ᐅᖃᓚᐅᑎᓯᐅᑏᑦ

You are here

ᐱᖦᖤᖏᓴᒃᑐᖅ ᓇᓗᓇᐃᖅᑕᐅᓯᒪᔪᖅ ᐃᒡᓗᓕᖕᒥᑦ

ᓄᕕᐱᕆ 05, 2018

ᐋᓐᓂᐊᖃᕐᓇᙱᑦᑐᓕᕆᓂᒧᑦ ᑭᒃᑯᑐᐃᓐᓇᕐᓄᑦ

ᐱᖦᖤᖏᓴᒃᑐᖅ ᓇᓗᓇᐃᖅᑕᐅᓯᒪᔪᖅ ᐃᒡᓗᓕᖕᒥᑦ


ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᒃᑲᐃᔪᒪᕗᑦ ᐃᒡᓗᓕᖕᒥᑦ ᒪᕐᕉᖕᓂ ᑎᕆᒐᓐᓂᐊᕐᓂᒃ ᖃᐅᔨᔭᐅᔪᖃᖅᓯᒪᓕᕐᓂᖓᓂᒃ ᐱᖦᖤᙱᓴᖅᑑᖕᓂᒃ/ᓯᖏᖅᓯᓂᕋᖅᑕᐅᔫᖕᓂᒃ.

ᑎᕆᒐᓐᓂᐊᑦ ᐊᒻᒪ ᐊᒪᕈᐃᑦ ᐱᖦᖤᙱᓴᓲᖑᕗᑦ/ᓯᖏᖅᓯᒪᓲᖑᕗᑦ ᓄᓇᕗᒻᒥ, ᓯᐊᒻᒪᒃᑎᕈᓐᓇᖅᖢᑎᒡᓗ ᕿᒻᒥᓄᑦ ᑮᔭᐅᓐᓂᕌᖓᑕ ᐱᖦᖤᙱᓴᖅᑐᒧᑦ/ᓯᖏᖅᓯᒪᔪᒧᑦ ᑎᕆᒐᓐᓂᐊᒧᑦ ᐅᕝᕙᓘᓐᓃᑦ ᐊᒪᖅᑯᒧᑦ. ᐃᓄᐃᑦ ᐱᖦᖤᙱᓴᖅᑐᒧ/ᓯᖏᖅᓯᒪᔪᒧᑦ ᑮᔭᐅᓐᓂᖅᐸᑕ, ᑕᓪᓕᒃᑕᐅᓐᓂᖅᐸᑕ ᐅᕝᕙᓘᓐᓃᑦ ᐊᓗᐱᖅᑕᐅᓐᓂᖅᐸᑕ ᐊᐃᑦᑐᕐᓗᒡᕕᐅᔪᓐᓇᖅᑐᑦ. ᐃᓄᖕᒥ ᐱᖦᖤᙱᓴᖅᑐᖃᓕᕈᓐᓇᕐᒥᔪᖅ ᐱᖦᖤᙱᓴᖅᑐᕕᓂᐅᑉ ᐊᒥᐊᓂᒃ ᐊᒥᓕᕆᔪᖃᕐᓂᖅᐸᑦ, ᑭᓪᓕᖃᕐᓗᓂ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᖃᓄᐃᓕᐅᖅᑕᐅᓂᕆᔭᐃᓪᓗ ᐅᖃᐅᓯᕆᑲᐅᑎᒋᓗᒍ. ᐃᓅᓕᓴᖅᑕᐅᓯᑲᐅᑎᒋᒋᐊᓕᒃ. ᐆᒪᔪᒥᒃ ᑕᑯᒍᕕᑦ ᐃᓕᖅᑯᓯᖅᓱᙱᑦᑐᒥᒃ, ᐱᓱᒡᒐᖅᑐᒥᒃ, ᖃᓂᒃᑯᑦ ᖃᐳᐊᒃᑐᒥᒃ, ᐊᓂᖅᓵᖅᑐᒡᒐᖅᑐᒥᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᔪᒥᒃ, ᓱᖁᑎᒋᑦᑕᐃᓕᒍᒃ ᐅᖃᐅᓯᕆᓗᒍᓗ ᒪᓕᒐᕋᓛᓕᕆᔨᒧᑦ.

ᑎᕆᒐᓂᐊᖅ ᓂᐊᖅᑭᕆᒐᓗᐊᖅᐸᑦ ᐅᓇᖅᑰᔨᔪᓐᓇᖅᐳᖅ. ᓄᑕᖅᑲᑦ ᐱᙳᐊᖃᑎᖃᕆᐊᖃᙱᑦᑐᑦ ᑎᕆᒐᓂᐊᓂᒃ ᐊᓯᖏᓐᓂᒡᓘᓐᓃᑦ ᐆᒪᔪᓂᒃ. ᕿᒻᒦᑦ ᓯᓚᒥᐅᑕᑦ ᐃᐱᖅᓯᒪᑏᓐᓇᕐᓗᒋᑦ, ᖃᐅᔨᓴᖅᐸᒡᓗᒋᓪᓗ ᐱᐅᓯᖏᑦ ᐊᓯᔾᔨᙱᒃᑲᓗᐊᕐᒪᖔᑕ ᐊᒻᒪ ᐱᖦᖤᙱᓴᓕᙱᒃᑲᓗᐊᕐᒪᖔᑕ. ᐱᖦᖤᙱᓴᕐᓇᙱᑦᑐᑦ ᑲᐴᑎᑦ ᑎᒍᐊᕆᔭᐅᔪᓄᑦ ᐊᑐᐃᓐᓇᐅᑎᑕᐅᓲᑦ ᓄᓇᓕᖕᓂ; ᐱᔪᒪᒍᕕᑦ ᖃᐅᔨᒋᐊᕐᕕᐅᔪᓐᓇᖅᑐᑦ ᐃᒡᓗᓕᒃ ᕼᐊᒻᒪᓚᒃᑯᑦ ᑎᑎᕋᕐᕕᐊᓂ ᑐᑭᓯᒋᐊᒃᑲᓐᓂᕈᓐᓇᖅᐳᑎᑦ.

ᑕᑯᒍᕕᑦ ᑎᕆᒐᓂᐊᒥᒃ ᐊᒪᖅᑯᒥᒡᓘᓐᓃᑦ ᓄᓇᓕᖕᓂᑦ, ᕿᒻᒦᓪᓘᓐᓃᑦ ᐊᐳᖅᑕᐅᓯᒪᒃᐸᑦ ᑎᕆᒐᓐᓂᐊᒧᑦ ᐊᒪᖅᑯᒧᓪᓘᓐᓃᑦ, ᐆᒪᔪᓕᕆᔨᒧᑦ ᐅᖃᓗᑲᐅᑎᒋᓗᑎᑦ ᐅᕗᖓ 867-934-6326, ᐊᕕᒃᑐᖅᓯᒪᔪᓂᑦ ᐊᕙᑎᓕᕆᔨᒧᓪᓘᓐᓃᑦ ᐅᕗᖓ 867 473 2676 ᐅᕝᕙᓘᓐᓃᑦ ᓴᓇᓐᓇᐅᔪᓐᓃᖅᐸᑦ ᐊᕙᑎᒧᑦ ᐋᓐᓂᐊᖃᖕᓇᙱᑦᑐᓕᕆᔨᒧᑦ ᐅᕗᖓ 867-975-5772.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓴᐃᕌ ᐹᑐᓴᓐ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᓯᔨ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5762
spaterson@gov.nu.ca