ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᖃᓄᐃᓕᒋᐊᕈᑎᖃᕐᓂᖏᑦ ᐱᓪᓗᒍ ᖃᓂᒪᓐᓇᖅ COVID-19

ᒫᑦᓯ 13, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᓄᓇᕗᑦ ᒐᕙᒪᒃᑯᖏᑦ ᖃᓄᐃᓕᒋᐊᕈᑎᖃᕐᓂᖏᑦ ᐱᓪᓗᒍ ᖃᓂᒪᓐᓇᖅ COVID-19

ᐃᖃᓗᐃᑦ, ᓄᓇᕗᑦ (ᒫᑦᓯ 13, 2020) – ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᐅᓪᓗᒥ ᓇᓗᓇᐃᔭᐃᖅᑲᐅᔪᖅ ᖄᒃᑲᓐᓂᖓᒍᑦ ᖃᓂᒻᒪᑦᑕᐃᓕᒍᑎᐅᒍᓐᓇᖅᑐᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᒫᓐᓇᐅᔪᖅ ᐅᐸᓗᖓᐃᔭᕈᑎᖏᓐᓂᒃ ᖃᓄᐃᓕᒋᐊᕈᑎᖃᕐᓂᕐᒧᑦ ᖃᓂᒪᓐᓇᒧᑦ COVID-19.

“ᓱᓕ ᓇᓗᓇᐃᖅᑕᐅᓯᒪᖃᙱᒃᑲᓗᐊᖅᑎᓪᓗᒍ ᖃᓂᒪᓐᓇᖅᑖᖅᓯᒪᔪᓂᒃ COVID-19 ᓄᓇᕗᒻᒥ, ᐱᒻᒪᕆᐅᕗᖅ ᖃᓄᐃᓕᒋᐊᕈᑎᖃᕆᐊᖃᕐᓂᕗᑦ ᐅᓗᕆᐊᓇᖅᑐᒦᓕᖁᓇᒋᑦ ᓄᓇᕗᒻᒥᐅᑦ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ. “ᖄᒃᑲᓐᓂᖓᒍᑦ ᖃᓂᒻᒪᑦᑕᐃᓕᒐᓱᐊᕐᓂᕐᒧᑦ ᖃᓄᐃᓕᐅᕈᑕᐅᒋᐊᓖᑦ ᐅᓪᓗᒥ ᒐᕙᒪᒃᑯᓐᓂᓕᒫᖅ ᐱᓕᕆᔾᔪᓯᐅᔪᑦ ᑐᕌᖓᔪᑦ ᑲᓇᑕᓕᒫᒥ ᖃᓄᐃᓕᒋᐊᕈᑕᐅᓯᒪᔪᓄᑦ ᓇᓗᓇᐃᖅᓯᓯᒪᒍᑕᐅᓂᐊᖅᑐᑎᓪᓗ ᓄᓇᕗᑦ ᒐᕙᒪᒃᑯᖏᑦ ᐅᐸᓗᖓᐃᖅᓯᒪᑦᓯᐊᖁᓪᓗᒋᑦ ᑕᒪᓐᓇ ᐊᓯᔾᔨᑳᓪᓚᓂᖅᑲᑦ.”

ᖃᖓᒃᑯᑦ ᓇᓗᓇᐃᖅᑕᐅᓚᐅᙱᓐᓂᖓᓂ, ᓄᓇᕗᒻᒥᐅᑦ ᑲᓇᑕᐅᑉ ᓯᓚᑖᓄᑦ ᐊᐅᓪᓚᖃᑦᑕᖁᔭᐅᒍᓐᓃᖅᑐᑦ ᐊᒻᒪᓗ ᐊᐅᓪᓚᑲᑕᓗᐊᖁᔭᐅᒍᓐᓃᖅᑐᑎᒃ ᑲᓇᑕᐅᑉ ᐃᓗᐊᓂ. ᓄᓇᕗᑦ ᐃᓗᐊᓂ ᐊᐅᓪᓚᑲᑕᒍᓐᓇᕐᓂᖅ ᓱᓕ ᐃᓱᓕᑦᑕᕐᕕᓕᐅᖅᑕᐅᓯᒪᙱᑦᑐᖅ. ᐱᒻᒪᕆᐅᓗᐊᙱᑦᑐᓂᒃ ᐊᐅᓪᓚᖃᑦᑕᕐᓂᐅᔪᑦ ᐃᖅᑲᓇᐃᔭᕆᐊᕐᓗᑎᒃ ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᓄᖅᑲᖅᑎᑕᐅᔪᑦ, ᒪᓐᓇᑲᐅᑎᒋ ᐱᒋᐊᕐᓗᓂ. ᑲᓇᑕᐅᑉ ᓯᓚᑖᓄᑦ ᐃᓕᓐᓂᐊᕐᕕᑎᒍᑦ ᐊᑭᓕᖅᑕᐅᓯᒪᔪᑦ ᐊᐅᓪᓚᖃᑦᑕᕐᓃᑦ ᓄᖅᑲᖅᑎᑕᐅᔪᑦ.

ᓄᓇᕗᑦ ᒐᕙᒪᒃᑯᑦ ᑭᒃᑯᓕᒫᓂᒃ ᖃᓄᐃᓕᐅᖅᑎᑦᓯᖃᑦᑕᕐᓂᖏᑦ ᓄᖅᑲᖅᑎᑕᐅᓂᐊᖅᑐᑦ ᖁᔭᓈᖅᑕᐅᓗᑎᒃ. ᓄᓇᕗᒻᒥᐅᑦ ᐅᐸᒍᑎᑦᑕᐃᓕᒋᐊᓖᑦ ᐊᒥᓱᕋᔭᕐᓄᑦ ᑲᑎᓯᒪᔪᓄᑦ ᓄᓇᓕᓐᓂᓗ ᖃᖓᑕᔫᒃᑯᕕᖏᓐᓅᖅᑕᐃᓕᒪᓗᑎᒃ ᐅᐸᒋᐊᑐᙱᒃᑯᑎᒃ. ᓄᓇᕗᒻᒥᐅᑦ ᐳᓚᕋᖃᑦᑕᐅᑎᓗᐊᖁᔭᐅᒍᓐᓃᖅᑐᑦ.

ᐅᓪᓗᒥ ᐱᒋᐊᕐᓗᓂ, ᖃᓂᒪᔪᓄᑦ ᓇᓗᓇᐃᒃᑯᑕᕐᓂᒃ ᑐᓂᔭᐅᔪᖃᔾᔮᒍᓐᓃᖅᑐᖅ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂ ᖃᖓᒃᑯᑦ ᓇᓗᓇᐃᖅᑕᐅᓚᙱᓐᓂᖓᓂ. ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᑐᓕᖁᔨᒻᒥᔪᑦ ᑲᑐᔾᔨᖃᑎᒌᑦ ᓄᓇᕗᒻᒥ ᖁᔭᓈᖅᓯᓯᒪᑲᐃᓐᓇᖁᓪᓗᒋᑦ ᓘᑦᑖᓂᒃ ᖃᓂᒪᔪᓄᑦ ᓇᓗᓇᐃᒃᑯᑕᖅᑖᕆᐊᖃᖅᑎᑦᓯᓂᕐᒥᒃ. ᓄᓇᕗᑦ ᒐᕙᒪᒃᑯᑦ ᖁᔭᓈᖅᓯᓯᒪᓚᐅᖅᑐᑦ ᖃᓂᒪᔪᓄᑦ ᓇᓗᓇᐃᒃᑯᑕᖅᑖᕆᐊᖃᕐᓂᕐᒥᒃ ᐃᖅᑲᓇᐃᔭᖅᑎᖏᓐᓄᑦ ᐱᓇᓱᐊᕈᓯᐅᓚᐅᖅᑐᒥ.
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᑯᓂ ᓄᓇᕗᓕᒫᒥ ᓯᐊᕐᒪᖅᑐᖃᓕᕐᓂᖅᑲᑦ ᐸᕐᓇᐅᑎᓕᐅᖅᓯᒪᔪᑦ. ᐋᓐᓂᐊᕐᕕᑦ ᓄᓇᓕᓕᒫᒥ ᓱᓇᒃᑯᑖᖃᑦᓯᐊᖅᑐᑦ ᐊᑐᐃᓐᓇᐅᓪᓗᑎᓪᓗ ᐃᓅᓕᓴᐃᒍᓐᓇᓂᕐᒧᑦ.

ᓴᓗᒪᖅᓴᐃᓂᖅᓴᐅᖃᑦᑕᓕᖅᑐᑦ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖏᓐᓂ ᖃᖓᑕᔫᒃᑯᕕᓐᓂᓗ. ᐃᓕᓐᓂᐊᕐᕕᑦ ᓄᓇᕗᒻᒥ ᑎᓕᔭᐅᓯᒪᔪᑦ ᓴᓗᒻᒪᖅᓴᐃᓂᖅᓴᐅᖃᑦᑕᖁᓪᓗᒋᑦ, ᐅᐊᓴᑦᓯᐊᖃᑦᑕᖁᔨᓪᓗᑎᒃ ᐊᓪᓚᕆᐊᖅᓯᖃᑦᑕᕐᓗᑎᓪᓗ ᐊᑐᓕᖅᑎᑦᓯᓪᓗᑎᓪᓗ ᑕᐅᖅᓰᖃᑦᑕᖁᔨᙱᓂᕐᒥᒃ ᒪᓕᑦᑕᐅᖁᔨᔪᑦ.

ᓄᓇᕗᒻᒥ ᑐᐊᕕᕐᓇᖅᑐᓕᕆᓂᕐᒧᑦ ᑲᑎᒪᔨᕋᓛᑦ ᐃᓚᒋᔭᐅᕕᐅᔪᑦ ᐊᖏᔪᖅᑲᐅᑎᓂᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓂᒃ, ᑭᒡᒐᖅᑐᐃᔨᖃᖅᑐᑎᒃ ᐊᕕᑦᑐᖅᓯᒪᓂᓕᒫᖏᓐᓂ ᓄᓇᕗᒻᒥ, ᐊᒻᒪᓗ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ, ᖃᐅᔨᓴᖅᐸᓪᓕᐊᖏᓐᓇᖅᑐᑦ ᖃᓄᐃᑉᐸᓪᓕᐊᒍᑕᐅᔪᓂᒃ ᓄᓇᕗᒻᒥ ᐋᓐᓂᐊᕐᕕᓕᒫᖏᓐᓂ ᑐᑭᒧᐊᖅᑎᑦᓯᓪᓗᑎᓪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᓄᐃᓕᒋᐊᕈᑎᖃᕆᐊᖃᕐᓂᖏᓐᓂᒃ ᖃᓂᒪᓐᓇᒧᑦ COVID-19 ᓄᓇᕗᒻᒥ.
ᖄᒃᑲᓐᓂᖓᒍᑦ, ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖏᑦ ᐅᓪᓗᑕᒫᑦ ᑲᑎᒪᖃᑦᑕᖅᑐᑦ ᑐᑭᒧᐊᖅᑎᑦᓯᓪᓗᑎᒃ ᐅᐸᓗᖓᐃᔭᕐᓂᕐᒧᑦ ᖃᓄᐃᓕᐅᕈᑎᐅᒋᐊᓕᓐᓂᒃ. ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᖃᑎᖃᐃᓐᓇᖅᑐᑦ ᑲᑐᔾᔨᖃᑎᒥᓂᒃ ᑲᓇᑕᓕᒫᒥ ᑐᑭᒧᐊᖃᑎᒌᑦᓯᐊᕐᓂᒃᑯᑦ ᖃᓄᐃᓕᒋᐊᕈᑎᖃᕈᒪᓪᓗᑎᒃ.

“ᑐᑭᓯᐅᒪᔪᖓ ᑕᒪᓐᓇ ᓇᓗᓈᕿᓇᕐᖓᑦ, ᐊᓯᔾᔨᖅᐸᓪᓕᐊᖏᓐᓇᖅᑐᓂᓗ. ᖃᓄᐃᙱᑦᑐᖅ ᐃᓱᒫᓗᓪᓗᓂ, ᑭᓯᐊᓂ ᐅᐸᓗᖓᐃᔭᖅᓯᒪᒋᐊᖃᖅᑐᒍᑦ. ᐊᑲᐅᓂᖅᐹᖅ ᖃᓄᐃᓕᒋᐊᕈᑎᖃᕐᓗᓂ ᖃᐅᔨᒪᑦᓯᐊᖏᓐᓇᕋᓱᐊᕐᓗᓂ ᖃᓄᐃᑉᐸᓪᓕᐊᔪᓂᒃ ᖃᓂᒻᒪᑦᑕᐃᓕᒍᑎᑦᓴᓂᓪᓗ ᐅᔾᔨᖅᓱᑦᓯᐊᕐᓗᑕ: ᖃᓂᒪᒍᕕᑦ, ᐊᖏᕐᕋᖅᓯᒪᑐᐃᓐᓇᕆᑦ; ᐅᔾᔨᖅᓱᕐᓗᑎᑦ ᐊᐅᓪᓚᕐᕕᐅᖁᔭᐅᙱᑦᑐᓂᒃ ᐊᒻᒪᓗ ᓈᓚᑦᓯᐊᖃᑦᑕᕐᓗᑎᑦ ᐅᖃᐅᔾᔨᒋᐊᕈᑕᐅᔪᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᖃᐅᔨᒪᔨᑕᕐᓂᒃ,” ᐅᖃᖅᓯᒪᔪᖅ ᓗᑦᑖᖅ ᐸᑐᓴᓐ.

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᓂᒻᒪᑦᑕᐃᓕᒍᑎᑦᓴᓂᒃ, ᐅᕗᙵᕐᓗᑎᑦ: https://www.gov.nu.ca/iu/aanniaqangnanngittulirijikku/information/aniqsa...

ᑐᑭᓯᒋᐊᒃᑲᓐᓂᕈᒪᒍᕕᑦ ᐊᐅᓪᓚᕈᓐᓇᓂᕐᒧᑦ ᐊᓯᖏᓐᓄᓪᓗ ᑐᕌᖓᔪᓂᒃ ᐅᔾᔨᖅᓱᖁᔭᐅᒍᑎᓂᒃ ᐅᕗᙵᕐᓗᑎᑦ: https://travel.gc.ca/travelling/advisories

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑯᕆᔅ ᐳᒡᓕᐊ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5762
cpuglia@gov.nu.ca