ᐅᖃᓚᐅᑎᓯᐅᑏᑦ

You are here

ᐱᐊᓂᒃᑕᐅᓂᖓ ᑎᑭᕋᕐᔪᐊᕐᒥ ᐳᕙᒡᓗᒃᑐᖃᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᓚᐅᖅᑐᑦ

ᑎᓯᐱᕆ 12, 2018

ᑐᓴᒐᒃᓴᓕᐊᖑᔪᖅ

ᐱᐊᓂᒃᑕᐅᓂᖓ ᑎᑭᕋᕐᔪᐊᕐᒥ ᐳᕙᒡᓗᒃᑐᖃᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᓚᐅᖅᑐᑦ

ᐃᖃᓗᐃᑦ, ᓄᓇᕗᑦ (ᑎᓯᐱᕆ 12, 2018) − ᓄᓇᕗᑦ ᒐᕙᒪᖓᓐᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓪᓗᒥ ᓇᓗᓇᐃᖅᓯᔪᑦ ᑲᔪᓯᓂᖃᑦᑎᐊᖅᑐᒥ ᐱᐊᓂᒃᓯᓂᕐᒧᑦ ᑖᒃᑯᓇᖓᑦ ᓄᓇᕗᓕᒫᒥ ᑭᖑᓪᓕᕐᒥ ᓄᓇᓕᓕᒫᒧᑦ ᐳᕙᓪᓗᖕᓇᒧᑦ (TB) ᐋᓐᓂᐊᖅᑖᖅᑕᐃᓕᒪᓂᕐᒧᑦ ᖃᐅᔨᓴᖅᑕᐅᓂᖅ ᑎᑭᕋᔪᐊᖅ ᐋᓐᓂᐊᕕᐊᓂ.

ᑎᑭᕋᕐᔪᐊᕐᒥ ᐋᓐᓂᐊᕕᒃ ᒪᒃᐱᓚᐅᖅᑐᖅ ᐅᑐᐱᕆ 22-ᒥ ᖃᐅᔨᓴᖅᓯᒪᓕᖅᑐᑦ ᐃᒻᒪᖄ 90 ᐳᓴᓐᑎᖓᓂ ᓄᓇᓕᖕᒥᐅᓂ, ᑕᓪᓕᒪᑦ ᐱᓇᓱᐊᕈᓯᑦ ᐃᓗᐊᓂ. ᐱᒋᐊᕐᓂᖃᓚᐅᖅᑐᑦ ᑐᓴᖅᑕᐅᑎᑦᑎᔾᔪᑎᓂ ᐱᓕᕆᖃᑎᒌᖕᓂᕐᒥᒃ ᓂᕆᖃᑎᒌᖕᓂᕐᒥᓪᓗ, ᐊᒻᒪᓗ ᓄᓇᓕᖕᓂ ᐱᓕᕆᕝᕕᖃᖅᐸᖕᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂ ᐊᑐᖅᑕᐅᑲᑕᒃᑎᓪᓗᒍ ᐋᓐᓂᐊᕕᖕᒥ. ᓄᓇᓕᖕᓂ ᐱᓕᕆᖃᑎᒌᖕᓂᐅᔪᑦ ᐃᓚᖃᖅᑐᑦ ᑕᖅᓯᖅᓱᐃᓂᕐᒥᒃ ᐊᑭᓐᓇᖓᓂᒃ, ᐊᐱᖅᑯᑎᓂ ᐱᓇᓱᐊᕈᓯᐅᔪᒥ, ᐊᒻᒪ ᒪᒃᑯᒃᑐᓄᑦ ᑕᕐᕆᔭᕆᐊᕐᓂᕐᒥᒃ.

"ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖁᔭᓕᓯᒪᔪᑦ ᑐᙵᓱᒃᑎᑕᐅᑦᑎᐊᓚᐅᕐᓂᖏᓐᓄᑦ ᐃᑲᔪᖅᓱᖅᑕᐅᖏᓐᓇᕐᓂᖏᓐᓄᓪᓗ ᑎᑭᕋᕐᔪᐊᕐᒥᐅᓄᑦ," ᐅᖃᖅᑐᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔪᐊᔾᔨ ᕼᐃᒃᔅ. "ᑕᒪᓐᓇ ᐱᕕᒃᓴᑦᑎᐊᕙᒻᒪᕆᐅᔪᖅ ᐅᕙᑦᑎᓐᓄᑦ ᐃᓕᓐᓂᐊᒐᒃᓴᓂ ᐃᓕᓐᓂᐊᖅᑕᐅᔪᓂ ᐊᔪᕈᓐᓃᖅᐹᓪᓕᕐᓂᕐᒧᑦ ᐱᓕᕆᐊᖃᒃᑲᓐᓂᕐᓂᕐᒧᓪᓗ ᖃᓄᐃᓕᐅᕈᑕᐅᔪᓐᓇᖅᑐᓂ ᓄᓇᓕᖕᒥᐅᑦ ᑕᐅᑐᒃᑕᖏᑦᑎᒍᑦ. ᖁᔭᓐᓇᒦᖅᑕᕗᑦ ᑎᑭᕋᕐᔪᐊᕐᒥ ᐃᑲᔪᖅᑐᐃᓂᕐᒥ ᐃᓚᐅᖃᑕᐅᓚᐅᕐᓂᖏᓐᓄᓪᓗ, ᐅᔾᔨᕐᓇᖅᑐᒻᒪᕆᖕᒥ ᐱᓕᕆᐊᖃᖅᐸᓪᓕᐊᓂᑦᑎᓐᓄᑦ ᑐᕌᒐᕆᔭᑦᑎᓐᓄᑦ ᐲᔭᐃᓂᕐᒥᒃ ᐳᕙᒡᓗᖕᓇᖅᑐᓂ ᓄᓇᕗᒻᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖁᔭᓕᖃᑕᐅᔪᒪᔪᑦ ᐋᓐᓂᐊᕕᖕᒥ ᑎᒥᖁᑎᐅᔪᓂ ᑲᓇᑕᒥ, ᑲᓇᑕᓕᒫᒥᑦ ᖁᐱᕐᕈᐊᕐᔪᓕᕆᓂᕐᒧᑦ ᖃᐅᔨᓴᕐᕕᖕᒥ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂᑦ, ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐊᒻᒪ ᕼᐋᒻᒪᓚᒃᑯᓐᓂᑦ ᑎᑭᕋᕐᔪᐊᕐᒥ, ᐊᓯᖏᓐᓂᒡᓗ ᐱᒻᒪᕆᐅᔪᓂ ᐱᓕᕆᖃᑎᒌᖕᓂ, ᑎᒥᐅᔪᓂ ᐊᒻᒪ ᐋᓐᓂᐊᕕᖕᒥ ᐃᖅᑲᓇᐃᔭᖃᑎᒌᓂ.

ᓄᓇᓕᓕᒫᒧᖓᔪᖅ ᖃᐅᔨᓴᕐᓂᖅ ᐱᔭᕇᖅᑎᓪᓗᒍ, ᓄᓇᓕᐅᔪᑦ ᐋᓐᓂᐊᕕᖕᒥᓗ ᐃᖅᑲᓇᐃᔭᖅᑎᑦ ᑎᑭᕋᔪᐊᕐᒥ ᑎᓕᐅᖅᑕᐅᔪᑦ ᑲᔪᓯᖁᔭᐅᓪᓗᑎᒃ ᐃᖏᕐᕋᑎᓪᓗᒍ ᐃᑲᔪᕐᓗᖏᑦ ᓄᓇᓕᐅᔪᑦ ᐳᕙᒡᓗᖕᓇᒧᑦ ᑲᒪᒋᔭᖃᕐᓂᕐᒥᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐳᕙᒡᓗᖕᓇᐅᑉ ᖃᐅᔨᓴᖅᑕᐅᓂᐅᓪᓗ ᒥᒃᓵᓄᑦ, ᐅᖃᓕᒫᕐᓗᒍ ᐳᕙᒃᓗᖕᓇᕐᒧᑦ ᓱᓕᔪᑦ ᐊᒻᒪ ᑖᓐᓇ ᐳᕙᒡᓗᖕᓂᕐᒧᑦ ᐅᕕᓂᒃᑯᑦ ᖃᐅᔨᓴᖅᑕᐅᔪᓄᑦ ᐅᖃᓕᒫᒐᒃᓴᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓴᐃᕋ ᐊᕐᓯᓅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
Sarsenault@gov.nu.ca