ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᖁᔭᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᑐᑦ ᐊᕐᕕᐊᓂᑦ

ᓯᑎᐱᕆ 22, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᖁᔭᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᑐᑦ ᐊᕐᕕᐊᓂᑦ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 22, 2021) −ᓘᒃᑖᖅ ᒪᐃᑯ ᐹᑐᓴᓐ ᓄᓇᕗᒻᒥᑦ ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᒃ, ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᖃᓱᔭᐅᓕᕐᓂᖏᓐᓂᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑭᒡᓕᒋᔭᐅᔪᓂ ᐊᕐᕕᐊᓂ ᓇᓗᓇᐃᕐᑕᐅᓚᐅᕐᑎᓪᓗᒍ ᓱᓕᙱᑦᑐᒥᑦ ᖃᐅᔨᓴᕈᑎᕕᓂᖕᒥᑦ.

“80 ᐅᖓᑖᓄ ᖃᐅᔨᓴᓚᐅᕐᐳᑦ ᖃᐅᔨᓇᓱᒃᖢᑎᒃ ᓄᕙᒡᔪᐊᕐᓇᖅ-19 ᓯᐊᒻᒪᖕᓂᖕᒪᖔᑦ ᖃᐅᔨᔭᐅᓚᐅᕋᓂᑦ ᐊᕐᕕᐊᓂ,” ᐅᖃᓚᐅᕐᑐᖅ ᓘᒃᑖᖅ ᐹᑐᓴᓐ. “ᖃᐅᔨᓴᕈᑎᕕᓂᑦ ᐱᑕᖃᙱᓐᓂᕋᐅᓚᐅᕐᑐᑦ ᓄᕙᒡᔪᐊᕐᓇᖅ-19−ᓕᖕᒥᑦ ᐊᑦᑕᖕᓇᖕᓂᖓᓗ ᓄᓇᓕᖕᓂᑦ ᐊᑦᑎᒃᖢᓂ. ᑕᐃᒪᐃᓐᓂᖓᓄᑦ, ᐅᓗᕆᐊᓇᙱᑦᑐᖅ ᖃᓱᕚᓪᓕᕐᓗᒋᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒪᓕᒃᑕᐅᔭᕆᐊᓕᑦ. ᑭᓯᐊᓂᓕ, ᒪᑐᐊᕐᓯᒪᔭᕆᐊᖃᓪᓚᕆᒃᑐᐃᑦ ᓱᓕ ᓄᓇᕗᓕᒫᒥᑦ.”

ᐱᒋᐊᕐᖢᓂ ᒫᓐᓇᑲᐅᑎᒋᑦ, ᓴᙱᓂᕐᓴᐃᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒪᓕᒃᑕᐅᔭᕆᐊᓕᑦ ᐊᕐᕕᐊᓂᑦ ᐲᕐᑕᐅᔪᑦ, ᐃᓚᐅᓪᓗᓂ ᐊᐅᓪᓚᕐᑕᐃᓕᒪᓂᖅ ᐊᓂᑦᑕᐃᓕᒪᓂᖕᒧᓪᓗ ᐅᖃᐅᔾᔪᐃᔾᔪᑎᑦ ᐃᓄᖕᓄᑦ ᑲᐱᔭᐅᓯᒪᙱᑦᑐᓄᑦ ᑕᒪᐃᓐᓄᑦ, ᐊᐅᓪᓚᓚᐅᕐᑐᑦ ᐊᕐᕕᐊᓂ ᓯᑎᐱᕆ 6−ᒥᑦ ᑭᖑᓂᐊᓂᓪᓗ. ᐊᒻᒪᓗᑦᑕᐅᖅ:

  • ᑭᒡᓕᖃᕈᓐᓃᕐᑐᑦ ᐊᒥᓲᓂᖏᑦ ᐃᓄᐃᑦ ᓯᓚᒥᑦ ᑲᑎᓐᓂᐊᕐᓗᑎᒃ.
  • ᐃᓘᑉ ᐃᓗᐊᓂ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ 15−ᓄᑦ ᐃᓄᖕᓄᑦ, ᐃᒡᓗᒥᐅᖃᑕᐅᔪᑦ ᐃᓚᐅᓗᑎᒃ.
  • ᐃᓪᓗᒥ ᑲᑎᙵᔪᑦ, ᑐᒃᓯᐊᕆᐊᕐᕕᐅᔪᓂᑦ, ᐱᙳᐊᕐᕕᐅᔪᓂᑦ, ᐃᖃᐃᓕᓴᕐᕕᐅᔪᓂᑦ, ᐊᒻᒪᓗ ᐳᐃᔾᔪᕋᕐᕖᑦ, ᐃᓚᒋᐊᕐᑐᑦ 100−ᓄᑦ ᐃᓄᖕᓄᑦ 75 ᐳᓴᓐᑎᒥᓪᓘᓐᓃᑦ ᐃᓄᒋᐊᒍᓐᓇᕐᑕᖓᓂ, ᓇᓕᐊᑐᐃᓐᓇᖅ ᐊᒥᓲᙱᓐᓂᕐᓴᖅ.
  • ᐅᖃᓕᒫᒐᖃᕐᕕᑦ, ᑕᑯᔭᒐᖃᕐᕕᑦ 25−ᓂᒃ ᐃᓄᖕᓂᒃ ᑕᕐᕆᔭᖅᑎᑦᑎᔪᓐᓇᖅᑐᑦ ᐅᕝᕙᓘᓐᓃᑦ 50% ᐃᓐᓄᒍᓐᓇᕐᓂᕆᔭᖓ ᒪᓕᒃᑕᐅᓗᓂ.
  • ᓇᒥᑐᐃᓐᓇᖅ ᐃᓄᒋᐊᒃᑐᒃᑯᕕᐅᔪᓂᑦ ᑲᑎᙵᓗᑎᑦ ᐳᓚᕋᑦᑎᖃᕆᐊᖃᕈᓐᓃᖅᑐᑦ, ᑲᑎᙵᓗᑎᑦ ᐃᖃᐃᓕᓴᕆᐊᖃᕈᓐᓃᖅᑐᑦ ᐅᕝᕙᓘᓐᓃᑦ ᐃᙱᓪᓗᑎᑦ.
  • ᐃᓕᒌᖑᔪᑦ ᕿᑎᒃᑎᑦ ᕿᑎᖃᑦᑕᕈᓐᓇᕐᓯᔪᑦ.
  • ᓂᕆᕝᕖᑦ ᐱᔪᓐᓇᐅᑎᖃᖅᑎᑕᐅᔪᓪᓗ 75 ᐳᓴᓐᑎᒥ ᐃᓄᖃᕈᓐᓇᖅᓯᓗᑎᑦ.
  • ᐃᓅᓯᓕᕆᓂᕐᒧᑦ ᑲᑎᙵᔪᑦ ᑭᒡᓕᖓ 20 ᐃᓄᐃᑦ.
  • ᒥᕐᖑᐃᖅᓯᕐᕕᑦ ᐃᒡᓗᖁᑎᖏᑦ ᐅᒃᑯᐃᕈᓐᓇᕐᓯᔪᑦ.
  • ᑲᒪᒋᔭᐅᖏᓐᓇᖅᑐᒃᑯᕕᐅᔪᑦ ᐊᒻᒪᓗ ᐃᓐᓇᒃᑯᕖᑦ ᒪᕐᕉᓐᓂᒃ ᐅᒡᓚᖅᑎᖃᕈᓐᓇᕐᓗᑎᑦ; ᒪᑐᐊᖅᓯᒪᔭᕆᐊᓖᑦ ᑕᒪᕐᒥᒃ ᐅᒡᓚᖅᑎᐅᔪᑦ ᐅᑭᐅᓖᑦ ᑎᓴᒪᓂᒃ ᐅᖓᑖᓄᓪᓗ ᐃᓯᕈᓐᓇᖅᑐᑦ; ᖃᓂᒋᓂᖅᐹᖏᑦ ᐃᓚᒋᔭᖏᑦ ᑭᓯᐊᓂ.

ᑭᓇᑐᐃᓐᓇᖅ ᐱᕙᓪᓕᐊᓂᖃᖅᐸᑦ ᓄᕙᕐᔪᐊᕐᓇᖅ-19ᖃᕐᓂᕐᒧᑦ ᐅᖄᓚᖁᔭᐅᕗᑦ ᓄᕙᕐᔪᐊᕐᓇᒧᑦ ᐅᖄᓚᕝᕕᒻᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ ᖃᐅᔨᓴᖅᑕᐅᓂᕐᒧᑦ ᐃᓂᔅᓴᓕᐅᖁᓪᓗᒋᑦ ᐅᕝᕙᓘᓐᓃᑦ ᑐᓴᖅᑎᑦᑎᑲᐅᑎᒋᓗᑎᓪᓘᓐᓃᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᒻᒥᓂᖅ, ᐊᒻᒪᓗ ᐊᖏᕐᕋᓐᓂᒃ ᐃᓄᑑᔭᕆᐊᖃᓕᕐᓗᑎᑦ ᐅᓪᓗᓄᑦ 14ᓄᑦ.

ᓱᓕ ᑲᐱᔭᐅᓐᓇᖅᐳᖅ ᓄᓇᕘᓕᒫᒥ. ᐋᓐᓂᐊᕕᓯ ᐅᖃᓗᒡᕕᒋᓗᒍ ᐃᓂᒃᓴᓕᐅᕐᓗᑎᑦ ᐃᓯᑐᐃᓐᓇᕐᓗᑎᓪᓘᓐᓃᑦ ᐃᖃᓗᐃᑦ ᐅᖁᒪᐃᓐᓂᕐᓂᐊᕐᕕᖓᓄᑦ ᐱᓇᓱᐊᕈᓯᑕᒫᑦ Moderna-ᒧᑦ (ᐅᑭᐅᓕᖕᓄᑦ 18 ᐅᖓᑖᓄᓪᓗ) ᐱᖓᔪᐊᒃᑯᓪᓗ Pfizer (ᐅᑭᐅᓕᖕᓄᑦ 12-ᓂᑦ 17-ᒧᑦ). ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓗᓂ ᐱᐅᓂᖅᐹᖑᕗᖅ ᐃᓕᖕᓂᑦ, ᐃᓚᖕᓂᑦ ᐊᒻᒪᓗ ᓄᓇᓕᖕᓂ ᓴᐳᔾᔨᓯᒪᓇᓱᒡᓗᑎᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca