ᐅᖃᓚᐅᑎᓯᐅᑏᑦ

You are here

ᐊᑕᐅᓯᕐᒥᒃ ᓄᑖᒥᒃ ᓄᕙᒃᔪᐊᕐᓇᖅ-19−ᖃᖅᑐᖃᓕᖅᐳᖅ ᐊᕐᕕᐊᓂ

ᔭᓐᓄᐊᓕ 22, 2021

ᐱᕙᓪᓕᐊᔪᑦ ᓴᖅᑭᑕᑦ

ᐊᑕᐅᓯᕐᒥᒃ ᓄᑖᒥᒃ ᓄᕙᒃᔪᐊᕐᓇᖅ-19−ᖃᖅᑐᖃᓕᖅᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᔭᓄᐊᕆ 22, 2020) – ᐅᓪᓗᒥ, ᓄᓇᕗᑦ ᑐᓴᖅᑎᑦᑎᔪᖅ ᐊᑕᐅᓯᕐᒥᒃ ᐱᖃᖅᑐᒥᒃ ᓄᕙᒃᔪᐊᕐᓇᖅ−19−ᒥᒃ ᐊᕐᕕᐊᓂ, ᓄᓇᕘᑉ ᓯᕗᓪᓕᖅᐹᒥ ᓄᑖᖑᓪᓗᓂ ᐱᖃᕐᕕᐅᓚᐅᖅᑐᖅ ᑕᐃᒪᙵᑦ ᑎᓯᐱᕆ 28, 2020. ᐱᖃᖅᑐᖅ ᑕᐃᓐᓇ ᖃᓂᒪᖅᑰᔨᙱᑦᑐᖅ, ᖃᓄᐃᙱᖦᖢᓂ ᐃᓄᑑᓪᓗᓂᓗ. ᐊᐃᑦᑐᕐᓗᒃᑕᐅᓯᒪᑐᐃᓐᓇᕆᐊᓖᑦ ᒫᓐᓇ ᖃᐅᔨᓴᖅᑕᐅᕙᓪᓕᐊᓕᖅᐳᑦ.

“ᐱᖃᕐᓂᕋᐃᔾᔪᑎ ᐃᓚᒋᔭᖓ ᖃᐅᔨᒋᐊᖅᑕᐅᒃᑲᓐᓂᑲᑕᖕᓂᕐᒧᑦ ᖃᐅᔨᓴᕈᑕᐅᓂᒃᑯᑦ ᓯᐊᒻᒪᒃᓯᒪᓚᐅᖅᑎᓪᓗᒍ,” ᐅᖃᖅᑐᖅ ‘ᓗᒃ’ᑕᖅ ᒪᐃᑯᓪ ᐹᑐᓴᓐ, ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓ. “ᖃᐅᔨᒪᓇᕈᑎᑕᖃᙱᑦᑐᖅ ᓄᓇᓕᖕᒥ ᓯᐊᒻᒪᒃᑎᕆᓂᖓᓂᒃ ᐊᑦᑕᕐᓇᕐᓂᖓᓗ ᖁᐱᕐᕈᐊᕐᔪᐃᑦ ᐊᐃᑦᑐᕐᓗᐃᔭᑦᑐᑦ ᓯᐊᒻᒪᒍᑎᖓᓄᑦ ᐊᑦᑎᒃᑐᖅ. ᑖᔅᓱᒧᖓ ᐱᔾᔪᑎᒧᑦ, ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᒫᓐᓇ ᐊᑐᖅᑕᐅᓇᓱᐊᖅᑐᑦ ᐊᕐᕕᐊᓂ ᐊᑐᐃᓐᓇᖅᑐᑦ.”

ᐋᓐᓂᐊᓕᕇᒃᑯᓯᓕᖅᑕᐅᕝᕕᑦ ᐊᕐᕕᐊᓂ ᑲᔪᓯᓂᐊᖅᑐᑦ ᕕᕗᐊᕆ 11-ᒥ 15−ᒧᑦ, ᐱᖃᑖ ᑲᐱᔭᐅᔾᔪᑎ ᒫᑐᓇᒧᑦ ᐱᑎᑕᐅᑲᑕᒃᓗᑎᒃ ᐱᓚᐅᖅᑐᓄᑦ ᔭᓄᐊᕆᒥ ᑲᐱᓯᑲᑕᒃᑎᓪᓗᒋᑦ. ᖃᐅᔨᔾᔪᑎᑦ ᑕᑯᑎᑦᑎᔪᑦ ᐱᖃᑖᓂᒃ ᑲᐱᔭᐅᓚᐅᖅᑎᓪᓗᒋᑦ, ᐋᓐᓂᐊᓕᕇᒃᑯᓯᖅ 94 ᐳᓴᓐᑎᒥᒃ ᐊᑑᑎᖃᖅᑐᖅ ᐊᑦᑕᕐᓇᖅᑐᒦᓗᐊᕈᓐᓃᖅᑎᑦᑎᓗᓂ ᐱᕐᔪᐊᖅᑐᓂᒃ ᐊᔪᓕᕈᑕᐅᔭᑦᑐᓄᑦ ᓄᕙᒃᔪᐊᕐᓇᖅ−19−ᒧᑦ. ᐊᕐᕕᐊᕐᒥᐅᑕᑦ ᐱᓚᐅᙱᑦᑐᑦ ᓯᕗᓪᓕᖓᓂ ᐋᓐᓂᐊᓕᕇᒃᑯᓯᕐᒥᒃ ᐱᔪᒪᓗᑎᒃᓗ ᑖᔅᓱᒥᖓ ᐅᖃᓗᒍᓐᓇᖅᑐᑦ ᐋᓐᓂᐊᕕᖕᒧᑦ ᐃᓂᒃᓴᓕᐅᕐᓗᑎᒃ.

“ᐅᓪᓗᒥᐅᔪᖅ ᐱᖃᖅᑐᖅ ᑕᑯᑎᑦᑎᔪᖅ ᐅᔾᔨᖅᓱᑦᑎᐊᙱᓐᓇᕆᐊᖃᖅᑐᒍᑦ ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᐊᑐᕋᓱᒋᐊᓕᑦᑎᓐᓂᒃ. ᓄᕙᒃᔪᐊᕐᓇᖅ ᐱᑕᖃᕐᔪᐊᖅᑐᖅ, ᓄᓇᕗᓪᓕ ᓄᓇᓕᒃᐳᓪᓗ ᐊᓯᐊᒎᕆᐊᖃᕈᑎᐅᙱᑦᑐᑦ,” ᐅᖃᖅᑐᖅ ᓯᕗᓕᖅᑎ ᔫ ᓴᕕᑲᑖᖅ. “ᐅᖓᓯᒌᒃᑕᐃᓐᓇᕐᐸᒃᓗᓯ ᒪᑐᐊᖅᓯᒪᓗᓯᓗ ᐊᔪᕌᖓᔅᓯ, ᐊᒡᒐᓯ ᐅᐊᓴᒐᔪᒃᓗᒋᑦ, ᐊᖏᕐᕋᖅᓯᒪᓗᑎᑦ ᐋᓐᓂᐊᖅᑰᔨᒍᕕᑦ ᐋᓐᓂᐊᓕᕇᒃᑯᓯᓕᖅᑕᐅᓗᑎᓪᓗ ᐊᔪᕈᓐᓃᑐᐊᕈᕕᑦ ᐱᒍᓪᓇᖅᓯᑐᐊᕈᕕᑦ."

ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᒃᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᖅ−19 ᐅᖄᓚᕝᕕᖓᓄᑦ ᐅᕗᖓ 1-888-975-8601 10−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus
ᑭᖑᓪᓕᖅᐹᒧᑦ ᑐᓴᕆᐊᕈᑎᓄᑦ ᓄᓇᕘᑉ ᓄᕙᒃᔪᐊᕐᓇᖅ−19 ᐋᓐᓂᐊᓕᕇᒃᑯᓯᒧᑦ ᑐᕌᒐᕆᔭᕐᒥ, ᐅᕗᙵᕐᓗᑎᑦ www.gov.nu.ca/health/information/covid-19-vaccination

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca