ᐋᓐᓂᐊᖃᕐᓇᙱᑦᑐᓕᕆᔨᑦ ᒪᓕᒃᑕᐅᖁᔭᖏᑦ ᓱᖁᓯᙱᑦᑐᑦ ᖁᕐᓗᖅᑑᕐᒥ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᑦ ᒪᓕᒃᑕᐅᖁᔭᖏᑦ ᓱᖁᓯᙱᑦᑐᑦ ᖁᕐᓗᖅᑑᕐᒥ

ᖁᕐᓗᖅᑑᖅ, ᓄᓇᕗᑦ (ᒫᔾᔨ 10, 2022) − ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᐅᓪᓗᒥ ᑐᓴᖅᑎᑦᑎᕗᖅ ᖁᕐᓗᖅᑐᕐᒥ ᐋᓐᓂᐊᖃᕐᓇᙱᑦᑐᓕᕆᔨᑦ ᒪᓕᒃᑕᐅᖁᔭᖏᑦ ᐊᑐᓗᐊᕈᓐᓃᕐᓂᐊᕐᓂᕋᖅᑕᐅᓚᐅᖅᑐᑦ ᓱᖁᓯᔾᔮᔪᓐᓃᖅᐳᑦ.

"ᒫᓐᓇ ᖁᕐᓗᖅᑑᕐᒥ ᓄᕙᕐᔪᐊᕐᓇᖅ-19−ᓖᑦ ᖃᓄᐃᓕᖓᓂᖏᑦ ᐊᒃᓱᕈᕐᓇᖅᑐᒃᑰᕈᑕᐅᓪᓚᕆᖕᒪᑦ ᓄᓇᓕᖕᓂ ᐋᓐᓂᐊᖅᑐᓕᕆᔾᔪᑎᖏᓐᓂ. ᑕᒪᓐᓇ ᐱᔾᔪᑎᒋᓪᓗᒍ, ᐋᓐᓂᐊᖃᕐᓇᙱᑦᑐᓕᕆᔨᑦ ᒪᓕᒃᑕᐅᖁᔭᖏᑦ ᖁᕐᓗᖅᑑᕐᒥ ᐊᑐᓗᐊᕈᓐᓃᕐᓂᐊᓚᐅᖅᑐᑦ ᐅᖓᕙᕆᐊᖅᑎᑦᑐᒪᓕᖅᐸᕗᑦ," ᓘᒃᑖᖅ ᐹᑐᓴᓐ ᐅᖃᖅᑐᖅ. "ᑕᒪᓐᓇ ᖃᐅᔨᓴᖅᐸᓪᓕᐊᓂᐊᖅᐸᕗᑦ ᖃᐅᔨᓴᒃᑲᓐᓂᕐᓂᐊᖅᐳᒍᓪᓗ ᖁᕐᓗᖅᑑᕐᒥ ᑭᒡᓕᒋᑎᑕᐅᔪᑦ ᐊᑐᓗᐊᕈᓐᓃᖅᑎᑕᐅᓂᐊᕐᒪᖔᑦ ᖃᐅᔨᒪᑦᑎᐊᓕᕈᑦᑕ ᓈᒻᒪᙱᑦᑐᒃᑯᑦ ᐊᒃᑐᐃᓇᔭᕐᓂᖓᓂ ᖃᓄᐃᙱᑦᑐᑦ ᑲᒪᒋᔭᐅᔪᓐᓇᕐᓂᖏᓐᓂ.

ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᒃᑕᐅᖁᔭᖏᑦ ᓱᓕ ᐊᑐᕐᓂᐊᖅᐳᑦ:

• ᓯᓚᒥ ᑲᑎᙵᖃᑦᑕᖅᑐᑦ 50−ᓄᑦ ᑭᒡᓕᖃᖅᑎᑕᐅᕗᑦ ᐃᓄᐃᑦ.
• ᐃᓘᑉ ᐃᓗᐊᓂ ᑲᑎᙵᔪᑦ ᖁᓕᑦ ᐅᖓᑖᓅᕆᐊᖃᙱᑉᐳᑦ, ᐃᒡᓗᒥᐅᖃᑎᒌᓪᓗ.
• ᓂᕆᕝᕖᑦ ᐊᒻᒪ ᓚᐃᓴᓐᓯᖃᖅᑐᑦ ᑭᓱᓕᕆᕝᕖᑦ ᒪᒃᐱᑐᐃᓐᓇᕆᐊᖃᖅᐳᑦ 25−ᓂᒃ ᐃᓄᖃᕈᓐᓇᕐᓗᑎᒃ ᐅᕝᕙᓘᓐᓃᑦ 25−ᐳᓴᓐ ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᑦ ᒪᓕᒃᑕᐅᓗᓂ.  ᐃᙱᑲᑕᒋᐊᖃᙱᑦᑐᑦ ᐊᒻᒪ ᒧᒥᑲᑕᒋᐊᖃᙱᑦᑐᑦ.
• ᐃᒡᓘᑉ ᐃᓗᐊᓂ ᑲᑎᙵᖃᑦᑕᖅᑐᑦ 25 ᐅᖓᑖᓅᕆᐊᖃᙱᑉᐳᑦ ᐅᕝᕙᓘᓐᓃᑦ 50-ᐳᓴᓐ ᐃᓐᓄᒍᓐᓇᕐᓂᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ.
• ᐃᖃᐃᓕᓴᕆᐊᕈᓐᓇᖅᑐᑦ 25-ᖑᓗᑎᒃ ᐃᓄᐃᑦ 50 ᐳᓴᓐᑎᖓᓘᓐᓃᑦ ᐃᓄᒋᐊᒍᓐᓇᕐᓂᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓗᓂ. ᑲᑎᙵᖃᑦᑕᖅᑐᑦ ᖁᓪᓕᑦ ᐅᖓᑖᓅᕆᐊᖃᙱᑉᐳᑦ ᐃᓄᐃᑦ.
• ᐅᖃᓕᒫᒐᖃᕐᕖᑦ, ᑕᑯᔭᒐᖃᕐᕖᑦ, ᖁᙱᐊᕆᐊᕐᕖᓪᓗ ᐅᒃᑯᐃᕈᓐᓇᖅᑐᑦ ᐃᓄᖃᕐᓗᑎᒃ 25−ᓂ ᐅᕝᕙᓘᓐᓃᑦ 50 ᐳᓴᓐᑎ ᐃᓄᒋᐊᒍᓐᓇᕐᓂᖓ, ᓇᓕᐊᒃ ᐅᓄᙱᓐᓂᖅᓴᖅ ᒪᓕᒡᓗᒍ. ᑲᑎᙵᔪᑦ ᐳᓚᕋᖅᑎᑦ ᖁᓕᑦ ᐅᖓᑖᓅᕆᐊᖃᙱᑉᐳᑦ ᐃᓄᐃᑦ.
• ᓯᐊᕐᕆᔮᕐᕕᖕᒥ ᐃᓐᓄᒍᓐᓇᕐᓂᖓ ᐅᓄᖅᓯᒋᐊᕈᓐᓇᑐᐃᓐᓇᕆᐊᓕᒃ 50-ᓂᒃ ᐃᓄᖕᓂᒃ ᐅᕝᕙᓘᓐᓃᑦ 50−ᐳᓴᓐ ᐃᓐᓄᒍᓐᓇᕐᓂᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᐅᒃᐸᑦ, ᐊᒻᒪᓗ ᐅᓄᓛᖃᕐᓗᑎᒃ 50−ᓂᒃ ᖁᙱᐊᕆᐊᖅᑐᓂᒃ.
• ᐱᙳᐊᖃᑎᒌᑦ ᐱᙳᐊᕈᓐᓇᖅᑐᑦ.
• ᑐᒃᓯᐊᕐᕖᑦ 50 ᐅᖓᑖᓅᕆᐊᖃᙱᑦᑐᑦ ᐃᓄᐃᑦ ᐅᕝᕙᓘᓐᓃᑦ 25 ᐳᓴᓐ ᐃᓐᓄᒍᓐᓇᕐᓂᖓ, ᐃᙱᕆᐊᖃᙱᖦᖢᑎᒡᓗ.
• ᓱᓕ ᒪᑐᐊᖅᓯᒪᔭᕆᐊᖃᓪᓚᕆᒃᑐᑦ.

ᑭᓇᑐᐃᓐᓇᖅ ᓄᕙᕐᔪᐊᕐᓇᖅ-19−ᒥᑦ ᖃᓂᒻᒪᒃᐸᓪᓕᐊᒃᐸᑦ ᐅᖄᓚᖁᔭᐅᕗᑦ ᓄᕙᕐᔪᐊᕐᓇᒧᑦ ᐅᖄᓚᕝᕕᖕᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ ᑐᓴᖅᑎᑦᑎᑲᐅᑎᒋᓗᑎᓪᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓄᑦ ᐅᖄᓚᓗᓂ. ᓇᖕᒥᓂᖅ ᐋᓐᓂᐊᕕᓕᐊᖅᑕᐃᓕᒋᑦ.

ᓄᕙᒡᔪᐊᕐᓇᖅ-19 ᑲᐴᑎᑦ ᐊᑐᐃᓐᓇᐅᕗᑦ ᓄᓇᕗᒻᒥᐅᓕᒫᓄᑦ ᑕᓪᓕᒪᓂᒃ ᐅᖓᑖᓄᓪᓗ ᐅᑭᐅᓕᖕᓄᑦ. ᐋᓐᓂᐊᕐᕕᓯᓐᓄᑦ ᖃᐅᔨᒋᐊᕐᓗᑎᑦ ᐃᓂᒃᓴᓕᐅᕈᒪᓗᑎᑦ.

ᓄᑖᙳᓛᒥᒃ ᑐᓴᒐᒃᓴᓂᒃ ᑕᑯᔪᒪᒍᕕᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ ᓄᓇᕗᒻᒥ, ᐅᕗᙵᕐᓗᑎᑦ: https://www.gov.nu.ca/

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca