦ ᓱᓕ, ᑭᓯᐊᓂ ᑐᐊᕕᖕᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.

ᑲᐱᔭᐅᖃᑦᑕᕐᓇᓛᕐᑐᑦ ᐊᐃᑉᐸᖓᓂ ᐊᕐᕕᐊᓂ ᕕᕗᐊᕆ 10−ᒥᑦ-13−ᒧᑦ. ᐊᕐᕕᐊᒥᐅᑦ ᓯᕗᓪᓕᕐᒥᑦ ᑲᐱᔭᐅᓚᐅᙱᑦᑐᑦ ᑲᐱᔭᐅᔪᒪᓗᑎᒃᓗ ᐅᖃᓗᒍᓐᓇᕐᑐᑦ ᐋᓐᓂᐊᕕᖕᒧᑦ ᐃᓂᒃᓴᓕᐅᕐᕕᒃᓴᒥᓄᑦ. ᓯᕗᓪᓕᐅᔾᔭᐅᓂᐊᕐᑐᑦ ᐊᐃᑉᐸᖏᓐᓂᑦ ᑲᐱᔭᐅᕕᒃᓴᓖᑦ.

ᑭᓇᑐᐃᓐᓇᑦᑎᐊᖅ ᐅᒃᐱᕆᔭᖃᖅᑐᖅ ᓵᑦᑎᐊᕐᒥᐅᑕᖃᖅᓯᒪᓂᕐᒥᓂᒃ ᓄᕙᒡᔪᐊᕐᓇᖅ−19-ᒧᑦ ᐅᖃᐅᔾᔭᐅᕗᖅ ᐅᖄᓚᖁᔭᐅᓪᓗᓂ ᓄᕙᕐᔪᐊᕐᓇᖕᒧᑦ−ᐅᖄᓚᕝᕕᐅᔪᓐᓇᖅᑐᒥᐅᕙᓂ 1-888-975-8601 10 −ᓗ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖏᓐᓂ, ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path.

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca