12-ᓂᒃ ᓄᑖᓂᑦ ᓄᕙᕐᔪᐊᕐᓇᖅ-19−ᒧᑦ ᐋᓐᓂᐊᓕᖅᑐᖃᖅᐳᖅ ᐊᕐᕕᐊᓂ

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ

12-ᓂᒃ ᓄᑖᓂᑦ ᓄᕙᕐᔪᐊᕐᓇᖅ-19−ᒧᑦ ᐋᓐᓂᐊᓕᖅᑐᖃᖅᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 22, 2021) − ᐅᓪᓗᒥ, ᓄᓇᕗᑦ 12−ᓂᒃ ᓄᑖᓂᒃ ᓇᓗᓇᐃᖅᑕᐅᔪᖃᖅᐳᖅ ᓄᕙᕐᔪᐊᕐᓇᖅ-19−ᑖᖅᑐᓂᒃ. 33-ᖑᔪᑦ ᓇᓗᓇᐃᖅᑕᐅᓯᒪᔪᑦ ᓄᕙᕐᔪᐊᓕᖅᑐᑦ ᓄᓇᕗᒻᒥ, ᑕᒪᕐᒥᒃᓗ ᐊᕐᕕᐊᒦᖦᖢᑎᒃ.

“ᐅᖓᑖᓄᑦ 100 ᐅᓪᓗᐃᑦ ᓯᕗᓪᓕᖅᐹᒥ ᓄᕙᕐᔪᐊᕐᓇᖅ-19 ᐱᑕᖃᓕᓚᐅᖅᑐᖅ ᐊᕐᕕᐊᓂ, ᑕᖃᓗᐊᕐᓂᖅ ᕿᐱᙳᓂᕐᓗ ᐱᔾᔪᑕᐅᓪᓗᐊᑕᖅᑐᑦ ᐱᔪᓐᓇᕐᓂᕆᔭᑦᑎᓐᓄᑦ ᐃᓱᖃᖅᑎᓪᓗᒍ ᓯᐊᒻᒪᔭᓐᓂᖓ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᑦ,” ᐅᖃᖅᑐᖅ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓ. “ᐱᔭᕆᐊᖃᒻᒪᕆᒃᑐᖅ ᑭᓇᑐᐃᓐᓇᖅ ᐊᓂᔭᕆᐊᖃᖅᑎᑕᐅᙱᑦᑐᖅ ᐊᖏᕐᕋᖅᓯᒪᓗᓂ ᐊᓂᔪᓐᓇᕐᓂᕋᖅᑕᐅᓕᖅᐸᑕ ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᓕᕆᖃᑎᖏᓐᓄᑦ. ᐊᓯᐊᒎᕆᐊᖃᕈᑎᐅᙱᑦᑐᖅ; ᐅᕙᑦᑎᓐᓅᖓᔪᖅ ᐊᑐᓂ ᐋᓐᓂᐊᖅᑕᐃᓕᒪᑎᓪᓗᑕ ᐊᑦᑕᕐᓇᙱᑦᑐᒦᓪᓗᑕᓗ. ᓄᖅᑲᖓᑐᐃᓐᓈᓪᓚᒋᔅᓯ ᑐᓂᓯᒪᑦᑎᐊᕐᓗᓯᓗ, ᐋᓐᓂᐊᓕᕇᒃᑯᓯᓕᖅᑕᐅᓗᓯᓗ ᐊᔪᕈᓐᓃᑐᐊᕈᔅᓯ.”

ᓄᓇᓕᖕᓄᑦ ᐊᐃᑦᑐᓪᓗᐃᓂᖅ ᖃᐅᒡᔭᐅᓯᒪᙱᑦᑐᖅ ᐊᕐᕕᐊᓂ, ᐱᑖᖅᑐᓕᒫᓪᓗ ᑲᓲᑎᓯᒪᔪᑦ ᐃᒡᓗᒥᐅᖃᑎᒌᓄᑦ ᐊᐃᑦᑐᕐᓗᒃᓯᓂᕐᒥ. ᑖᒃᑯᐊ ᑕᒪᕐᒥᒃ ᖃᓄᐃᙱᑦᑐᑦ, ᐅᐸᒃᑕᐅᑦᑕᐃᓕᒪᓪᓗᑎᒡᓗ ᐊᖏᕐᕋᖏᓐᓂ ᑲᑎᙵᖃᑎᒋᔭᐅᓚᐅᖅᑐᓪᓗ ᓱᓕ ᖃᐅᔨᓴᖅᑕᐅᕙᓪᓕᐊᓪᓗᑎᒃ.

ᕕᕗᐊᕆ 22−ᒥ ᐱᒋᐊᖅᖢᓂ, ᐊᕐᕕᐊᕐᒥ ᖃᐅᔨᓴᖅᑕᐅᔪᑦ 2213−ᖑᔪᑦ ᐱᑕᖃᙱᓐᓂᕋᖅᑕᐅᔪᑦ ᖃᐅᔨᓴᖅᑕᐅᔾᔪᑎᖏᑦ. ᓄᓇᕘᑉ ᑐᐊᕕᕐᓇᖅᑐᓕᕆᔨᒃᑯᑦ ᓱᓕ ᐃᑲᔪᖅᑐᑦ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᖏᓐᓂᒃ. ᓱᓕ ᐊᕐᕕᐊᓕᐊᖅᑐᖃᕆᐊᖃᙱᑦᑐᖅ ᐊᕐᕕᐊᓂᓪᓗ ᐊᐅᓪᓚᖅᑐᖃᕆᐊᖃᙱᖦᖢᓂ, ᑭᓯᐊᓂ ᑐᐊᕕᕐᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.

ᐊᕐᕕᐊᕐᒥᐅᑦ ᓄᕙᕐᔪᐊᕐᓇᖅ−19ᒧᑦ ᑲᐱᔭᐅᔪᒪᔪᑦ ᐋᓐᓂᐊᕕᖕᒧᑦ ᐅᖄᓚᔪᓐᓇᖅᐳᑦ ᐃᓂᒃᓴᓕᐅᕈᒪᓗᑎᒃ. ᒫᓐᓇᒧᑦ ᑎᑭᖦᖢᒍ, 6977 ᓄᓇᕗᒻᒥᐅᑦ ᐊᑕᐅᓯᕐᒥᒃ ᑲᐱᔭᐅᓯᒪᓕᖅᐳᑦ ᒫᑐᓇ ᑲᐴᑎᒧᑦ. ᑲᐱᓯᑲᑕᖕᓂᐊᖅᑐᑦ ᑕᒫᓂ ᐅᑭᐅᖅᑕᖅᑐᒥ ᓱᓕ ᑲᔪᓯᕗᑦ.
ᑭᓇᑐᐃᓐᓇᑦᑎᐊᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ−19-ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ−ᐅᖄᓚᕝᕕᒃᓴᒧᑦ ᐅᕗᖓ 1-888-975-8601 10:00−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6:00−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ,

ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐊᓂᑦᑕᐃᓕᒪᓯᑲᐅᑎᒋᓗᓂᓗ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca