ᐅᖃᓚᐅᑎᓯᐅᑏᑦ

You are here

ᐊᑕᐅᓯᕐᒥᒃ ᓄᑖᒥᒃ ᐱᑕᖃᓕᖅᐳᖅ ᓄᕙᒡᔪᐊᕐᓇᖅ-19-ᒥᒃ ᐊᕐᕕᐊᕐᒥ

ᕕᕝᕗᐊᓕ 17, 2021

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ

ᐊᑕᐅᓯᕐᒥᒃ ᓄᑖᒥᒃ ᐱᑕᖃᓕᖅᐳᖅ ᓄᕙᒡᔪᐊᕐᓇᖅ-19-ᒥᒃ ᐊᕐᕕᐊᕐᒥ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 17, 2021) – ᐅᓪᓗᒥ, ᓄᓇᕗᑦ ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19−ᒧᑦ ᐱᖓᓱᓂᒡᓗ ᐊᓂᒍᐃᓯᒪᔪᖃᓕᖅᖢᓂ. 21-ᖑᕗᑦ ᓇᓗᓇᐃᖅᑕᐅᓯᒪᕗᑦ ᓄᕙᒡᔪᐊᓕᖅᑐᑦ ᓄᓇᕗᒻᒥ, ᑕᒪᕐᒥᒡᓗ ᐊᕐᕕᐊᒦᖦᖢᑎᒃ.

“ᐊᒃᑐᖅᓯᓂᕆᔭᖏᑦ ᓄᕙᒡᔪᐊᕐᓇᖅ-19-ᒧᑦ ᐊᒃᓱᕈᕐᓇᖅᐳᑦ ᑕᖃᓇᖅᖢᑎᒡᓗ,” ᑕᐃᒪᓐᓇ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥᐅ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ ᐅᖃᖅᖢᓂ. “ᐃᓕᓴᕆᔪᒪᕙᒃᑲ ᐊᑐᖅᑕᐃᓕᒪᓂᕆᖃᑦᑕᖅᑕᖏᑦ ᐊᕐᕕᐊᕐᒥᐅᑦ, ᐊᐱᕆᓪᓗᖓᓗ ᐊᓯᖏᑦ ᐊᕕᒃᓯᒪᓂᕐᒦᑦᑐᑦ ᐅᑭᐅᖅᑕᖅᑐᒥ ᑖᒃᑯᓂᖓ ᐃᑲᔪᖅᑐᐃᖁᓪᓗᒋᑦ. ᒪᓕᒡᓗᓂ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᕙᒃᑐᓂᒃ, ᑲᐱᔭᐅᓂᖅ, ᐃᓅᖃᑎᓄᓪᓗ ᐃᓄᑦᑎᐊᕙᐅᓂᖅ ᐱᐅᓛᖑᕗᑦ ᐊᑐᕈᓐᓇᖅᖢᑎᒍ ᐊᓂᒍᐃᓂᐊᕐᓗᑕ ᑕᒪᑐᒥᖓ ᓇᒧᙵᕈᓘᔭᖅᑐᒥᒃ ᖃᓂᒪᓐᓇᒥᒃ."

ᑖᒃᑯᐊ ᑕᒪᕐᒥᒃ ᖃᓄᐃᙱᑉᐳᑦ, ᐅᐸᒃᑕᐅᑦᑕᐃᓕᒪᓪᓗᑎᒡᓗ ᐊᖏᕐᕋᒥᓂ ᑲᑎᙵᖃᑎᒋᔭᐅᓚᐅᖅᑐᓪᓗ ᓱᓕ ᖃᐅᔨᓴᖅᑕᐅᕙᓪᓕᐊᓪᓗᑎᒃ. ᕕᕗᐊᕆ 17−ᒥ ᐱᒋᐊᖅᖢᓂ, ᐊᕐᕕᐊᕐᒥ ᖃᐅᔨᓴᖅᑕᐅᔪᑦ 2078−ᓂᒃ ᐱᑕᖃᙱᓐᓂᕋᖅᑕᐅᔪᓂᒃ ᓴᖅᑭᑎᑦᑎᕗᑦ ᖃᐅᔨᓴᖅᑕᐅᔾᔪᑎᖏᑦ.

ᓄᓇᕗᒻᒥᑦ ᑐᐊᕕᕐᓇᖅᑐᓕᕆᔨᒃᑯᑦ ᓱᓕ ᐃᑲᔪᖅᑐᐃᔪᑦ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᖏᓐᓂᒃ. ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 12-ᒥ ᐱᒋᐊᕐᓗᓂ ᐃᓄᖕᓄᑦ ᑲᑎᙵᓗᐊᑲᑕᖁᔭᐅᙱᑉᐳᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ. ᖃᐅᔨᒋᐊᖁᔭᐅᕗᑦ ᐋᓐᓂᐊᕕᖏᓐᓄᑦ ᐃᖃᓗᖕᓂᓪᓘᓐᓃᑦ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᕐᓂᐊᕐᓗᑎᒃ ᑲᑎᙵᖃᑎᒋᔭᐅᓚᐅᖅᑐᑦ ᖃᐅᔨᓇᓱᓕᖅᐸᑕ ᖃᐅᔨᓴᖅᐸᓪᓕᐊᓕᖅᐸᑕᓗ. ᓱᓕ ᐊᕐᕕᐊᓕᐊᖅᑐᖃᕆᐊᖃᙱᑦᑐᖅ ᐊᕐᕕᐊᓂᓪᓗ ᐊᐅᓪᓚᖅᑐᖃᕆᐊᖃᙱᖦᖢᓂ, ᑭᓯᐊᓂ ᑐᐊᕕᕐᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.

ᐊᕐᕕᐊᕐᒥᐅᑦ ᓄᕙᒡᔪᐊᕐᓇᖅ−19-ᒧᑦ ᑲᐱᔭᐅᔪᒪᔪᑦ ᐋᓐᓂᐊᕕᖕᒧᑦ ᐅᖄᓚᔪᓐᓇᖅᐳᑦ ᐃᓂᒃᓴᓕᐅᕈᒪᓗᑎᒃ. ᒫᓐᓇᒧᑦ ᑎᑭᖦᖢᒍ, 6805 ᓄᓇᕗᒻᒥᐅᑦ ᐊᑕᐅᓯᕐᒥᒃ ᑲᐱᔭᐅᓯᒪᓕᖅᐳᑦ Moderna ᑲᐴᑎᒧᑦ. ᑲᐱᓯᑲᑕᖕᓂᐊᖅᑐᑦ ᑕᒫᓂ ᐅᑭᐅᖅᑕᖅᑐᒥ ᓱᓕ ᑲᔪᓯᕗᑦ.

ᑭᓇᑐᐃᓐᓇᑦᑎᐊᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ−19-ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ−ᐅᖄᓚᕝᕕᒃᓴᒧᑦ ᐅᕗᖓ 1-888-975-8601 10:00−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6:00−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐊᓂᑦᑕᐃᓕᒪᓯᑲᐅᑎᒋᓗᓂᓗ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca