ᐅᖃᓚᐅᑎᓯᐅᑏᑦ

You are here

13-ᓂᒃ ᓄᑖᓂᒃ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᖅᓯᒪᔪᖃᓕᖅᐳᖅ ᓄᓇᕗᒻᒥ

ᓄᕕᐱᕆ 29, 2020

ᐱᕙᓪᓕᐊᔪᖅ ᓴᖅᑭᑕᖅ

13-ᓂᒃ ᓄᑖᓂᒃ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᖅᓯᒪᔪᖃᓕᖅᐳᖅ ᓄᓇᕗᒻᒥ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 29, 2020) – ᐅᓪᓗᒥ, ᓄᓇᕗᒻᒥ ᑲᑎᖦᖢᒋᑦ 112−ᖑᕗᑦ ᐱᑕᖃᖅᑐᑦ ᓄᕙᒡᔪᐊᕐᓇᖅ-19−ᒥᒃ, ᑲᑎᖦᖢᒋᓪᓗ 65−ᖑᓪᓗᑎᒃ ᑕᒪᑐᒥᖓ ᐊᓂᒍᐃᑎᑦᑎᓯᒪᔪᑦ. 11−ᓂᒃ ᓄᑖᓂᒃ ᐱᓕᖕᓂᒃ ᓇᓗᓇᐃᖅᑕᐅᓯᒪᔪᖃᓕᕆᕗᖅ ᐊᕐᕕᐊᕐᒥ, ᓄᓇᓕᖕᒥᐅᑦ ᖃᔅᓯᐅᓂᖏᑦ ᑕᐃᒪᐃᑦᑐᓖᑦ 90−ᐅᓕᖅᖢᑎᒃ. ᑎᑭᕋᕐᔪᐊᕐᒥᐅᑦ ᒪᕐᕉᖕᓂᒃ ᓄᑖᖕᓂᑦ ᐱᓖᖕᓂᒃ ᐱᑕᖃᓕᕐᒥᔪᖅ, ᑲᑎᖦᖢᒋᑦ 14−ᓗᑎᒃ ᑕᐃᒪᐃᑦᑐᓖᑦ ᓄᓇᓕᖕᓂ.

"ᓄᓇᕗᒻᒥᐅᑦ ᐱᓕᕆᐊᖃᑦᑎᐊᖅᑐᒻᒪᕆᐊᓘᕗᑦ, ᑕᒪᕐᒥᑦᑎᐊᕐᓗ ᑎᓕᐅᖅᐸᒃᑲ ᑕᐃᒪᐃᓕᐅᙱᓐᓇᖁᓪᓗᒋᑦ ᐅᔾᔨᖅᓱᐃᓐᓇᖅᐸᒡᓗᑎᒡᓗ. ᐱᒻᒪᕆᐊᓘᕗᖅ ᐱᓕᕆᕐᔪᐊᖏᓐᓇᕈᑦᑕ ᓱᒃᑲᐃᒡᓕᑎᑦᑎᓯᒪᔪᒪᓗᑕ ᑕᒪᑐᒥᖓ ᖃᓂᒪᓐᓇᒥᒃ,” ᑕᐃᒪᓐᓇ ᓘᒃᑖᖅ ᒪᐃᑯ ᐹᑐᓴᓐ, ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ ᐅᖃᖅᖢᓂ. “ᐳᐃᒍᖅᑐᖃᖅᑕᐃᓕᓕ, ᐊᔾᔨᒌᒍᓐᓃᖅᑕᕐᓂᖏᑦ ᖃᔅᓯᐅᓂᖏᑕ ᓄᑖᑦ ᑕᐃᒪᐃᑦᑐᓖᑦ ᑕᐃᒪᐃᒐᔪᒃᐸᖕᒪᑕ, ᓵᓚᐅᓂᕐᒥᒡᓗ ᐃᒃᐱᒋᔭᖃᕈᑕᐅᓪᓗᐊᙱᖦᖢᑎᒃ. ᐊᑐᐃᓐᓇᖃᑦᑕᕆᔅᓯ ᑕᒪᐃᓐᓂᑦᑎᐊᖅ ᐊᑐᖁᔭᐅᓯᒪᔪᓂᒃ ᑭᒃᑯᑐᐃᓐᓇᓄᑦ ᖃᓂᒪᑎᑦᑎᑦᑕᐃᓕᒪᓂᕐᒧᑦ ᐊᑐᖁᔭᐅᔪᓂᒃ, ᐃᓱᓕᑦᑕᖅᑎᓪᓗᒍ ᐳᓛᕆᐊᖅᐸᖕᓂᓯ, ᓄᒃᑕᖅᑕᐃᓕᓗᓯᓗ ᑕᒪᓐᓇ ᐊᑐᓪᓚᕆᒋᐊᖃᙱᑐᐊᖅᐸᑦ."

ᑕᒪᕐᒥᑦᑎᐊᖅ ᐃᓄᐃᑦ ᐆᒪᔪᒥᒃ ᓄᕙᒡᔪᐊᕐᓇᖅ-19−ᒥᒃ ᐱᓖᑦ ᐅᐸᒃᑕᐅᑦᑕᐃᓕᒪᔪᒦᑉᐳᑦ ᖃᓄᐃᙱᖦᖢᑎᒡᓗ, ᒥᑭᑦᑐᑯᓗᖕᓂᒃ ᐅᔾᔨᕐᓇᕐᓂᖅᓴᓄᑦ ᐱᖃᕐᓂᕐᒥᓂᒃ ᖃᐅᔨᒪᓇᖅᐸᒃᖢᑎᒃ. ᐊᐴᑎᖃᑦᑕᐅᑎᓚᐅᖅᑐᓂᒃ ᑐᔾᔭᖅᓯᓂᖅ ᑕᒪᐃᓐᓂ ᓄᓇᓕᖕᓂ ᐊᒃᑐᖅᑕᐅᓯᒪᔪᓂ ᑲᔪᓰᓐᓇᖅᐳᖅ, ᑭᒃᑯᑐᐃᓐᓇᓄᓪᓗ ᐋᓐᓂᐊᖃᓐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑏᑦ ᑕᐃᒃᑯᓂᖓ ᑕᒪᐃᓐᓂᒃ ᐅᐸᒃᑕᐅᑦᑕᐃᓕᒪᔪᓂᒃ ᓇᐅᑦᑎᖅᓱᖅᓯᕗᑦ.

ᓄᕕᐱᕆ 28, 2020−ᐅᓚᐅᕐᓂᖓᓂᑦ, 203-ᓂᒃ ᑲᖏᖅᖠᓂᕐᒥ ᖃᐅᔨᓴᖅᑕᐅᔪᖃᖅᓯᒪᓕᖅᑐᖅ ᐱᖃᙱᓐᓂᕋᐃᓯᒪᓪᓗᑎᒡᓗ ᑖᑯᓂᖓ. ᐊᕐᕕᐊᕐᒥ ᖃᐅᔨᓴᖅᓯᓂᖅ ᓴᖅᑭᑎᑦᑎᓯᒪᕗᖅ 536−ᓂᒃ ᐱᑕᖃᙱᓐᓂᕋᐃᓯᒪᓪᓗᑎᒡᓗ ᑖᒃᑯᓂᖓ. ᖃᐅᔨᓴᖅᓯᓂᖅ ᑎᑭᕋᕐᔪᐊᕐᒥ ᓴᖅᑭᑎᑦᑎᓯᒪᕗᖅ 90−ᓂᒃ ᐱᑕᖃᙱᓐᓂᕋᐃᔪᓂᒃ ᖃᐅᔨᓴᖅᑕᐅᔪᓂᒃ. ᓇᐅᑦᑎᖅᓱᖅᓯᓂᖅ ᓴᓂᑭᓗᐅᒥ ᑲᔪᓰᓐᓇᖅᐳᖅ.

ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᑉᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖃᐅᔾᔨᖁᔭᐅᕗᖅ ᐅᖄᓚᓗᓂ ᓄᕙᒡᔪᐊᕐᓇᖕᒧᑦ ᐅᖄᓚᕕᒻᒧ ᐅᕗᖓ 1-888-975-8601 ᐅᑯᐊ ᐃᑲᕐᕋᖏᓐᓂᑦ 10−ᒥᑦ ᐅᓪᓛᒃᑯᑦ ᐊᒻᒪᓗ 6−ᒧᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᑎᒍᑦ, ᖃᐅᔨᑎᓪᓗᒍᓘᓐᓃᑦ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᒃᑎᒃ ᖃᐅᔨᑎᑲᐅᑎᒋᓗᒍ, ᐃᒻᒥᓂᒡᓗ ᐅᐸᒃᑕᐅᑦᑕᐃᓕᒪᑎᓯᑲᐅᑎᒋᓗᓂ ᐊᖏᕐᕋᒥᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᒻᒥᓂᖅ.

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus.

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᒫᓐᓇᓕᓴᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᓂᒃ, ᐅᕗᙵᕈᓐᓇᖅᐳᓯ: https://www.gov.nu.ca/health/information/nunavuts-path

ᓄᑖᙳᕆᐊᖅᓯᒪᔪᓂᒃ ᐱᑎᑦᑎᔪᖃᕐᓂᐊᖅᐳᖅ ᐱᕙᓪᓕᐊᔪᓄᑦ ᑐᓴᖅᑎᑦᑎᔪᖃᓕᖅᐸᑦ 11−ᒥ ᐅᓪᓗᒥ. ᑲᓇᓐᓂᕐᑦᒥ, ᓇᒡᒐᔾᔭᐅ, ᓅᕖᕝᕙ 30.

###

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᖅ

ᑲᐃᑦ ᒪᒡᓚᐅᑦ
ᐱᕙᓪᓕᔪᓄᑦ ᑎᑎᕋᖅᑎ ᓯᕗᓕᖅᑎᒧᑦ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
cpuglia@gov.nu.ca