ᐃᖅᑲᐃᑎᑦᑎᒋᐊᕈᑎ: ᓄᕙᒡᔪᐊᕐᓇᖅ-19 ᐅᖄᓚᕝᕕᐊ ᒪᑐᓛᓕᕐᑐᖅ ᔮᓄᐊᕆ 31

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᐃᖅᑲᐃᑎᑦᑎᒋᐊᕈᑎ: ᓄᕙᒡᔪᐊᕐᓇᖅ-19 ᐅᖄᓚᕝᕕᐊ ᒪᑐᓛᓕᕐᑐᖅ ᔮᓄᐊᕆ 31

ᓄᓇᕗᑦ ᒐᕙᒪᒃᑯᖏᑦ ᐃᖅᑲᐃᓯᑎᑦᑎᔪᒪᕗᑦ ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ ᐊᑐᐃᓐᓇᐅᓛᕈᓐᓃᕐᒪᑦ ᐱᒋᐊᕐᓗᓂ ᔭᓄᐊᕆ 31, 2023−ᒥ. ᐅᖃᓗᒡᕕᒃᓴᖅ ᐃᓚᒋᔭᐅᓚᐅᕐᑐᖅ ᐊᒥᓱᓄ ᐊᑐᕐᑕᐅᔭᕆᐊᓕᖕᓂ ᐃᑲᔪᖅᑑᑕᐅᓪᓗᓂ ᓄᓇᒻᒥᒧᑦ ᓄᕙᒡᔪᐊᕐᓇᖅ-19 ᓄᓇᕐᔪᐊᒥ ᖃᓂᒪᓂᖃᕐᑎᓪᓗᒍ ᖃᓄᐃᓕᐅᕈᑕᐅᔪᓂᑦ.

ᐃᓱᒪᓕᐊᖑᓂᖓ ᒪᑐᔭᐅᓗᓂ ᐅᖄᓚᕕᒃᓴᖅ ᐊᒥᓲᔪᓐᓃᕐᓂᖏᓐᓄᑦ ᐅᖃᓗᒃᐸᒃᑐᑦ. ᔮᓄᐊᕆ 31, 2023 ᑭᖑᓂᐊᓂ, ᐊᐱᖅᑯᑎᒃᓴᖃᕈᕕᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ ᐃᓅᓕᓴᕐᑕᐅᔪᓐᓇᕐᒪᖔᓪᓘᓐᓃᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᓄᕙᒡᔪᐊᕐᓇᖅ-19−ᒧᑦ ᐃᑭᐊᖅᑭᕕᐊᓄᙵᐅᓗᑎᑦ ᖃᐅᔨᒋᐊᕐᓗᑎᓪᓘᓐᓃᑦ ᐋᓐᓂᐊᕕᔅᓯᓐᓄᑦ ᐅᖁᒪᐃᓐᓂᕐᓂᐊᕐᕕᖕᒧᓪᓘᓐᓃᑦ.

ᓄᕙᒡᔪᐊᕐᓇᖅ-19 ᓱᓕ ᐃᓱᒫᓘᑕᐅᕗᖅ, ᐆᒻᒪᕆᒃᖢᓂᓗ ᓄᓇᕗᒻᒥᑦ. ᐃᓕᖕᓂᒃ ᓴᐳᑎᓯᒪᐃᓐᓇᕐᓗᑎᑦ ᑕᐃᒃᑯᐊᓗ ᖃᓂᒋᔭᑎᑦ ᓴᐳᑎᓯᒪᓗᒋᑦ ᑲᐱᔭᐅᓗᑎᑦ ᐱᕚᓪᓕᖅᓯᒪᓗᑎᓪᓗ, ᐊᔪᕈᓐᓃᖅᓴᖅᐸᒡᓗᑎᑦ ᐊᓂᖅᓵᖅᑐᕐᓂᕐᒧᑦ ᐃᓕᖅᑯᓯᑦᑎᐊᕙᒋᔭᐅᕙᒃᑐᓂᒃ, ᐊᒡᒐᓂᒃ ᐅᐊᓴᖅᐸᖕᓂᕐᒥᒃ, ᐃᓅᖃᑎᖕᓂᒃ ᐅᖓᓯᒃᓴᕆᐊᖃᖅᐸᖕᓂᕐᒥᒃ ᐊᑐᕐᓂᕐᒥᒡᓗ ᒪᑐᐊᖅᓯᓯᒪᔾᔪᑎᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓂᒋᔭᐅᔪᓂ. ᑭᒃᑯᑐᐃᓐᓇᑦᑎᐊᑦ ᐊᔪᖅᑎᑕᐅᙱᑦᑐᑦ ᐅᓪᓗᒥᒧᑦ ᐊᖑᒻᒪᑎᙱᓪᓗᑎᒡᓗ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᓂᕐᒥᒃ ᐅᖄᓚᔪᓐᓇᖅᐳᑦ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᒋᔭᒥᓄᑦ ᑭᒃᑯᑐᐃᓐᓇᓄᓪᓘᓐᓃᑦ ᐋᓐᓂᐊᕕᓕᐊᕐᕕᒋᕙᒃᑕᒥᓄᑦ ᑲᐱᔭᐅᔭᖅᑐᕐᓗᑎᒃ.

ᑲᐴᑎᑦ ᐊᑐᐃᓐᓇᐅᔪᑦ ᓄᓇᕗᒻᒥᑦ ᓄᓇᕗᒻᒥᐅᓕᒫᓄᑦ  ᑕᖅᑭᓕᖕᓄᑦ 6 ᐅᖓᑖᓄᑦ. ᐋᓐᓂᐊᕐᕕᖕᒧᑦ ᐅᖃᓛᑐᐃᓐᓇᕐᓗᓯ ᐅᖁᒪᐃᓐᓂᕐᓂᐊᕐᕕᖕᒧᓪᓘᓐᓃᑦ ᐃᓂᒃᓴᓕᐅᖅᑕᐅᔪᒪᓗᓯ. ᑐᑭᓯᒋᐊᒃᑲᓐᓂᕈᒪᒍᕕᑦ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᓂᐅᑉ ᒥᒃᓵᓄᑦ, ᓄᓇᕗᑦ ᒐᕙᒪᒃᑯᑦ ᑲᐴᑎᖓᑕ ᐃᑭᐊᖅᑭᕕᖓᓐᓄᐊᕐᓗᑎᑦ.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᕕᒃᑑᕆᐊ ᒧᐊᒐᓐ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
vmorgan2@gov.nu.ca