ᐅᖃᓚᐅᑎᓯᐅᑏᑦ

You are here

ᐱᖦᖤᙱᓴᖅᑐᖃᕋᓱᒋᔭᐅᔪᖅ ᓴᓪᓕᕐᒥ

ᓄᕕᐱᕆ 23, 2018

ᐃᓄᐃᑦ ᐋᓐᓂᐊᓕᖁᔭᐅᙱᖦᖢᑎᒃ ᑐᓴᖅᑕᐅᔪᒃᓴᖅ

ᐱᖦᖤᙱᓴᖅᑐᖃᕋᓱᒋᔭᐅᔪᖅ ᓴᓪᓕᕐᒥ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓪᓕᕐᒥᐅᓂᒃ ᑐᓴᖁᔨᕗᑦ ᑎᕆᒐᓐᓂᐊᒥᒃ ᓄᓇᓕᖕᓂ ᕿᒻᒥᕐᒥᒃ ᐹᔪᖃᕐᓂᕐᒪᑦ ᐱᖦᖤᙱᓴᕋᓱᒋᔭᐅᓪᓗᓂᓗ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ ᑎᕆᒐᓐᓂᐊᒧᑦ ᕿᒻᒥᕐᒧᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᐅᖃᐅᓯᕆᓗᒍᓗ ᖃᓄᐃᑕᐅᓂᕆᖅᑲᐅᔭᑦ ᐃᕐᖐᓐᓇᖅ. ᖃᓄᐃᑦᑐᒪᙱᒃᑯᕕᑦ, ᐃᓅᓕᓴᖅᑕᐅᓯᑲᐅᑎᒋᔭᕆᐊᖃᖅᐳᑎᑦ. ᐆᒪᔪᒥᒃ ᑕᑯᒍᕕᑦ ᐃᓕᖅᑯᓯᖅᓱᙱᑦᑐᒥᒃ, ᐅᕐᕈᔮᖅᑐᒥᒃ, ᖃᓂᐊᒍᑦ ᖃᐳᐊᒃᑐᒥᒃ, ᐊᓂᖅᓵᖅᑐᒡᒐᖅᑐᒥᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᔪᒥᒃ, ᓱᖁᑎᒋᑦᑕᐃᓕᒍᒃ ᐅᖃᐅᓯᕆᓗᒍᓗ ᐆᒪᔪᕐᓂᐊᖅᑎᒧᑦ.

ᑎᕆᒐᓐᓂᐊᖅ ᓂᐊᖅᑭᕆᒐᓗᐊᖅᐸᑦ ᐅᓇᖅᑰᔨᔪᓐᓇᖅᐳᖅ. ᓄᑕᖅᑲᑦ ᐱᙳᐊᖃᑎᖃᕆᐊᖃᙱᑦᑐᑦ ᑎᕆᒐᓐᓂᐊᓂᒃ ᐊᓯᖏᓐᓂᒡᓘᓐᓃᑦ ᐆᒪᔪᓂᒃ. ᕿᒻᒦᑦ ᓯᓚᒥᐅᑕᑦ ᐃᐱᖅᓯᒪᑏᓐᓇᕐᓗᒋᑦ, ᖃᐅᔨᓴᖅᐸᒡᓗᒋᓪᓗ ᐱᐅᓯᖏᑦ ᐊᓯᔾᔨᙱᒃᑲᓗᐊᕐᒪᖔᑕ ᐊᒻᒪ ᐱᖦᖤᙱᓴᓕᙱᒃᑲᓗᐊᕐᒪᖔᑕ.

ᐱᖦᖤᙱᓴᖅᑐᖅᓯᐊᕆᔭᐅᓲᑦ ᑎᕆᒐᓐᓂᐊᑦ ᐊᒻᒪ ᐊᒪᖅᑯᑦ ᓄᓇᕗᒻᒥ, ᐱᖦᖤᙱᓴᓕᕈᓐᓇᕐᒥᔪᑦ ᕿᒻᒦᑦ ᑮᔭᐅᔪᑦ ᐱᖦᖤᙱᓴᖅᑐᒧᑦ ᑎᕆᒐᓐᓂᐊᒧᑦ ᐅᕝᕙᓘᓐᓃᑦ ᐊᒪᖅᑯᒧᑦ. ᐃᓄᐃᑦ ᐱᖦᖤᙱᓴᓕᕈᓐᓇᕐᒥᔪᑦ ᑮᔭᐅᓐᓂᖅᐸᑕ, ᑕᓪᓕᒃᑕᐅᓐᓂᖅᐸᑕ ᐊᓗᐱᖅᑕᐅᓐᓂᖅᐸᑕᓘᓐᓃᑦ ᐱᖦᖤᙱᓴᖅᑐᒧᑦ. ᐃᓄᖕᒥ ᐱᖦᖤᙱᓴᖅᑐᖃᓕᕈᓐᓇᕐᒥᔪᖅ ᐱᖦᖤᙱᓴᖅᑐᕕᓂᐅᑉ ᐊᒥᐊᓂᒃ ᐊᒥᓕᕆᔪᖃᕐᓂᖅᐸᑦ, ᑭᓪᓕᖃᕐᓗᓂ.

ᑕᑯᒍᕕᑦ ᑎᕆᒐᓐᓂᐊᒥᒃ ᐊᒪᖅᑯᒥᒡᓘᓐᓃᑦ ᓄᓇᓕᖕᓂᑦ, ᕿᒻᒦᓪᓘᓐᓃᑦ ᐊᐳᖅᑕᐅᓯᒪᒃᐸᑦ ᑎᕆᒐᓐᓂᐊᒧᑦ ᐊᒪᖅᑯᒧᓪᓘᓐᓃᑦ, ᐆᒪᔪᓕᕆᔨᒧᑦ ᐅᖃᓗᑲᐅᑎᒋᓗᑎᑦ ᐅᕗᖓ 867-925-8823 ᐊᕕᒃᑐᖅᓯᒪᔪᓂᑦ ᐊᕙᑎᓕᕆᔨᒧᓪᓘᓐᓃᑦ ᐅᕗᖓ 867-645-8071.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓴᐃᕌ ᐹᑐᓴᓐ
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨᐅᓚᐅᑲᒃᑐᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5762
spaterson@gov.nu.ca