ᐅᖃᓚᐅᑎᓯᐅᑏᑦ

You are here

ᑲᐱᔭᐅᓯᒪᙱᑦᑐᑦ ᐃᓄᐃᑦ ᐊᓂᑦᑕᐃᓕᔪᓐᓇᖅᑎᑕᐅᔪᑦ ᓄᓇᕗᒻᒥ

ᔪᓚᐃ 30, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᑲᐱᔭᐅᓯᒪᙱᑦᑐᑦ ᐃᓄᐃᑦ ᐊᓂᑦᑕᐃᓕᔪᓐᓇᖅᑎᑕᐅᔪᑦ ᓄᓇᕗᒻᒥ

ᓄᓇᕗᑦ (ᔪᓚᐃ 30, 2021) − ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ, ᓘᒃᑖᖅ. ᒪᐃᑯ ᐹᑐᓴᓐ, ᑐᓴᖅᑎᑦᑎᖅᑲᐅᕗᖅ ᐅᓪᓗᒥ ᐱᒋᐊᕐᓗᒍ ᐋᒡᒌᓯ 2, ᑲᐱᔭᐅᓯᒪᙱᑦᑐᑦ ᐃᓄᐃᑦ ᓄᓇᕘᑉ ᓯᓚᑖᓄᑦ ᐊᐅᓪᓚᓚᐅᖅᑐᑦ ᐊᖓᔪᖅᑳᒥᓂᒃ ᐸᖅᑭᔨᒥᓂᒡᓘᓐᓃᑦ ᐱᖃᑎᖃᕐᓗᑎᒃ ᑲᐱᔭᐅᓯᒪᔪᓂᒃ ᐅᓪᓗᕐᓄᑦ 14-ᓄᑦ ᐊᓂᑦᑕᐃᓕᔪᓐᓇᕐᓂᐊᓕᕐᒥᔪᑦ ᓄᓇᕗᒦᑎᓪᓗᒋᑦ.

"ᒫᓐᓇ ᓯᐊᒻᒪᒃᐸᓪᓕᐊᔪᖃᙱᑎᓪᓗᒍ ᓄᓇᕗᒻᒥ ᑲᐱᔭᐅᕙᓪᓕᐊᔪᓪᓗ ᐅᓄᖅᓯᕙᓪᓕᐊᖏᓐᓇᖅᑎᓪᓗᒋᑦ, ᐋᖅᑭᒋᐊᖅᓯᒃᑲᓐᓂᕈᓐᓇᖅᓯᖕᒥᒐᑦᑕ ᐊᓂᑦᑕᐃᓕᓂᕐᒧᑦ ᑭᒡᓕᒋᑎᑕᐅᔪᓂᒃ," ᐅᖃᓚᐅᖅᐳᖅ ᓘᒃᑖᖅ ᐹᑐᓴᓐ. "ᑭᖑᓪᓕᕐᒥ ᐱᓕᕆᐊᖑᔪᓐᓇᕐᓂᐊᓕᕐᒥᔪᖅ, ᑲᐱᔭᐅᓯᒪᙱᑦᑐᑦ ᐃᓄᐃᑦ ᐊᐅᓪᓚᖃᑎᖃᖃᑦᑕᖅᑐᑦ ᐊᖓᔪᖅᑳᒥᓂᒃ ᐅᕝᕙᓘᓐᓃᑦ ᐸᖅᑭᔨᒥᓂᒃ ᓄᓇᕘᓕᐊᖃᑕᐅᔪᓐᓇᖅᓯᔪᑦ ᐊᓂᑦᑕᐃᓕᙱᒃᑲᓗᐊᕐᓗᑎᒃ ᖃᓪᓗᓈᑦ ᓄᓈᓐᓂ ᐅᑎᖅᐸᓪᓕᐊᓕᖅᑎᓪᓗᒋᑦ."

ᓄᓇᕗᒦᓕᖅᐸᑕᓕ, ᑲᐱᔭᐅᓯᒪᔪᑦ ᐸᖅᑭᔨᒋᔭᐅᔪᑦ ᐊᓂᑦᑕᐃᓕᒋᐊᖃᖃᑦᑕᔾᔮᔪᓐᓃᖅᑐᑦ. ᐸᖅᑭᔩᑦ ᑲᒪᒋᔭᒃᓴᖃᕐᓂᐊᖅᐳᑦ ᐃᓚᖏᑦ ᐊᓂᑦᑕᐃᓕᑎᓪᓗᒋᑦ ᖃᐅᔨᒪᔭᕆᐊᖃᕐᓂᐊᖅᐳᓪᓗ ᐊᓯᓕᒫᖏᑦ ᑲᐱᔭᐅᓯᒪᙱᑦᑐᑦ ᐃᒡᓗᒥᐅᖃᑎᒋᔭᐅᔪᑦ ᐊᓂᑦᑕᐃᓕᖃᑕᐅᒋᐊᖃᕐᓂᖏᓐᓂᒃ ᐅᓪᓗᕐᓄᑦ 14-ᓄᑦ. ᐃᒡᓗᒥᐅᖃᑎᒌᑦ ᐊᓂᑦᑕᐃᓕᔪᑦ ᐳᓛᖅᑎᖃᕆᐊᖃᙱᑦᑐᑦ, ᑕᐃᒃᑯᐊᓗ ᐊᓂᑦᑕᐃᓕᔪᑦ ᐳᓛᕆᐊᕆᐊᖃᙱᑦᑐᑦ ᑐᐊᕕᕐᓇᖅᐸᑦ ᑭᓯᐊᓂ. ᐊᓂᑦᑕᐃᓕᓂᖅ ᐱᒋᐊᖃᑦᑕᖅᑐᖅ ᑎᑭᑐᐊᕈᕕᑦ ᓄᓇᕗᒻᒧᑦ. ᐋᓐᓂᐊᕐᕕᒻᒥ ᐊᓂᔪᓐᓇᖅᓯᓂᕋᖅᑕᐅᒋᐊᖃᙱᑦᑐᑦ ᐊᓐᓂᑕᐃᓕᓂᐅᑉ ᓄᕐᖑᐊᒍᑦ. ᑭᒃᑯᑐᐃᓐᓇᐃᑦ ᓱᕋᐃᔪᑦ ᐊᑐᕆᐊᖃᑦᑕᒥᓂᒃ ᐊᑭᓖᑎᑕᐅᔪᓐᓇᖅᑐᑦ $575.

ᑲᐱᔭᐅᓯᒪᔪᑦ ᐊᖓᔪᖅᑳᕆᔭᐅᔪᑦ ᐸᖅᑭᔩᓪᓘᓐᓃᑦ ᐱᔭᕇᖅᓯᔭᕆᐊᖃᖅᑐᑦ ᐊᐅᓪᓚᕐᓂᐊᖅᑐᓄᑦ ᓱᓕᓂᕋᕈᑎᒥ ᐅᕙᙵᑦ ᓇᓂᔭᒃᓴᐅᔪᑦ https://gov.nu.ca/health/information/travel-and-isolation. ᑕᒪᕐᒥᒃ ᐃᓄᐃᑦ ᐊᐅᓪᓚᖃᑎᓖᑦ ᐸᖅᑭᔨᒥᓂᒃ ᖃᖓᑐᐃᓐᓇᒃᑯᑦ ᑎᑎᕋᖅᑕᐅᓯᒪᔭᕆᐊᓖᑦ ᐱᐊᓂᒃᓯᒪᔪᒡᓗ ᑕᑕᑎᕆᐊᓕᖕᓂᒃ ᑐᓂᓯᒋᐊᓖᑦ ᐅᕗᖓ vaccineexemptions@gov.nu.ca. ᐊᖏᖅᑕᐅᓯᒪᓕᖅᐸᑦ, ᖃᖓᑕᓲᒃᑯᑦ ᐊᐅᓪᓚᕐᓂᐊᖅᑐᖅ ᑎᑎᖅᑲᓕᔭᕆᐊᖃᖅᐳᖅ ᐃᓚᓕᐅᔾᔨᓯᒪᔪᒥᒃ ᐃᓚᖏᑦ ᑐᓂᔭᐅᓂᐊᕐᓂᖏᓐᓂᒃ ᐊᖓᔪᖅᑳᖏᓐᓄᑦ ᐅᕝᕙᓘᓐᓃᑦ

ᐸᖅᑭᔨᖏᓐᓄᑦ. ᑎᑎᖅᑲᖅ ᐊᕐᕌᒍᓕᒫᖅ ᐊᑐᕐᓂᐊᖅᑐᖅ. ᑖᓐᓇ ᑎᑎᖅᑲᖅ ᑐᓂᔭᐅᔭᕆᐊᖃᖅᑐᖅ ᖃᖓᑦᑕᐅᑎᑖᕐᕕᒻᒧᑦ ᓄᓇᕗᒻᒧᑦ ᐅᑎᓚᐅᖅᑎᓐᓇᒍ.

ᑐᑭᓯᒋᐊᑲᓐᓂᕈᒪᒍᕕᑦ ᐊᐅᓪᓚᕐᓂᕐᒧᑦ ᐃᓄᑑᔭᕆᐊᖃᕐᓂᕐᒧᓪᓗ, ᐅᕗᙵᕐᓗᑎᑦ: https://gov.nu.ca/health/information/travel-and-isolation.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca