ᐅᖃᓚᐅᑎᓯᐅᑏᑦ

You are here

ᓄᕙᕐᔪᐊᕐᓇᖅ-19−ᒧᑦ ᑲᐱᔭᐅᔭᕆᐊᖃᓪᓚᕆᖕᓂᐊᓕᖅᑐᑦ ᐃᓚᖏᑦ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᐅᔪᑦ

ᓄᕕᐱᕆ 30, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᕙᕐᔪᐊᕐᓇᖅ-19−ᒧᑦ ᑲᐱᔭᐅᔭᕆᐊᖃᓪᓚᕆᖕᓂᐊᓕᖅᑐᑦ ᐃᓚᖏᑦ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᐅᔪᑦ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 30, 2021) − ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᔮᓐ ᒪᐃᓐ ᑐᓴᖅᑎᑦᑎᖅᑲᐅᕗᖅ ᔮᓄᐊᕆ 10, 2022−ᒥ ᐱᒋᐊᕐᓗᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓚᖏᓐᓂᒃ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᒋᔭᐅᔪᓂᒃ ᑲᐱᔭᐅᓯᒪᔭᕆᐊᖃᖅᑎᑦᑎᓂᐊᓕᖅᐳᑦ.

"ᓄᕙᕐᔪᐊᕐᓇᖅ-19−ᒧᑦ ᑲᐴᑎ ᓴᐳᔾᔨᔾᔪᑎᑦᑎᐊᕙᐅᓛᖑᕗᖅ ᖃᓂᒪᓐᓇᒧᑦ," ᒥᓂᔅᑕ ᒪᐃᓐ ᐅᖃᖅᑐᖅ. "ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᑲᐱᔭᐅᓯᒪᒍᑎᒃ ᓄᓇᕗᒻᒥᐅᓂᑦ ᐊᑦᑕᕐᓇᙱᑦᑐᒦᑎᑦᑎᓂᐊᖅᐳᑦ ᐋᓐᓂᐊᕐᕕᖕᒥ ᐱᔨᑦᑎᕋᖅᑕᐅᕙᒃᑐᓂᑦ ᓴᐳᔾᔨᓗᑎᒡᓗ ᐋᓐᓂᐊᖅᑐᓕᕆᔾᔪᑎᑦᑕ ᑐᙵᑦᑎᐊᕐᓂᖓᓂ."

ᐋᓐᓂᐊᕐᕕᖕᒥ ᐱᓕᕆᔩᑦ ᐋᓐᓂᐊᖅᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᐅᔪᑦ ᐅᓄᖅᑐᑦ ᑲᐱᔭᐅᔾᔪᑎᒥᓂᒃ ᐊᙳᒻᒪᑎᔭᕆᐊᖃᖅᑎᑕᐅᕌᓂᒃᐳᑦ ᐋᓐᓂᐊᕕᖕᒥ ᐊᑐᖅᑕᐅᔭᕆᐊᓖᑦ ᒪᓕᒐᐃᑦ ᒪᓕᒃᖢᒋᑦ, ᐊᒻᒪᓗᑦᑕᐅᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᑦ ᐊᖏᖃᑎᒌᒍᑎᖓ. ᑖᓐᓇ ᐋᖅᑭᒃᑕᐅᔪᖅ ᐃᓚᒋᐊᖅᓯᓂᐊᖅᐳᖅ ᑲᓇᑕᐅᑉ ᒐᕙᒪᖓᓂ ᐊᖏᖅᑕᐅᓯᒪᔪᒥᒃ ᓄᕙᕐᔪᐊᕐᓇᖅ-19 ᑲᐴᑎᒥᒃ ᒫᓐᓇ ᐃᖅᑲᓇᐃᔭᖅᑎᖏᓐᓄᑦ ᑲᐱᔭᐅᔾᔪᑎᒋᔭᕆᐊᓕᖏᓐᓂ.

ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᑐᓂᓯᔭᕆᐊᖃᖃᑦᑕᕐᓂᐊᓕᖅᐳᑦ ᓄᕙᕐᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᖓᓂ ᑎᑎᕋᖅᓯᒪᔪᒥᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑐᓕᕆᔨᖏᓐᓄᑦ ᔮᓄᐊᕆ 10, 2022−ᒥᑦ. ᑖᓐᓇᑦᑕᐅᖅ ᐊᑐᖅᑕᐅᔭᕆᐊᖃᕐᓂᐊᕆᕗᖅ ᐋᓐᓂᐊᕐᕕᖕᒥ ᐃᖅᑲᓇᐃᔭᓕᓵᖅᑐᓄᑦ ᐊᑖᓂ ᐱᓕᕆᕝᕕᓕᖕᓄᑦ:

  • ᓄᓇᓕᖕᓂ ᐋᓐᓂᐊᕐᕕᖓᓂ ᐃᖅᑲᓇᐃᔭᖅᑎᐅᔪᑦ (ᐅᑯᐊᓗ ᑎᑎᕋᖅᑎ ᑐᓵᔨᑦ), ᓴᓗᒻᒪᖅᓴᐃᔨᑦ ᐊᒻᒪ ᐊᒡᓚᕝᕕᓕᕆᔨᑦ).
  • ᐅᖁᒪᐃᓐᓂᕐᓂᐊᕐᕕᖕᒥ ᐃᖅᑲᓇᐃᔭᖅᑎᑦ.
  • ᕿᑭᖅᑕᓂ ᐋᓐᓂᐊᕕᖕᒥ ᐃᖅᑲᓇᐃᔭᖅᑎᑦ.
  • ᑲᒪᒋᔭᐅᖏᓐᓇᕆᐊᖃᖅᑐᒃᑯᕕᖕᒥ ᐃᖅᑲᓇᐃᔭᖅᑎᑦ.
  • ᐊᑲᐅᓯᓴᕐᕕᖕᒥ ᐃᖅᑲᓇᐃᔭᖅᑎᑦ.
  • ᐃᖃᓗᑦᑑᑎᐊᒥᑦ ᐃᓱᒪᓕᔨᒃᑯᑦ.
  • ᐃᓱᒪᓕᕆᔨᐅᑉ ᐊᒡᓚᕝᕕᐊᓂ ᐃᖅᑲᓇᐃᔭᖅᑎᑦ.
  • ᑕᒪᕐᒥᒃ ᑲᑎᙵᔪᑦ 5−ᒥᑦ ᐃᖅᑲᓇᐃᔭᖅᑎᐅᔪᑦ (ᐊᓂᒍᐃᓯᒪᔪᑦ ᐃᖢᐊᖅᓴᐃᔨᑦ, ᐃᓕᑕᕆᔭᐅᔾᔪᑎᖃᖅᑐᑦ ᐃᖢᐊᖅᓴᐃᔨᑦ, ᐋᓐᓂᐊᕕᖕᒥ ᐆᒪᔪᐃᔭᐅᑎᓕᕆᔨᑦ, ᑭᒍᑎᑦᑎᐊᕙᓕᕆᔨᑦ, ᐃᕐᓂᓱᒃᓰᔩᑦ, ᐃᓕᑕᕆᔭᐅᔾᔪᑎᖃᖅᑐᑦ ᐃᓱᒪᓕᕆᔨᑦ, ᐱᔪᓐᓇᐅᑎᓖᑦ ᐃᖢᐊᖅᓴᐃᔨᑦ)

ᑲᐱᔭᐅᓯᒪᙱᑦᑐᑦ ᐃᖅᑲᓇᐃᔭᖅᑏᑦ ᐊᓯᐊᓂᒃ ᐃᓂᑖᖅᑎᑕᐅᑐᐃᓐᓇᕆᐊᓖᑦ ᐅᕝᕙᓘᓐᓃᑦ ᖃᐅᔨᓴᖅᑕᐅᖃᑦᑕᕆᐊᖃᕋᔭᖅᐳᑦ. ᐊᑐᓂ ᐃᓂᑖᖅᑎᑕᐅᖁᔭᐅᔪᑦ ᕿᒥᕐᕈᔭᐅᖃᑦᑕᕐᓂᐊᖅᐳᑦ ᐊᑕᐅᓯᐅᑦᑕᕐᓗᒋᑦ. ᐅᑯᐊ ᐃᓱᒪᒃᓴᖅᓯᐅᕈᑕᐅᖃᑦᑕᕐᓂᐊᖅᑐᑦ ᐃᖅᑲᓇᐃᔭᖅᑎ ᐊᑦᑕᕐᓇᖅᑐᒻᒪᕆᖕᒥᑦ ᐋᖅᑭᒃᓯᒪᔪᒦᓐᓂᖏᑦ ᐊᒻᒪ ᑲᑎᙵᖃᑎᖃᖃᑦᑕᕐᓂᖏᑦ ᓄᓇᕗᒻᒥᐅᓂᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑳᑦᑐᓛᒃᑕᐅᓯᒪᔪᓂᑦ ᐋᒃᑳᑐᐃᓐᓇᕆᐊᓖᑦ ᒪᓕᒐᖏᓐᓂᒃ ᒪᓕᒍᒪᙱᑦᑐᓂᒃ ᐃᓄᖕᓂᒃ.

###

ᑐᓴᒐᒃᓴᓕᕆᔨᓄᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca