ᐅᖃᓚᐅᑎᓯᐅᑏᑦ

You are here

ᒫᓂᑑᐸᒥᐅᑦ ᓅᑎᑦᑎᕗᑦ ᓄᕙᒡᔪᐊᕐᓇᖅ-19−ᖃᖅᑐᑦ ᓈᓴᖅᑕᐅᓯᒪᔪᓂᒃ ᓄᓇᕗᒻᒧᑦ

ᒫᑦᓯ 17, 2021

ᐱᕙᓪᓕᐊᔪᖅ ᓴᖅᑭᑕᐅᔪᑦ

ᒫᓂᑑᐸᒥᐅᑦ ᓅᑎᑦᑎᕗᑦ ᓄᕙᒡᔪᐊᕐᓇᖅ-19−ᖃᖅᑐᑦ ᓈᓴᖅᑕᐅᓯᒪᔪᓂᒃ ᓄᓇᕗᒻᒧᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 17, 2020) − ᐅᓪᓗᒥ ᐱᒋᐊᖅᖢᓂ, ᓄᓇᕗᒥᐅᑦ ᐅᖃᖅᓯᒪᕗᑦ 12-ᓂᒃ ᓄᕙᒡᔪᐊᕐᓇᖅ-19−ᑖᖅᓯᒪᔪᖃᕐᓂᖓᓂᒃ ᖃᐅᔨᓴᖅᑕᐅᓯᒪᔪᓂᒃ ᒫᓂᑑᐸᒥ. ᐅᑯᐊ ᓄᑖᖑᓪᓗᑎᒃ ᑭᒡᓕᓯᓂᐊᖅᑕᐅᓯᒪᔪᑦ ᑕᑯᒃᓴᐅᑎᑕᐅᓂᐊᖅᐳᑦ ᓄᓇᕗᒻᒥ ᐅᓂᒃᑳᓕᐊᓂᒃ, ᐃᓚᓕᐅᔾᔭᐅᓗᑎᒡᓗ ᐱᖓᓱᑦ ᑐᖁᓚᐅᖅᑐᑦ ᓄᓇᕗᒥᐅᑦ ᑎᓯᐱᕆ 2020 ᐊᒻᒪ ᔭᓄᐊᕆ 2021 ᐊᑯᓐᓂᖓᓐᓂ.

ᓄᓇᕗᑦ ᒐᕙᒪᒃᑯᑦ ᐱᓕᕆᐊᒃᓴᖃᖃᑦᑕᖅᐳᑦ ᐃᔨᕋᖅᑐᙱᑦᑎᐊᖅᖢᑎᒃ ᐱᓕᕆᐊᕆᔭᓕᒫᖏᓐᓂᒃ ᖃᓄᓕᒫᑦᑎᐊᖅ ᑭᐅᔾᔪᑎᖏᓐᓂᒃ ᓄᕙᒡᔪᐊᕐᓇᖅ-19−ᒧᑦ. ᐃᓚᓕᐅᑎᓪᓗᒋᑦ ᓈᒻᒪᒡᓗᑎᒃ ᐅᓂᒃᑲᐅᓯᐅᒋᐊᓕᑦ ᐱᔾᔪᑕᐅᔪᑦ ᑭᒡᒐᖅᑐᖅᑕᐅᔪᑦ ᒪᓕᒡᓗᒋᑦ, ᐊᒻᒪᓗ ᐱᓕᕆᐊᒃᓴᑦ ᐅᓂᒃᑲᐅᓯᖃᕐᓂᐊᕐᓗᓂ ᑲᓇᑕᒥ ᑎᑎᕋᖅᑕᐅᓯᒪᔪᓂᒃ ᐋᖅᑭᒃᑕᐅᓯᒪᔪᑦ ᖃᐅᔨᔾᔪᑕᐅᔪᓐᓇᖅᑐᑦ ᐱᔾᔪᑕᐅᖃᑦᑕᖅᓯᒪᔪᑦ ᓈᓴᖅᑕᐅᔪᐃᓐᓇᐅᖕᒪᖔᑕ ᐊᓯᐅᖕᒪᖔᑕᓘᓐᓃᑦ," ᐅᖃᓚᐅᖅᐳᖅ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑎᑎᕋᕐᕕᐊᓂᙶᖅᑐᖅ, ᓘᒃᑖᖅ ᒪᐃᑯᓪ ᐲᑕᓴᓐ. "ᑐᑭᓯᑦᑎᐊᖁᔭᐅᕗᓯ, ᐅᑯᐊ ᓄᑖᙳᓪᓗᑎᒃ ᖃᓂᒻᒪᒃᓯᒪᙱᑦᑐᑦ ᐊᒃᑐᐊᓂᖃᙱᖦᖢᑎᒡᓗ ᒫᓐᓇᓕᓴᕐᓄᑦ ᐅᕝᕙᓘᓐᓃᑦ ᑭᖑᓂᖔᑦᑎᓐᓂ ᓄᕙᒡᔪᐊᕐᓇᖅ-19−ᑖᖅᐸᓪᓕᐊᓚᐅᖅᑐᓄᑦ ᓄᓇᕗᒻᒥ."

ᓄᕙᒡᔪᐊᕐᓇᖅ-19−ᑖᖅᑐᑦ ᓄᓇᕗᒥᐅᑦ ᓄᓇᕘᑉ ᓯᓚᑖᓃᑎᓪᓗᒋᑦ ᓴᖅᑭᑉᐸᓪᓕᐊᖏᓐᓇᕐᓂᐊᖅᐳᑦ ᐊᑕᐅᓯᐅᓈᑦᑕᕐᓗᑎᒃ ᖃᐅᔨᔭᐅᕙᓪᓕᐊᔪᑦ ᑐᙵᕕᒋᔭᐅᓗᑎᒃ. ᐅᓂᒃᑳᓕᐅᖃᑦᑕᕐᓂᐊᖅᐳᑦ ᐱᓕᕆᖃᑎᖃᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔩᑦ ᖃᓪᓗᓈᓂᕐᒥᐅᑕᓂᒃ. ᐊᔾᔨᒌᙱᓐᓂᖏᑦ ᐅᓂᒃᑳᓕᐅᖅᑐᓂᒃ ᑲᓇᑕᒥ ᓇᓂᕈᓘᔭᖅ ᐅᖓᕙᕆᐊᕈᑕᐅᑐᐃᓐᓇᕆᐊᖃᖅᐳᑦ ᓄᓇᕗᒻᒥ ᓈᓴᖅᑕᐅᓯᒪᔪᓂᒃ ᖃᕆᑕᐅᔭᒃᑯᑦ. ᓄᓇᕗᑦ ᒐᕙᒪᒃᑯᑦ ᐊᒃᓱᕉᑎᖃᐃᓐᓇᖅᐳᑦ ᓈᒻᒪᖅᑰᑦᑎᓇᓱᒃᐸᒃᖢᑎᒃ ᑕᒻᒪᖅᑕᖅᓯᒪᙱᖦᖢᑎᒡᓗ ᖃᕆᑕᐅᔭᒃᑯᑦ ᐅᓂᒃᑳᓕᐊᖏᑦ.

"ᖃᓂᒻᒪᒃᐸᓪᓕᐊᔪᓂᒃ ᖃᐅᔨᒪᓇᓱᐃᓐᓇᖅᑎᓪᓗᑕ, ᖃᐅᔨᒪᓕᖅᑐᒍᑦ ᐊᓯᔾᔨᖃᑦᑕᕐᓂᐊᕐᓂᖏᓐᓂ ᑭᐅᔾᔪᑕᐅᔪᑦ ᖃᓄᕈᓘᔭᖅ, ᐅᑯᐊᓗ ᐅᓂᒃᑲᐅᓯᐅᖃᑦᑕᕐᓂᐊᓕᕐᓂᖏᓐᓂᒃ ᖃᐅᔨᔭᐅᔪᑦ," ᐅᖃᓚᐅᖅᐳᖅ ᓯᕗᓕᖅᑎ ᔫ ᓴᕕᑲᑖᖅ. "ᐱᓕᕆᑦᑎᐊᖏᓐᓇᕋᓱᖕᓂᐊᖅᑐᒍᑦ ᐊᑦᑕᕐᓇᙱᑦᑐᒦᖁᓪᓗᒋᑦ ᖃᓄᐃᙱᑦᑎᐊᖁᓪᓗᒋᓪᓗ ᓄᓇᕗᒥᐅᑦ. ᕿᒃᓵᖃᑎᒋᕙᕗᑦ ᓄᓇᕗᒥᐅᓕᒫᑦ ᐃᓚᒥᓂᒃ ᐊᓯᐅᔨᓚᐅᖅᑐᑦ ᓄᕙᒡᔪᐊᕐᓇᖅ-19−ᒧᑦ, ᐃᒃᐱᒍᓱᖃᑎᒋᑦᑎᐊᖅᐸᕗᑦ ᐆᒻᒪᑎᒃᑯᑦ ᐃᓱᒪᒃᑯᓪᓗ."

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᓐᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca