ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᒋᑎᑕᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᐸᓪᓕᐊᔪᑦ ᓇᓂᕈᓘᔭᖅ ᕿᑭᖅᑖᓗᖕᒥ, ᑲᖏᖅᖠᓂᖅ

ᔫᓂ 23, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᒋᑎᑕᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᐸᓪᓕᐊᔪᑦ ᓇᓂᕈᓘᔭᖅ ᕿᑭᖅᑖᓗᖕᒥ, ᑲᖏᖅᖠᓂᖅ

ᓄᓇᕗᑦ (ᔫᓂ 23, 2021) - ᐅᓪᓗᒥ, ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ, ᑐᓴᖅᑎᑦᑎᖅᑲᐅᕗᖅ ᓄᑖᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᓯᔾᔪᑕᐅᔪᓂᒃ ᑲᖏᖅᖠᓂᕐᒥ ᐊᒻᒪ ᑕᒪᐃᓐᓂᒃ ᕿᑭᖅᑖᓗᖕᒥ ᓄᓇᓕᖕᓂ ᑭᓯᐊᓂ ᐃᖃᓗᖕᓂ ᓇᓗᓇᐃᖅᓯᓪᓗᓂᓗ ᓄᕙᒡᔪᐊᕐᓇᖅ-19 ᓯᐊᒻᒪᒃᐸᓪᓕᐊᓚᐅᖅᑐᖅ ᑭᙵᕐᓂ ᐊᓂᒍᖅᓯᒪᓕᕐᓂᖓᓂᒃ.

"ᓄᓇᕗᒥᐅᑦ ᐊᒃᓱᕉᑎᖃᑦᑎᐊᓚᐅᕐᒪᑕ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᕗᑦ, 28 ᐅᓪᓗᑦ ᐅᖓᑖᓅᖅᓯᒪᓕᕐᒪᑦ ᑭᖑᓪᓕᖅᐹᒥ ᖃᓂᒻᒪᒃᑐᖃᓚᐅᖅᑎᓪᓗᒍ ᑭᙵᕐᓂ, ᓇᓗᓇᐃᖅᓯᔪᓐᓇᖅᓯᕗᒍᑦ ᐊᐃᑦᑐᕐᓗᕋᐅᑎᓂᖅ ᐊᓂᒍᑲᓚᐅᕐᓂᖓᓂᒃ," ᐅᖃᓚᐅᖅᐳᖅ ᓘᒃᑖᖅ ᐹᑐᓴᓐ. "ᐊᒃᓱᕉᑕᐅᖁᔪᓐᓃᖅᐸᓪᓕᐊᓕᖅᑎᓪᓗᑎᒍᑦ ᐆᒃᑐᖅᑕᐅᖁᔭᕗᑦ ᕿᑭᖅᑖᓗᖕᒥ ᓇᓂᕈᓘᔭᖅ ᐊᒻᒪ ᑲᖏᖅᖠᓂᕐᒥ, ᑭᒃᑯᓕᒫᑦᑎᐊᑦ ᑎᓕᐅᖅᐸᒃᑲ ᐅᔾᔨᖅᓱᑦᑎᐊᖏᓐᓇᖁᓪᓗᒋᑦ."

ᐱᒋᐊᕐᓗᒍ 12:01 ᐅᓐᓄᐊᒃᑯᑦ, ᐅᓪᓗᑐᐃᓐᓇᖅ, ᔫᓂ 25, ᑲᖏᖅᖠᓂᕐᒥ ᐊᒻᒪ ᑕᒪᐃᓐᓂᒃ ᕿᑭᖅᑖᓗᖕᒥᓄᓇᓕᖕᓂ ᑭᓯᐊᓂ ᐃᖃᓗᖕᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᐅᕆᔾᔪᑕᐅᔪᑦ ᐊᒃᓱᕉᑕᐅᓗᐊᕈᓐᓃᖅᑐᑦ.

ᑖᒃᑯᓄᖓ ᓄᓇᓕᖕᓄᑦ, ᐃᒡᓗᕐᔪᐊᑉ ᐃᓗᐊᓂ ᑲᑎᖃᑦᑕᖅᑐᑦ ᐱᙳᐊᕐᕕᖕᒥ, ᑲᑎᒪᕕᖕᓂ, ᒐᕙᒪᒃᑯᓐᓂ ᐊᒻᒪ ᐃᓄᐃᑦ ᑲᑐᔾᔨᖃᑎᒌᓂᒃ ᐅᓄᖅᓯᒋᐊᖅᑕᐅᓂᐊᓕᖅᑐᑦ ᑲᑎᑦᑐᓐᓇᖅᑐᑦ 100−ᓄᑦ ᐃᓄᖕᓄᑦ ᐅᕝᕙᓘᓐᓃᑦ 75%−ᖓᓂ ᐃᓐᓄᒍᓐᓇᕐᓂᕆᔭᐅᔪᖅ ᒪᓕᒃᑕᐅᓗᓂ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓂᐊᖅᑐᖅ. ᑲᑎᙵᓗᑎᒃ ᐃᖃᐃᓕᓴᕐᕕᖕᓂ ᐊᒻᒪ ᐳᐃᔾᔪᕌᕐᕕᖕᓂ ᐅᓄᖅᓯᒋᐊᕈᓐᓇᕐᓗᑎᒃ 25−ᓂᒃ ᐃᓄᖕᓂᒃ. ᑕᕐᕆᔭᕐᕖᑦ 100−ᓂᒃ ᐃᓄᖕᓂᒃ ᑕᕐᕆᔭᖅᑎᑦᑎᔪᓐᓇᖅᑐᑦ ᐅᕝᕙᓘᓐᓃᑦ 75% ᐃᓐᓄᒍᓐᓇᕐᓂᕆᔭᖓ ᒪᓕᒃᑕᐅᓗᓂ. ᑐᒃᓯᐊᕐᕕᖕᓂ ᑲᑎᙵᔪᑦ ᐃᓄᒋᐊᒃᑎᒋᔪᓐᓇᕐᓂᐊᖅᐳᑦ 100-ᓂᒃ ᐅᕝᕙᓘᓐᓃᑦ 75%−ᖑᓗᑎᒃ ᐃᓯᕈᓐᓇᖅᑐᑦ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᐅᑐᐊᖅᐸᑦ. ᓄᓇᕗᒻᒥ ᐊᕕᒃᓯᒪᔪᓂᒃ ᐊᒻᒪ ᕼᐋᒻᒪᓚᒃᑯᓐᓂ ᒥᕐᖑᐃᖅᓯᕐᕕᖕᒧᑦ ᐃᒡᓗᕐᔪᐊᑦ ᒪᒃᐱᒃᑲᓐᓂᑐᐃᓐᓇᕆᐊᓕᑦ. ᐃᓅᖃᑎᒌᑦ ᐃᓄᒋᐊᒃᑐᓂᒃ ᐅᖓᓯᒌᒃᑕᖅᐸᒡᓗᑎᒃ. ᐃᓕᓐᓂᐊᕐᕖᑦ ᒪᑐᐃᒃᑲᓐᓂᕈᓐᓇᖅᓯᕗᑦ ᓇᓃᓐᓂᖓ 1-ᒦᑦᑐᓄᑦ ᓄᓇᕗᒻᒥ ᐃᓕᓐᓂᐊᕐᕖᑦ ᒪᒃᐱᓛᕐᒪᖔᑕ ᐸᕐᓇᒃᑕᐅᑎᓪᓗᒋᑦ. ᐃᒡᓗᕐᔪᐊᑉ ᐃᓗᐊᓂ ᑲᑎᙵᔪᑦ ᐃᒡᓗᒋᔭᐅᔪᒥᒃ

15-ᖑᐃᓐᓇᖁᔭᐅᕗᑦ ᐃᒡᓗᒥᐅᖃᑎᒋᔭᐅᔪᑦ ᐃᓚᓕᐅᑎᓗᒋᑦ, ᐊᓃᕐᓗᑎᒡᓗ ᑲᑎᙵᔪᑦ 100−ᒦᖏᓐᓇᕐᓂᐊᖅᐳᖅ ᐃᓄᐃᑦ ᑲᑎᙵᔪᓐᓇᖅᑐᑦ.
ᒪᑐᐊᖅᓯᒪᔭᕆᐊᖃᐃᓐᓇᑐᐃᓐᓇᕆᐊᓖᑦ ᓄᓇᕗᒻᒥ ᓄᓇᓕᓕᒫᓂᒃ.

ᑭᓇᑐᐃᓐᓇᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᒧᑦ ᐅᖄᓚᕝᕕᐅᔪᓐᓇᖅᑐᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ, ᑐᓴᖅᑎᑦᑎᑲᐅᑎᒋᓗᑎᒡᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓄᑦ,

ᐊᓂᑦᑕᐃᓕᓯᑲᐅᑎᒋᓗᓂᓗ ᐊᖏᕐᕋᒥᓂ ᐅᓪᓗᓄᑦ 14-ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.
ᑐᓴᒐᒃᓴᓕᐊᖑᓵᖅᑐᑦ ᐅᕙᙵᑦ ᐱᔭᒃᓴᐅᔪᑦ www.gov.nu.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5979
cpuglia@gov.nu.ca