ᐅᖃᓚᐅᑎᓯᐅᑏᑦ

You are here

ᓄᓇᕗᒻᒧᑦ ᐸᕐᓇᐅᑎᖓ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔨᑦᑎᕋᐅᑏᑦ ᑲᔪᓯᓂᕆᔭᖏᓐᓄᑦ ᐊᐅᔭᒃᑯᑦ

ᔪᓚᐃ 16, 2021

ᐱᕙᓪᓕᐊᔪᑦ ᓴᖅᑭᑕᑦ

ᓴᖅᑭᖅᑕᐅᑦᑕᐅᑎᒋᒋᐊᓕᒃ

ᓄᓇᕗᒻᒧᑦ ᐸᕐᓇᐅᑎᖓ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔨᑦᑎᕋᐅᑏᑦ ᑲᔪᓯᓂᕆᔭᖏᓐᓄᑦ ᐊᐅᔭᒃᑯᑦ

ᐃᖃᓗᐃᑦ, ᓄᓇᕗᑦ (ᔪᓚᐃ 16, 2021) − ᓄᓇᕗᒻᒥᑦ ᓄᓇᓖᑦ ᐃᓚᖏᑦ ᖃᐅᔨᓂᐊᖅᑐᑦ ᐋᓐᓂᐊᕕᖏᑦ ᒪᑐᓯᒪᑎᑕᐅᑲᐃᓐᓇᕐᓂᐊᕐᒪᑕ ᐅᕝᕙᓗ ᐱᔨᑦᑎᕋᕐᓂᕆᕙᑦᑕᖏᑦ ᐃᓚᖏᑦ ᓄᖅᑲᖓᑎᑕᐅᓂᐊᖅᑐᑦ ᐊᐅᔭᐅᓂᖓᓂᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓ ᐱᓕᕆᖃᑎᖃᕐᓂᒃᑯᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᒻᒪᓗ ᓄᓇᕗᒻᒥ ᐱᓕᕆᖃᑎᒌᖑᔪᑦ ᑖᒃᑯᐊ ᓄᓇᕗᒻᒥᐅᑦ ᐋᓐᓂᐊᕕᒻᒥᑦ ᑲᒪᒋᔭᐅᔭᕆᐊᖃᖅᑎᓪᓗᒋᑦ ᐊᑐᐃᓐᓇᖃᕈᓐᓇᖁᓪᓗᒋᑦ ᑖᒃᑯᐊ ᐃᖅᑲᓇᐃᔭᖅᑎᑭᖅᓱᖅᑎᓪᓗᒋᑦ ᒫᓐᓇ ᐋᖅᑭᓱᖅᑕᐅᓯᒪᓂᐊᖅᑐᑦ.

"ᓄᕙᕐᔪᐊᕐᓇᖅ-19 ᐊᒥᓱᓄᑦ ᐋᓐᓂᐊᓕᕈᑕᐅᓯᒪᔪᖅ ᐊᒻᒪᓗ ᑲᓇᑕᓕᒫᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓂᔅᓴᓂᑦ ᐱᔭᕆᐊᑦᑐᖅᑎᑦᑎᓯᒪᔪᖅ ᓄᓇᕗᒻᒧ ᐃᖅᑲᓇᐃᔭᖅᑎᔅᓴᖅᑖᕋᓱᐊᓂᕐᒥᑦ," ᐅᖃᖅᑐᖅ ᒥᓂᔅᑕ ᖁᐊᓴ ᑯᓱᒐᖅ. "ᐱᓕᕆᕝᕕᒋᔭᕗᑦ ᑖᓐᓇ ᐅᐸᓗᖓᐃᔭᖅᓯᒪᔾᔪᑎᒥᑦ ᐋᖅᑭᔅᓱᐃᓯᒪᔪᑦ ᐸᕐᓇᐅᑎᒥᑦ ᑲᔪᓯᔪᓐᓇᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᔨᑦᑎᕋᐅᑎᖏᑦ ᐊᑦᑐᖅᑕᐅᔪᓂᑦ ᓄᓇᓕᓐᓂᑦ ᑖᒃᑯᐊ ᐊᔅᓱᕈᒻᒪᕆᓪᓗᑎᑦ ᐃᖅᑲᓇᐃᔭᖅᑎᔅᓴᐅᔪᓂᑦ ᕿᓂᕐᓂᖃᐃᓐᓇᖅᑎᓪᓗᒋᑦ ᐊᐅᔭᐅᓂᖓᓂᑦ."

ᐊᐅᔭᐅᓂᓕᒫᖓᓂᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓ ᐃᑲᔪᖅᑕᐅᓂᐊᖅᑐᑦ ᓄᑖᖅ ᑖᓐᓇ ᐱᒋᐊᖅᑐᖅ ᑳᓐᑐᕌᒃ ᐸᐃᓱᐊ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐱᒍᔾᔨᔨᔨᐅᔪᓂᑦ, ᑖᒃᑯᐊ ᑳᓐᑐᕌᒃᑕᐅᓚᐅᖅᑐᑦ ᒫᑦᓯ 23ᒥᑦ ᐋᓐᓂᐊᖅᓯᐅᑎᖃᖅᑎᑦᑎᔨᐅᓂᐊᕐᒪᑕ ᐊᒻᒪᓗ ᐃᕐᓂᓱᒃᓰᔨᓂᑦ ᓄᓇᕗᒻᒧ. ᑖᓐᓇ ᐱᓕᕆᖃᑎᒌᓐᓂᐅᔪᖅ ᐱᓪᓗᒍ ᐃᖅᑲᓇᐃᔭᖅᑎᑖᖅᐸᓪᓕᐊᓇᓱᐊᖅᑎᓪᓗᒋᑦ ᐱᓇᓱᐊᕈᓯᕐᓂᑦ ᐊᓂᒍᖅᑐᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ ᐊᔪᕈᓐᓃᖅᑎᑦᑎᓯᒪᔪᑦ ᐋᓐᓂᐊᕐᕕᓐᓂᑦ ᒪᑐᔭᐅᓂᐊᖅᓯᒪᔪᓂᑦ ᒪᑐᐃᖓᐃᓐᓇᖅᑎᑦᑎᔪᓐᓇᖅᓯᓪᓗᑎᑦ ᐃᓚᐃᓐᓇᖓᒍᑦ ᐊᐅᔭᐅᓂᐊᖅᑐᒥᑦ, ᐃᓚᖏᑦ ᑭᓯᐊᓂ ᒪᑐᓯᒪᔭᕆᐊᖃᕐᓂᐊᖅᑐᑦ ᐃᖅᑲᓇᐃᔭᖅᑎᖃᕐᓂᕆᔭᖏᑦ ᐊᓯᔾᔨᖏᑉᐸᑕ.

ᓄᓇᓕᓐᓂᑦ ᑖᒃᑯᓂᖓ ᐋᓐᓂᐊᕐᕕᖏᑦ ᒪᑐᓯᒪᔭᐅᓂᐊᖅᑐᓂᑦ ᐅᕝᕙᓗ ᐃᓚᐃᓐᓇᖏᓐᓂᑦ ᐱᔨᑦᑎᖅᑕᐅᓂᐊᖅᑐᓂᑦ, ᑖᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓ ᐊᑐᖅᑎᑦᑎᓂᐊᖅᑐᑦ ᐃᑭᐊᖅᑭᕕᒃᑰᖓᓗᒋᑦ ᑕᑯᔭᐅᔪᑦ, ᐊᐅᓪᓚᖅᑎᑕᐅᓗᑎᑦ ᐊᒻᒪᓗ ᑖᒃᑯᓄᖓ ᑐᐊᕕᕐᓇᖅᑐᓕᕆᔨᓄᑦ ᐱᔨᑦᑎᕈᑕᐅᕙᑦᑐᓂᑦ ᑖᒃᑯᐊ ᐃᑲᔪᖅᑕᐅᔪᓐᓇᖁᓪᓗᒋ ᐃᑲᔪᖅᑕᐅᔭᕆᐊᓖᑦ. ᐋᓐᓂᐊᕕᖏᓐᓄᑦ ᓱᓕ ᐅᖄᓚᖃᑦᑕᕐᓂᐊᖅᑐᑦ ᐊᒻᒪᓗ ᑐᕌᖅᑎᑕᐅᖃᑦᑕᕐᓗᑎᑦ ᐃᑭᐊᖅᑭᕕᒃᑰᖓᔪᒧᑦ ᐱᔨᑦᑎᕋᐅᑎᒧᑦ ᑐᓂᔭᐅᖃᑦᑕᕐᓂᐊᖅᑐᑦ. ᐅᖄᓚᔪᑦ ᑐᕌᑲᐅᑎᒋᔪᓐᓇᕐᓂᐊᖅᑐᑦ ᓄᓇᓕᓐᓄᑦ, ᐊᒻᒪᓗ ᐅᖄᓚᔪᑦ ᐃᓕᓯᑦᑕᐃᓕᖁᔭᐅᔪᑦ ᑭᖑᕙᖅᐸᑦ ᑖᓐᓇ ᑐᕌᖅᑎᑕᐅᓇᓱᓐᓂᖓᓂᑦ ᐊᓯᐊᓄᑦ. ᐃᖅᑲᓇᐃᔭᖅᑎᖏᑦ ᐃᑲᔪᖅᑎᐅᖃᑦᑕᖅᑐᑦ ᓱᓕ ᑲᔪᓯᓂᐊᖅᑐᑦ ᓲᕐᓗ ᒪᑯᓄᖓ ᐃᓅᓕᓴᐅᑎᑖᖑᔭᕆᐊᓕᓐᓂᑦ ᑎᑎᕋᖅᑕᐅᑎᑦᑎᓂᕐᒧᑦ, ᑭᓯᐊᓂ ᓄᓇᕗᒻᒥᐅᑦ ᐊᑦᑐᖅᑕᐅᔪᓂᑦ ᑕᒪᔅᓱᒧᖓ ᐃᖅᑲᐅᒪᖁᔭᐅᕗᑦ ᑭᖑᕙᖅᓯᒪᑐᐃᓐᓇᕆᐊᖃᕐᒪᑕ.

ᐃᑭᐊᖅᑭᕕᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ, ᑐᐊᕕᕐᓇᖅᑐᓕᕆᔨᒃᑯᑦ ᐊᒻᒪᓗ ᐊᓯᖏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᖏᑦ ᓱᓕ ᑲᔪᓯᓂᐊᖅᑐᑦ ᖃᓄᐃᓕᐅᕆᐊᕈᑎᖃᕐᓂᕐᒧᑦ ᓄᕙᕐᔪᐊᕐᓇᖅ-19 ᐱᑕᖃᖅᑐᒥᓂᐅᑉᐸᑦ ᓄᓇᓕᒻᒥ, ᖃᐅᔨᓴᕐᓂᕐᒥᑦ, ᐊᒻᒪᓗ ᐃᓄᐃᑦ ᖃᐅᔨᓴᖅᑕᐅᕙᓪᓕᐊᓗᑎᑦ ᑭᓇᒃᑯᑦ ᑲᑎᓯᒪᔭᐅᓐᓂᕐᒪᖔᑕ. ᐋᓐᓂᐊᓕᕇᒃᑯᑎ ᑲᐴᑎᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ ᐃᓂᔅᓴᓕᐅᕐᓂᒃᑯᑦ ᐊᒻᒪᓗ ᓱᓕ ᑲᐱᓯᖃᑦᑕᕐᓂᐊᖅᑐᑦ ᑖᒃᑯᐊ ᑐᐊᕕᕐᓇᖅᑐᓕᕆᔨᒃᑯᑎᒍᑦ ᐅᕝᕙᓘᓐᓃᑦ ᓚᐃᓴᖃᖅᑐᒧᑦ ᐋᓐᓂᐊᓯᐅᖅᑎᐅᔪᒧᑦ.

ᐱᔨᑦᑎᕋᕐᓂᕆᕙᑦᑕᖏᑦ ᐃᓚᖏᑦ ᓄᖅᑲᖓᑎᑕᐅᔪᑦ ᐅᕝᕙᓗ ᒪᑐᔭᐅᔪᑦ ᐊᓯᔾᔨᕈᓐᓇᖅᑐᑦ ᐃᖅᑲᓇᐃᔭᖅᑎᑖᑐᐊᖅᐸᑕ. ᐱᔨᑦᑎᕋᐅᑏᑦ ᐊᓯᔾᔨᑐᐃᓐᓇᕆᐊᓖᑦ ᐃᖅᑲᓇᐃᔭᖅᑎᖏᑦ ᐊᓯᔾᔨᖅᑕᐅᓂᖅᐸᑕ.

ᓄᓇᓕᖕᓂ ᐋᓐᓂᐊᕖᑦ ᒪᑐᓯᒪᖃᑦᑕᕐᓂᖏᑦ:

ᐊᐅᓱᐃᑦᑐᖅ: ᐊᐅᒡᒍᓯᐅᑉ ᕿᑎᐊᓂᑦ
ᖃᐅᓱᐃᑦᑐᖅ: ᐊᐅᒡᒍᓯᐅᑉ ᕿᑎᐊᓂᑦ

ᐋᓐᓂᐊᕕᒃ ᒪᑐᓯᒪᓂᐊᖅᑐᖅ ᑭᓯᐊᓂ ᑐᐊᕕᕐᓇᖅᑐᖃᖅᐸᑦ:

ᑰᒑᕐᕈᒃ: ᐊᐅᒡᒍᓯ 1ᒥ 15ᒧᑦ
ᑕᓗᕐᔪᐊᖅ: ᔪᓚᐃ 30ᒥ ᐊᐅᒡᒍᓯ 13ᒧᑦ
ᑲᖏᖅᑐᒑᐱᒃ: ᐊᐅᒡᒍᓯ 9ᒥ ᐊᐅᒡᒍᓯ 24ᒧᑦ
ᓴᓂᑭᓗᐊᖅ: ᔪᓚᐃ 26ᒥ ᐊᐅᒡᒍᓯ 31ᒧᑦ
ᓇᐅᔮᑦ: ᐊᐅᒍᔅᓯ 12ᒥ ᐊᐅᒡᒍᓯ 31ᒧᑦ

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca