ᐋᓐᓂᐊᖃᕐᓇᙱᑦᑐᓕᕆᔨᓂᑦ ᑭᒡᓕᖃᖅᑎᑕᐅᔪᑦ ᖃᓱᔾᔫᒥᑎᑕᐅᕗᑦ ᓄᓇᕘᓕᒫᒥ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᓂᑦ  ᑭᒡᓕᖃᖅᑎᑕᐅᔪᑦ ᖃᓱᔾᔫᒥᑎᑕᐅᕗᑦ ᓄᓇᕘᓕᒫᒥ

ᐃᖃᓗᐃᑦ, ᓄᓇᕗᑦ (ᒫᑦᓯ 25, 2022) − ᓘᒃᑖᖅ ᐋᓐᓇᕇ ᑯᐊᕐᕆᕗ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᖓᔪᖅᑳᕆᔭᐅᓚᐅᑲᒃᑐᖅ, ᑐᓴᖅᑎᑦᑎᓕᖅᐳᖅ ᖃᓱᔾᔫᒥᔭᐅᓂᐊᓕᕐᓂᖏᓐᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᐅᕆᔾᔪᑕᐅᔪᑦ ᑭᒡᓕᒋᑎᑕᑦ ᓄᓇᕘᓕᒫᒥᑦ, ᐱᒋᐊᕐᓗᓂ ᓇᒡᒐᔾᔭ ᒫᑦᓯ 28, 2022.

"ᐃᖏᕐᕋᓇᓱᐃᓐᓇᖅᑎᓪᓗᑕ ᐊᖅᑯᑎᒋᔪᒪᔭᑦᑎᓐᓄᑦ ᐊᑐᕈᓐᓃᖅᑎᓐᓂᐊᕐᓗᒋᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑐᐊᕕᕐᓇᖅᑐᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᐅᕆᔾᔪᑎᑦ ᖃᓱᔭᐅᒃᑲᓐᓂᕐᓂᐊᓕᕐᒥᔪᑦ ᓄᓇᕘᒥ ᐱᒋᐊᕐᓗᒍ ᒫᑦᓯ 28-ᒥ," ᐅᖃᓚᐅᖅᐳᖅ ᓘᒃᑖᖅ ᑯᐊᕐᕆᕗ. "ᐸᕐᓇᒃᑕᑦᑎᓐᓂ ᑖᒃᑯᓈᓂᓕᖅᑎᓪᓗᑕ, ᐱᓕᕆᓯᒋᐊᖅᐸᓪᓕᐊᓂᐊᓕᕐᒥᔪᒍᑦ ᑲᒪᒋᒃᑲᓐᓂᓕᕐᒥᓗᑎᒍᑦ ᐃᑲᔫᑎᒃᓴᕆᑲᑕᒃᑕᕗᑦ ᐊᐅᓚᑦᑎᔾᔪᑎᒃᓴᑦ ᓄᕙᒡᔪᐊᕐᓇᖅ-19−ᒧᑦ ᐊᓯᓕᒫᖏᑦ ᖃᓂᒻᒪᓰᑦ ᑲᒪᒋᓲᑦᑎᑐᑦ ᓴᖅᑭᓪᓗᒋᓪᓗ ᐊᓯᖏᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓱᒫᓘᑕᐅᔪᑦ ᓄᓇᕗᒥᐅᓄᑦ. ᑕᒪᓐᓇ ᑐᑭᖃᖅᐳᖅ ᖃᓂᕝᕕᓯᐅᓚᐅᖅᑐᓂᒃ ᖃᐅᔨᓴᖅᐸᒍᓐᓃᕐᓗᑕ, ᖃᓂᒻᒪᒃᓯᒪᔪᓄᑦ ᖃᓂᕝᕕᓯᐅᓚᐅᖅᑑᒐᓗᐊᑦ ᐊᓂᑦᑕᐃᓕᑎᑕᐅᖃᑦᑕᔾᔮᔪᓐᓃᖅᑐᑦ, ᑐᓴᖅᑎᑦᑎᖃᑦᑕᔾᔮᔪᓐᓃᖅᖢᑕᓗ ᓄᑖᓂᒃ ᓇᓗᓇᐃᔭᐅᑎᓂᒃ ᓄᕙᒡᔪᐊᕐᓇᖅ-19−ᓕᕆᔪᓂᒃ ᓄᓇᓕᖕᓂ. ᑭᒃᑯᑐᐃᓐᓇᑦᑎᐊᑦ ᓇᓗᓇᐃᖅᑕᐅᓯᒪᔪᑦ ᓄᕙᒡᔪᐊᕐᓇᖅ-19−ᖃᕐᓂᕋᖅᑕᐅᓗᑎᒃ ᐊᓂᑦᑕᐃᓕᒋᐊᖃᐃᓐᓇᕐᓂᐊᖅᑐᑦ. ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᓯᒪᒍᕕᑦ, ᐊᓂᑦᑕᐃᓕᓯᑲᐅᑎᒋᓗᑎᑦ ᐅᖃᓗᒃᕕᒋᓗᒍᓗ ᓄᕙᒡᔪᐊᕐᓇᖅ-19 ᐅᕐᑳᓚᕝᕕᒃ ᐃᑲᔪᖅᑕᐅᒃᑲᓐᓂᕈᒪᓗᑎᑦ."

ᒪᑐᐊᑦ ᐊᑐᖅᑕᐅᖏᓐᓇᕐᓗᑎᒃ ᓄᓇᓕᓕᒫᓂᒃ. ᐃᓕᓐᓂᐊᕐᕕᓕᒫᑦ ᒪᒃᐱᕈᓐᓇᖅᑐᑦ 100 ᐳᓴᓐᑎᖏᓐᓂᒃ ᐃᓐᓄᒍᓐᓇᖅᑎᒋᔭᖏᓐᓂᒃ.

ᐱᒋᐊᕐᓗᒍ ᓇᒡᒐᔾᔭ, ᒫᑦᓯ 28, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᐅᕆᔾᔪᑕᐅᔪᓕᒫᑦ ᓄᓇᕘᒥ ᐃᒪᐃᓕᖓᓛᓕᖅᑐᑦ:

• ᑭᓪᓕᖃᖅᑎᑕᐅᙱᓪᓗᑎᒃ ᓯᓚᒥ ᑲᑎᓐᓂᕆᔭᐅᕙᒃᑐᑦ.
• ᐃᒡᓘᑉ ᐃᓗᐊᓂ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ 15−ᓂᒃ ᐃᓄᖕᓂᒃ ᐃᒡᓗᒥᐅᑕᕆᔭᐅᔪᑦ ᐃᓚᐅᓗᑎᒃ.
• ᓂᕆᕝᕖᑦ ᐊᒻᒪᓗ ᓚᐃᓴᖃᖅᑎᐅᔪᑦ ᑭᓱᓕᕆᕝᕖᑦ ᒪᒃᐱᑐᐃᓐᓇᕆᐊᖃᕐᓗᑎᒃ 75 ᐳᓴᓐᑎᒥᒃ ᐃᓐᓄᒍᓐᓇᕐᓂᖏᑦ ᒪᓕᒃᑕᐅᓗᑎᒃ. ᐃᙱᑲᑕᒍᓐᓇᖅᓯᓗᑎᒃ ᒧᒥᑲᑕᒍᓐᓇᖅᓯᓗᑎᒡᓗ.
• ᐃᖃᓗᖕᓂ ᑕᕐᕆᔭᕐᕕᒃ ᒪᒃᐱᑐᐃᓐᓇᕆᐊᖃᖅᐳᖅ 100−ᓄᑦ ᐃᓄᖕᓄᑦ ᐅᕝᕙᓘᓐᓃᑦ 75 ᐳᓴᓐᑎᖏᑦ ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᑦ ᒪᓕᒃᑕᐅᓇᔭᖅᖢᓂ, ᑕᕐᕆᔭᕐᕕᒃ ᐊᑕᐅᓯᕐᒥ ᐊᓯᐊᓄᑦ ᑕᕐᕆᔭᕐᕕᖕᒧᑦ ᓅᑲᑕᙱᓪᓗᑎᒃ.
• ᐃᒡᓘᑉ ᐃᓗᐊᓂ ᑲᑎᙵᖃᑦᑕᖅᑐᑦ 100 ᐅᖓᑖᓃᑦᑕᕆᐊᖃᙱᑉᐳᑦ ᐅᕝᕙᓘᓐᓃᑦ 75-ᐳᓴᓐᑎᒥᒃ ᐃᓐᓄᒍᓐᓇᕐᓂᖓ, ᓇᓕᐊᑐᐃᓐᓇᖅ ᐃᓄᑭᓐᓂᖅᓴᖅ ᒪᓕᒃᑕᐅᓇᔭᖅᖢᓂ.
• ᑲᑎᙵᓗᑎᒃ ᐃᓅᓯᓕᕆᔭᐅᕝᕕᑦ ᑎᑭᐅᑎᔪᓐᓇᖅᑐᑦ ᐊᕙᑎᓄᑦ ᐃᓄᖕᓄᑦ.
• ᐃᖃᐃᓕᓴᕐᕕᖕᒥ ᐃᓐᓄᒍᓐᓇᕐᓗᑎᒃ 25-ᓂᒃ ᐅᕝᕙᓘᓐᓃᑦ 50 ᐳᓴᓐᑎᒥᒃ ᐃᓐᓄᒍᓐᓇᕐᓂᕆᔭᖓᓂᒃ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ. ᑲᑎᙵᓪᓗᑎᒃ ᑲᑎᒪᔪᑦ ᐃᓐᓄᒃᑎᒋᔪᓐᓇᕐᓗᑎᒃ 25-ᓂᒃ.
• ᐳᐃᔾᔪᕌᕐᕖᑦ ᒪᒃᐱᕈᓐᓇᕐᓗᑎᒃ ᐳᐃᔾᔪᕌᕆᐊᖅᑐᖅᑐᓕᒫᑦ ᐃᓯᕈᓐᓇᕐᓗᑎᒃ. ᑲᑎᙵᓗᑎᒃ ᑲᑎᒪᔪᑦ ᑭᒡᓕᖃᕐᓗᑎᒃ 25-ᓂᒃ ᐃᓄᖕᓂᒃ.
• ᐅᖃᓕᒫᒐᖃᕐᕖᑦ, ᑕᑯᔭᒐᖃᕐᕖᑦ, ᖁᙱᐊᕆᐊᕐᕖᓪᓗ ᐅᒃᑯᐃᕈᓐᓇᖅᑐᑦ ᐃᓄᖃᕐᓗᑎᒃ 25−ᓂ ᐅᕝᕙᓘᓐᓃᑦ 50 ᐳᓴᓐᑎᓂᒃ ᐃᓐᓄᒍᓐᓇᕐᓂᖓ, ᐅᓄᙱᓐᓂᖅᓴᑦ ᒪᓕᒃᑕᐅᓇᔭᖅᑐᖅ. ᑲᑎᙵᔪᑦ ᕿᒥᕐᕈᓇᒃᑎᑕᐅᔪᑦ 25-ᓂᒃ ᐃᓄᖕᓂᒃ ᕿᒥᕐᕈᑎᑦᑎᔪᓐᓇᖅᓯᓗᑎᒃ.
• ᓯᐊᕐᕆᔮᕐᕕᖕᒥ ᐃᓐᓄᒍᓐᓇᕐᓂᖓ ᐅᓄᖅᓯᒋᐊᕈᓐᓇᑐᐃᓐᓇᕆᐊᓕᒃ 50-ᓂᒃ ᐃᓄᖕᓂᒃ ᐅᕝᕙᓘᓐᓃᑦ 50−ᐳᓴᓐᑎᖓᓐᓂ ᐃᓐᓄᒍᓐᓇᕐᓗᑎᒃ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ, ᐊᒻᒪᓗ ᐅᓄᓛᖃᕐᓗᑎᒃ 50−ᓂᒃ ᖁᙱᐊᕆᐊᖅᑐᓂᒃ.
• ᑐᒃᓯᐊᕐᕕᖕᓂ ᑲᑎᙵᔪᑦ ᐃᓄᒋᐊᒃᑎᒋᔪᓐᓇᕐᓂᐊᖅᐳᑦ 100-ᓂᒃ ᐅᕝᕙᓘᓐᓃᑦ 75 ᐳᓴᓐᑎᖏᑦ ᐃᓯᕈᓐᓇᕐᓗᑎᒃ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ. ᐃᙱᕈᓐᓇᖅᑐᑦ.
• ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᖕᒧᑦ ᐳᓛᕆᐊᕈᒪᔪᑦ ᐳᓛᕆᐊᕈᓐᓇᖅᓯᓗᑎᒃ ᐃᓚᒥᓄᑦ.
• ᒥᕐᖑᐃᖅᓯᕐᕖᑦ ᒥᕐᖑᐃᖅᓯᕐᕕᖕᒥ ᐃᒡᓗᖁᑎᒋᔭᐅᔪᑦ ᒪᒃᐱᕈᓐᓇᖅᓯᓗᑎᒃ.

ᑭᓇᑐᐃᓐᓇᖅ ᓄᕙᒡᔪᐊᕐᓇᖅ-19−ᒥᑦ ᖃᓂᒻᒪᒃᐸᓪᓕᐊᒃᐸᑦ− ᑲᒃᑭᓕᑲᑕᒡᓗᓂ, ᖁᐃᕐᓱᑲᑕᒡᓗᓂ, ᐃᒡᒋᐊᕐᓗᒡᓗᓂ, ᐆᓇᑲᑕᒡᓗᓂ, ᐊᓂᖅᑎᕆᑦᑎᐊᕈᓐᓇᙱᓪᓗᓂᓗ −  ᐅᖄᓚᖁᔭᐅᕗᖅ ᓄᕙᒡᔪᐊᕐᓇᒧᑦ ᐅᖄᓚᕝᕕᖓᓄᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ. ᓇᖕᒥᓂᖅ ᐋᓐᓂᐊᕕᓕᐊᖅᑕᐃᓕᒋᑦ ᑭᓯᐊᓂ ᑐᐊᕕᕐᓇᖅᐸᑦ.

ᑲᐴᑎᑦ ᓄᓇᕗᒥᐅᓄᑦ ᐅᑭᐅᓕᖕᓄᑦ ᑕᓪᓕᒪᓂᒃ 11-ᓄᑦ ᑎᑭᓪᓗᒍ ᐊᑐᐃᓐᓇᐅᓕᖅᑐᑦ ᓄᓇᓕᓕᒫᓂᒃ. ᐋᓐᓂᐊᕐᕕᖕᒧᑦ ᐅᖃᓛᑐᐃᓐᓇᕐᓗᓯ ᐃᓂᒃᓴᓕᐅᖅᑕᐅᔪᒪᒍᔅᓯ.

ᓄᑖᙳᓛᒥᒃ ᑐᓴᒐᒃᓴᓂᒃ ᑕᑯᔪᒪᒍᕕᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ ᓄᓇᕗᒻᒥ, ᐅᕗᙵᕐᓗᑎᑦ: https://www.gov.nu.ca/.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ   
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
cpuglia@gov.nu.ca