ᐅᖃᓚᐅᑎᓯᐅᑏᑦ

You are here

ᓇᓗᓇᐃᖅᑕᐅᔫᒃ ᓄᕙᔾᔪᐊᕐᓇᑖᖅᓯᒪᔫᒃ 19 ᑲᐱᓯᓕᒃᑑᖅ (Hope Bay) ᐅᔭᕋᕐᓂᐊᕐᕕᖓᓂ

ᓯᑎᐱᕆ 19, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᓇᓗᓇᐃᖅᑕᐅᔫᒃ ᓄᕙᔾᔪᐊᕐᓇᑖᖅᓯᒪᔫᒃ 19 ᑲᐱᓯᓕᒃᑑᖅ (Hope Bay) ᐅᔭᕋᕐᓂᐊᕐᕕᖓᓂ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 19, 2020) − ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᒪᕐᕈᓐᓂᒃ ᓇᓗᓇᐃᖅᑕᐅᓯᒪᔫᓐᓂᒃ ᓄᕙᔾᔪᐊᕐᓇᖅ 19-ᒥᒃ ᑲᐱᓯᓕᒃᑑᖅ ᐅᔭᕋᕐᓂᐊᕐᕕᐊᓂ ᐅᖓᓯᓐᓂᓕᒻᒥ 125 ᑭᓚᒥᑕᓂᒃ ᓂᒋᐊᓂ ᐃᖃᓗᑦᑑᑦᑎᐊᖅ. ᑕᒪᒃᑮᒃ ᓇᓗᓇᐃᖅᑕᐅᓯᒪᔫᒃ ᑲᑎᓯᓯᒪᓐᓂᕆᐊᖏᒃ ᐊᖏᕐᕋᒥᓐᓂ. ᑲᑎᓯᔪᒥᓂᐅᒐᓗᐊᒃ ᐊᐅᓪᓚᓚᐅᖅᑎᓐᓇᒋᒃ, ᑕᒪᓐᓇ ᓇᓗᓇᐃᖅᑕᐅᓐᓂᒋᑦᑐᖅ ᑭᓯᐊᓂ ᑭᖑᓂᐊᒍᑦ ᑎᑭᓯᒪᓕᖅᑎᓪᓗᒋᒃ ᐅᔭᕋᕐᓂᐊᕐᕕᒻᒧᑦ.

“ᑕᒪᒃᑮᒃ ᐅᔭᕋᕐᓂᐊᖅᑏᒃ ᖃᓄᐃᒍᑎᖃᙱᑦᑑᒃ ᕿᓚᒥᐅᔪᒃᑯᓪᓗ ᐃᓄᑑᒋᐊᖃᓕᖅᑎᑕᐅᓚᐅᖅᑑᒃ ᖃᐅᔨᓴᖅᑕᐅᒍᑎᑦᓴᓂᓪᓗ ᐲᖅᓯᕕᐅᓪᓗᑎᒃ ᓄᕙᔾᔪᐊᕐᓇᕐᒧᑦ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ. “ᖃᐅᔨᓴᕋᑦᓴᐃᑦ ᓇᓗᓇᐃᖅᑕᐅᓚᐅᖅᑑᒃ ᓄᕙᔾᔪᐊᕐᓇᖅᑑᓂᖏᓐᓂᒃ GeneXpert ᖃᐅᔨᓴᕈᑎᒧᑦ ᑲᖏᖅᖠᓂᕐᒥ ᐅᓐᓄᒃᑯᑦ ᓯᑎᐱᕆ 16 ᓇᓗᓇᐃᖅᑕᐅᒋᐊᒃᑲᓐᓂᖅᑐᑎᓪᓗ ᑲᓇᑕᒥ ᖃᐅᔨᓴᕐᕕᔾᔪᐊᖓᓂ ᐅᐃᓂᐱᒡᒥ ᐅᓪᓗᒥ.”

ᒫᓐᓇᐅᔪᖅ, ᓇᓗᓇᐃᖅᑕᐅᓯᒪᔪᖃᙱᑦᑐᖅ ᐊᐃᑦᑐᕐᓗᐃᓐᓂᕐᒪᖔᑎᒃ ᑲᐱᓕᓯᒃᑑᖅ ᐅᔭᕋᕐᓂᐊᕐᕕᖓᓂ. ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᖃᑎᒌᑦ ᐊᑐᐃᓐᓇᐅᔪᑦ ᐃᑲᔪᖅᓱᐃᒍᓐᓇᖅᑐᑎᒃ ᑭᐅᒍᓐᓇᖅᑐᓪᓗ, ᑕᐃᒪᐃᒋᐊᖃᑐᐊᕈᑎᒃ.

“ᑲᐱᓕᓯᒃᑑᕐᒥ ᐅᔭᕋᕐᓂᐊᕐᕕᒃ ᐊᓯᖏᓐᓄᑦ ᐅᐸᒐᑦᓴᐅᙱᑦᑐᖅ, ᓄᓇᕗᒻᒥᐅᓂᓪᓗ ᒫᓐᓇᐅᔪᖅ ᑕᐃᑲᓂ ᐃᖅᑲᓇᐃᔭᖅᑐᖃᙱᑦᑐᖅ. ᐅᓗᕆᐊᓇᕈᑕᐅᓂᖓ ᓄᕙᔾᔪᐊᕐᓇᖅ 19 ᓯᐊᕐᒪᒍᓐᓇᕐᓂᖓᓄᑦ ᓄᓇᓕᑦᑎᓐᓄᑦ ᑖᒃᑯᓈᙵᑦ ᐊᑉᐸᓯᑦᑐᖅ,” ᐅᖃᖅᓯᒪᔪᖅ ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᔪᐊᔾ ᕼᐃᒃᔅ. “ᖃᐅᔨᓴᑦᓯᐊᖅᑕᕗᑦ ᑕᒪᓐᓇ ᓄᓇᕗᒻᒥᐅᓪᓗ ᑐᓴᖅᑎᓯᒪᐃᓐᓇᕐᓂᐊᖅᑕᕗᑦ ᑭᓱᑐᐃᓐᓇᕐᓂᒃ ᐊᓯᔾᔨᖅᑐᖃᕐᓂᖅᑲᑦ.”
ᒫᓐᓇᐅᔪᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓖᑦ ᓄᓇᕗᑦ ᒪᑐᐃᖅᐸᓪᓕᐊᓂᖓ ᐊᒻᒪᓗ ᐊᐅᓪᓚᖃᑦᑕᕐᕕᐅᒍᓐᓇᖅᑐᑦ ᑰᔾᔪᐊᕌᓗᒃ, ᒫᓂᑐᐸᒧᑦ ᓄᓇᑦᓯᐊᕐᒧᓪᓗ, ᐊᑦᑐᖅᑕᐅᓂᖃᔾᔮᙱᑦᑐᑦ.

ᖃᓄᐃᒍᑕᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐃᓚᒋᔭᐅᓪᓗᑎᒃ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐃᐱᓂᐊᖃᑦᑕᕐᓂᕐᓘᓐᓃᑦ. ᓴᐳᒻᒥᓯᒪᑦᓯᐊᕈᓐᓇᖅᑐᑦ ᐊᐃᑦᑐᕐᓗᐃᑦᑕᐃᓕᓂᕐᒧᑦ ᐊᐃᑦᑐᕐᓗᑦᑕᐅᒍᓐᓇᓂᕐᒧᓪᓘᓐᓃᑦ ᓄᕙᔾᔪᐊᕐᓇᕐᒥᒃ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᑎᑦ ᐅᐊᓴᖃᑦᑕᕐᓗᒋᑦ 20 ᓴᑲᓐᓯᓂᒃ, ᖁᐃᖅᓱᖃᑦᑕᕐᓗᑎᒃ ᑕᒋᐅᖃᑦᑕᕐᓗᑎᓪᓗ ᐊᐃᕐᒥᓄᑦ ᐊᖏᕐᕋᖅᓯᒪᖃᑦᑕᕐᓗᑎᓪᓗ ᑕᐃᒪᐃᒍᓐᓇᕐᓂᓕᒫᒥᓂ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
cpuglia@gov.nu.ca