ᐅᖃᓚᐅᑎᓯᐅᑏᑦ

You are here

7−ᓂᒃ ᓄᑖᓂᑦ ᓄᕙᒃᔪᐊᕐᓇᖅ-19−ᒧᑦ ᐱᑕᖃᓕᕐᐳᖅ ᐊᕐᕕᐊᓂ

ᕕᕝᕗᐊᓕ 15, 2021

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ

7−ᓂᒃ ᓄᑖᓂᑦ ᓄᕙᒃᔪᐊᕐᓇᖅ-19−ᒧᑦ ᐱᑕᖃᓕᕐᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 15, 2021) − ᐅᓪᓗᒥ, ᓄᓇᕗᑦ 7−ᓂᒃ ᓇᓗᓇᐃᖅᑕᐅᓯᒪᓪᓚᑦᑖᖅᑐᓂᑦ ᓄᕙᒡᔪᐊᕐᓇᖅ-19−ᖃᕐᓂᖏᓐᓂᒃ. 18-ᖑᕗᑦ ᓇᓗᓇᐃᖅᑕᐅᓯᒪᕗᑦ ᓄᕙᒡᔪᐊᕐᓇᓖᑦ ᓄᓇᕗᒻᒥ, ᑕᒪᕐᒥᒡᓗ ᐊᕐᕕᐊᒦᖦᖢᑎᒃ.

“ᑕᑯᑎᓪᓗᑕ ᐅᓄᖅᓯᕙᓪᓕᐊᔪᓂᒃ ᓄᕙᒡᔪᐊᕐᓇᖅ-19−ᒥᒃ ᐊᕐᕕᐊᕐᒥ, ᐱᒻᒪᕆᐊᓘᕗᖅ ᑭᒃᑯᓕᒫᑦᑎᐊᑦ ᑲᔪᓰᓐᓇᖅᐸᑕ ᐱᓕᕆᐊᒃᓴᕆᔭᒥᓂᒃ ᓄᖅᑲᖅᑎᑦᑎᔪᒪᓪᓗᑎᒃ ᓯᐊᒻᒪᒃᐸᓪᓕᐊᓂᖓᓂᒃ ᑕᒪᑐᒪ ᖃᓂᒪᓐᓇᕆᔭᐅᔫᑉ,” ᑕᐃᒪᓐᓇ ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ, ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᖢᓂ. "ᐊᖏᕐᕋᖅᓯᒪᖃᑦᑕᕆᔅᓯ ᑭᓯᐊᓂ ᐊᓂᔭᕆᐊᖃᓪᓚᕆᒃᑯᔅᓯ, ᒪᑐᐊᖅᓯᒪᕙᒡᓗᓯ ᐃᒡᓗᒥᐅᑕᐅᖃᑎᒌᓯ ᓯᓚᑖᓃᓕᕌᖓᔅᓯ, ᐃᓱᓕᑦᑕᖅᑎᓪᓗᒋᑦ ᑲᑎᓐᓂᕆᔭᐅᕙᒃᑐᑦ ᓯᓚᒥᑐᐊᖅ, ᐊᔅᒐᓯᓗ ᐅᐊᓴᕋᔪᒃᐸᒡᓗᒋᑦ. ᖃᐅᔨᒪᔪᖓ ᑕᒪᔅᓯᑦᑎᐊᖅ ᑕᒪᑐᒧᖓ ᑕᖃᒋᔭᖃᓕᕐᓂᔅᓯᓐᓂᒃ ᑕᖃᓯᒪᓂᕐᓗ ᓴᖅᑭᖃᑦᑕᓕᖅᖢᓂ, ᑭᓯᐊᓂᓗᑦᑕᐅᖅ ᐊᑐᕆᐊᓕᖕᓂᒃ ᐊᑐᐃᓐᓇᖅᐸᒡᓗᓯ ᓴᙲᓐᓇᕐᓗᓯᓗ."

ᑕᒪᕐᒥᑦᑎᐊᖅ ᑕᐃᒃᑯᐊ ᐃᓄᐃᑦ ᖃᓄᐃᙱᑉᐳᑦ, ᐅᐸᒃᑕᐅᑦᑕᐃᓕᒪᓪᓗᑎᒡᓗ ᐊᖏᕐᕋᒥᓂ ᐊᐴᑎᖃᑎᖃᖅᓯᒪᓂᕐᒧᓪᓗ ᑐᔾᔭᖅᓯᕙᓪᓕᐊᓂᖅ ᑲᔪᓰᓐᓇᖅᖢᓂ. ᕕᕗᐊᕆ 15−ᖑᓚᐅᕐᓂᖓᓂᑦ, ᐊᕐᕕᐊᕐᒥ ᖃᐅᔨᓴᖅᓯᓂᖅ ᓴᖅᑭᑎᑦᑎᓯᒪᕗᖅ 2056−ᓂᒃ ᐱᑕᖃᙱᓐᓂᕋᐃᔪᓂᒃ ᖃᐅᔨᓴᕐᓂᕐᓂᒃ.

ᓄᓇᕗᒻᒥᑦ ᑐᐊᕕᕐᓇᖅᑐᓕᕆᔨᒃᑯᖏᑦ ᐃᑲᔪᖅᑐᐃᔪᑦ ᓄᓇᓕᖕᓂᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᒌᒃᑯᖏᓐᓂᑦ. ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 12-ᒥ ᐱᒋᐊᕐᓗᓂ ᐃᓄᖕᓄᑦ ᐊᒃᑐᐊᑲᑕᖁᔭᐅᙱᑦᑐᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ. ᖃᐅᔨᒋᐊᖁᔭᐅᕗᑦ ᐋᓐᓂᐊᕕᖏᓐᓄᑦ ᐃᖃᓗᖕᓂᓪᓘᓐᓃᑦ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᕐᓂᐊᕐᓗᑎᒃ ᖃᐅᔨᓇᓱᖕᓂᖕᓂᑦ ᖃᐅᔨᓴᕐᓂᖕᓂᓪᓗ. ᑎᑭᑦᑐᖃᕈᓐᓇᙱᑦᑐᖅ ᐊᐅᓪᓚᖅᑐᖃᕈᓐᓇᕋᓂᓗ ᐊᕐᕕᐊᓂᑦ ᓱᓕ, ᑭᓯᐊᓂ ᑐᐊᕕᖕᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.

ᐊᕐᕕᐊᒥᐅᑦ ᓯᕗᓪᓕᕐᒥᑦ ᑲᐱᔭᐅᓚᐅᙱᑦᑐᑦ ᑲᐱᔭᐅᔪᒪᓗᑎᒃᓗ ᐅᖃᓗᒍᓐᓇᕐᑐᑦ ᐋᓐᓂᐊᕕᖕᒧᑦ ᐃᓂᒃᓴᓕᐅᕐᕕᒃᓴᒥᓄᑦ. ᐅᓪᓗᒥᒧᑦ ᑎᑭᖦᖢᒍ, 6500 ᓄᓇᕗᒻᒥᐅᑦ ᐱᓯᒪᓕᖅᐳᑦ ᐊᑕᐅᓯᕐᒥᒃ ᑲᐱᔭᐅᕐᒥᒃ ᑕᒪᑐᒥᖓ Moderna ᑲᐱᔭᐅᔾᔪᑎᒥᒃ. ᑲᐱᓯᓂᕐᒧᑦ ᐱᓕᕆᐊᖑᔪᑦ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᑲᔪᓰᓐᓇᖅᐳᑦ.

ᑭᓇᑐᐃᓐᓇᑦᑎᐊᖅ ᐅᒃᐱᕆᔭᖃᖅᑐᖅ ᓵᑦᑎᐊᕐᒥᐅᑕᖃᖅᓯᒪᓂᕐᒥᓂᒃ ᓄᕙᒡᔪᐊᕐᓇᖅ−19-ᒧᑦ ᐅᖃᐅᔾᔭᐅᕗᖅ ᐅᖄᓚᖁᔭᐅᓪᓗᓂ ᓄᕙᕐᔪᐊᕐᓇᖕᒧᑦ−ᐅᖄᓚᕝᕕᐅᔪᓐᓇᖅᑐᒥᐅᕙᓂ 1-888-975-8601 10 −ᓗ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖏᓐᓂ, ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca