ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ ᐅᖃᐅᓯᓕᒃ ᓄᕙᔾᔪᐊᕐᓇᖅ 19-ᓕᒻᒥᒃ ᑎᑭᑦᑐᒥᓂᕐᒥᒃ ᖃᖓᑕᔫᒃᑯᑦ ᐃᖃᓗᓐᓄᑦ

ᔭᓐᓄᐊᓕ 20, 2021

ᓇᓗᓇᐃᕈᑎ

ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ ᐅᖃᐅᓯᓕᒃ ᓄᕙᔾᔪᐊᕐᓇᖅ 19-ᓕᒻᒥᒃ ᑎᑭᑦᑐᒥᓂᕐᒥᒃ ᖃᖓᑕᔫᒃᑯᑦ ᐃᖃᓗᓐᓄᑦ

ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ ᓘᑦᑖᖅ ᒪᐃᒃ ᐸᑐᓴᓐ ᐅᓪᓗᒥ ᓴᖅᑭᖅᑎᑦᓯᖅᑲᐅᔪᖅ ᐆᒥᖓ ᓇᓗᓇᐃᕈᑎᒥᒃ:

“12:30-ᕈᔪᒻᒥ ᐅᓐᓄᓴ ᐅᓪᓗᒥ, ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᒥᒃ ᑲᑎᓯᒋᐊᖅᑐᖅᑐᖃᖅᑕᐅᔪᖅ ᑎᑭᓐᓂᐊᖅᑐᒥᒃ ᑲᓇᐃᑎᐊᓐ ᓄᐊᑦ ᖃᖓᑕᔫᖓᓂᒃ FAB101 ᐋᑐᕙᒥᒃ ᐃᖃᓗᓐᓄᑦ. ᑎᑭᑦᑐᖅ ᕿᓚᒥᐅᔪᒃᑯᑦ ᐋᓐᓂᐊᕐᕕᓕᐊᖅᓯᒪᓪᓗᓂ ᐊᐅᓪᓚᖅᓯᒪᔪᒥᓂᖅ ᐱᒋᐊᖅᑐᓂ ᔭᓐᓄᐊᓕ 17. ᓄᕙᔾᔪᐊᕐᓇᖅ 19-ᖃᕐᒪᖔᖅ ᖃᐅᔨᓴᖅᑕᐅᔪᒥᓂᖅ ᔭᓐᓄᐊᓕ 18-ᒥ ᐋᑐᕙᒥ ᓇᓗᓇᐃᖅᑕᐅᖅᑲᐅᔪᖅ ᓄᕙᔾᔪᐊᕐᓇᖅᑐᖃᕐᓂᖓᓂᒃ ᐅᓪᓛᖅ, ᖃᖓᑕᔫᖅ ᐊᐅᓪᓚᖅᓯᒪᓕᖅᑎᓪᓗᒍ.

ᑎᑭᑦᑐᒥᓂᖅ ᖃᖓᑕᔫᒃᑯᑦ ᖃᓂᒪᒍᑎᖃᙱᑦᑐᖅ ᖃᓄᐃᖏᑦᓯᐊᖅᑐᓂᓗ. ᓯᕗᕐᖓᒍᑦ ᐅᔾᔨᖅᓱᑦᓯᐊᖁᔨᓪᓗᑕ, ᑖᓐᓇ ᑎᑭᑦᑐᒥᓂᖅ ᕿᑭᖅᑕᓂ ᐋᓐᓂᐊᕐᕕᐊᓗᒻᒨᖅᑕᐅᓂᐊᖅᑐᖅ ᐊᓂᑦᑕᐃᓕᑎᑕᐅᓕᕐᓗᓂᓗ. ᑭᖑᓂᐊᒍᑦ ᓄᕙᔾᔪᐊᕐᓇᖅ 19-ᖃᕐᒪᖔᖅ ᖃᐅᔨᓴᖅᑕᐅᒃᑲᓐᓂᕐᓂᐊᖅᑐᖅ ᖃᐅᔨᓴᕈᑎᒥᓂᐅᔪᖅ ᓇᓗᓇᐃᖅᑕᐅᓯᒪᔪᖅ ᑕᒻᒪᖅᓯᒪᙱᒃᑲᓗᐊᕐᒪᖔᖅ. ᓂᕆᐅᑦᑐᒍᑦ ᖃᐅᔨᓴᖅᑕᐅᒍᑎᖏᑦ ᓴᖅᑭᖅᑕᐅᓂᐊᕐᓂᖏᓐᓂᒃ ᐅᓐᓄᓴᒋᐊᒃᑲᓐᓂᖅ.

ᒫᓐᓇᑲᐃᓐᓇᕐᓕ, ᐅᔾᔨᖅᓱᒋᐊᓪᓚᖁᔨᓪᓗᑕ, ᐃᑭᒪᔪᒥᓂᓕᒫᑦ ᖃᖓᑕᔫᒥ ᐅᖃᐅᔾᔭᐅᓂᐊᖅᑐᑦ ᓅᑦᑕᐃᓕᑲᐃᓐᓇᖁᔭᐅᓗᑎᒃ ᐅᐊᑦᓯᔭᐅᕕᖓᓂ ᐃᖃᓗᐃᑦ ᖃᖓᑕᔫᒃᑯᕕᖓᓂ ᖃᐅᔨᓴᖅᑕᐅᒍᑎᖏᑦ ᓇᓗᓇᐃᖅᑕᐅᒃᑲᓐᓂᓚᐅᙱᓐᓂᖏᓐᓂ ᐅᓐᓄᓴ. ᐃᖅᑲᐃᑎᑦᓯᒋᐊᕈᒪᔪᖓ ᓄᓇᕗᒻᒥᐅᓂᒃ ᐅᓗᕆᓇᖅᑑᒍᓐᓇᕐᓂᖓ ᐊᐃᑦᓱᓪᓗᐃᒍᓐᓇᓂᕐᒧᑦ ᖃᖓᑕᔫᓂ ᐊᑉᐸᓯᑦᑐᒻᒪᕆᒃ.

ᐊᖏᕐᕋᖅᓯᒪᖁᓪᓗᒋᑦ ᐊᓂᑦᑕᐃᓕᓕᕐᓗᑎᓪᓗ. ᐃᖅᑲᐃᑎᑦᓯᒋᐊᕈᒪᔪᖓ ᓄᓇᕗᒻᒥᐅᓂᒃ ᑭᒃᑯᑐᐃᓐᓇᐃᑦ ᐊᐅᓪᓚᕐᓂᐊᖅᑐᑦ ᐊᓯᖏᓐᓄᑦ ᓄᓇᓕᓐᓄᑦ ᐅᓪᓗᒥ ᓱᓕ ᐊᐅᓪᓚᕈᓐᓇᖅᑐᑦ ᐊᓂᑦᑕᐃᓕᓕᕐᓗᑎᓪᓗ ᐊᖏᕐᕋᒥᓐᓂ ᑎᑭᒃᑯᑎᒃ ᐅᐸᑦᑕᒥᓐᓄᑦ.

ᑭᓇᑐᐃᓐᓇᖅ ᖃᓄᐃᒍᑎᖃᓕᑐᐊᕈᓂ ᖃᐅᔨᒃᑲᐃᖁᔭᐅᔪᖅ ᓄᕙᔾᔪᐊᕐᓇᖅ 19 ᐅᖄᓚᕕᖓᓄᑦ ᖃᓄᐃᓕᐅᕆᐊᖃᕐᒪᖔᕐᒥᒃ ᖃᐅᔨᒋᐊᕐᓗᑎᒃ ᐅᕗᖓ 1-888-975-8601.

ᑐᓴᖅᑎᑦᓯᒋᐊᖃᑦᑕᓂᐊᖅᑐᑦ ᓄᑖᓂᒃ ᑐᓴᕋᑦᓴᓂᒃ ᐊᑐᐃᓐᓇᕈᖅᑐᖃᕋᐃᑉᐸᑦ.”

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
cpuglia@gov.nu.ca