ᐅᖃᓚᐅᑎᓯᐅᑏᑦ

You are here

ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᓕᒻᒥᒃ ᓄᓇᕗᒻᒥ

ᓄᕕᐱᕆ 06, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᓕᒻᒥᒃ ᓄᓇᕗᒻᒥ


ᐃᖃᓗᐃᑦ, ᓄᓇᕗᑦ (ᓄᕕᐱᕆ 6, 2020) − ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ, ᓇᓗᓇᐃᖅᓯᓯᒪᓕᖅᑐᖅ ᓄᓇᕗᒻᒥ ᓯᕗᓪᓕᖅᐹᒥ ᓄᕙᔾᔪᐊᕐᓇᖅ 19-ᓕᒻᒥᒃ, ᓴᓂᑭᓗᐊᕐᒥ.

“ᐱᒋᐊᖅᑎᑦᓯᓯᒪᓕᖅᑐᒍᑦ ᑲᑎᒪᒥᓂᖏᓐᓂᒃ ᖃᐅᔨᓴᕐᓂᕐᒥᒃ ᓄᓇᖓᓐᓂ ᑐᐊᕕᕐᓇᖅᑐᓕᕆᓂᕐᒧᓪᓗ ᐱᓕᕆᔨᕗᑦ ᐊᑐᐃᓐᓇᐅᔪᑦ ᐊᐅᓚᑦᓯᖃᑕᐅᓂᐊᖅᑐᓂᒃ ᑕᒪᑐᒥᖓ ᑕᐃᒪᐃᒋᐊᖃᓕᕐᓂᕈᑎᒃ,” ᐅᖃᖅᓯᒪᔪᖅ ᐸᑐᓴᓐ. “ᐊᐱᕆᔭᕗᑦ ᓴᓂᑭᓗᐊᕐᒥᐅᑕᐃᑦ ᐊᖏᕐᕋᖅᓯᒪᑐᐃᓐᓇᖁᓪᓗᒋᑦ ᒫᓐᓇᐅᔪᖅ ᑲᑎᓯᓗᐊᑦᑕᐃᓕᓗᑎᓪᓗ ᐊᓯᒥᓐᓂᒃ ᐃᓚᒋᔭᐅᓪᓗᑎᒃ ᐃᓚᒋᔭᒥᓐᓂᒃ ᐃᓪᓗᒥᐅᑕᖃᑎᒋᙱᑕᒥᓐᓂᒃ. ᐱᒻᒪᕆᐅᕗᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓖᑦ ᒪᓕᑦᑕᐅᒋᐊᖃᕐᓂᖏᓐᓂᒃ ᑭᒃᑯᓕᒫᓄᑦ ᐃᑲᔪᖃᑕᐅᔪᐃᓐᓇᐅᓗᑕᓗ ᕿᓚᒥᐅᔪᒃᑯᑦ ᓯᐊᕐᒪᑦᑕᐃᓕᑎᑕᐅᖁᓪᓗᒍ ᓄᓇᖓᓐᓂ”.

ᑖᓐᓇ ᓇᓗᓇᐃᖅᑕᐅᔪᖅ ᐃᓚᖏᓪᓗ ᐊᓂᑦᑕᐃᓕᑎᑕᐅᓕᖅᑐᑦ ᖃᓄᐃᒐᑎᓪᓗ. ᑎᑭᕝᕕᐅᖃᑦᑕᕈᓐᓇᕐᓂᖏᑦ ᐊᐅᓪᓚᖃᑦᑕᕈᓐᓇᕐᓂᖏᓪᓗ ᓴᓂᑭᓗᐊᕐᒥ ᐃᓱᓕᑦᑕᕐᕕᖃᖅᑎᑕᐅᓕᖅᑐᖅ, ᐋᒡᒐᑐᐊᖅ ᐱᖁᑎᓂᒃ ᑎᑭᑎᑦᓯᖃᑦᑕᕐᓂᖅ ᑐᐊᕕᕐᓇᖅᑐᒃᑯᓪᓗ ᐊᐅᓪᓚᖃᑦᑕᕈᓐᓇᖅᑐᑎᒃ. ᑐᐊᕕᕐᓇᖅᑐᓕᕆᓂᕐᒧᑦ ᐱᔨᑦᓯᕋᐅᑎᑦ ᒪᑐᐃᖓᔪᑑᓂᐊᖅᑐᑦ ᓂᕿᑖᕐᕖᑦ ᓂᐅᕕᕐᕖᑦ ᐊᑐᓕᖅᑎᑦᓯᓂᐊᖅᑐᑦ ᐃᑲᕐᕋᖏᑦ ᓇᑲᑕᐅᒋᐊᕐᓗᑎᒃ. ᓂᐅᕕᕆᐊᖅᑐᑦ ᒪᑐᐊᖅᓯᒪᒋᐊᓖᑦ ᓂᐅᕕᕐᕕᒻᒦᑎᓪᓗᒋᑦ.

“ᐃᖅᑲᐅᒪᓂᐊᖅᑯᓯ ᓇᓗᓇᐃᖅᑕᐅᔪᖃᕐᓂᖓ ᓄᕙᔾᔪᐊᕐᓇᖅᑐᓕᒻᒥᒃ ᐅᐃᒻᒪᒍᑕᐅᒋᐊᖃᙱᑦᑐᖅ. ᐅᐸᓗᖓᐃᔭᖅᓯᒪᔪᒍᑦ ᑕᒪᑐᒧᖓ ᑲᒪᒋᓂᐊᖅᑐᑎᒍᓗ. ᓄᓇᕗᒻᒥᐅᓕᒫᑦ ᓱᓕ ᐊᑑᑎᖃᕆᐊᓖᑦ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ, ᐊᒡᒐᓯ ᐅᐊᓴᐃᓐᓇᖃᑦᑕᕐᓗᒋᑦ, ᐊᖏᕐᕋᖅᓯᒪᖃᑦᑕᕐᓗᓯᓗ ᖃᓄᐃᒍᑎᖃᑐᐊᕈᑦᓯ,” ᐅᖃᖅᓯᒪᔪᖅ ᓯᕗᓕᖅᑎ ᔫ ᓴᕕᑲᑖᖅ. “ᖃᓄᐃᙱᑦᓯᐊᖁᔭᕋ ᓇᓗᓇᐃᖅᑕᐅᒍᑎᓕᒃ ᓄᕙᔾᔪᐊᕐᓇᖅᑐᒥᒃ ᓴᓂᑭᓗᐊᕐᒥᐅᑕᐃᓪᓗ.”

ᑖᓐᓇ ᓇᓗᓇᐃᖅᑕᐅᔪᖅ ᐊᑦᑐᐃᓂᖃᔾᔮᙱᑦᑐᖅ ᐊᐅᓪᓚᖃᑦᑕᕐᕕᐅᒍᓐᓇᖅᑐᓂᒃ ᓄᓇᑦᓯᐊᕐᒧᑦ ᐊᒻᒪᓗ ᑰᔾᔪᐊᕌᓗᒃ, ᒫᓂᑐᐸᒧᑦ.

ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.

ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 2:30 ᐅᓐᓄᓴ ᐅᓪᓗᒥ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ
ᓴᕕᖃᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
cpuglia@gov.nu.ca