ᐅᖃᓚᐅᑎᓯᐅᑏᑦ

You are here

ᓇᓗᓇᐃᖅᑕᐅᔪᑦ ᓄᕙᕐᔪᐊᕐᓇᖅ-19 ᓯᐊᒻᒪᔅᓯᒪᓂᖓᓂ ᓄᓘᔮᑦ ᐅᔭᕋᖕᓂᐊᕐᕕᒻᒥ

ᒪᐃ 02, 2021

ᐱᕙᓪᓕᐊᔪᑦ ᓴᖅᑭᑕᑦ

ᓇᓗᓇᐃᖅᑕᐅᔪᑦ ᓄᕙᕐᔪᐊᕐᓇᖅ-19 ᓯᐊᒻᒪᔅᓯᒪᓂᖓᓂ ᓄᓘᔮᑦ ᐅᔭᕋᖕᓂᐊᕐᕕᒻᒥ

ᐃᖃᓗᐃᑦ, ᓄᓇᕗᑦ (ᒪᐃ 2, 2021) − ᐊᓐᓂᐊᖃᕐᓇᖏᑦᑐᓕᕆᔨᒻᒪᕆᒃ ᓄᓇᕗᒻᒥ, ᓅᑦᑖᖅ ᒪᐃᑯ ᐹᑐᓴᓐ ᐅᓪᓗᒥ ᓇᓗᓇᐃᖅᓯᕗᖅ ᓄᕙᕐᔪᐊᕐᓇᖅ-19 ᓯᐊᒻᒪᔅᓯᒪᓕᕐᓂᖓᓂᒃ ᓄᓗᔮᑦ ᐅᔭᕋᖕᓂᐊᕐᕕᓐᓂ, ᑖᓐᓇ 176 ᑭᓛᒥᑕᓂ ᐅᖓᓯᓐᓂᖃᖅᑐᖅ ᐱᖓᓐᓇᐸᓯᐊᓃᑦᑐᖅ ᒥᑦᑎᒪᑕᓕᐅᑉ. ᐅᓪᓗᒥ, ᐅᔭᕋᓐᓂᐊᕐᕕᒻᒥ 9ᓂᑦ ᐋᓐᓂᐊᓕᖅᓯᒪᔪᖃᖅᑐᖅ ᓄᕙᒡᔪᐊᕐᓇᖅ-19ᒧᑦ.

"ᑖᒃᑯᐊ ᑕᒪᕐᒥᒃ ᓇᓗᓇᐃᖅᑕᐅᓯᒪᓪᓚᑦᑖᑐ ᐃᓄᑐᐊᒃᑯᕕᖕᒦᑦᑐᑦ ᐊᒻᒪ ᖃᓄᐃᙱᑦᑐᑦ. ᖃᐅᓴᖅᑕᐸᓪᓕᐊᔭᕗᑦ ᖃᓄᐃᓐᓂᐅᔪᖅ, ᐊᒻᒪᓗ ᐃᑲᔪᕈᓐᓇᕐᓂᐊᖅᑕᕗᑦ ᑖᒃᑯᐊ ᐅᔭᕋᖕᓂᐊᕐᕕᐅᔪᑦ ᐃᑲᔪᖅᑕᐅᔭᕆᐊᖃᖅᐸᑕ," ᐅᖃᖅᑐᖅ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. "ᐅᔭᕋᓐᓂᐊᕐᕕᒻᒦᑦᑐᖃᙱᑦᑐᖅ ᒫᓐᓇ ᐃᖅᑲᓇᐃᔭᖅᑎᓂᑦ ᓄᓇᕗᒻᒥᐅᓂᑦ, ᑖᒃᑯᐊ ᕿᑭᖅᑖᓗᒻᒥ ᐅᔭᕋᓐᓂᐊᖅᑏᑦ ᒪᓕᒃᑕᐅᔭᕆᐊᖃᓪᓚᕆᑦᑐᓂᑦ ᐋᖅᑭᔅᓯᒪᔭᖏᓐᓂᑦ ᐊᖅᑐᑦᑐᑦ ᑖᒃᑯᐊ ᓄᓇᓕᓐᓅᕆᐊᖃᖅᑎᑕᐅᙱᑦᑐᑦ. ᑖᓐᓇ ᓯᐊᒻᒪᔅᓯᒪᓂᐅᔪᖅ ᐊᑦᑐᐃᓂᖃᙱᑦᑐᖅ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒫᓐᓇ ᐊᑐᖅᑕᐅᔪᒥ, ᐅᓗᐊᕆᐊᓇᕐᓂᖓᓗ ᓄᓇᕗᒻᒥᐅᓄᑦ ᖃᓂᒋᔭᖓᓃᑦᑐᓄᑦ ᐃᓱᒫᓗᓐᓇᓗᐊᙱᑦᑐᖅ."

ᕿᑭᖅᑖᓗᒻᒥ ᐅᔭᕋᓐᓂᐊᖅᑏᑦ ᖃᐅᔨᒃᑲᐃᓚᐅᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓯᐊᒻᒪᔅᓯᒪᔪᖃᓕᕐᓂᖓᓂᒃ ᑕᓪᓕᕐᒥᕐᒥ, ᐄᐳᓘ 30 ᐊᒻᒪᓗ ᑖᒃᑯᐊ ᖃᐅᔨᓴᕈᑕᐅᓯᒪᔪᑦ ᐅᔭᕋᖕᓂᐊᕐᕕᕐᒥ ᐃᖃᓗᓐᓄᑦ ᐊᐅᓪᓚᖅᑎᑕᐅᓪᓗᑎᑦ ᖃᐅᔨᓴᖅᑐᓕᕆᔨᒃᑯᖏᓐᓄᑦ ᓇᓗᓇᐃᖅᓯᖁᓪᓗᒋᑦ. ᓄᓇᕗᒻᒥ ᖃᐅᔨᓴᕐᕕᐅᔪᖅ ᓇᓗᓇᐃᖅᓯᔪᑦ ᑖᒃᑯᐊ ᑕᒪᕐᒥᒃ 9 ᖃᐅᔨᓴᖅᑕᐅᔪᑦ ᐱᑕᖃᕐᓂᖏᓐᓂᑦ.

ᑕᒪᓐᓇ ᐱᓪᓗᒍ, ᐊᐅᓪᓚᖃᑦᑕᕐᓂᐅᔪᖅ ᐱᔭᕆᐊᓪᓚᕆᙱᑐᐊᖅᐸᑦ ᑕᐃᑯᖓ ᐊᒻᒪᓗ ᑕᐃᑲᙵᑦ ᐅᔭᕋᖕᓂᐊᕐᕕᕐᒥ, ᑖᒃᑯᐊᓗ ᐋᖅᑭᓱᖅᑕᐅᓯᒪᔪᑦ ᐅᓪᓗᖏᑦ ᐊᓯᔾᔨᖅᑕᐅᓪᓗᑎᑦ, ᓄᖅᑲᖅᑎᑕᐅᑐᐃᓐᓇᕐᓂᐊᖅᑐᑦ ᒫᓐᓇ ᓇᓗᓇᐃᖅᑕᐅᓛᑐᐃᓐᓇᖅᑐᑦ. ᓇᓗᓇᐃᖅᑕᐅᓯᒪᓪᓚᑦᑖᖅᑐᑦ ᓄᕙᒡᔪᐊᕐᓇᖅ-19ᖃᕐᓂᖏᓐᓂᑦ ᐅᔭᕋᖕᓂᐊᕐᕕᒻᒥ ᑖᒃᑯᐊ ᓈᓴᖅᑕᐅᓯᒪᔪᓄᑦ ᖃᑦᑎᐅᓂᖏᑦ ᐃᓚᓕᐅᑎᔭᐅᓂᐊᖅᑐᑦ ᓄᓇᖃᕐᕕᒋᔭᖏᓐᓄᑦ ᐊᒻᒪᓗ ᓄᓇᕗᒻᒧ ᐃᓚᓕᐅᑎᓯᒪᔭᐅᔾᔮᖏᑦᑐᑦ.

ᑭᓇᑐᐃᓐᓇᑦᑎᐊᑦ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ−19-ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ−ᐅᖄᓚᕝᕕᒃᓴᒧᑦ ᐅᕗᖓ 1-888-975-8601 10−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᑲᓇᓂᕐᒥᑦ, ᐅᕙᓗ ᖃᐅᔨᒃᑲᐃᓗᑎᑦ
ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐊᓂᑦᑕᐃᓕᒪᓯᑲᐅᑎᒋᓗᓂᓗ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᙳᕆᐊᖅᓯᒪᔪᓂᒃ ᐱᑎᑦᑎᔪᖃᕐᓂᐊᖅᐳᖅ ᐱᕙᓪᓕᐊᔪᓄᑦ ᑐᓴᖅᑎᑦᑎᔪᖃᓕᖅᐸᑦ ᐊᐃᑉᐱᕐᒥ, ᒪᐃ 4 ᐅᓪᓛᓴᒃᑯᑦ 11ᒥ. ᑲᓇᖕᓇᒥ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca