ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥᐅᑕᖅ ᐋᓐᓂᐊᕕᓕᐊᖅᓯᒪᓪᓗᓂ ᐊᐅᓪᓚᖅᓯᒪᔪᖅ ᓇᓗᓇᐃᖅᑕᐅᕗᖅ ᐱᖃᓪᓚᕆᖕᓂᖓᓂᒃ ᓄᕙᒡᔪᐊᕐᓇᖅ-19−ᒥᒃ

ᒪᐃ 18, 2020

ᐱᕙᓪᓕᐊᔪᖅ ᓴᖅᑭᑕᖅ

ᓄᓇᕗᒻᒥᐅᑕᖅ ᐋᓐᓂᐊᕕᓕᐊᖅᓯᒪᓪᓗᓂ ᐊᐅᓪᓚᖅᓯᒪᔪᖅ ᓇᓗᓇᐃᖅᑕᐅᕗᖅ ᐱᖃᓪᓚᕆᖕᓂᖓᓂᒃ ᓄᕙᒡᔪᐊᕐᓇᖅ-19−ᒥᒃ

ᐃᖃᓗᐃᑦ, ᓄᓇᕗᑦ (ᒪᐃ 18, 2020) − ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖓᑦ, ᓇᓗᓇᐃᖅᓯᓯᒪᓕᖅᐳᖅ ᓄᓇᕗᒻᒥᐅᑕᒥᒃ ᐊᐅᓪᓚᖅᓯᒪᔪᒥᒃ ᐋᓐᓂᐊᕕᓕᐊᖅᓯᒪᓪᓗᓂ ᓄᓇᒋᙱᑕᒥᓄᑦ ᓇᓗᓇᐃᕐᕕᐅᓯᒪᓕᕐᓂᖓᓂᒃ ᐱᖃᕐᓂᖓᓂᒃ ᓄᕙᒡᔪᐊᕐᓇᖅ-19−ᒥᒃ (novel coronavirus-ᖑᓂᕋᖅᑕᐅᒋᓪᓗᓂ).

"ᑖᓐᓇ ᑲᒪᒋᔭᐅᑦᑎᐊᖅᑐᖅ ᖃᓪᓗᓈᓂ ᖃᓄᐃᙱᖦᖢᓂᓗ." ᑖᓐᓇ ᓘᒃᑖᖅ ᐹᑐᓴᓐ, ᐅᖃᖅᖢᓂ. "ᓇᓗᙱᑦᑎᐊᖅᐳᒍᑦ ᑕᒪᓐᓇ ᒥᑭᑦᑐᑯᓗᖕᒥᒃ ᖁᐊᖅᓵᕐᓇᖅᑎᑦᑎᓂᖓᓂᒃ ᓄᓇᕗᒻᒧᐊᖅᑎᑦᑎᓇᔭᕆᐊᒃᓴᖅ ᑕᒪᑐᒥᖓ ᖃᓂᒪᓐᓇᖅᑐᒥᒃ, ᐃᒪᐃᓐᓂᖓᓄᑦ, ᐊᒥᓱᑦ ᓄᒃᑕᓚᐅᖅᑐᑦ ᑖᔅᓱᒧᖓ ᖃᓂᒃᓴᖅᑐᕕᓃᑦ ᐅᐸᒃᑕᐅᑦᑕᐅᓕᒪᓕᕆᐊᖃᕐᓂᐊᕐᒪᑕ 14−ᓄᑦ ᐅᓪᓗᓄᑦ ᐅᑎᓚᐅᙱᓐᓂᕐᒥᓂᒃ ᓄᓇᕗᒻᒧᑦ.

ᑖᓐᓇ ᐃᓗᐊᖅᓴᖅᑕᐅᔭᖅᑐᖅᓯᒪᔪᖅ ᖃᓪᓗᓈᓂᓯᐅᖅᓯᒪᔪᖅ 6−ᐸᓗᖕᓄᑦ ᐱᓇᓱᐊᕈᓯᕐᓄᑦ ᑲᒪᒋᔭᐅᔭᖅᑐᖅᓯᒪᓪᓗᓂ ᑲᒪᒋᔭᐅᔪᒃᓴᒧᑦ ᐊᑦᑐᐊᓂᖃᙱᑦᑐᒧᑦ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ. ᑲᙳᓇᕆᐊᖃᕐᓂᖓᓂᒃ ᐃᓱᒫᓗᖕᓇᑐᐃᓐᓇᕆᐊᓕᖕᓄᓪᓗ, ᑕᒫᓂᐅᓂᖓᓄᓪᓗ, ᑕᑉᐹᓂᐅᙱᑦᑐᖅ, ᓄᓇᕗᑦ ᒐᕙᒪᖓ ᑖᔅᓱᒪ ᓄᓇᖓᑕ ᒥᒃᓵᓄᑦ ᓴᖅᑭᑎᑦᑎᔾᔮᙱᑦᑐᑦ ᖃᓄᑐᐃᓐᓇᖅ ᑐᓴᒐᒃᓴᓂᒃ

"ᑕᐃᒪᑐᖅ ᑖᓐᓇ ᖃᓄᐃᑦᑐᓐᓃᑲᐅᖅᑐᕐᓂᐊᖅᐳᖅ, ᖃᐅᔨᒪᓪᓗᖓᓗ ᑲᒪᒋᔭᐅᑦᑎᐊᖅᑐᒻᒪᕆᐅᓂᖏᓐᓂᒃ ᑕᐅᓇᓂ ᖃᓪᖢᓈᓂ. ᑐᓴᖅᑎᑦᑎᐊᒃᑲᓐᓂᕈᒪᕙᒃᑲ ᓄᓇᕗᒻᒥᐅᑦ ᑕᒪᓐᓇ ᖁᐊᖅᓵᕐᓇᖅᑐᒃᑲᓐᓂᕐᒥᒃ ᓴᖅᑭᑎᑦᑎᙱᓐᓂᖓᓂᒃ ᑕᒫᓂ ᐊᕕᒃᓯᒪᓂᕐᒥ ᐅᑭᐅᖅᑕᖅᑐᒥ, ᑭᓯᐊᓂᓗᑦᑕᐅᖅ ᑎᓕᐅᖅᐸᒃᑲ ᑭᒃᑯᓕᒫᑦᑎᐊᑦ ᐅᔾᔨᖅᓱᐃᓐᓇᑦᑎᐊᖁᓪᓗᒋᑦ ᐱᓇᔪᖕᓂᕆᔭᒥᓂ ᓄᖅᑲᖅᑎᑦᑎᔪᒪᓪᓗᑎᒃ ᓯᐊᒻᒪᒃᐸᓪᓕᐊᓇᔭᕐᓂᖓᓂᒃ ᓄᕙᒡᔪᐊᕐᓇᖅ-19 ᓄᓇᕗᒻᒥ," ᒥᓂᔅᑕᕆᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔪᐊᔾ ᕼᐃᒃᔅ ᐅᖃᖅᖢᓂ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦᓇᐅᑦᑎᖅᓱᐃᓐᓇᕐᓂᐊᖅᐳᑦ ᑕᒪᐃᓐᓂᒃ ᐃᓗᐊᖅᓴᖅᑕᐅᔪᒥᒃ ᐊᐅᓪᓚᕈᔾᔨᔨᒋᓚᐅᖅᑕᖓᓂᒡᓗ ᖃᓄᐃᓕᕙᓪᓕᐊᓂᖏᖕᓂᒃ, ᖃᐅᔨᒪᑦᑎᐊᖅᐸᒡᓗᑎᒡᓗ ᐃᓚᖏᑦ ᑐᓴᐅᒪᑎᑕᐊᑦᑎᐊᕋᓗᐊᕐᒪᖔᑕ, ᖃᓄᑐᐃᓐᓇᕐᓗ ᐃᑲᔪᖅᑕᐅᔭᕆᐊᖃᕐᓂᕐᒥᒃ ᐃᑲᔪᖅᑕᐅᒐᓗᐊᕐᒪᖔᑕ. ᓄᑖᙳᕆᐊᖅᓯᒪᔪᓂᒃ ᐱᑎᑦᑎᔪᖃᕐᓂᐊᖅᐳᖅ ᓄᓇᕗᑦ ᒐᕙᒪᖓ ᐱᕙᓪᓕᐊᔪᓂᒃ ᓄᑖᙳᕆᐊᖅᑎᑦᑎᓕᖅᐸᑕ ᐊᐃᑉᐹᓂ, ᒪᐃ 19, 2020−ᒥ, 3:00-ᒧᐊᖅᐸᑦ ᐅᓐᓄᒃᓴᒃᑯᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
cpuglia@gov.nu.ca