ᐅᖃᓚᐅᑎᓯᐅᑏᑦ

You are here

ᓄᕙᕐᔪᐊᕐᓇᖅ-19−ᒧᑦ ᑲᐴᑎᑦ ᒫᓐᓇ ᐊᑐᐃᓐᓇᐅᓕᖅᐳᑦ ᓄᑕᖅᑲᓄᑦ ᑕᓪᓕᒪᓂᑦ 11−ᒧᑦ ᑎᑭᓪᓗᒍ ᐅᑭᐅᓕᖕᓄᑦ

ᓄᕕᐱᕆ 26, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᕙᕐᔪᐊᕐᓇᖅ-19−ᒧᑦ ᑲᐴᑎᑦ ᒫᓐᓇ ᐊᑐᐃᓐᓇᐅᓕᖅᐳᑦ ᓄᑕᖅᑲᓄᑦ ᑕᓪᓕᒪᓂᑦ 11−ᒧᑦ ᑎᑭᓪᓗᒍ ᐅᑭᐅᓕᖕᓄᑦ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 26, 2021) − ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᔮᓐ ᒪᐃᓐ ᑐᓴᖅᑎᑦᑎᖅᑲᐅᔪᖅ Pfizer-BioNTech ᓄᕙᕐᔪᐊᕐᓇᖅ−19−ᒧᑦ ᑲᐴᑎᑦ ᓄᑕᖅᑲᓄᑦ ᑐᕌᖓᔪᑦ ᑕᓪᓕᒪᓂᒃ 11−ᒧᑦ ᑎᑭᓪᓗᒍ ᐅᑭᐅᓕᖕᓄᑦ ᓂᕆᐅᒋᔭᐅᓕᖅᐳᑦ ᓄᓇᕗᒻᒧᑦ ᑎᑭᓐᓂᐊᓕᕐᓂᖏᓐᓂ ᐱᓇᓱᐊᕈᓯᐅᑉ ᓄᙳᐊᓂ.

"ᐊᑦᑕᕐᓇᙱᑦᑐᑦ ᐊᑑᑎᖃᑦᑎᐊᖅᑐᑦ ᑲᐴᑏᑦ ᑎᑭᓯᒪᓕᕐᓗᑎᒃ, ᐅᑯᐊᓗ ᐋᓐᓂᐊᕐᕕᖕᒥ ᒪᓕᖁᔭᐅᔪᑦ, ᖄᒃᑲᓐᓂᐊᒍᑦ ᐊᑦᑕᕐᓇᙱᔾᔪᑕᐅᓂᐊᖅᐳᑦ ᕿᑐᕐᙵᑦᑎᓐᓄᑦ, ᐃᓚᑦᑎᓐᓄᑦ ᐊᒻᒪ ᓄᓇᖅᑲᑎᑦᑎᓐᓄᑦ," ᒥᓂᔅᑕ ᒪᐃᓐ ᐅᖃᖅᑐᖅ. "ᓄᓇᕗᒻᒥᐅᑦ ᑕᓪᓕᒪᓂᒃ 11−ᒧᑦ ᑎᑭᓪᓗᒍ ᐅᑭᐅᓖᑦ 15−ᐳᓴᒥᑦ ᐅᓄᖅᑎᒋᕗᑦ ᓄᓇᕗᒻᒥᐅᑦ ᐃᓄᖏᓐᓂ. ᐊᖓᔪᖅᑳᕆᔭᐅᔪᑦ ᑎᓕᐅᖅᐸᒃᑲ ᕿᑐᕐᙵᒥᓄᑦ ᓇᓗᓇᐃᖅᓯᑦᑎᐊᖁᓪᓗᒋᑦ ᐅᖃᖃᑎᖃᑦᑎᐊᕐᓗᑎᒡᓗ ᐃᓂᒃᓴᓕᐅᕐᓗᓂᒋᓪᓗ ᐋᓐᓂᐊᕐᕕᖕᒧᑦ ᐃᓂᒃᓴᓕᐅᕐᓇᖅᓯᑐᐊᖅᐸᑦ."

Pfizer ᑲᐴᑦ ᑕᐃᒪᓐᓇᑦᑕᐅᖅ ᐱᓕᕆᐊᖑᖃᑦᑕᕆᕗᖅ ᓄᑕᖅᑲᓄᑦ 12−ᒥᑦ ᐅᖓᑖᓄᓪᓗ ᐅᑭᐅᓕᖕᓄᑦ ᑲᐴᑎᑎᑐᑦ. ᐅᓇ ᐊᔾᔨᒋᙱᐊᕐᔪᒃᑕᖓ ᓄᑕᖅᑲᑦ ᑕᓪᓕᒪᓂᒃ 11−ᒧᑦ ᑎᑭᓪᓗᒍ ᐅᑭᐅᓖᑦ ᒪᕐᕉᖕᓂᒃ ᒥᑭᓐᓂᖅᓵᖕᓂᒃ ᑲᐱᔭᐅᓂᐊᖅᐳᑦ.

ᓯᕗᓪᓕᕐᒥ, ᓄᓇᕗᒻᒥ ᓈᒻᒪᒃᑐᓂᒃ ᑲᐴᑎᑖᕐᓂᐊᖅᐳᑦ ᓄᓇᕗᒻᒥᐅᓕᒫᑦ ᐅᑭᐅᓖᑦ ᑕᓕᒪᓂᒃ 11−ᒧᑦ ᑎᑭᓪᓗᒍ ᓯᕗᓕᖅᐹᒥ ᑲᐱᔭᐅᔪᐃᓐᓇᐅᖁᓪᓗᒋᑦ. ᑲᐴᑎᑦ ᐊᑐᐃᓐᓇᐅᓂᐊᖅᐳᑦ ᐃᓂᒃᓴᓕᐅᖅᑕᐅᓯᒪᔪᓄᑦ ᑕᒪᐃᓐᓂᒃ ᐋᓐᓂᐊᕕᖕᓂ ᐊᒻᒪ ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖓᓂ ᓄᕕᐱᕆ 29−ᒥ ᐱᒋᐊᕐᓗᓂ. ᐊᖓᔪᖅᑳᕆᔭᐅᔪᒥᒃ ᐸᖅᑭᔨᒋᔭᐅᔪᒥᓪᓘᓐᓃᑦ ᐱᖃᑎᒋᔭᐅᔭᕆᐊᖃᕐᓂᐊᖅᑐᑦ ᑲᐱᔭᐅᔭᖅᑐᓕᕈᑎᒃ, ᑲᐴᑎᒧᑦ ᐊᖏᕆᐊᖃᕐᓂᐊᕐᒪᑕ.

ᐱᖃᑖᓂ ᑲᐱᔭᐅᓂᐊᖅᑐᑦ ᐋᖅᑭᒃᑕᐅᓂᐊᖅᐳᑦ 8 ᐱᓇᓱᐊᕈᓰ ᐊᓂᒍᖅᐸᑦ ᓯᕗᓪᓕᖅᐹᒥ ᑲᐱᔭᐅᓚᐅᕐᓗᓂ, ᐊᑐᓕᖁᔭᐅᔪᑦ ᒪᓕᒃᖢᒋᑦ ᑲᓇᑕᒥ ᑲᐴᑎᓂᑦ ᖃᐅᔨᒪᔨᐅᓪᓗᑎᒃ ᑲᑎᒪᔨᕋᓛᓄᑦ.

"ᐅᓪᓗᒥ ᐱᒻᒪᕆᐅᔪᒥᒃ ᐊᓪᓗᕆᐊᖅᐳᒍᑦ ᐱᓇᔪᒍᑎᒋᔭᑦᑎᓐᓂ ᐊᒃᑐᐃᓕᖁᓇᒍ ᐊᑦᑕᕐᓇᕈᓐᓇᖅᑐᖅ ᓄᕙᕐᔪᐊᕐᓇᖅ-19 ᓄᓇᕗᒻᒥ," ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᑐᖅ. "ᑲᐴᑎ ᐊᑦᑕᕐᓇᙱᑦᑐᒃᑯᑦ ᐊᐅᓚᑕᐅᓯᒪᕗᖅ 3−ᒥᓕᐊᓐ ᐅᖓᑖᓂ ᓄᑕᖅᑲᓄᑦ ᓄᓇᕐᔪᐊᓕᒫᒥ ᐊᒻᒪᓗ ᑕᑯᓯᒪᓪᓗᑎᒃ ᐅᓄᕈᓐᓃᖅᐹᓪᓕᕐᓂᖏᓐᓂᒃ ᐋᓐᓂᐊᓕᕐᔪᐊᕋᔭᓚᐅᖅᑐᑦ ᐊᒻᒪ ᐊᐃᑦᑐᕐᓗᐃᖃᑦᑕᐅᑎᓇᔭᖅᑐᑦ ᖃᓂᒪᓐᓇᒥ ᖃᑕᙳᑎᖏᓐᓄᑦ ᑲᐱᔭᐅᔪᓐᓇᙱᑦᑐᓄᑦ."

ᑲᐱᔭᐅᓚᐅᕐᓗᑎᒃ, ᐃᓚᖏᑦ ᓄᑕᖅᑲᑦ ᐊᒃᑐᖅᑕᐅᔪᓐᓇᖅᐳᑦ ᓲᕐᓗ ᑕᓕᖓ ᒪᐃᓕᕐᓗᓂ, ᑕᖃᖓᓗᓂ, ᓂᐊᖁᙳᓗᓂ, ᓴᐅᓂᙳᓗᓂ, ᖄᓕᖅᑭᑲᑕᒡᓗᓂ, ᐆᓇᑲᑕᒡᓗᓂ ᒥᕆᐊᙳᑲᑕᒡᓗᓂᓘᓐᓃᑦ. ᑲᐱᔭᐅᕌᓂᒃᑎᓪᓗᒋᑦ ᒪᑯᐊ ᓴᖅᑭᑦᑐᓐᓇᖅᑐᑦ ᓴᖅᑭᓲᖑᖕᒥᔪᑦ ᖃᓄᐃᑦᑐᓐᓃᕈᓐᓇᖅᖢᑎᒡᓗ ᐅᓪᓗᑦ ᖃᔅᓯᐊᕐᔪᑦ ᐊᓂᒍᖅᐸᑕ. ᑲᐴᑎᐅᑉ ᒥᒃᓵᓄᑦ ᐊᐱᖅᑯᑎᒃᓴᖃᕈᕕᑦ, ᐃᖢᐊᖅᓴᐃᔨᒧᑦ ᐅᖃᓪᓚᖃᑎᖃᕐᓗᑎᑦ.

ᓄᕙᕐᔪᐊᕐᓇᖅ-19−ᒧᑦ ᑲᐴᑎᑦ ᓄᓇᕗᒻᒥᐅᓕᒫᓄᑦ 12−ᒥᑦ ᐅᖓᑖᓂᓪᓗ ᐅᑭᐅᓕᖕᓄᑦ ᓱᓕ ᐊᑐᐃᓐᓇᐅᕗᑦ, ᐅᑯᐊᓗ ᓯᕗᕐᒥ ᐱᖃᑖᓂᓪᓗ ᑲᐴᑎᑦ ᐊᒻᒪᓗᑦᑕᐅᖅ ᐱᖓᔪᖓᓂ ᑲᐴᑎ. ᐋᓐᓂᐊᕕᖕᒧᑦ ᐅᖄᓚᓗᑎᑦ ᓄᓇᔅᓯᓐᓂ ᐅᕙᓘᓐᓃᑦ ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖕᒧᑦ ᐃᓂᒃᓴᓕᐅᕐᓗᑎᑦ.

ᑲᐴᑎᑦ ᓄᓇᓕᖕᓄᐊᖅᑕᐅᓂᐊᖅᑐᑦ ᐋᖅᑭᒃᑕᐅᓯᒪᔪᑦ ᓴᖅᑭᑕᐅᓂᐊᖅᐳᑦ ᑲᐴᑎᑦ ᓄᓇᕗᒻᒧᑦ ᑎᑭᓯᒪᓕᖅᐸᑕ. ᖃᐅᔨᒪᓂᐊᖅᐳᑎᑦ ᑲᐴᑎᑦ ᓄᓇᓕᖕᓄᐊᖅᑕᐅᓂᐊᖅᑐᑦ ᐋᖅᑭᒃᑕᐅᓯᒪᔪᑦ ᐊᒃᑐᖅᑕᐅᑐᐃᓐᓇᕆᐊᖃᖅᐳᑦ ᓂᕆᐅᓇᙱᑦᑐᓄᑦ ᓲᕐᓗ ᓯᓚ ᐱᔾᔪᑎᒋᓪᓗᒍ.

ᓄᑖᙳᓛᒥᒃ ᑐᓴᒐᒃᓴᓂᒃ ᑕᑯᔪᒪᒍᕕᑦ ᓄᕙᕐᔪᐊᕐᓇᖅ-19 ᒥᒃᓵᓄᑦ ᓄᓇᕗᒻᒥ, ᐅᕗᙵᕐᓗᑎᑦ: https://www.gov.nu.ca/

###

ᑐᓴᒐᒃᓴᓕᕆᔨᓄᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca