ᐅᖃᓚᐅᑎᓯᐅᑏᑦ

You are here

ᐋᓐᓂᐊᓕᖅᓯᒪᔪᖃᑐᐃᓐᓇᕆᐊᓕᒃ ᓄᕙᒡᔪᐊᕐᓇᖅ-19ᒧᑦ ᐊᕐᕕᐊᓂ

ᓯᑎᐱᕆ 17, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᓕᖅᓯᒪᔪᖃᑐᐃᓐᓇᕆᐊᓕᒃ ᓄᕙᒡᔪᐊᕐᓇᖅ-19ᒧᑦ ᐊᕐᕕᐊᓂ

ᐊᕐᕕᐊᑦ, ᓄᓇᕗᑦ (ᓯᑎᐱᕆ 17, 2021) − ᓗᑦᑖᖅ. ᒪᐃᑯᓪ ᐹᑐᓴᓐ, ᓄᓇᕗᒻ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ, ᐅᓪᓗᒥ ᑐᓴᖅᑎᑦᑎᔪᖅ ᐋᓐᓂᐊᓕᖅᓯᒪᔪᖃᑐᐃᓐᓇᕆᐊᖃᕐᓂᖓᓂᒃ ᓄᕙᕐᔪᐊᕐᓇᖅ-19ᒧᑦ ᐊᕐᕕᐊᕐᒥᑦ.

"ᑖᓐᓇ ᓄᑖᖅ ᓇᓗᓇᐃᖅᑕᐅᔪᖅ ᓯᑎᐱᕆ 16ᒥᑦ ᑖᓐᓇ ᐃᓕᓐᓂᐊᖅᑎᐅᔪᖅ ᓄᓇᓕᒻᒥᑦ ᖃᐅᔨᓴᖅᑕᐅᔾᔪᑎᖓᑎᒍᑦ ᖃᐅᔨᔭᐅᔪᖅ ᖃᐅᔨᓴᐅᑎᒃᑯᑦ ᐊᑎᖃᖅᑐᖅ IDNow ᖃᐅᔨᓴᕈᑎ ᓱᑲᔪᒥᑦ ᖃᐅᔨᑎᑦᑎᔾᔪᑎᐅᔪᖅ. ᑖᔅᓱᒪ ᖃᐅᔨᓴᖅᑕᐅᔾᔪᑎᖓᑕ ᐊᐃᑉᐸᖓ ᐊᐅᓪᓚᖅᑎᑕᐅᓯᒪᔪᖅ ᑲᖏᖅᖠᓂᕐᒧᑦ ᓇᓗᓇᐃᖅᑕᐅᓪᓚᑦᑖᕈᓐᓇᖁᓪᓗᒍ ᖃᐅᔨᓴᕈᑕᐅᓯᒪᔪᖅ, ᐅᓪᓗᒥ ᑖᓐᓇ ᓂᕆᐅᒋᔭᐅᔪᖅ ᑐᓴᖅᑕᐅᔪᓐᓇᖅᓯᓂᐊᕐᓗᓂ," ᐅᖃᖅᑐᖅ ᓗᑦᑖᖅ. ᐹᑐᓴᓐ. ᐃᓕᓐᓂᐊᕐᕖᑦ ᐊᕐᕕᐊᓂᑦ ᒪᑐᔭᐅᔪᑦ ᐅᓪᓗᒥ ᖃᐅᔨᓇᓱᖕᓂᖏᓐᓂᑦ ᖃᓄᑎᒋᒃ ᐅᓗᕆᐊᓇᕐᓂᖃᕐᒪᖔᖅ. ᑖᓐᓇ ᓄᕙᕐᔪᐊᕐᓇᖅᑐᓕᒻᒥ ᓇᓗᓇᐃᖅᑕᐅᔪᖅ ᐃᓄᒃ ᐃᓚᖏᓪᓗ ᑕᒪᕐᒥᒃ ᐊᐅᓪᓚᖅᓯᒪᕋᑖᓚᐅᖅᑐᑦ, ᑖᓐᓇ ᓇᓗᓇᐃᕈᑕᐅᔪᖅ ᐊᐃᑉᐸᖓᓐᓂᒃ ᓄᕙᕐᔪᐊᕐᓇᖅᑐᓕᒻᒦᑦᑐᖃᕐᓂᖓᓂᒃ. ᓇᓗᓇᐃᕈᑎᒃᓴᐅᔪᖅ ᖃᐅᔨᒪᓇᖅᓯᔪᖅ ᖁᓚᕐᓇᖏᑦᑐᒥᑦ ᑖᓐᓇ ᖃᐅᔨᓴᖅᑕᐅᒃᑲᓐᓂᕈᑎᖓ ᓇᓗᓇᐃᖅᓯᓂᐊᖅᑐᖅ ᐱᑕᖃᓪᓚᑦᑖᕐᓂᖓᓂᒃ. ᑖᓐᓇ ᐱᓪᓗᒍ, ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒪᓕᑦᑕᐅᔭᕆᐊᓖᑦ ᓄᖅᑲᖓᔾᔪᑕᐅᔪᑦ ᐱᒋᐊᖅᑎᑕᐅᕗᑦ ᓄᓇᓕᒻᒥ."

ᐊᐅᓪᓚᕆᐊᓖᑦ ᐊᕐᕕᐊᓄᑦ ᑕᕝᕙᖓᓪᓗ ᐊᕐᕕᐊᓂᑦ ᒫᓐᓇ ᓄᖅᑲᖓᖁᔭᐅᕗᑦ. ᑭᓇᑐᐃᓐᓇᖅ ᐊᕐᕕᐊᓂᑦ ᐊᐅᓪᓚᓚᐅᖅᑐᖅ ᓯᑎᐱᕆ 6ᒥ, ᐊᒻᒪᓗ ᑲᐱᔭᐅᓯᒪᙱᓪᓗᓂᒃ ᑕᒪᒃᑮᓐᓂᒃ ᐋᓐᓂᐊᓕᕇᒃᑯᑎᒥᑦ, ᐊᓂᑦᑕᐅᓕᖁᔭᐅᕗᖅ ᐅᓪᓗᓄᑦ 14ᓄᑦ ᐅᓪᓗᖓᓐᓂᒃ ᐱᒋᐊᕐᓗᑎᑦ ᐊᐅᓪᓚᕐᕕᒋᓚᐅᖅᑕᖏᓐᓂᑦ ᐊᕐᕕᐊᕐᒥᑦ. ᐋᓐᓂᐊᕈᑕᐅᖃᑦᑕᖅᑐᓂᑦ ᐃᑉᐱᓐᓂᐊᓕᕐᓂᕈᕕᑦ, ᐅᖄᓚᓗᑎᑦ ᓄᓇᕗᒻᒥ ᓄᕙᕐᔪᐊᕐᓇᖅ-19 ᐅᖄᓚᕝᕕᖓᓐᓄᑦ 1-888-975-8601.

ᐱᒋᐊᕐᓗᒍ ᒫᓐᓇᑲᐅᑎᒋ ᒪᑐᐊᖅᓯᒪᔾᔪᑎᓂᑦ ᐊᑐᕆᐊᖃᓕᖅᑐᑦ ᐊᕐᕕᐊᓂᑦ ᓇᒥᓕᒫᖅ ᐃᓯᖅᓯᒪᔪᑦ ᓯᓚᒥᓪᓗ ᐃᓄᒋᐊᒃᑐᒃᑯᕕᐅᔪᓂᑦ ᐅᖓᓯᒌᒃᑕᕈᓐᓇᖏᑉᐸᑕ. ᐊᒻᒪᓗᑦᑕᐅᖅ:

  • ᓯᓚᒥ ᑲᑎᓐᓂᕆᔭᐅᕙᒃᑐᑦ ᐃᓱᓕᑦᑕᖅᑎᑕᐅᕗᑦ 50−ᓄᑦ ᐃᓄᖕᓄᑦ.
  • ᐃᓘᑉ ᐃᓗᐊᓂ ᑲᑎᙵᔪᑦ ᖃᑦᑏᓐᓇᕈᐊᕐᓗᑎᒃ 10−ᓄᑦ ᐃᓄᖕᓄᑦ, ᐃᒡᓗᒥᐅᖃᑕᐅᔪᑦ ᐃᓚᐅᓗᑎᒃ.
  • ᐃᓪᓗᒥ ᑲᑎᙵᔪᑦ, ᑐᒃᓯᐊᕆᐊᕐᕕᐅᔪᓂᑦ, ᐱᙳᐊᕐᕕᐅᔪᓂᑦ, ᐃᖃᐃᓕᓴᕐᕕᐅᔪᓂᑦ, ᐅᖃᓕᒫᒐᖃᕐᕕᐅᔪᓂᑦ ᐊᒻᒪᓗ ᐳᐃᔾᔪᕋᕐᕖᑦ, ᑭᓪᓕᖃᕐᓂᐊᓕᖅᑐᑦ 25ᓄᑦ ᐅᕝᕙᓗ 50 ᐳᓴᓐᑎᖓᓐᓂᒃ ᐃᓄᒋᐊᒍᓐᓇᕐᓂᕆᔭᖏᑕ, ᓇᓪᓕᐊᑐᐃᓐᓇᖅ ᖃᑦᑏᓐᓇᐅᓂᖅᓴᖅ.
  • ᓇᒥᑐᐃᓐᓇᖅ ᐃᓄᒋᐊᒃᑐᒃᑯᕕᐅᔪᓂᑦ ᑲᑎᙵᓗᑎᑦ ᐳᓚᕋᑦᑎᖃᕆᐊᖃᕈᓐᓃᖅᑐᑦ, ᑲᑎᙵᓗᑎᑦ ᐃᖃᐃᓕᓴᕆᐊᖃᕈᓐᓃᖅᑐᑦ ᐅᕝᕙᓘᓐᓃᑦ ᐃᙱᓪᓗᑎᑦ.
  • ᓯᐊᕐᕆᔮᕐᕕᓐᓃᑦᑐᑦ ᑭᓪᓕᖃᕐᓗᑎᑦ 50ᓄᑦ ᐅᕝᕙᓘᓐᓃᑦ 50 ᐳᓴᓐᑎᖓ ᐃᓄᖃᕈᓐᓇᕐᓂᖓᑕ, ᓇᓪᓕᐊᑐᐃᓐᓇᖅ ᖃᑦᑏᓐᓇᐅᓂᖅᓴᖅ. ᕿᑎᖃᑎᒌᙱᓪᓗᑎᑦ.
  • ᓂᕆᕝᕕᑦ ᐊᒻᒪᓗ ᓚᐃᓴᖃᖅᑎᑕᐅᔪᓪᓗ 25 ᐳᓴᓐᑎᒥ ᐃᓄᖃᕈᓐᓇᖅᓯᓗᑎᑦ.
  • ᐃᓅᓯᓕᕆᓂᕐᒧᑦ ᑲᑎᙵᔪᑦ ᑭᒡᓕᖓ 10 ᐃᓄᐃᑦ.
  • ᒥᕐᖑᐃᖅᓯᕐᕖᑦ ᒪᑐᐃᖔᖅᑐᑦ ᓱᓕ ᑭᓯᐊᓂ ᐱᓕᕆᕝᕕᖏᑦ ᒪᑐᔪᑦ.
  • ᐃᓕᓐᓂᐊᕐᕖᑦ ᐃᓕᓐᓂᐊᖅᑎᑦᑎᓂᕐᒧᑦ ᐸᕐᓇᐅᑎᖏᓐᓄᑦ ᓅᓪᓗᑎᑦ ᐃᓕᓐᓂᐊᕐᕕᒻᒦᓪᓗᑎᓪᓗ ᐊᒻᒪᓗ ᐊᖏᕐᕋᒻᒥᓂᒃ.
  • ᑲᒪᒋᔭᐅᖏᓐᓇᖅᑐᒃᑯᕕᐅᔪᑦ ᐊᒻᒪᓗ ᐃᓐᓇᒃᑯᕖᑦ ᒪᕐᕉᓐᓂᒃ ᐅᒡᓚᖅᑎᖃᕈᓐᓇᕐᓗᑎᑦ; ᒪᑐᐊᖅᓯᒪᔭᕆᐊᓖᑦ ᑕᒪᕐᒥᒃ ᐅᒡᓚᖅᑎᐅᔪᑦ ᐅᑭᐅᓖᑦ ᑎᓴᒪᓂᒃ ᐅᖓᑖᓄᓪᓗ ᐃᓯᕈᓐᓇᖅᑐᑦ; ᖃᓂᒋᓂᖅᐹᖏᑦ ᐃᓚᒋᔭᖏᑦ ᑭᓯᐊᓂ.

ᑭᓇᑐᐃᓐᓇᖅ ᐱᕙᓪᓕᐊᓂᖃᖅᐸᑦ ᓄᕙᕐᔪᐊᕐᓇᖅ-19ᖃᕐᓂᕐᒧᑦ ᐅᖄᓚᖁᔭᐅᕗᑦ ᓄᕙᕐᔪᐊᕐᓇᒧᑦ ᐅᖄᓚᕝᕕᒻᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ ᖃᐅᔨᓴᖅᑕᐅᓂᕐᒧᑦ ᐃᓂᔅᓴᓕᐅᖁᓪᓗᒋᑦ ᐅᕝᕙᓘᓐᓃᑦ ᑐᓴᖅᑎᑦᑎᑲᐅᑎᒋᓗᑎᓪᓘᓐᓃᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᒻᒥᓂᖅ, ᐊᒻᒪᓗ ᐊᖏᕐᕋᓐᓂᒃ ᐃᓄᑑᔭᕆᐊᖃᓕᕐᓗᑎᑦ ᐅᓪᓗᓄᑦ 14ᓄᑦ.

ᓱᓕ ᑲᐱᔭᐅᓐᓇᖅᐳᖅ ᓄᓇᕘᓕᒫᒥ. ᐋᓐᓂᐊᕕᓯ ᐅᖃᓗᒡᕕᒋᓗᒍ ᐃᓂᒃᓴᓕᐅᕐᓗᑎᑦ ᐃᓯᑐᐃᓐᓇᕐᓗᑎᓪᓘᓐᓃᑦ ᐃᖃᓗᐃᑦ ᐅᖁᒪᐃᓐᓂᕐᓂᐊᕐᕕᖓᓄᑦ ᐱᓇᓱᐊᕈᓯᑕᒫᑦ Moderna-ᒧᑦ (ᐅᑭᐅᓕᖕᓄᑦ 18 ᐅᖓᑖᓄᓪᓗ) ᐱᖓᔪᐊᒃᑯᓪᓗ Pfizer (ᐅᑭᐅᓕᖕᓄᑦ 12-ᓂᑦ 17-ᒧᑦ). ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓗᓂ ᐱᐅᓂᖅᐹᖑᕗᖅ ᐃᓕᖕᓂᑦ, ᐃᓚᖕᓂᑦ ᐊᒻᒪᓗ ᓄᓇᓕᖕᓂ ᓴᐳᔾᔨᓯᒪᓇᓱᒡᓗᑎᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca