ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᖁᕕᐊᓲᑎᖃᖅᑐᑦ ᐃᓅᓯᕐᒥ ᐃᓵᒃᓯᒪᒋᒃᑯᑦ ᐅᓪᓗᖓᓐᓂᑦ

ᓯᑎᐱᕆ 10, 2020

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᓄᓇᕗᒻᒥ ᖁᕕᐊᓲᑎᖃᖅᑐᑦ ᐃᓅᓯᕐᒥ ᐃᓵᒃᓯᒪᒋᒃᑯᑦ ᐅᓪᓗᖓᓐᓂᑦ

ᐃᓅᓯᕐᒥ ᐃᓵᒃᓯᒪᒋᑦ ᐅᓪᓗᕆᑎᓪᓗᓂᐅᒃ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓕᐅᕆᕗᑦ ᓄᓇᕗᒻᒥᐅᓂᒃ ᖃᓄᐃᙱᑦᑎᐊᕐᓇᖅᑐᓂᒃ ᐱᓕᕆᖃᑕᐅᖁᓪᓗᒋᑦ ᐃᑲᔫᑎᓕᖕᓂᒃ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᖃᓄᐃᙱᑦᑎᐊᕈᓯᕐᓄᑦ. ᑖᒃᑯᓇᓂ ᐅᓪᓗᓂᑦ ᐊᑐᖅᑕᑎᓐᓂᑦ ᓇᓗᓇᖅᑐᒦᖃᑦᑕᑎᓪᓗᑕ, ᐱᓯᒪᑦᑎᑦᑎᐊᕆᐊᖃᕐᓂᕐᒥᑦ ᖃᓄᐃᖏᑦᑎᐊᕋᓱᓐᓂᕆᔭᑦᑎᓐᓂᑦ ᐱᒻᒪᕆᐅᒻᒪᑦ ᑎᒥᒃᑯᑦ ᖃᓄᐃᑦᑎᐊᕈᑎᒋᓗᒍ.

ᐃᒻᒥᓂ ᑲᒪᒋᑦᑎᐊᕐᓂᖅ ᐊᒻᒪᓗ ᕿᓄᐃᓵᕈᓐᓇᕐᓂᖅ ᒪᑭᑕᑦᑎᐊᕐᓇᖅᐳᑦ ᐃᓱᒪᒧᓪᓗ ᖃᓄᐃᙱᑦᑎᐊᕐᓇᖅᖢᓂ. ᐱᖃᓐᓇᕆᔭᑦ ᐱᓕᕆᖃᑎᒋᕙᒡᓗᒋᑦ, ᐊᐅᓪᓛᖅᓯᒪᖃᑎᒋᕙᒡᓗᒋᑦ, ᐃᓚᐅᕝᕕᒋᕙᒡᓗᒋᑦ ᐱᖅᑯᓯᒃᑯᑦ ᐱᓕᕆᐊᑦ ᓲᕐᓗ ᒥᖅᓱᖅᑐᑦ, ᐊᖑᓇᓱᒃᑐᑦ, ᐅᕝᕙᓘᓐᓃᑦ ᓴᓇᐅᒐᓕᕆᔪᑦ, ᓂᕿᑦᑎᐊᕙᖕᓂᒃ ᓂᕆᔪᑦ, ᐊᒻᒪᓗ ᐃᑲᔪᖅᑕᐅᔪᒪᓂ ᐃᑲᔪᖅᑕᐅᔭᕆᐊᖃᓕᕈᕕᑦ.

ᐳᐃᒍᖅᑕᐃᓕᒋᑦ, ᐃᓄᑑᙱᓐᓇᕕᑦ ᐃᑲᔪᖅᑕᐅᔪᓐᓇᐃᓐᓇᖅᖢᑎᓪᓗ. ᐃᑲᔪᖅᑕᐅᔭᕆᐊᖃᕈᕕᑦ ᐃᑲᔪᖅᑕᐅᔭᕆᐊᓕᖕᒥᓪᓘᓐᓃᑦ ᖃᐅᔨᒪᒍᕕᑦ, ᐅᖃᓪᓚᖃᑎᖃᕆᑦ ᐱᖃᓐᓇᕆᔭᕐᓄᑦ, ᖃᑕᙳᑎᖕᓄᑦ, ᐃᓕᓴᐃᔨᒧᑦ, ᐃᓅᓯᓕᕆᔨᒧᑦ ᐅᕝᕙᓘᓐᓃᑦ ᐃᓐᓇᕐᒧᑦ. ᐊᑭᖃᙱᑦᑐᖅ, ᑐᓴᖅᑕᐅᔾᔮᙱᑦᑐᓂᑦ ᐃᓱᒪᒧᑦ ᐅᐃᕆᓯᒪᓂᖕᒧᓪᓗ ᐃᑲᔪᖅᑎᖃᖅᐳᑦ ᐋᓐᓂᐊᕕᖕᓂᑦ.

ᑭᓇᐅᓂᕐᓂ ᖃᐅᔨᔭᐅᙱᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖄᓚᓗᑎᑦ:

  • ᓄᓇᕗᑦ ᑲᒪᑦᑎᐊᖅᑐᖅ ᐅᖄᓚᐅᑖᓄᑦ ᐅᕗᖓ ᐊᑭᖃᖏᑦᑐᖅ 1-800-265-3333 ᐅᕝᕙᓘᓐᓃᑦ
  • 867-979-3333 (ᐊᑐᐃᓐᓇᐅᔪᑦ ᐃᑲᕐᕋᓄᑦ 24−ᓄᑦ);
  • - ᐊᒃᓱᕈᕐᓇᖅᑐᓄᑦ ᐱᔨᑦᑎᕋᖅᑎᑦ ᑲᓇᑕᒥ – ᖃᕆᓴᐅᔭᒃᑯᑦ ᐅᖃᖃᑎᖃᕆᑦ www.crisisservicescanada.ca, ᐅᖃᓗᒡᓗᑎᑦ, ᐅᕝᕙᓘᓐᓃᑦ ᐅᖃᓘᑎᕋᓛᒃᑯᑦ ᑎᑎᕋᕐᓗᑎᑦ 1-833-456-4566; ᐅᕝᕙᓘᓐᓃᑦ
  • ᓄᑕᖅᑲᓄᑦ ᐃᑲᔪᖅᑕᐅᕕᖕᒧᑦ ᐅᖄᓚᐅᑦ 1-800-668-6868, ᐅᖄᓚᐅᑎᕋᓛᒃᑯᑦ ᑎᑎᕋᕐᓗᑎᑦ 'TALK' ᐅᕗᖓ 686868, ᐅᕝᕙᓘᓐᓃᑦ ᖃᕋᓴᐅᔭᑦᑯᑦ ᐅᖃᖃᑎᖃᕆᑦ ᐅᕙᓂ www.kidshelpphone.ca.

ᐊᑦᑕᕐᓈᕿᓐᓂᕈᕕᑦ ᖃᐅᔨᒪᔭᓪᓘᓐᓃᑦ, ᐸᓖᓯᒃᑯᑦ ᐅᖃᓗᒡᕕᒋᓗᒋᑦ, ᐅᕝᕙᓘᓐᓃᑦ ᐋᓐᓂᐊᕕᓕᐊᕐᓗᑎᑦ ᐋᓐᓂᐊᕕᐊᓗᖕᒧᓪᓘᓐᓃᑦ ᐃᕐᖐᓐᓇᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca