ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᓄᖅᑲᖅᑎᑦᑎᕗᖅ ᐊᐅᓪᓚᕐᕕᐅᒐᔪᒃᑐᒥᑦ ᑰᒡᔪᐊᕌᓗᖕᒧᑦ

ᓯᑎᐱᕆ 17, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᓇᕗᑦ ᓄᖅᑲᖅᑎᑦᑎᕗᖅ ᐊᐅᓪᓚᕐᕕᐅᒐᔪᒃᑐᒥᑦ ᑰᒡᔪᐊᕌᓗᖕᒧᑦ

ᓄᓇᕗᑦ (ᓯᑎᐱᕆ 17, 2021) − ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ, ᓘᒃᑖᖅ ᒪᐃᑯᓪ ᐹᑐᓴᓐ ᓄᖅᑲᖅᑎᑦᑎᓯᒪᓕᖅᐳᖅ ᓄᓇᕗᒻᒥ ᐊᐅᓪᓚᕐᕕᐅᒐᔪᒃᑐᒥᑦ ᑰᒡᔪᐊᕌᓗᖕᒥᑦ, ᒪᓂᑐᐸᒧᑦ ᒫᓐᓇᑲᐅᑎᒋ ᐊᑐᓯᒋᐊᕐᓂᐊᖅᖢᓂ.

"ᓄᕙᒡᔪᐊᕐᓇᖅ-19−ᖃᖅᑐᑦ ᐅᓄᖅᓯᕙᓪᓕᐊᖕᒪᑕ ᒪᓂᑐᐸᒥ ᐊᒻᒪ ᐅᓗᕆᐊᓇᖅᑐᒥᑦᑐᑦ ᐅᓄᖅᓯᕙᓪᓕᐊᓂᖏᓐᓄᑦ ᖃᓂᒪᓐᓇᒥ ᐊᒃᑐᖅᑕᐅᔪᓐᓇᖅᑐᑦ, ᐊᐅᓪᓚᖃᑦᑕᖅᑐᑦ ᑯᒡᔪᐊᕋᓗᖕᒧᑦ ᐊᒻᒪ ᓄᓇᕗᒻᒧᑦ ᒪᓐᓇ ᓄᖅᑲᖅᑎᑕᐅᓯᒪᓕᖅᐳᑦ," ᐅᖃᖅᑐᖅ ᓗᒃᑕᖅ ᐹᑐᓴᓐ. ᐊᐅᓪᓚᕐᕕᐅᒐᔪᒃᑐᓄᑦ ᐱᔪᓐᓇᐅᑎᑕᕈᑎᑦ ᑎᑎᖅᑲᐃᑦ ᑯᒡᔪᐊᕋᓗᑉ ᐊᒻᒪ ᓄᓇᕗᑦ ᐊᑯᓐᓂᖓᓂ ᐊᑐᕈᓐᓂᖅᐳᑦ. ᑭᓇᑐᐃᓐᓇᖅ ᒪᓐᓇ ᑯᒡᔪᐊᕋᓗᖕᒥᑦᑐᖅ ᐱᔪᓐᓇᐅᑎᑕᕆᐊᖃᖅᐳᖅ ᓄᓇᕗᒻᒧᑦ ᐅᑎᕐᓂᐊᕐᓗᓂ.

ᑲᐱᔭᐅᓯᒪᙱᑦᑐᓕᒪᑦ ᐊᐅᓪᓚᖅᓯᒪᔪᑦ ᑯᒡᔪᐊᕋᓗᖕᒥᙵᖅᑐᑦ ᓄᓇᕗᒻᒧᐊᖅᑐᑦ ᓯᑎᐱᕆ 12−ᒥ ᐅᖓᑕᓂᓪᓗᓐᓂᑦ ᐅᓪᓗᓄᑦ 14−ᓄᑦ ᐃᓄᑐᔭᕆᐊᖃᓯᑲᐅᑎᒋᕗᑦ ᓄᓇᕗᒻᒧᐊᑐᐊᕈᓂ. ᑲᐱᔭᐅᓯᒪᓂᒃᑐᑦ ᐊᐅᓪᓚᖃᑦᑕᖅᑐᑦ ᓄᓇᕗᒻᒧᑦ ᐅᑎᓚᐅᖅᑐᑦ ᑯᒡᔪᐊᕋᓗᖕᒥᙵᕐᓗᑎᒃ ᓯᑎᐱᕆ 12 ᐊᓂᒍᖅᑎᓪᓗᒍ ᒪᑐᐊᖅᓯᒪᔭᕆᐊᖃᖅᐳᑦ ᐊᒻᒪ ᖃᓂᒻᒪᒃᐸᓪᓕᐊᖕᒪᖓᑦ ᖃᐅᔨᓴᕐᓗᓂ ᐅᓪᓗᓄᑦ 14−ᓄᑦ.

ᑲᐱᔭᐅᓯᒪᓂᒃᑐᑦ ᐊᐅᓪᓚᖃᑦᑕᖅᑐᑦ ᑲᐱᔭᐅᓯᒪᙱᑦᑐᒥᒃ ᐊᐅᓪᓚᖅᓯᒪᖃᑎᖃᖅᑐᑦ ᕿᑐᕐᙵᒥᓂᒃ ᓄᓇᕗᒻᒧᑦ ᐃᓯᕈᒪᓗᓂ ᐱᓇᔪᒍᓐᓇᖅᐳᖅ ᐃᕐᙱᓐᓇᖅᑕᐅᒃᑯᑦ ᑲᐱᔭᐅᓯᒪᔪᓄᑦ ᓇᓗᓇᐃᖅᓯᔾᔪᑎᒥᒃ ᑎᑎᕋᕆᐊᓕᖕᒥᒃ ᐅᕙᓂ vaccineexemptions@gov.nu.ca. ᓄᓇᕗᒻᒥᐅᑕᐅᙱᑦᑐᑦ ᑐᓂᓯᔭᕆᐊᖃᕆᕗᑦ ᑲᐱᔭᐅᓯᒪᓂᕐᒥᓂᒃ ᓇᓗᓇᐃᖅᓯᔾᔪᑎᒥᒃ.

ᑲᐱᔭᐅᓯᒪᙱᑦᑐᑦ ᐊᐅᓪᓚᖃᑦᑕᖅᑐᑦ ᓄᓇᕗᑦ ᒐᕙᒪᒃᑯᑦ ᐃᓄᑐᐊᒃᑯᕕᖓᓂᑦᑕᕆᐊᖃᖅᐳᑦ ᖃᓪᓗᓇᓂ ᑲᓇᑕᒥ ᓄᓇᕗᒻᒧᑦ ᐅᑎᓚᐅᙱᑎᓪᓗᒋᑦ. ᐃᕐᙱᓐᓇᖅᑕᐅᒃᑯᑦ ᑎᑎᕋᕐᓗᑎᑦ ᐃᓄᑐᔭᕆᐊᖃᕐᓂᕐᒧᑦ ᐃᓂᒃᓴᓕᐅᕈᓐᓇᐅᑎᒧᑦ ᑐᒃᓯᕋᐅᑎᒥᒃ ᐅᕙᓂ nuisolationreservation@nunavutcare.ca ᐊᖅᑭᒃᑕᐅᓂᐊᕐᒪᑦ ᐃᓂᒋᓂᐊᖅᑕᐃᑦ. ᐃᓄᑐᔭᕆᐊᖃᖅᑐᑦ ᐊᑭᓕᔭᕆᐊᖃᙱᑉᐳᑦ ᓄᓇᕗᒻᒧᑦ ᐊᐅᓪᓚᕆᐊᖅᑐᖅᑐᓄᑦ. ᓄᓇᕗᑦ ᒐᕙᒪᖓᑦ ᖃᖓᑦᑕᐅᑎᓂᒃ ᐊᑭᓕᖃᑦᑕᖅᐳᑦ ᐊᓯᔾᔨᖅᑕᐅᔪᑦ ᐱᔾᔪᑎᒋᓪᓗᒋᑦ ᐊᓐᓂᐊᖃᕐᓇᙱᑦᑐᓕᕆᔨᑦ ᒪᓕᖁᔭᖏᑦ.

ᑐᑭᓯᒋᐊᑲᓐᓂᕈᒪᒍᕕᑦ ᐊᐅᓪᓚᕐᕕᐅᔪᓐᓇᖅᑐᓄᑦ ᐅᕗᖓᓗᑎᑦ https://gov.nu.ca/health/information/travel-and-isolation.

ᓱᓕ ᑲᐱᔭᐅᓐᓇᖅᐳᖅ ᓄᓇᕘᓕᒫᒥ. ᐋᓐᓂᐊᕐᕕᔅᓯᓐᓄ ᐅᖄᓚᓗᑎᑦ ᐃᓂᒃᓴᓕᐅᕐᓗᑎᑦ.
ᐃᓂᒃᓴᓕᐅᕐᓗᑎᑦ ᐅᕝᕙᓗᓐᓂᑦ ᐅᖁᒪᐃᓐᓂᕐᓂᐊᕐᕕᖕᒧᑦ ᐃᓯᑐᐃᓐᓇᕐᓗᑎᑦ ᐱᓇᓱᐊᕈᓯᑕᒪᑦᑎᐊᖅ ᒪᑐᓇᒧᑦ ᑲᐱᔭᐅᔪᒪᔪᑦ (18−ᓂᒃ ᐅᖓᑕᓂᓪᓗ ᐅᑭᐅᓕᑦ) ᐊᒻᒪ ᐱᖓᔪᐊᒃᑯᑦ Pfizer-ᒧᑦ ᑲᐳᑎᒧᑦ (12−ᒥᑦ 17−ᒧᑦ ᐅᑭᐅᓕᑦ). ᑲᐳᑎᑦ ᓴᐳᔾᔨᔾᔪᑎᑦᑎᐊᕙᐅᓚᖑᕗᑦ ᐃᓕᖕᓂᑦ, ᐃᓚᖕᓂᑦ ᐊᒻᒪ ᓄᓇᖅᑲᑎᖕᓂᑦ.

ᑭᓇᑐᐃᓐᓇᖅ ᐱᕙᓪᓕᐊᒃᐸᑦ ᓄᕙᕐᔪᐊᕐᓇᖅ-19−ᒧᑦ ᐅᖄᓚᖁᔭᐅᕗᑦ ᓄᕙᕐᔪᐊᕐᓇᒧᑦ ᐅᖄᓚᕝᕕᖕᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ ᖃᐅᔨᓴᖅᑕᐅᓂᕐᒧᑦ ᐃᓂᒃᓴᓕᐅᖁᓪᓗᒋᑦ ᐅᕝᕙᓘᓐᓃᑦ ᑐᓴᖅᑎᑦᑎᑲᐅᑎᒋᓗᓂ ᐊᓐᓂᐊᕐᕕᖕᒧᑦ. ᐋᓐᓂᐊᕕᓕᐊᖅᑕᐃᓕᒋᑦ ᓇᖕᒥᓂᖅ, ᐅᓪᓗᓄᓪᓗ 14−ᓄᑦ ᐃᓄᑐᓯᑲᐅᑎᒋᓗᑎᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᓐᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca