ᐅᖃᓚᐅᑎᓯᐅᑏᑦ

You are here

ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19-ᒥᒃ ᐊᕐᕕᐊᕐᒥ

ᕕᕝᕗᐊᓕ 10, 2021

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ

ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19-ᒥᒃ ᐊᕐᕕᐊᕐᒥ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 10, 2021) – ᐅᓪᓗᒥ, ᓄᓇᕗᑦ ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19−ᒥᒃ. 6-ᖑᕗᑦ ᓇᓗᓇᐃᖅᑕᐅᓯᒪᕗᑦ ᓄᕙᒡᔪᐊᕐᓇᓖᑦ ᓄᓇᕗᒻᒥ, ᑕᒪᕐᒥᒡᓗ ᐊᕐᕕᐊᒦᖦᖢᑎᒃ.

“ᑕᑯᙱᒃᑲᓗᐊᖅᑎᓪᓗᑕ ᓱᒃᑲᓕᒋᐊᖅᑐᒥᒃ ᐱᑕᓕᖕᓂᒃ ᓄᕕᐱᕆᐅᓚᐅᖅᑐᑎᑐᑦ, ᐃᒡᓗᒥᐅᑕᐅᖃᑎᒌᓂ ᐊᐃᑦᑐᕐᓗᒃᓯᕙᖕᓂᖅ ᑲᔪᓰᓐᓇᖅᐳᖅ” ᑕᐃᒪᓐᓇ ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᖢᓂ, ᑖᓐᓇ ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ. “ᖃᐅᔨᒪᕗᒍᑦ ᐃᓄᒋᐊᓗᐊᖅᐸᖕᓂᖅ ᐱᑎᑦᑎᕙᖕᓂᖓᓂᒃ ᓯᐊᒻᒪᒃᑎᕆᓂᕐᒥᒃ ᑕᒪᑐᒥᖓ ᖃᓂᒪᓐᓇᒥᒃ, ᑕᒪᓐᓇᓗᑦᑕᐅᖅ ᐳᓛᕆᐊᖅᐸᖕᓂᖅ. ᖃᐅᔨᒪᕗᖓ ᑕᒪᓐᓇ ᐊᔪᕐᓇᙱᑦᑐᑯᓘᙱᓐᓂᖓᓂᒃ ᑭᓯᐊᓂᓗ ᐊᕐᕕᐊᕐᒥᐅᑦ ᐱᓇᔪᐃᓐᓇᕈᑎᒃ ᐱᓇᔪᒃᑕᒥᓂᒃ ᒪᓕᒃᑯᑎᒡᓗ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᕙᒃᑐᓂᒃ, ᐊᔪᔾᔮᙱᓚᒍᑦ ᓄᖅᑲᖅᑎᑦᑎᔭᕆᐊᒃᓴᖅ ᓯᐊᒻᒪᒃᑎᕆᓂᕐᒥᒃ ᑕᒪᑐᒥᖓ ᖃᓂᒪᓐᓇᒥᒃ."

ᑕᒪᕐᒥᑦᑎᐊᖅ ᐃᓄᐃᑦ ᖃᓄᐃᙱᓚᑦ, ᐅᐸᒃᑕᐅᑦᑕᐃᓕᒪᕙᒡᓗᑎᒃ ᐊᖏᕐᕋᒥᓂ ᐊᒃᑐᖅᑕᓚᐅᖅᑐᓂᒡᓗᑐᔾᔭᖅᓯᓂᕐᒥᒃ ᑲᔪᓰᓐᓇᖅᐳᖅ. ᕕᕗᐊᕆ 10−ᖑᓚᐅᕐᓂᖓᓂᑦ, ᐊᕐᕕᐊᕐᒥ ᖃᐅᔨᓴᖅᓯᓂᖅ ᓴᖅᑭᑎᑦᑎᓯᒪᕗᖅ 1904−ᓂᒃ ᐱᑕᖃᙱᓐᓂᕋᐃᔪᓂᒃ ᖃᐅᔨᓴᕐᓂᕐᓂᒃ.

ᓄᓇᕗᒻᒥᑦ ᑐᐊᕕᕐᓇᖅᑐᓕᕆᔨᒃᑯᖏᑦ ᐃᑲᔪᖅᑐᐃᔪᑦ ᓄᓇᓕᖕᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᒌᒃᑯᖏᓐᓂᑦ. ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 12-ᒥ ᐱᒋᐊᕐᓗᓂ ᐃᓄᖕᓄᑦ ᐊᒃᑐᐊᑲᑕᖁᔭᐅᙱᑦᑐᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ.

ᖃᐅᔨᒋᐊᖁᔭᐅᕗᑦ ᐋᓐᓂᐊᕕᖏᓐᓄᑦ ᐃᖃᓗᖕᓂᓪᓘᓐᓃᑦ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᕐᓂᐊᕐᓗᑎᒃ ᖃᐅᔨᓇᓱᖕᓂᖕᓂᑦ ᖃᐅᔨᓴᕐᓂᖕᓂᓪᓗ. ᑎᑭᑦᑐᖃᕈᓐᓇᙱᑦᑐᖅ ᐊᐅᓪᓚᖅᑐᖃᕈᓐᓇᕋᓂᓗ ᐊᕐᕕᐊᓂᑦ ᓱᓕ, ᑭᓯᐊᓂ ᑐᐊᕕᖕᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.

ᑲᐱᔭᐅᖃᑦᑕᕐᓇᓛᕐᑐᑦ ᐊᐃᑉᐸᖓᓂ ᐊᕐᕕᐊᓂ ᕕᕗᐊᕆ 10-13. ᐊᕐᕕᐊᒥᐅᑦ ᓯᕗᓪᓕᕐᒥᑦ ᑲᐱᔭᐅᓚᐅᙱᑦᑐᑦ ᑲᐱᔭᐅᔪᒪᓗᑎᒃᓗ ᐅᖃᓗᒍᓐᓇᕐᑐᑦ ᐋᓐᓂᐊᕕᖕᒧᑦ ᐃᓂᒃᓴᓕᐅᕐᕕᒃᓴᒥᑦ. ᓯᕗᓪᓕᐅᔾᔭᐅᓂᐊᕐᑐᑦ ᐊᐃᑉᐸᖏᓐᓂᑦ ᑲᐱᔭᐅᕕᒃᓴᓖᑦ.

ᑭᓇᑐᐃᓐᓇᑦᑎᐊᖅ ᐅᒃᐱᕆᔭᖃᖅᑐᖅ ᓵᑦᑎᐊᕐᒥᐅᑕᖃᖅᓯᒪᓂᕐᒥᓂᒃ ᓄᕙᒡᔪᐊᕐᓇᖅ−19-ᒧᑦ ᐅᖃᐅᔾᔭᐅᕗᖅ ᐅᖄᓚᖁᔭᐅᓪᓗᓂ ᓄᕙᕐᔪᐊᕐᓇᖕᒧᑦ−ᐅᖄᓚᕝᕕᐅᔪᓐᓇᖅᑐᒥᐅᕙᓂ 1-888-975-8601 10 −ᓗ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖏᓐᓂ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path.

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca