ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᖅᑭᑦᑎᕗᑦ ᓄᑕᕋᓛᑉ ᐊᑦᑕᕐᓇᙱᑦᑐᒃᑯᑦ ᓯᓂᖕᓂᕐᒧᑦ ᐅᔾᔨᕈᓱᖕᓂᕐᒥᒃ ᑐᕌᒐᕆᔭᖓᓂᒃ

ᐱᕙᓪᓕᐊᔪᑦ ᓴᖅᑭᑕᐅᔪᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᖅᑭᑦᑎᕗᑦ ᓄᑕᕋᓛᑉ ᐊᑦᑕᕐᓇᙱᑦᑐᒃᑯᑦ ᓯᓂᖕᓂᕐᒧᑦ ᐅᔾᔨᕈᓱᖕᓂᕐᒥᒃ ᑐᕌᒐᕆᔭᖓᓂᒃ

ᐃᖃᓗᒃᑑᑦᑎᐊᖅ, ᐃᖃᓗᐃᑦ, ᑲᖏᖅᖠᓂᖅ, ᓄᓇᕗᑦ (ᒫᑦᓯ 20, 2023) – ᐊᑕᐅᑦᑎᒃᑰᖃᑎᖃᕐᓗᓂ ᑲᓇᑕᒥ ᖁᐊᖅᓵᕐᓇᙱᑦᑐᒥᒃ ᓯᓂᖕᓂᕐᒧᑦ ᐅᔾᔨᕆᔭᖃᕐᓂᕐᒧᑦ ᐱᓇᓱᐊᕈᓯᕆᔭᐅᔪᒥᒃ, ᒫᑦᓯ 13-17, 2023−ᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᖅᑭᑎᑦᑎᓯᒪᕗᑦ ᓄᑕᕋᓛᑉ ᖁᐊᖅᓵᕐᓇᙱᑦᑐᒥᒃ ᓯᓂᒃᐸᖕᓂᕐᒧᑦ ᐅᔾᔨᕆᔭᖃᕐᓂᕐᒧᑦ ᐱᓕᕆᐊᖑᕙᒃᑐᒥᒃ ᐅᔾᔨᕐᓇᖅᓯᑎᑦᑎᔪᒪᓪᓗᑎᒃ ᖁᐊᖅᓵᕐᓇᙱᑦᑐᒃᑯᑦ ᓯᓂᒃᐸᖕᓂᕐᒧᑦ ᐊᑐᖅᑕᐅᕙᒃᑐᓂᒃ ᒥᑭᒡᓕᒋᐊᖅᑎᑦᑎᔪᒪᓂᕐᒧᓪᓗ ᖁᐊᖅᓵᕐᓇᖅᑐᒥᒃ ᓄᑕᕋᓛᑦ ᓯᓂᖕᓂᒃᑰᖓᔪᒃᑯᑦ ᑐᖁᕙᒃᑐᓄᑦ ᓄᓇᕘᓕᒫᒥ.

ᐊᑦᑕᖕᓇᙱᑦᑐᒥᑦ ᓯᓂᒃᕕᖃᕐᓂᖅ ᐱᔭᕆᐊᖃᓪᓚᕆᒃᐳᖅ ᓄᑕᕋᓛᑉ ᖃᓄᐃᙱᑦᑎᐊᖁᓪᓗᒍ ᐊᑦᑕᕐᓇᖅᑐᒦᖏᓪᓗᓂᓗ. ᐋᓐᓂᐊᕕᖕᒥ ᑲᒪᒋᔭᐅᕙᒌᖅᐸᒃᑲᓗᐊᖅᑎᓪᓗᒋᑦ, ᓯᓂᖕᓂᒃᑰᖓᔪᒃᑯᑦ ᐃᓅᔪᓐᓃᖃᑦᑕᖅᑐᑦ − ᐃᓚᓕᐅᔾᔭᐅᓪᓗᑎᒃ ᓄᑕᕋᓛᑦ ᐊᓂᕐᓂᖃᙱᑎᓪᓗᒋᑦ ᐃᖅᑯᒻᒪᐅᑕᐅᕙᒃᑐᑦ – ᓱᓕ ᐊᐃᑉᐸᕆᔭᐅᓪᓗᓂ ᐃᓅᔪᓐᓃᕈᑕᐅᓂᖅᐹᖑᓲᖅ ᖃᓄᐃᙱᑦᑎᐊᖅᑐᓄᑦ ᓄᑕᕋᓛᓄᑦ, ᐅᓄᕐᓂᖅᓴᐅᓪᓗᑎᒃ ᐊᒃᑐᖅᑕᐅᓴᕋᐃᑦᑐᑦ ᐃᓄᖕᓂ. ᓄᓇᕗᒻᒥ, ᐃᓅᓵᖅᑐᑦ ᐃᖅᑯᒻᒪᐅᑕᐅᕙᖕᓂᖏᑦ ᓴᖅᑭᑉᐹᓕᓲᖑᕗᑦ ᒪᕐᕈᐃᖅᓱᖅᖢᑎᒃ ᑎᓴᒪᐃᖅᓱᖅᖢᑎᓪᓗ ᐅᓄᕐᓂᖅᓴᐅᓪᓗᑎᒃ ᐊᓯᖏᓐᓂᒃ ᑲᓇᑕᒥ.

ᑖᓐᓇ ᐅᔾᔨᕈᓱᑦᑎᑦᑎᓂᕐᒥᑦ ᐱᓕᕆᐊᖑᔪᖅ ᐊᕐᕌᒍᓕᒫᒧᑦ ᐱᓇᓱᒃᑕᐅᓯᒪᔪᖅ ᐱᐅᓯᕚᓪᓕᑎᑦᑎᓂᕐᒥᑦ ᐅᔾᔨᕈᓱᖕᓂᕐᒥᑦᑦ ᐃᓕᓐᓂᐊᑎᑦᑎᓂᕐᒥᒃᓗ ᐊᑦᑕᕐᓇᖏᑦᑐᒥᑦ ᓯᓂᒃᕕᖃᖃᑦᑕᕐᓂᕐᒥᑦ ᐊᕙᑎᖃᕐᓂᖅ ᐃᑲᔪᕐᓗᒋᑦ ᐊᖓᔪᖅᑳᕆᔭᐅᔪᑦ ᐸᖅᑭᑦᓯᔨᓪᓗ ᖃᐅᔨᒪᔾᔪᑎᒃᓴᐅᑎᑕᐅᔪᓂᒃ ᐋᖅᑭᒃᓯᕙᖕᓂᕐᓂ ᐊᑦᑕᕐᓇᖏᑦᑐᒥᑦ ᓯᓂᖕᓂᕐᒧᑦ ᐱᓕᕆᔾᔪᓯᕐᓂᑦ.

"ᑐᑭᒧᐊᒃᑕᐅᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐊᒻᒪ ᐃᓄᐃᑦ ᐱᒻᒪᕆᐅᒋᔭᖏᓐᓂᑦ, ᐅᔾᔨᕆᔭᐅᓕᖅᑎᑦᑎᓂᕐᒧᑦ ᐱᓕᕆᐊᖑᑎᑕᐅᔪᖅ ᐃᓚᖃᖅᐳᖅ ᐱᔾᔪᑎᒃᓴᓂᒃ ᓲᕐᓗ ᓄᑕᕋᓛᑉ ᐊᑦᑕᕐᓇᙱᑦᑐᒃᑯᑦ ᓯᓂᖕᓂᕐᒧᑦ ᑕᕐᕆᔮᒃᓴᒥᒃ, ᐊᔾᔨᙳᐊᒥᒃ ᑕᑯᒃᓴᐅᑎᑦᑎᓪᓗᓂ ᐊᑦᑕᕐᓇᙱᑦᑐᒥᒃ ᓯᓂᒍᓯᕐᓂᒃ ᐊᒻᒪ ᐃᒡᓕᕐᓂᒃ, ᐊᑭᓐᓇᕐᒥᐅᑕᓂᒃ ᐊᒻᒪ ᑐᓂᐅᖅᑲᒐᒃᓴᓂᒃ ᓴᖅᑭᔮᖅᑎᑦᑎᔪᓂᒃ ᐊᑦᑕᕐᓇᙱᑦᑐᒥᒃ ᓯᓂᒡᕕᖃᕐᓂᕐᒥᒃ, ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ, ᓄᓇᓕᖕᓂ ᓈᓚᐅᑎᒃᑯᑦ ᑎᑎᕋᖅᓯᒪᔪᓂᒃ, ᐱᕙᓪᓕᐊᔪᓂᒃ ᒪᓂᓴᐅᑎᓂᒃ ᐊᒻᒪ ᐃᓅᓵᖅᑐᓂᒃ ᖃᓄᐃᙱᑦᑎᐊᖅᑐᓕᕆᔾᔪᑎᓂᒃ ᐊᖓᔪᖅᑳᙳᓵᖅᑐᓄᑦ," ᐅᖃᓚᐅᖅᐳᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ. "ᑐᕌᒐᕆᔭᕗᑦ ᖃᓄᐃᙱᑦᑎᐊᕐᓂᖅᓴᑦ ᖃᑕᙳᑎᒌᑦ ᖃᐅᔨᒪᒋᐊᕐᓗᒋᓪᓗ ᓄᑕᕋᓕᒫᑦ ᓄᓇᕗᒻᒥ ᖃᓄᐃᙱᑦᑎᐊᕐᓗᑎᒃ ᐱᒋᐊᕐᓗᑎᒃ ᐃᓅᓯᕐᒥ. ᑲᑐᔾᔨᓗᑕ ᓯᐊᒻᒪᑦᑎᑦᑎᔪᓐᓇᖅᑐᒍᑦ ᐅᖃᐅᓯᕐᒥᑦ ᐱᒻᒪᕆᐅᓂᖓᓂᒃ ᓴᖅᑭᑎᑦᑎᓂᕐᒥᑦ ᐊᑦᑕᕐᓇᖏᑦᑐᒥᑦ ᓯᓂᒃᕕᐅᔪᓐᓇᖅᑐᓂᑦ ᐊᕙᑎᓕᖕᓂ ᓄᓇᕗᒻᒥᐅᓕᒫᑦ ᓄᑕᕋᓛᓄᑦ."

ᐃᓚᒋᔭᐅᓪᓗᓂ ᑕᒪᑐᒧᖓ ᐅᔾᔨᕆᔭᖃᕐᓂᕐᒧᑦ ᐱᓕᕆᐊᖑᔪᒧᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᖃᖅᐳᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ ᐱᑎᑦᑎᕙᒃᑐᓂᒃ ᓄᓇᕘᓕᒫᒥ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᐊᔪᕈᓐᓃᖅᓴᕐᓂᕐᒥᒃ ᖃᐅᔨᒪᓂᕆᔭᐅᔪᓂᒡᓗ ᖁᐊᖅᓵᕐᓇᙱᑦᑐᒃᑯᑦ ᓯᓂᖕᓂᕐᒧᑦ ᐊᑐᖅᑕᐅᕙᒃᑐᓂᒃ. ᐃᖅᑲᓇᐃᔭᖅᑎᑦ ᓄᓇᕘᓕᒫᒥ ᐱᑎᑕᐅᓂᐊᖅᐳᑦ ᐱᒻᒪᕆᐅᔪᓂᒃ ᐃᓕᓴᐃᔨᓄᑦ ᐱᕚᓪᓕᕈᑎᒃᓴᓂᒃ ᐊᕐᕌᒍ ᐊᑐᖅᑎᓪᓗᒍ ᓄᑕᕋᓛᑦ ᐊᑦᑕᕐᓇᙱᑦᑐᒃᑯᑦ ᓯᓂᒍᓯᖏᑦ ᐊᒻᒪ ᐃᒡᓕᖃᓕᖅᐸᑕ, ᖃᓄᖅ ᐊᑦᑕᕐᓇᙱᑦᑐᒃᑯᑦ ᐱᓕᕆᔪᓐᓇᕐᒪᖔᑕ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐋᖅᑭᒃᓱᐃᕙᓪᓕᐊᕗᑦ ᖃᕆᑕᐅᔭᒃᑯᑦ ᐊᔪᕈᓐᓃᖅᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᒥᒃ ᐃᓚᓕᐅᑎᓯᒪᔪᒥᒡᓗ ᐊᑐᖅᑕᐅᔪᓐᓇᖅᑐᒥᒃ ᐃᓗᓕᖃᖅᖢᓂ ᐊᑐᖅᑕᐅᔪᓐᓇᖅᑐᓂᒃ ᐃᑲᔪᕈᒪᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ ᐃᖅᑲᓇᐃᔭᖅᑏᑦ ᐃᑲᔪᖅᑐᐃᓂᐊᕐᓗᑎᒃ ᐊᖓᔪᖅᑳᓂᒃ ᑲᒪᔨᒋᔭᐅᕙᒃᑐᓂᒡᓗ ᓄᑕᕋᓛᓂᒃ.

ᓄᑕᕋᓛᑉ ᐊᑦᑕᕐᓇᙱᑦᑐᒃᑯᑦ ᓯᓂᖕᓂᕐᒧᑦ ᖃᓄᐃᓕᐅᕈᑎᖓ ᓇᓕᒧᑦᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ 2023-2026 ᐱᓕᕆᐊᖃᕐᓂᕐᒧᑦ ᐸᕐᓇᐅᑎᖓᓂ ᓯᕗᓪᓕᐅᔾᔭᐅᔭᕆᐊᓕᖕᓂ ᐊᒃᑐᐊᓂᖃᕐᖢᓂ ᓄᓇᕗᒻᒥ ᒐᕙᒪᒃᑯᑦ ᑐᑭᒧᐊᕈᑎᒃᓴᖏᓐᓄᑦ ᓯᕗᓪᓕᐅᔾᔭᐅᔭᕆᐊᓕᖕᓄᑦ ᐱᔪᓐᓇᖅᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᖅ ᒪᒥᓴᕐᓂᕐᓗ ᓇᓗᓇᐃᖅᓯᒪᔪᖅ ᑲᑐᔾᔨᓗᑕᒥ: ᐊᕐᕕᓂᓕᕆᓕᖅᑕᖓ ᒪᓕᒐᓕᐅᖅᑏᑦ ᐱᓕᕆᐊᒃᓴᖓᑦ 2022

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca