ᐅᖃᓚᐅᑎᓯᐅᑏᑦ

You are here

ᓄᑖᖑᔪᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒃᑯᑕᐃᓐᓇᕐᓄᑦ ᐱᖁᔭᐅᔪᖅ ᐊᒻᒪ ᒪᓕᒋᐊᓖᑦ. ᐊᐱᖅᑯᑕᐅᒐᔪᒃᑐᑦ

ᓄᑖᖑᔪᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒃᑯᑕᐃᓐᓇᕐᓄᑦ ᐱᖁᔭᐅᔪᖅ ᐊᒻᒪ ᒪᓕᒋᐊᓖᑦ.

ᐊᐱᖅᑯᑕᐅᒐᔪᒃᑐᑦ

 

ᐊᑐᖅᑕᐅᔪᒪᓇᔭᖅᑐᖅ ᑭᒃᑯᑐᐃᓐᓇᓄᑦ ᖃᓄᐃᙱᑦᑎᐊᕐᕈᓐᓇᕐᓂᖏᓐᓄᑦ, ᐃᓚᖃᖅᖢᓂ ᑖᔅᓱᒥᖓ ᐱᖁᔭᕐᒥᒃ, ᐱᐅᓯᒋᐊᖅᑎᑦᑎᔪᒪᓂᐅᕗᖅ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᒥᑭᒡᓕᒋᐊᖅᑎᑦᑎᓗᓂᓗ ᓇᓕᒧᒌᙱᓐᓂᕆᔭᐅᔪᓂᒃ, ᑕᒪᓐᓇ ᒪᓕᑦᑎᐊᕐᓗᓂ ᐃᓄᐃᑦ ᐃᓅᖃᑎᒌᒃᐸᖕᓂᕐᒧᑦ ᐊᓐᓂᕆᔭᖏᓐᓂᒃ.
 

ᖃᓄᐃᒻᒪᑦ ᐱᔪᖃᕆᐊᖃᓚᐅᖅᐸ ᐋᖅᑭᒃᓱᐃᔭᕆᐊᖃᕐᓂᕐᒥᒃ ᓄᑖᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᖁᔭᕐᒥᒃ?

ᑭᖑᓂᑦᑎᓐᓂ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᐅᓚᐅᖅᑐᖅ ᐊᑐᖅᑕᐅᓯᒋᐊᓚᐅᖅᓯᒪᔪᖅ ᓄᓇᑦᓯᐊᒥ ᑕᐃᒪᙵᓂ 1957−ᖑᓚᐅᖅᑎᓪᓗᒍ.ᑖᓐᓇ ᓄᑕᐅᔪᓐᓃᖅᓯᒪᓚᐅᖅᐳᖅ ᑐᙵᕕᖃᖅᑎᑕᐅᓪᓗᓂᓗ ᐋᖅᑭᒃᓱᖅᑕᐅᓯᒪᔪᓄᑦ ᐊᑐᖅᑕᐅᕙᒃᑐᓄᓪᓗ ᐊᑐᕈᓐᓇᐃᓪᓕᓯᒪᓕᖅᑐᓄᑦ.ᐱᓕᕆᓂᕆᔭᐅᕙᒃᑐᖅ ᑭᒃᑯᑐᐃᓐᓇᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᓯᔾᔨᖅᓯᒪᓕᖅᐳᖅ ᖃᖓᙳᖅᐸᓪᓕᐊᓂᖓ ᒪᓕᒃᖢᒍ ᑕᐃᓐᓇᓗ ᐱᖁᔭᕆᔭᐅᓚᐅᖅᑐᖅ ᓇᓗᓇᐃᔭᐃᓚᐅᙱᓚᖅ ᐃᓗᓕᖏᓐᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᕙᖕᓂᕐᒥ ᑕᒪᒃᑯᐊᓗ ᐃᓕᓴᕆᔭᐅᓯᒪᓕᖅᖢᑎᒃ ᑲᓇᑕᓕᒫᒥ ᓄᓇᕐᔪᐊᓕᒫᒥᓗ.ᑕᒪᒃᑯᐊ ᐊᓂᒍᖅᑎᓐᓇᓱᒋᐊᓖᑦ ᑲᒪᒋᔪᒪᓪᓗᒋᑦ, ᓄᑖᒥᒃ ᐅᓪᓗᒥᒧᑦ ᐊᖑᒻᒪᑎᔪᒥᒃ ᓄᓇᕗᒻᒥ ᓴᓇᔭᐅᓯᒪᔪᒥᒃ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓄᑦ ᐱᖁᔭᕐᒥᒃ ᐊᓂᒍᐃᑎᑦᑎᔪᖃᓚᐅᖅᐳᖅ ᒪᓕᒐᓕᐅᕐᕕᖕᒥᐅᓂᑦ ᓄᕕᐱᕆ 2016−ᖑᑎᓪᓗᒍ.

 

ᑖᓐᓇ ᓄᑖᖅ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓄᑦ ᐱᖁᔭᖅ ᖃᓄᐃᓕᐅᖅᐸᒃᐸ?

ᓄᑖᖅ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓄᑦ ᐱᖁᔭᖅ:

  • ᐱᔾᔪᑎᖃᖅᐳᖅ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᑕᒪᒃᑭᖅᖢᑎᒃ ᑭᒃᑯᓕᒫᑦ;
  • ᐱᑎᑦᑎᕙᒃᐳᖅ ᒪᓕᒐᑎᒎᖓᔪᒥᒃ ᐊᑐᖅᑕᐅᔪᓐᓇᖅᑐᒥᒃ ᐊᔪᖅᑎᑦᑎᙱᖦᖢᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᒃ ᓴᐳᑎᓯᒪᖃᑦᑕᖁᓪᓗᒋᑦ ᑭᒃᑯᑐᐃᓐᓇᐃᑦ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒧᓪᓗ, ᖃᐅᔨᒪᓕᕈᒪᓂᕐᒧᑦ, ᐊᐅᓚᑦᑎᕝᕕᖃᕈᒪᓂᕐᒧᑦ, ᓄᖅᑲᖅᑎᑦᑎᔪᒪᓂᕐᒧᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑐᓂᒃ ᑕᐃᒪᐃᓕᐅᕐᓂᕐᒥᓂᓗ ᐸᒡᕕᓴᐃᙱᑦᑎᐊᕐᓗᑎᒃ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᒋᔭᖏᓐᓄᑦ ᐃᓱᒪᖅᓲᑎᒋᔪᓐᓇᖅᑕᖏᓐᓄᓪᓗ;
  • ᑲᒪᒋᔭᖃᖅᐸᒃᐳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᔾᔨᕐᓇᖅᓯᑎᑦᑎᓂᕐᒥᒃ, ᐅᔾᔨᕐᓇᕈᓐᓇᖅᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ ᖃᓄᐃᓕᖓᓂᕆᔭᐅᔪᓂᒡᓘᓐᓃᑦ, ᐊᐃᑦᑐᕐᓘᑕᐅᔪᓐᓇᖅᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᕈᓐᓇᖅᑐᓂᒃ (ᐃᓚᒋᔭᐅᓪᓗᑎᒃ ᓂᕿᓄᑦ ᖁᐊᖅᓵᕐᓇᖅᑕᐃᓕᒪᓂᖅ, ᖁᐊᖅᓵᕐᓇᙱᑦᑐᒥᒃ ᐃᒪᕐᒥᒃ ᐃᒥᖅᑕᐅᕙᒃᑐᒥᒃ, ᓴᓗᒪᓂᕐᒧᑦ) ᑭᒃᑯᑐᐃᓐᓇᓄᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᓯᔪᓄᑦ;
  • ᓇᓗᓇᐃᔭᐃᕙᒃᐳᑦ ᐱᔭᒃᓴᕆᔭᐅᔪᓂᒃ ᑲᒪᒋᔭᒃᓴᕆᔭᐅᔪᓂᒡᓗ ᑭᒃᑯᑐᐃᓐᓇᓄᑦ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓄᑦ ᐊᓯᖏᓐᓄᓪᓗ ᑲᒪᒋᔭᒃᓴᓕᖕᓄᑦ ᒥᓂᔅᑕᓄᑦ;
  • ᒪᓕᑦᑎᐊᕐᓗᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᖁᔭᕐᓄᑦ ᐊᓯᖏᓐᓂ ᐊᕕᒃᓯᒪᓂᕆᔭᐅᔪᓂᒃ ᐊᕕᒃᑐᖅᓯᒪᓂᕆᔭᐅᔪᓂᓗ;
  • ᐊᑐᖅᑎᑦᑎᓕᖅᐸᒃᐳᖅ ᓈᒻᒪᒃᑐᓂᒃ ᐊᑐᕐᓂᕆᔭᐅᔪᓂᒃ ᐱᐅᔪᓄᑦ ᐊᓐᓂᕆᔭᐅᔪᓄᑦ ᐱᓗᐊᙳᐊᖅᖢᓂ ᐃᓄᑐᐊᓄᑦ ᐃᓱᒪᖅᓲᑕᐅᕙᒃᑐᓂᒃ, ᓴᐳᔾᔨᓯᒪᓂᕐᒥᒃ ᑭᒃᑯᕈᓘᔭᕐᓂᑦ ᐋᓐᓂᖅᑎᕆᓂᐅᕙᒃᑐᓂ, ᖃᓄᐃᓕᐅᓂᕆᔭᐅᓕᖅᐸᒃᑐᓂ, ᑲᙳᓇᕆᐊᓕᖕᓂᓗ ᖃᐅᔨᔭᐅᔭᕆᐊᖃᙱᑦᑐᓂᒡᓗ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᓴᖅᑕᐅᔪᒃᓴᓄᑦ.

 

ᑭᓱᑦ ᑕᕝᕘᓈᙱᓚᑦ ᑖᔅᓱᒨᓇ ᓄᑖᒃᑯᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᒥᑦ?

ᑖᓐᓇ ᓄᑖᖅ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓄᑦ ᐱᖁᔭᖅ ᐃᒪᐃᓕᐅᖅᐸᙱᓚᖅ:

  • ᑲᒪᒋᔭᖃᕐᓗᓂ ᖃᓄᖅ ᐋᖅᑭᒃᓱᖅᓯᒪᓂᖓᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᖅ;
  • ᑕᒪᐃᑎᒎᖅᑎᑦᑎᙱᓚᖅ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᕈᓐᓇᖅᑐᓄᑦ;
  • ᑲᒪᒋᔭᖃᖅᐸᙱᓚᖅ ᐃᖅᑲᓇᐃᔭᕐᕕᒋᔭᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᐃᓱᒪᒋᔭᒃᓴᓄᑦ ᑲᒪᒋᔭᐅᓕᖅᐸᒃᑐᓄᑦ ᐊᓯᖏᓐᓂ ᒐᕙᒪᒋᔭᐅᔪᑦ
  • ᐱᓕᕆᕝᕕᒋᔭᖏᓐᓂ ᐃᓚᒋᔭᐅᓪᓗᑎᒃ ᒐᕙᒪᑐᖃᒃᑯᑦ ᐱᓕᕆᕝᕕᒋᔭᖏᑦ ᑐᑦᑕᕐᕕᒋᔭᖏᓪᓗ;
  • ᑲᒪᒋᔭᖃᖅᐸᙱᓚᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᕕᖃᕐᓂᕐᒧᑦ ᑲᔪᓯᑎᑦᑎᓂᕐᒥᒃ ᐋᓐᓂᐊᕕᖕᓂ ᐋᓐᓂᐊᕕᓕᐊᕐᕕᒋᔭᐅᕙᒃᑐᓂᓘᓐᓃᑦ;
  • ᑲᒪᒋᔭᖃᖅᐸᙱᓚᖅ ᐋᓐᓂᐊᕕᓕᐊᕐᓗᓂ ᓄᒃᑕᕐᓂᕆᔭᐅᔪᒥᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓪᓕᐊᒃᑯᒫᓂᒃ ᐅᖓᕙᕆᐊᖅᑎᑕᐅᓯᒪᔪᓂᒡᓘᓐᓃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᕚᓪᓕᕈᑕᐅᕙᒃᑐᓂᒃ.

 

ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᓕᐅᔾᔭᐅᓯᒪᓕᖅᐹᑦ ᓄᑖᒧᑦ ᐋᓐᓂᐊᖅᑕᐃᓕᒪᔪᓂᓕᕆᓂᕐᒧᑦ  ᑭᒃᑯᑐᐃᓐᓇᓄᑦ ᐱᖁᔭᕐᒨᑦ?

ᐄ, ᑖᓐᓇ ᐱᖁᔭᖅ ᐅᖃᖅᓯᒪᓂᖃᓪᓚᕆᒃᐳᖅ ᑕᐃᓐᓇ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᓗ ᖃᐅᔨᒪᑦᑎᐊᕆᐊᖃᖅᐳᒃ ᑕᒪᒃᑯᐊ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᓕᐅᔾᔭᐅᒐᓗᐊᒪᖔᑕ ᑕᒪᐃᓐᓄᑦᑎᐊᖅ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᓄᑦ ᓄᓇᕗᒻᒥ.

 

ᑭᓱᑦ ᐱᓪᓗᐊᑕᐃᑦ ᐋᓯᔾᔨᕐᓂᕆᔭᐅᕙᑦ ᑖᒃᑯᓇᓂ ᑭᖑᓂᑦᑎᓐᓂ ᐋᓐᓂᐊᖅᑕᐃᓕᒪᔪᓂᕆᓂᕐᒥ ᑭᒃᑯᑐᐃᓐᓇᓄᑦ ᐱᖁᔭᕐᒥ ᐊᒻᒪᓗ ᓄᑖᒥ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᒥ?

ᑭᓱᑦ ᓄᑖᖑᕙᑦ?

  • ᐋᖅᑭᒃᓯᒪᓕᖅᑎᑦᑎᕗᖅ ᓇᓕᒧᒃᓱᕐᓂᕐᒥᒃ ᐃᓄᑐᐊᑉ ᐱᔪᓐᓇᐅᑎᒋᔭᖏᓐᓂᒃ ᑭᒃᑯᑐᐃᓐᓇᐃᓪᓗ ᖃᓄᐃᙱᑦᑐᓐᓇᕐᓂᖏᓐᓂᒃ ᒪᓕᑦᑎᐊᖅᖢᓂᓗ ᑲᓇᑕᒥᐅᓄᑦ ᐱᖁᔭᕐᔪᐊᒥᒃ ᐱᔪᓐᓇᐅᑎᒋᔭᐅᔪᓄᑦ ᐃᓱᒪᖅᓲᑎᒋᔭᐅᔪᓄᓪᓗ;
  • ᐃᓚᓕᐅᔾᔨᕗᖅ ᐊᑐᖅᑕᐅᔭᕆᐊᖃᖅᐸᒃᑐᓂᒃ ᐅᑯᓇᓂ, ᐋᓐᓂᐊᕆᔭᐅᓕᖅᐸᒃᑐᓄᑦ ᑎᑎᕋᖅᓯᒪᓕᖅᑎᑦᑎᓂᕐᒧᑦ ᐱᖁᔭᕐᒥ  ᑖᓐᓇᓗ ᐊᑐᖁᔭᐅᔪᓐᓃᕐᓂᐊᖅᖢᓂ;
  • ᐃᓚᖃᖅᐳᖅ ᐅᖃᐅᓯᖃᕐᓂᕐᒥᒃ ᓂᕐᔪᑎᓂᙶᖅᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ ᓂᕐᔪᑎᓂᑦ ᓂᕐᔪᑎᓄᑦ ᐃᓗᐊᖅᓴᐃᔨᒥᑦ, ᐆᒪᔪᕐᓂᐊᖅᑎᒥᑦ ᐸᓖᓯᙳᐊᕆᔭᐅᔪᒥᓪᓘᓐᓃᑦ;
  • ᓇᓗᓇᐃᔭᐃᕙᒃᐳᖅ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᓯᔪᓂᒃ ᐱᑎᑦᑎᓕᖅᐸᒃᖢᓂᓗ ᓴᙱᓂᕆᔭᐅᒃᑲᓐᓂᕈᓐᓇᖅᑐᓂᒃ;
  • ᐱᑎᑦᑎᓯᒪᕙᒃᐳᖅ ᑲᐱᔭᐅᔪᓄᑦ ᑎᑎᕋᖅᓯᒪᓂᓕᖅᑎᑕᐅᓯᒪᕙᒃᑐᓂᒃ;
  • ᐱᑎᑦᑎᕙᒃᐳᖅ ᐱᔪᓐᓇᐅᑎᒋᔭᐅᔪᒥᒃ ᐋᓐᓂᐊᖃᓇᙱᑦᑐᓕᕆᓂᕐᒧᑦ ᐅᔾᔨᕐᓇᖅᓯᑎᑦᑎᓂᕐᒧᑦ ᐱᓕᕆᐊᖑᓯᒋᐊᖅᐸᒃᑐᓂᒃ;
  • CPHO−ᒥᒃ ᓴᖅᑭᑎᑦᑎᔭᕆᐊᖃᖅᑎᑦᑎᕗᖅ ᐅᓂᒃᑲᐅᓯᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᖏᓐᓂᒃ ᓄᓇᕗᒻᒥᐅᑦ ᐊᕐᕌᒎᒃ ᒪᕐᕉᒃ ᐊᓂᒍᑐᐊᖓᑎᒃ;
  • CPHO−ᒥᒃ ᐱᔪᓐᓇᖅᑎᑦᑎᓕᖅᐸᒃᐳᖅ  ᐋᖅᑭᒃᓯᒪᓕᖅᑎᑦᑎᓂᕐᒥᒃ ᐊᑐᖅᑕᐅᓕᖅᐸᒃᑐᓂᒃ ᒪᓕᒃᑕᐅᕙᓪᓕᐊᓕᖅᐸᒃᑐᓂᒡᓗ;
  • ᓴᖅᑭᑎᑦᑎᓕᖅᐸᒃᐳᖅ ᐊᑐᖅᑕᐅᕙᓪᓕᐊᕙᒃᑐᒥᒃ ᓴᖅᑭᑎᑦᑎᔪᓐᓇᕐᓗᓂ ᑎᓕᓯᔾᔪᑕᐅᔪᓂᒃ ᒪᓕᑦᑎᐊᖅᑐᓂᒃ ᐱᖁᔭᕆᔭᐅᔪᒥᒃ ᐱᔪᓐᓇᐅᑎᒋᔭᐅᔪᓄᑦ ᐃᓱᒪᖅᓲᑎᒋᔭᐅᕙᒃᑐᓄᓪᓗ;
  • ᐱᑎᑦᑎᕙᒃᐳᖅ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᙱᑦᑎᐊᕈᓐᓇᕐᓂᕐᒧᓪᓗ ᑲᑎᒪᔨᕋᓛᓂᒃ.

ᑭᓱᑦ ᐲᖅᑕᐅᓯᒪᓕᖅᐸᑦ ᐅᔾᔨᕐᓇᖅᑐᒻᒪᕆᒃᑯᓪᓘᓐᓃᑦ ᐊᓯᔾᔨᖅᑕᐅᓯᒪᓕᖅᐸᑦ?

  • ᐲᖅᓯᕗᖅ ᐅᖃᐅᓯᖃᕐᓂᖓᓂᒃ ᑲᑎᒪᔨᒋᔭᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑖᒃᑯᐊ ᐱᑕᖃᕈᓐᓃᖅᓯᒪᓕᕐᓂᖏᓐᓄᑦ;
  • ᐊᓯᔾᔨᖅᓯᕗᖅ ᑕᐃᔭᐅᕙᖕᓂᖏᓐᓂᒃ ᐃᓚᖏᓐᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᒃ;
  • ᐲᖅᓯᕗᖅ ᖃᓄᑐᐃᓐᓇᖅ ᐅᖃᐅᓯᖃᕐᓂᕆᔭᐅᔪᓂᒃ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᑲᒪᒋᔭᐅᕙᖕᓂᕐᒧᑦ ᑖᒃᑯᐊ ᐃᓛᒃᑰᕐᖢᑎᒃ ᐱᓕᕆᐊᒃᓴᐅᓂᖏᖕᓄᑦ. ᑎᑎᕋᖅᓯᒪᓂᖏᑦ ᓄᑕᐅᙱᑦᑑᑉ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᐅᑉ ᐱᔾᔪᑎᓖᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑲᒪᒋᔭᖃᖅᐸᖕᓂᕐᒥ ᐃᓂᒋᔭᐅᔪᓂ ᐱᔭᐅᓯᒪᓂᐊᖅᐳᖅ ᐊᑎᓕᖅᑕᐅᒃᑲᓐᓂᖅᑐᒥ ᐊᓯᐊᓂᒃ ᐱᖁᔭᕐᒥ, ᑕᖕᒫᖅᓯᒪᕝᕕᖕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᕕᖃᕐᓂᕐᒧᑦ ᐱᖁᔭᕐᒥ, ᑕᐃᓐᓇ ᓄᑕᐅᙱᑦᑐᖅ ᐋᓐᓂᐊᖅᑕᐃᓕᒪᓕᕆᓂᖅ ᑭᒃᑯᑐᐃᓐᓇᓄᑦ ᐱᖁᔭᖅ ᐊᑐᕈᓐᓃᖅᑎᑕᐅᒃᐸᑦ.

 

ᖃᓄᐃᓕᓯᒪᕙᑦ ᒪᓕᒃᑕᐅᔭᕆᐊᖃᖅᐸᒃᑐᑦ ᑖᒃᑯᓇᓂ ᓄᑕᐅᙱᑦᑐᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓄᑦ ᐱᖁᔭᕐᓂ?

ᑕᒪᕐᒥᑦᑎᐊᖅ ᒪᓕᒋᐊᖃᖅᐸᒃᑐᑦ ᓄᑕᐅᙱᑦᑐᒥ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᒥ ᕿᒥᕐᕈᐊᖅᑕᐅᒃᑲᓐᓂᖅᓯᒪᓕᖅᐳᑦ ᐊᑐᕈᓐᓃᖅᑎᑕᐅᓪᓗᑎᒡᓘᓐᓃᑦ, ᓄᑖᙳᕆᐊᖅᑎᑕᐅᓪᓗᑎᒃ ᐊᓯᔾᔨᖅᑕᐅᓪᓗᑎᒡᓘᓐᓃᑦ ᓄᑖᓄᑦ ᒪᓕᒃᑕᐅᔭᕆᐊᖃᓕᖅᐸᒃᑐᓄᑦ. ᐱᖓᓱᓂᒃ ᓄᑖᓂᒃ ᒪᓕᒋᐊᖃᖅᐸᒃᑐᓂᒃ ᐋᖅᑭᒃᓱᐃᔪᖃᖅᓯᒪᓕᖅᐳᖅ ᐅᑯᐊᒃ ᐃᓚᒋᔭᐅᓪᓗᑎᒃ, ᐅᖃᐅᓯᐅᔪᓐᓇᖅᑐᑦ ᐋᓐᓂᐊᕆᔭᐅᓕᖅᐸᒃᑐᓄᓪᓗ ᐊᐅᓚᑦᑎᓂᕐᒧᑦ ᒪᓕᒃᑕᐅᕙᒃᑐᑦ ᐊᒻᒪᓗ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᒪᓕᒋᐊᖃᖅᐸᒃᑐᑦ. ᐱᓕᕆᓂᕆᔭᐅᔪᖅ ᑲᔪᓰᓐᓇᕐᓂᐊᖅᐳᖅ ᓄᑖᙳᕆᐊᖅᑎᑦᑎᕙᓪᓕᐊᔪᖃᕐᓗᓂ ᒪᓕᒋᐊᖃᖅᐸᒃᑐᓂᒃ ᓯᕗᓂᒃᓴᑦᑎᓐᓂ. 

 

ᑭᓱᓂᒃ ᑖᒃᑯᐊ ᐅᖃᐅᓯᖃᕐᓂᕐᒧᑦ ᐋᓐᓂᐊᕆᔭᐅᓕᖅᐸᒃᑐᓄᓪᓗ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒃᑕᐅᔭᕆᐊᖃᖅᐸᒃᑐᑦ ᐱᔾᔪᑎᖃᖅᐸᑦ?

ᐅᓂᒃᑲᐅᓯᖃᕐᓂᕐᒧᑦ ᐋᓐᓂᐊᕆᔭᐅᓕᖅᐸᒃᑐᓄᓪᓗ ᐊᐅᓚᑦᑎᓂᕐᒧᑦ ᒪᓕᒃᑕᐅᔭᕆᐊᖃᖅᐸᒃᑐᑦ ᐃᓗᓕᒃᑲᓐᓂᖏᓐᓂᒃ ᓇᓗᓇᐃᔭᐃᕗᑦ ᐅᖃᐅᓯᖃᖅᐸᖕᓂᕐᒧᑦ ᐊᐅᓚᑦᑎᕝᕕᖃᕐᓂᕐᒧᓪᓗ ᐊᐃᑦᑐᕐᓘᑕᐅᔪᓐᓇᖅᑐᓂᒃ ᐊᓯᖏᓐᓂᒡᓗ ᐋᓐᓂᐊᕆᔭᐅᓕᖅᐸᒃᑐᓂᒃ ᖃᓄᐃᓕᐅᕐᓂᕆᔭᐅᔪᓂᒡᓗ, ᐊᒻᒪᓗᑦᑕᐅᖅ ᑭᐅᓯᒋᓪᓗᓂ ᐱᕙᓪᓕᐊᓂᕆᔭᐅᔪᒥᒃ ᐃᓗᓕᖏᓐᓂᒡᓗ ᑲᐱᔭᐅᕙᖕᓂᕐᒧᑦ ᑎᑎᕋᖅᓯᒪᓕᖅᑎᑕᐅᕙᓪᓕᐊᕙᒃᑐᑦ.

 

ᓇᐅᒃᑯᑦ ᑭᓱᓂᒃ ᑖᒃᑯᐊ ᑭᒃᑯᑐᐃᓐᓇᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒋᐊᖃᖅᐸᒃᑐᑦ ᐊᑐᕐᕕᖃᖅᐸᑦ?

ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᓄᑦ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒋᐊᖃᖅᐸᒃᑐᑦ ᐱᑎᑦᑎᕗᑦ ᑐᓴᖅᑕᐅᔪᒃᓴᓂᒃ ᐱᔭᐅᔭᕆᐊᓕᖕᓂᒃ ᓴᖅᑭᑎᑦᑎᓂᐊᕐᓗᓂ ᑎᓕᓯᔾᔪᑕᐅᔪᓂᒃ ᐅᑯᑎᒎᓇᖅ, ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᐅᑉ ᐊᑖᒍᑦ.  ᑕᒪᓐᓇ ᐃᓚᖃᖅᐳᖅ ᐅᖃᐅᔾᔪᐃᓂᕐᒥᒃ ᐃᓄᖕᒥᒃ ᐱᓕᕆᕝᕕᐅᓂᐊᖅᑐᒥᒃ ᑎᓕᓯᔾᔪᑕᐅᔪᒥᒃ ᑖᔅᓱᒥᖓ ᓴᖅᑭᑦᑎᔪᖃᓚᐅᖅᑳᖅᑎᓐᓇᒍ ᐱᑎᑦᑎᓗᓂᓗ ᑐᓴᖅᑕᐅᔪᒃᓴᓂᒃ ᖃᓄᖅ ᑕᒪᓐᓇ ᐃᓱᒪᒋᔭᒃᓴᖅ ᐱᓕᕆᐊᖑᓂᐊᕐᒪᖔᑦ, ᑕᐃᒪᐃᑉᐸᓪᓗ ᑎᓕᓯᔾᔪᑕᐅᔪᒥᒃ ᐱᔪᖃᕆᐊᖃᕋᔭᕋᓂ.   ᐊᒻᒪᑦᑕᐅᖅ ᐱᔾᔪᑎᖃᕆᕗᖅ ᖃᓄᖅ ᐱᓕᕆᓂᐅᓇᔭᖅᑐᒥᒃ ᑖᓐᓇ ᑎᓕᓯᔾᔪᑕᐅᔪᖅ ᑲᔪᓯᑎᑦᑐᒪᓗᒍ.

 

ᖃᓄᖅ ᑖᓐᓇ ᐱᖁᔭᖅ ᐊᒃᑐᖅᓯᕙ ᑲᐱᔭᐅᓂᕆᔭᐅᕙᒃᑐᓄᑦ?

ᑖᓐᓇ ᓄᑖᖅ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᖅ ᐊᒻᒪᓗ ᐅᖃᐅᓯᖃᕐᓂᕐᒧᑦ  ᐋᓐᓂᐊᕆᔭᐅᓕᖅᐸᒃᑐᓄᓪᓗ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒋᐊᖃᖅᐸᒃᑐᑦ ᐃᑲᔪᖅᑐᐃᕗᑦ ᓴᐳᔾᔨᓯᒪᓂᕐᒥᒃ ᐅᔾᔨᕐᓇᖅᓯᑎᑦᑎᓂᕐᒥᒡᓗ ᐋᓐᓂᐊᖃᕐᓇᙱᑦᑐᓕᕆᓂᕐᒥ. ᑖᒃᑯᐊ ᐃᓚᖃᖅᐳᑦ ᐊᑐᖅᑕᐅᔪᓐᓇᖅᑐᓂᒃ ᑲᐱᔭᐅᕙᖕᓂᕐᒧᑦ ᑎᑎᕋᖅᓯᕕᐅᕙᓪᓕᐊᕙᒃᑐᒥᒃ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᒃ ᐊᐅᓚᑦᑎᔪᖅ ᑲᐱᔭᐅᓂᐅᕙᒃᑐᓂᒃ ᐅᕝᕙᓘᓐᓃᑦ ᐱᔪᖅ ᑎᑎᕋᖅᓯᒪᓕᖅᑎᑕᐅᓯᒪᔪᓂᒃ ᐱᔾᔪᑎᓕᖕᓂᒃ ᑲᐱᔭᐅᓂᐅᕙᒃᑐᓂᒃ ᓄᓇᕗᑦ ᓯᓚᑖᓂ ᑕᒪᑐᒥᖓ ᐅᖃᐅᓯᖃᕆᐊᖃᖅᐳᖅ CPHO−ᑯᓐᓄᑦ.  ᐱᔾᔪᑎᒋᔭᖓ ᓇᓗᙱᑦᑎᐊᕈᒪᓂᐅᕗᖅ ᑲᐱᔭᐅᕙᖕᓂᕐᒧᑦ ᖃᓄᐃᓕᕙᓪᓕᐊᓂᕆᔭᐅᔪᖅ ᐃᓄᑐᐃᓐᓇᓄᑦ ᒪᓂᒪᑎᑕᐅᓯᑲᐅᑎᒋᕙᒃᐳᖅ ᓯᐊᒻᒪᒃᑎᖅᑐᖃᕌᖓᑦ ᑲᐱᔭᐅᓗᓂ ᐱᑕᖃᖅᑎᑕᐅᔪᓐᓇᙱᑦᑐᒥᒃ ᑲᐱᔭᐅᕙᖕᓂᕐᒧᓪᓗ ᖃᓄᖅ ᐊᖏᑎᒋᔪᒥᒃ ᐊᑐᖅᑐᖃᖅᐸᖕᒪᖔᑦ ᑭᒃᑯᑐᐃᓐᓇᓄᑦ ᖃᐅᔨᒪᔭᐅᓕᕈᓐᓇᖅᐳᖅ.

 

ᓇᓕᐊᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔩᑦ ᐱᔪᓐᓇᐅᑎᖃᖅᐸᑦ ᐅᑯᑎᒎᓇᖅ, ᓄᑖᑎᒍᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᖅᑎᒍᑦ?

ᑖᓐᓇ ᓄᑖᖅ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᖅ  ᑕᐃᓯᕗᖅ ᒥᓂᔅᑕᒧᑦ, ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒧᑦ (CPHO−ᒧᑦ), ᑐᒡᓕᐊᓄᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᐅᑉ (DCPHO−ᒧᑦ), ᐃᓗᐊᖅᓴᐃᕙᖕᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒧᑦ ᐱᓕᕆᔨᓪᓗᐊᑕᕐᒧᑦ (MHO−ᒧᑦ) ᐊᒻᒪᓗ ᐊᕙᑎᒥᒃ ᖃᓄᐃᙱᑦᑎᐊᖅᑎᑦᑎᓂᕐᒧᑦ ᐱᓕᕆᔨᐅᕙᒃᑐᒧᑦ (EHO).

 

ᑭᓱᓕᕆᔨᐅᕙ ᒥᓂᔅᑕ ᑕᕝᕙᓂ ᓄᑖᒥ ᐋᓐᓂᐊᖅᑕᐃᓕᒪᔪᓕᕆᓂᕐᒧᒃ ᑭᒃᑯᑐᐃᓐᓇᓂᒃ ᐱᖁᔭᕐᒥ?

ᒥᓂᔅᑕᕆᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᑯᓂᖓ ᑲᒪᒋᔭᒃᓴᖃᖅᐳᖅ:

  • ᐅᖃᐅᔾᔨᕙᖕᓂᕐᒥᒃ ᒐᕙᒪᒃᑯᓐᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓱᒪᒋᔭᒃᓴᓄᑦ ᐃᓚᒋᔭᐅᓗᑎᒃ ᑕᐃᒃᑯᐊ ᐊᒃᑐᐊᓂᓖᑦ ᓄᓇᕗᒻᒥᐅᒃ ᑐᐊᕕᕐᓇᖅᑐᖅᑕᖃᓕᖅᑎᓪᓗᒍ ᐱᕙᒌᔭᖅᓯᒪᔭᖏᓐᓄᑦ;
  • ᐅᖃᐅᓯᖃᓪᓚᕆᓕᖅᐸᖕᓂᕐᒥᒃ ᑭᒃᑯᑐᐃᓐᓇᓄᑦ ᐋᓐᓂᓐᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᓯᔪᓂᒃ;
  • ᐋᖅᑭᒃᓯᒪᓕᖅᑎᑦᑎᓂᕐᒥᒃ ᐊᑐᖅᑕᐅᕙᒃᑐᓂᒃ ᓴᖅᑭᑎᑦᑎᓂᕐᓗ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᕙᒃᑐᓄᑦ;
  • ᓇᓗᙱᑦᑎᐊᕈᒪᓂᕐᒧᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕐᕕᐅᕙᒃᑐᑦ ᐱᔨᑦᑎᕋᕐᕕᖃᖅᐸᒃᑲᓗᐊᕐᒪᖔᑕ ᓄᓇᕗᒻᒧᑦ;
  • ᐃᓚᓕᐅᑎᔪᒪᓂᕐᒧᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖏᖃᑎᒌᒍᑕᐅᓯᒪᔪᓄᑦ ᐊᓯᖏᓐᓄᑦ ᐱᔪᓐᓇᐅᑎᖃᕐᕕᐅᔪᓄᑦ.

 

ᑭᓲᕙᑦ ᑲᒪᒋᔭᒃᓴᖏᑦ ᐋᓐᓂᐊᖃᓇᙱᑦᑐᓕᕆᔨᓪᓗᐊᑕᐅᑉ ᐱᓕᕆᔨᐅᑉ (CPHO−ᖑᓂᕋᖅᑕᐅᒋᓪᓗᓂ) ᑖᒃᑯᓇᓂ ᓄᑖᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐱᖁᔭᕐᓂ ᒪᓕᒋᐊᖃᖅᐸᒃᑐᓂᓗ?

CPHO−ᒋᔭᐅᔪᖅ(ᑭᖑᓂᑦᑎᓐᓂ ᖃᐅᔨᒪᔭᐅᕙᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ  ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ) ᐃᓂᑖᖅᑎᑕᐅᕙᒃᐳᖅ ᒥᓂᔅᑕᒥᑦ. CPHO−ᒋᔭᐅᔪᖅ  ᓘᒃᑖᖑᔭᕆᐊᖃᖅᐳᖅ ᐊᔪᙱᓐᓂᖃᕐᓗᓂᓗ ᐋᖅᑭᒃᑕᐅᓯᒪᔪᓂᒃ ᒥᓂᑕᒥᑦ.
CPHO−ᒋᔭᐅᔪᖅ ᐱᓕᕆᖃᑦᑕᕆᐊᖃᖅᐳᖅ ᐃᓛᒃ ᑰᕐᓗᓂ ᐱᔪᓐᓇᐅᑎᖃᖅᖢᓂᓗ ᐱᔭᒃᓴᖃᖅᖢᓂᓗ ᐱᔭᐅᓯᒪᔭᕆᐊᓕᖕᓂᒃ ᓴᐳᔾᔨᓯᒪᓂᐊᕐᓗᓂ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᓄᓇᕗᒻᒥᐅᑦ,  ᐅᑯᓂᖓ ᑕᒪᓐᓇ ᐃᓚᖃᖅᖢᓂ:

  • ᓇᐅᑦᑎᖅᓱᖅᓯᓂᕐᒥᒃ ᐋᓐᓂᐊᕆᔭᐅᓕᖅᐸᒃᑐᓄᑦ ᖃᓄᐃᓕᕙᓪᓕᐊᓂᕆᔭᐅᔪᓂᒃ ᖃᓄᐃᙱᑦᑎᐊᕐᓂᖏᓐᓄᓪᓗ ᓄᓇᕗᒻᒥᐅᑦ;
  • ᐋᖅᑭᒃᓱᐃᓗᓂ ᐊᑐᓕᖅᑎᑦᑎᓗᓂᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᔾᔨᕐᓇᖅᓯᑎᑦᑎᓂᕐᒧᑦ ᐱᓕᕆᐊᖑᕙᒃᑐᓂᒃ ᑲᐱᔭᐅᔪᖃᖅᐸᖕᓂᖓᓄᓪᓗ ᐱᓕᕆᐊᖑᕙᒃᑐᓂᒃ ᑕᒪᓐᓇ ᐃᓚᖃᕐᓗᓂ ᑲᐱᔭᐅᔪᖃᖅᐸᖕᓂᖓᓄᑦ ᑎᑎᕋᕐᕕᐅᕙᓪᓕᐊᕙᒃᑐᒥᒃ;
  • ᑲᔪᓯᑎᑦᑎᕙᒡᓗᓂ ᐋᓐᓂᐊᕆᔭᐅᓕᖅᐸᒃᑐᓄᑦ ᑲᔪᓯᓂᕆᔭᐅᔪᓂᒃ;
  • ᑲᔪᓯᑎᑦᑎᕙᒡᓗᓂ ᖃᐅᔨᓴᖅᓯᓂᕐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᒃ ᖁᐊᓵᕐᓇᕈᓐᓇᖅᑐᓂᒃ;
  • ᐱᕙᒡᓗᓂ ᐅᓂᒃᑲᐅᓯᕐᓂᒃ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐊᐃᑦᑐᕐᓘᑕᐅᔪᓐᓇᙱᑦᑐᓄᓪᓗ ᐋᓐᓂᐊᕆᔭᐅᕙᒃᑐᓄᑦ ᖃᓄᐃᓕᖓᓂᕆᔭᐅᔪᓄᓪᓗ ᐱᓕᕆᐊᖃᖅᐸᒃᖢᓂᓗ ᑕᐃᒃᑯᓄᖓ ᐅᓂᒃᑲᐅᓯᕐᓄᑦ;
  • ᐊᐅᓚᑦᑎᕙᒃᖢᓂ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐋᓐᓂᐊᓄᑦ ᓇᒧᙵᕈᓘᔭᓕᖅᐸᒃᑐᓄᓪᓗ ᐃᓚᖃᕐᓗᓂ ᑕᒪᓐᓇ ᑎᑎᕋᖅᓯᓂᕐᒥᒃ ᑎᓕᓯᔾᔪᑕᐅᔪᓂᒃ ᐃᓄᖕᒧᑦ ᖃᐅᔨᓴᖅᑕᐅᔭᕆᐊᓕᖕᒧᑦ, ᐃᓄᖃᑎᑦᑐᒦᑎᑕᐅᔭᕆᐊᓕᖕᒧᑦ, ᐅᐸᒃᑕᐅᔭᕆᐊᖃᙱᓕᖅᑎᑕᐅᔪᒧᑦ ᑲᒪᒋᔭᐅᔪᒧᓪᓗ;
  • ᐊᐅᓚᑦᑎᕝᕕᖃᕐᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ  ᖁᐊᖅᓵᕐᓇᕈᓐᓇᖅᑐᓂᒃ;
  • ᐊᐅᓚᑦᑎᓂᖅ ᑭᒃᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᕆᔭᔪᓄᑦ ᐊᑕᖐᔪᒥ ᑐᐊᕕᕐᓇᖅᑐᑕᖃᓕᖅᑎᓪᓗᒍ ᐱᕙᒌᔭᕐᓂᕐᒥᒃ ᑭᐅᓯᓂᕐᒥᒡᓗ ᓄᓇᕗᒻᒥ;
  • ᐋᖅᑭᒃᓱᐃᓂᖅ ᐅᓂᒃᑲᐅᓯᒥᒃ ᐊᕐᕌᒎᒃ ᒪᕐᕉᒃ ᐊᓂᒍᑐᐊᕌᒐᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᖏᓐᓄᑦ ᓄᓇᕗᒻᒥᐅᑦ ᑕᒪᓐᓇ ᐃᓚᖃᕐᓗᓂ ᐅᓂᒃᑲᐅᓯᕐᒥᒃ ᓂᕐᔪᑎᓂᑦ ᐋᓐᓂᐊᖅᑖᕆᔭᐅᕙᒃᑐᓂᒃ ᐊᒻᒪᓗ ᑲᐱᔭᐅᔪᖃᖅᐸᖕᓂᖓᓄᑦ ᐱᓕᕆᐊᖑᕙᒃᑐᒧᑦ; 
  • ᑐᑭᒧᐊᖅᑎᑦᑎᕙᒡᓗᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓂᒃ ᐃᓂᑖᖅᑎᑕᐅᓯᒪᔪᓂᒃ ᐱᖁᔭᐅᑉ ᐊᑖᒍᑦ;
  • ᐱᑎᑦᑎᕙᒡᓗᓂ ᐅᖃᐅᔾᔪᐃᓂᕐᒥᒃ ᒐᕙᒪᒃᑯᓐᓄᑦ ᑭᒃᑯᑐᐃᓐᓇᓄᓪᓗ ᐱᓕᕆᔨᓄᑦ ᑭᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐃᓱᒪᒋᔭᒃᓴᓄᑦ;
  • ᐱᓯᒪᖃᑎᖃᓕᕐᓗᓂ ᐱᓕᕆᔾᔪᑎᓄᑦ ᐊᖏᖃᑎᒌᒍᑎᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑦᑕᕐᕕᒋᔭᐅᔪᓄᑦ;
  • ᐋᖅᑭᒃᓱᐃᓂᖅ ᐅᓂᒃᑲᐅᓯᕐᓂᒃ ᐃᓱᒫᓘᑕᐅᓯᒪᔪᓄᑦ ᑕᒪᒃᑯᐊᓗ ᐃᓱᒫᓘᑕᐅᓯᒪᔪᑦ  ᓴᖅᑭᑎᓪᓗᒋᑦ ᖃᐅᔨᒪᔭᐅᓕᖅᑎᓪᓗᒋᑦ ᒪᓕᒐᓕᐅᕐᕕᖕᒥᐅᓄᑦ;
  • ᓴᖅᑭᑎᑦᑎᓗᓂ ᒪᓕᒃᑕᐅᕙᓪᓕᐊᕙᒃᑐᓂᒃ ᐱᔾᔪᑎᓕᖕᓂᒃ ᐱᓪᓗᐊᑕᕐᓂᒃ ᑭᕐᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᕙᒃᑐᓄᑦ;
  • ᑎᓕᓯᕙᒡᓗᓂ ᓂᕐᔪᑎᒥᒃ ᐆᒪᔪᓐᓃᖅᑎᑦᑎᖁᔨᓗᓂ ᖃᐅᔨᓴᖅᑕᐅᑎᓪᓗᒍᓗ ᐱᖦᖤᙱᓴᕐᒪᖔᑦ.

The CPHO−ᒋᔭᐅᔪᖅ, ᑎᑎᕋᕐᕕᖕᒥᑎᒍᑦ ᐃᒪᐃᑦᑑᒋᕗᖅᑕᐅᖅ,  MHO−ᖑᓪᓗᓂ ᐊᒻᒪᓗ  EHO−ᖑᓪᓗᓂ.

 

ᑭᓲᕙᑦ ᑲᒪᒋᔭᒃᓴᕆᔭᐅᔪᑦ ᑐᒡᓕᐊᑕ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᐅᑉ  (DCPHO−ᖑᓂᕋᖅᑕᐅᒋᓪᓗᓂ) ᑖᒃᑯᓇᓂ ᓄᑖᓂ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᒥ ᒪᓕᒋᐊᖃᖅᑐᖁᑎᖏᓐᓂᓗ?

ᒥᓂᔅᑕ ᑎᒃᑯᐊᖅᓯᕙᒃᐳᖅ ᑐᒡᓕᕐᒥᒃ CPHO−ᒥᒃ (ᑭᖑᓂᑦᑎᓐᓂ ᖃᐅᔨᒪᔭᐅᓚᐅᖅᓯᒪᓪᓗᓂ ᑐᓪᓕᐊ ᐃᓗᐊᖅᓴᐃᔨᓪᓗᐊᑕᐅᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ)  ᑖᓐᓇᓗ ᑎᑎᖃᖅᕕᖃᖅᑎᑕᐅᕙᒃᖢᓂ ᐊᕐᕌᒍᓄᑦ ᑕᓪᓕᒪᓄᑦ. CPHO−ᒋᔭᐅᔫᑉ ᑐᒡᓕᐊ  ᓘᒃᑖᖑᔭᕆᐊᖃᖅᐳᖅ ᐊᔪᙱᓐᓂᖃᕐᓗᓂᓗ ᐋᖅᑭᒃᑕᐅᓯᒪᔪᓂᒃ ᒥᓂᑕᒥᑦ. ᑖᓐᓇ ᐃᓇᖏᖅᓯᓯᒪᕙᒃᐳᖅ CPHO−ᒥᒃ ᑕᐃᓐᓇ CPHO−ᒋᔭᐅᔪᖅ ᑕᐃᑲᓃᙱᒃᑳᖓᑦ, ᐱᓕᕆᔪᓐᓇᙱᒃᑳᖓᑦ CPHO−ᒥᒡᓘᓐᓃᑦ ᐃᓕᓯᓯᒪᔪᖃᙱᑉᐸᑦ. ᑎᑎᕋᕐᕕᖕᒥᑎᒍᑦ, ᑖᓐᓇ ᑐᒡᓕᐊ CPHO-ᒋᔭᐅᔪᖅ ᐃᒪᐃᑦᑑᒋᕗᖅᑕᐅᖅ,  MHO−ᖑᓪᓗᓂ ᐊᒻᒪᓗ  EHO−ᖑᓪᓗᓂ.

 

ᑭᓲᕙᑦ ᑲᒪᒋᔭᒃᓴᖏᑦ ᐋᓐᓂᐊᖃᓇᙱᑦᑐᓕᕆᔨᓪᓗᐊᑕᐅᑉ ᐱᓕᕆᔨᐅᑉ (MHO−ᒋᔭᐅᔫᑉ) ᑖᒃᑯᓇᓂ ᓄᑖᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐱᖁᔭᕐᓂ ᒪᓕᒋᐊᖃᖅᐸᒃᑐᓂᓗ?

CPHO−ᒋᔭᐅᔪᖅ ᑎᒃᑯᐊᖅᓯᔪᓐᓇᖅᐳᖅ ᓘᒃᑖᒥᒃ MHO−ᖑᓕᖅᑎᓪᓗᒍ. MHO−ᒋᔭᐅᔪᖅ  ᓘᒃᑖᖑᔭᕆᐊᖃᖅᐳᖅ ᐊᔪᙱᓐᓂᖃᕐᓗᓂᓗ ᐋᖅᑭᒃᑕᐅᓯᒪᔪᓂᒃ ᒥᓂᑕᒥᑦ.    ᑖᓐᓇ ᑎᑎᕋᖅᓯᒪᓂᖓ ᐃᓚᓕᐅᔾᔭᐅᓯᒪᕗᖅ ᐱᖁᔭᕐᒥ ᐱᕕᒃᓴᖃᖅᑎᑦᑎᓂᐊᕐᓗᓂ ᐊᓯᐊᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓘᒃᑖᒥᒃ ᑎᒃᑯᐅᖅᑕᐅᔪᓐᓇᖅᑎᑦᑎᓪᓗᓂ ᐃᓄᒋᐊᒃᓯᕙᓪᓕᐊᓂᖓ ᑕᐃᒪᐃᑎᑦᑎᔭᕆᐊᖃᖅᐸᑦ ᓯᕗᓂᒃᓴᒥ ᐅᕝᕙᓘᓐᓃᑦ ᖃᓄᐃᓕᖓᓂᕆᔭᐅᔪᖅ ᑕᐃᒪᐃᑎᑦᑎᔭᕆᐊᖃᓚᐅᑲᒃᐸᑦ.

MHO−ᒋᔭᐅᔪᖅ ᖃᐅᔨᓴᖅᓯᑐᐃᓐᓇᕆᐊᖃᖅᐳᖅ ᐋᓐᓂᐊᕐᓂᕆᔭᐅᔪᒥᒃ ᑐᖁᓂᕆᔭᐅᔪᒥᒡᓘᓐᓃᑦ ᓴᖅᑭᑎᑦᑎᓗᓂᓗ ᑎᓕᓯᔾᔪᑕᐅᔪᓂᒃ ᐊᒃᑐᐊᓂᓕᖕᓂᒃ ᖁᐊᖅᕐᓇᖅᑐᒧᑦ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᖁᓐᓴᕐᓂᖏᓐᓄᑦ ᑕᒪᓐᓇᓗ ᐃᓚᖃᕐᓗᓂ ᐅᑯᓂᖓ:

  • ᐊᐃᑦᑑᑕᐅᕙᒃᑐᓂᒃ ᖃᓂᒻᒪᓯᕐᓂᒃ
  • ᐊᐃᑦᑑᑕᐅᕙᙱᑦᑐᓂᒃ ᖃᓂᒻᒪᓯᕐᓂᒃ ᐅᕝᕙᓘᓐᓃᑦ
  • ᐅᓂᒃᑲᐅᓯᐅᔪᓐᓇᖅᑐᓂᒃ ᖃᓄᐃᓕᕐᓂᐅᔪᓂᒃ

 

ᑭᓲᕙᑦ ᑲᒪᒋᔭᒃᓴᖏᑦ ᐊᕙᑎᒥ ᖃᓄᐃᙱᑦᑎᐊᖅᑎᑦᑎᓂᕐᒧᑦ ᐱᓕᕆᔨᐅᑉ (EHO) ᑖᒃᑯᓇᓂ ᓄᑖᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐱᖁᔭᕐᓂ ᒪᓕᒋᐊᖃᖅᐸᒃᑐᓂᓗ?

EHO−ᒋᔭᐅᔪᑦ ᑎᒃᑯᐊᖅᑕᐅᕙᒃᐳᑦ CPHO−ᒥᑦ ᐊᔪᙱᓐᓂᖃᕆᐊᖃᖅᖢᑎᒡᓗ ᐋᖅᑭᒃᑕᐅᓯᒪᔪᓂᒃ ᑎᓕᓯᔾᔪᑕᐅᓯᒪᔪᒥᑦ ᒥᓂᔅᑕᒥᑦ. EHO−ᒋᔭᐅᔪᑦ ᖃᔅᓯᑲᓪᓚᖕᓂᒃ ᑲᒪᒋᔭᒃᓴᖃᖅᐳᑦ:

  • ᓇᐅᑦᑎᖅᓱᖅᓯᓗᑎᒃ, ᑕᒻᒪᖅᓯᒪᔪᖅᓯᐅᕐᓗᑎᒃ ᑲᔪᓯᑎᑦᑎᓗᑎᒡᓗ ᖁᐊᖅᓵᕐᓇᖅᑐᓄᑦ ᖃᐅᔨᓴᖅᓯᓂᕐᓂᒃ ᐊᒃᑐᐊᓂᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑐᓄᑦ;
  • ᓴᖅᑭᑎᑦᑎᓗᓂ ᐊᔾᔨᒌᙱᕈᓘᔭᖅᑐᓂᒃ ᑎᓕᓯᔾᔪᑕᐅᔪᓂᒃ ᐊᒃᑐᐊᓂᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑐᓂᒃ ᑕᐃᒪᐃᑦᑕᕆᐊᖃᕌᒐᒥ;
  • ᓴᖅᑭᑎᑦᑎᓗᓂ ᑎᓕᓯᔾᔪᑕᐅᔪᓂᒃ ᐊᒃᑐᐊᓂᓕᖕᓂᒃ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐋᓐᓂᐊᕆᔭᐅᓕᖅᐸᒃᑐᓄᑦ ᐃᓂᒧᓪᓗ, ᐃᓂᒋᔭᐅᔪᓄᑦ ᐱᖁᑎᒧᓪᓘᓐᓃᑦ ᓱᕈᖅᑎᖅᓯᒪᑐᐃᓐᓇᕆᐊᓕᖕᒧᑦ ᐋᓐᓂᐊᓕᖅᑎᑦᑎᔪᓐᓇᖅᑐᒥᒃ;
  • ᐱᕙᒡᓗᓂ ᑐᓴᐅᒪᑎᑦᑎᔾᔪᑎᓂᒃ ᐊᐅᓚᑦᑎᔨᒋᔭᐅᔪᒥᑦ ᐃᒥᖅᑕᕐᕕᐅᕙᒃᑐᒥᑦ ᑕᒪᓐᓇ ᐃᒪᖅ ᖁᐊᖅᓵᕐᓇᕐᓂᖅᐸᑦ ᐊᓂᒍᐃᙱᑉᐸᓪᓘᓐᓃᑦ ᐃᒪᐅᑉ ᐱᐅᓂᖓᓄᑦ ᖃᐅᔨᓴᖅᓯᓂᕐᒥᒃ ᒪᓕᙱᑉᐸᓪᓘᓐᓃᑦ ᒪᓕᒋᐊᖃᖅᐸᒃᑐᓄᑦ.  ᐊᒻᒪᐃᓛᒃ EHO−ᒋᔭᐅᔪᖅ ᐅᖃᐅᓯᖃᓕᖅᐸᒃᐳᖅ ᑕᒪᑐᒥᖓ ᑐᓴᖅᑕᐅᔪᒃᓴᒥᒃ MHO−ᒋᔭᐅᔪᒧᑦ;
  • ᐊᐅᓚᑦᑎᕙᒡᓗᓂ ᓂᕐᔪᑎᒥᒃ ᐱᓕᖕᒥᒃ ᐃᓱᒪᒋᔭᐅᔪᒥᒡᓘᓐᓃᑦ ᐱᖃᕋᓱᒋᔭᐅᓗᓂ ᓂᕐᔪᑎᒥᙶᖅᑐᒥᒃ ᐋᓐᓂᐊᕆᔭᐅᔪᒥᒃ ᓵᑦᑎᐊᕐᒥᐅᑕᖃᕐᓗᓂᓘᓐᓃᑦ ᓂᕐᔪᑎᓂᑦ ᐋᓐᓂᐊᕆᔭᐅᔪᒥᑦ ᑕᒪᓐᓇ ᐃᓚᖃᕐᓗᓂ ᑎᓕᓯᓂᕐᒥᒃ ᓇᖕᒥᓂᖃᖅᑎᐅᔪᒥᒃ, ᐃᓄᖕᒥᒃ ᐱᓯᒪᔪᒥᒃ ᓂᕐᔪᑎᒥᒃ ᐆᒪᔪᕐᓂᐊᖅᑎᒥᒡᓘᓐᓃᑦ,ᐸᓖᓯᙳᐊᒥᑦ ᐸᓖᓯᒥᓪᓘᓐᓃᑦ ᐱᓕᕆᐊᖃᖁᓗᒍ ᐱᔾᔪᑎᖃᕐᓗᓂ ᑖᔅᓱᒥᖓ ᓂᕐᔪᑎᒥᒃ;
  • ᑲᔪᓯᑎᑦᑎᕙᒡᓗᓂ ᖃᐅᔨᓴᕐᓂᕐᓂᒃ ᐱᔪᓐᓇᕈᑎᖃᕐᓗᓂ ᐱᔪᓐᓇᐅᑎᖃᕐᓗᓂᓘᓐᓃᑦ ᑎᒍᓯᔪᓐᓇᕐᓗᓂᓗ ᐱᖁᑎᓂᒃ ᐱᑐᐃᓐᓇᐅᙱᑦᑐᑎᒍᑦ ᖃᓄᐃᓕᖓᓂᕆᔭᐅᔪᑎᒍᑦ.

 

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕇᑦ ᑲᒪᒋᔭᒃᓴᖃᖅᐹᑦ ᐅᑯᑎᒎᓇᖅ, ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᓄᑦ ᐱᖁᔭᖅᑎᒎᑦ ᒪᓕᒋᐊᖃᖅᑐᖁᑎᖏᑎᒍᓪᓘ?

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᕐᓂᕐᒧᑦ ᐱᓕᕆᔨᓪᓚᕇᑦ (ᓘᒃᑖᑦ, ᑭᒍᑎᓕᕆᔩᑦ, ᐃᓗᐊᖅᓴᐃᔩᑦ, ᓯᖓᐃᔪᓕᕆᔩᑦ ᖃᐅᔨᓴᕐᕕᖕᒥᓗ ᐱᓕᕆᔩᑦ) ᐅᖃᐅᓯᖃᓪᓚᕆᒋᐊᖃᖅᐸᒃᐳᖅ ᑐᖁᓐᓇᖅᑐᓂᒃ ᑐᖁᓐᓇᙱᑦᑐᓂᒡᓗ ᐊᐃᑦᑐᕐᓘᑕᐅᔪᓐᓇᖅᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ, ᖃᓄᐃᓕᖓᓂᕆᔭᐅᔪᓂᒃ, ᑎᒥᒥ ᐊᔾᔨᐅᙱᑦᑐᓂᒃ ᐊᓯᖏᓐᓂᒡᓗ ᖃᓄᐃᓕᓂᕆᔭᐅᔪᓂᒃ ᓲᕐᓗ ᑳᓐᓱ ᐊᒻᒪᓗ ᐱᐅᙱᑦᑐᑦ ᖃᓄᐃᓕᖓᓕᕐᓂᕆᔭᐅᕙᒃᑐᑦ ᑲᐱᔭᐅᔪᖄᓪᓚᓚᐅᖅᑎᓪᓗᒍ.  ᖃᖓᒃᑰᕋᔭᕐᓂᖓ ᐅᓂᒃᑲᐅᓯᐅᑉ ᓇᓗᓇᐃᔭᖅᑕᐅᓯᒪᕗᖅ ᒪᓕᒋᐊᖃᖅᐸᒃᑐᓂ.

ᐊᓯᖏᑦᑕᐅᖅ ᐃᓄᑐᐃᓐᓇᐃᑦ ᐊᒻᒪᑦᑕᐅᖅ ᐅᖃᕆᐊᖃᖅᐸᒃᑭᕗᑦ ᐅᑯᓄᖓ:

  • ᑐᖁᖓᔪᓕᕆᔨᓄᑦ;
  • ᐃᓄᖕᓄᒃ ᑲᒪᒋᔭᖃᖅᑐᓄᑦ ᐃᓂᒋᔭᐅᔪᓂᒃ ᐱᔾᔪᑎᖃᕐᓗᑎᒃ ᐋᓐᓂᐊᑦ ᓇᒧᙶᑎᕈᓘᔭᖅᐸᖕᓂᖏᓐᓂᒃ ᐃᓂᒋᔭᐅᔪᓂ;
  • ᐃᔨᓕᕆᔨᓂᒃ ᐊᐃᑦᑐᕐᓘᑕᐅᔪᓐᓇᖅᑐᓄᑦ  ᐋᓐᓂᐊᕆᔭᐅᓕᖅᐸᒃᑐᓄᑦ ᐃᔨᒃᑯᑦ;
  • ᐃᖅᑲᓇᐃᔭᖅᑏᑦ ᐊᔪᖅᑎᑕᐅᙱᓪᓗᑎᒃ ᐱᑎᑦᑎᔪᓐᓇᕐᓂᕐᒥᒃ ᑲᐱᓯᓂᕐᓂᒃ ᐱᔾᔪᑎᖃᕐᓗᑎᒃ ᐊᐅᓚᑦᑎᕝᕕᖃᕐᓂᕐᒥᒃ ᑲᐱᔭᐅᓂᕐᓂᒃ, ᐱᐅᙱᑦᑐᓂᒃ ᓴᖅᑭᑦᑐᖃᓕᕋᔭᕐᓂᖓᓄᑦ ᑲᐱᔭᐅᔪᖄᓪᓚᓚᐅᕐᓗᓂ ᑲᐱᔭᐅᔪᖃᖅᐸᖕᓂᖓᓄᓪᓗ ᑕᒻᒪᖅᑐᓂᒃ;
  • ᐆᒪᔪᕐᓂᐊᖅᑏᑦ ᒪᓕᒐᕌᓛᓕᕆᔨᓪᓗ ᐸᓖᓯᙳᐊᑦ ᐱᔾᔪᑎᖃᕐᓗᓂ ᓂᕐᔪᑎᓂᙶᖅᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ ᓂᕐᔪᑎᓂᒡᓗ ᐊᐴᑎᓯᒪᓕᖅᐸᖕᓂᕐᒧᑦ.

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᖕᒥᒃ ᐅᒃᐱᕈᓱᒃᑐᖃᖅᐸᑦ ᑕᐃᓐᓇ ᐃᓄᒃ ᐊᐃᑦᑐᕐᓘᑕᐅᔪᓐᓇᖅᑐᒥᒃ ᐋᓐᓂᐊᖃᖅᐸᑦ, ᐆᒃᑐᓪᓗᐊᖅᐳᑦ, ᑕᒪᓐᓇᓗ ᐊᖏᖅᑕᐅᓯᒪᓗᓂ, ᐱᓇᔪᖕᓗᑎᒃ ᖃᐅᔨᓴᕐᓂᕐᒧᑦ ᖃᐅᔨᓴᖅᑕᐅᔪᓐᓇᖅᑐᒥᒃ. ᐱᑎᑦᑎᔭᕆᐊᖃᕆᕗᑦᑕᐅᖅ ᐃᓗᐊᖅᓴᖅᑕᐅᔪᒥᒃ ᑐᓴᖅᑕᐅᔪᒃᓴᓂᒃ ᑕᒪᑐᒧᖓ ᐋᓐᓂᐊᕆᔭᐅᔪᒧᑦ ᖃᓄᕐᓗ ᓯᐊᒻᒪᒃᑎᑦᑎᑦᑕᐃᓕᒪᔪᓐᓇᕐᒪᖔᑕ ᑕᒪᑐᒥᖓ.  ᐃᓗᐊᖅᓴᖅᑕᐅᔪᖅ ᓅᑎᑕᐅᓐᓂᖅᐸᑦ ᐊᓯᐊᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ ᐱᓕᕆᔨᒧᑦ, ᑕᐃᓐᓇ ᑕᐃᑯᙵᖁᔨᔪᖅ ᐅᖃᐅᔾᔨᔭᕆᐊᖃᖅᐳᖅ ᐱᔪᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᕐᓂᕐᒧᑦ ᐱᓕᕆᔨᓪᓚᕆᖕᒥᒃ ᑲᒪᒋᔭᒃᓴᖏᓐᓂᒃ ᑕᒪᒃᑯᐊᓗ ᑲᒪᒋᔭᒃᓴᐅᓕᕐᓗᑎᒃ ᓄᑖᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᕐᓂᕐᒧᑦ ᐱᓕᕆᔨᓪᓚᕆᖕᒧᑦ.

 

ᑭᓱᓕᕆᔨᐅᕙᒃᐸᓪᓕ ᓂᕐᔪᑎᓄᑦ ᐃᓗᐊᖅᓴᐃᔩᑦ, ᐆᒪᔪᕐᓂᐊᖅᑏᑦ, ᐸᓖᓯᙳᐊᕆᔭᐅᔪᓪᓗ?

ᓂᕐᔪᑎᓄᑦ ᐃᓗᐊᖅᓴᐃᔨ, ᐆᒪᔪᕐᓂᐊᖅᑎ ᐸᓖᓯᙳᐊᕐᓘᓐᓃᑦ ᐅᖃᐅᓯᖃᕆᐊᖃᖅᐳᖅ ᑕᐃᒪᐃᓐᓇᓱᒋᔭᐅᔪᒥᒃ ᑕᐃᒪᐃᓪᓚᕆᖕᓂᕋᖅᑕᐅᔪᒥᒡᓘᓐᓃᑦ ᓂᕐᔪᑎᓂᙶᖅᑐᒥᒃ ᐋᓐᓂᐊᕆᔭᐅᔪᒥᒃ ᓂᕐᔪᑎᒥᑦ ᐃᓄᖕᓘᓐᓃᑦ ᓂᕐᔪᑎᒥᒃ ᖃᐅᔨᒪᔭᐅᔪᒥᒃ ᐃᓱᒪᒋᔭᐅᔪᒥᒡᓘᓐᓃᑦ ᐊᐃᑦᑐᕐᓗᒃᑕᐅᓯᒪᔪᒥᒃ ᓂᕐᔪᑎᓂᙶᖅᑐᒥᒃ ᐋᓐᓂᐊᕆᔭᐅᓕᖅᐸᒃᑐᒥᒃ. ᐃᓅᑉ ᐊᒃᑐᖅᓯᓂᕆᔭᖓ ᐃᓚᖃᖅᐳᖅ ᓵᑦᑎᐊᕐᒥᐅᑕᖃᕐᓂᖅ ᓄᕚᕿᓂᕐᒥᒃ, ᑲᒃᑭᖓᓂᒡᓘᓐᓃᑦ  ᑮᔭᐅᓗᓂ, ᕿᓱᒃᑕᐅᓗᓂ, ᐅᕕᓂᖕᒥ ᐊᓕᒃᓯᒪᔪᖃᕐᓗᓂ ᓱᕐᓗᐊᒍᓪᓘᓐᓃᑦ ᐃᓅᑉ.

ᑕᐃᒪᐃᑦᑐᖃᖅᐸᑦ, EHO−ᒋᔭᐅᔪᖅ ᑎᓕᓯᓕᕈᓐᓇᖅᐳᖅ ᐱᔾᔪᑎᖃᕐᓗᓂ ᓂᕐᔪᑎᒥᒃ, ᓇᖕᒥᓂᖃᖅᑎᐅᔪᖅ, ᐃᓄᒃ ᑖᔅᓱᒥᖓ ᓂᕐᔪᑎᒥᒃ ᐱᓯᒪᔪᖅ, ᐆᒪᔪᕐᓂᐊᖅᑎ, ᐸᓖᓯᙳᐊᖅ ᐃᒪᐃᓕᐅᕈᓐᓇᖅᑎᖦᖢᒍ:

  • ᑖᓐᓇ ᓂᕐᔪᑎ ᓂᔪᑎᓄᑦ ᐃᓗᐊᖅᓴᐃᔨᒧᙵᐅᑎᓗᒍ;
  • ᐱᓗᒍ ᓂᕐᔪᑎ, ᐅᐸᒃᑕᐅᔪᓐᓇᐃᓪᓕᑎᓪᓗᒍ ᐃᓄᑑᑎᓕᕐᓗᒍᓘᓐᓃᑦ ᑖᓐᓇ ᓂᕐᔪᑎ, ᓇᓗᙱᑦᑎᐊᕐᓂᓗ ᓈᒻᒪᒃᑐᓂᒃ ᓂᕿᖃᕐᒪᖔᑦ, ᐃᒪᖃᕐᒪᖔᑦ, ᐅᖅᑯᐃᕝᕕᖃᕐᒪᖔᑦ ᓴᐳᔾᔭᐅᓯᒪᖕᒪᖔᓪᓘᓐᓃᑦ ᐊᓯᖏᓐᓂᑦ ᓂᕐᔪᑎᓂᑦ.

CPHO−ᑯᑦ ᐅᖃᓪᓚᕆᒍᓐᓇᖅᐳᑦ ᐃᒪᓐᓇ, ᑖᓐᓇ ᓂᕐᔪᑎ ᑐᖁᑕᐅᖁᓗᒍ.

ᑭᓱᓕᕆᔨᐅᕙᓪᓕ ᐃᓕᓐᓂᐊᕐᕕᖕᒥ ᐊᖓᔪᖅᑳᑦ?

ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᐅᖃᖅᐳᖅ ᑕᐃᓐᓇ ᐃᓕᓐᓂᐊᕐᕕᐅᑉ ᐊᖓᔪᖅᑳᖓ, CPHO−ᒥᑦ ᐊᐱᕆᔭᐅᒑᖓᒥ, ᐊᔪᖅᑎᑦᑎᖃᑦᑕᕆᐊᖃᖅᐳᖅ ᓄᑕᖅᑲᒥᒃ ᐊᐃᑦᑐᕐᓘᑕᐅᔪᓐᓇᖅᑐᒥᒃ ᐋᓐᓂᐊᓕᖕᒥᒃ ᑕᒪᓐᓇ ᐋᓐᓂᐊᖓ ᐊᐃᑦᑐᕐᓘᑕᐅᔪᓐᓇᕐᓂᖓᓄᑦ ᐊᓯᖏᓐᓄᑦ ᐃᓕᓐᓂᐊᖅᑎᓄᑦ. ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᖅ CPHO−ᒥᒃ ᐱᔪᓐᓇᖅᑎᑦᑎᕗᖅ ᓇᒃᓯᐅᔾᔨᔪᓐᓇᕐᓂᕐᒥᒃ ᑐᓴᖅᑕᐅᔪᒃᓴᓂᒃ ᐃᓕᓐᓂᐊᕐᕕᐅᑉ ᐊᖓᔪᖅᑳᖓᓄ ᑦ ᑕᐃᓐᓇ ᐃᓕᓐᓂᐊᕐᓂᓕᕆᓂᕐᒧᑦ   ᐱᖁᔭᖅ ᒪᓕᒃᑕᐅᔪᓐᓇᕐᓂᐊᕐᒪᑦ.

 

ᕼᐋᒻᓚᒋᔭᐅᔪᑦ ᐅᖃᐅᓯᐅᓯᒪᕗᑦ ᐅᑯᓇᓂ, ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᒥ ᒪᓕᒋᐊᖃᖅᑐᖁᑎᖏᓐᓂᓗ. ᑭᓱᓂᒡᓕ ᑖᒃᑯᐊ ᑲᒪᒋᔭᒃᓴᖃᖅᐸᑦ?

ᕼᐋᒻᓚᒋᔭᐅᔪᓂ ᑯᐊᐳᕇᓴᒋᔭᐅᔪᑦ ᖃᔅᓯᑲᓪᓚᖕᓂᒃ ᑲᒪᒋᔭᒃᓴᖃᖅᐳᑦ ᐅᑯᓂᖓ ᐃᓚᖃᖅᖢᑎᒃ:

  • ᐊᐅᓚᑦᑎᓇᔭᕐᓂᕐᒥᒃ ᐃᒥᖅᑕᐅᕙᒃᑐᒥᒃ ᐊᑐᖅᑕᐅᕙᒃᑐᒥᒃ ᐱᑎᑦᑎᕙᒃᑐᒥᒃ ᓈᒻᒪᒃᑐᒥᒃ ᐊᖏᓂᖓᓂᒃ ᐃᒪᕐᒥᒃ ᒫᓐᓇᒧᑦ ᓯᕗᓂᒃᓴᒥᓗ ᐱᔭᐅᔪᒪᕙᒃᑐᓄᑦ ᐊᒻᒪᓗᑦᑕᐅᖅ ᐃᑯᐊᓚᔪᓄᑦ ᐊᑐᖅᑕᐅᔪᒃᓴᐅᑕᐅᔪᒧᑦ. ᐃᒪᕐᒧᑦ ᐊᑐᖅᑕᐅᕙᒃᑐᖅ ᐊᐅᓚᑕᐅᔭᕆᐊᖃᖅᐳᖅ ᑲᒪᒋᔭᐅᕙᒡᓗᓂᓗ ᓴᓗᒪᔪᒃᑯᑦ ᓴᓗᒪᓂᖃᑦᑎᐊᖅᑐᒃᑯᓪᓗ ᐅᔾᔨᕐᓱᕈᑎᓂᒃ ᑕᒪᐃᓐᓂ ᐱᔭᐅᔭᕆᐊᓕᖕᓂᒃ ᐱᓯᒪᓗᓂ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒧᑦ ᓱᕈᖅᑎᑕᐅᔪᒥᒃ ᐊᓯᖏᓐᓄᓪᓗ ᖁᐊᖅᓵᕐᓇᖅᑐᓄᑦ. ᑖᓐᓇ ᖃᖓᙳᑐᐊᕌᖓᑦ ᖃᐅᔨᓴᖅᑕᐅᖃᑦᑕᕆᐊᖃᖅᐳᖅ ᐆᒃᑐᕋᖅᑕᐅᓗᓂᓗ. ᑕᒪᓐᓇ ᐃᒪᖅ ᖁᐊᖅᓵᕐᓇᖅᐸᑦ ᐃᒥᕆᐊᒃᓴᖅ ᖃᓄᑐᐃᓐᓇᑦᑎᐊᖅ, ᑕᒪᓐᓇ EHO−ᒋᔭᐅᔪᒧᑦ ᐅᖃᐅᓯᐅᔭᕆᐊᖃᖅᐳᖅ.
  • ᐊᐅᓚᑦᑎᕙᒡᓗᑎᒃ ᑲᒪᒋᔭᖃᖅᐸᒡᓗᑎᒡᓗ ᑭᓈᓗᖕᒧᑦ ᐊᑐᖅᑕᐅᕙᒃᑐᒥᒃ ᑕᒪᓐᓇᓗ ᓈᒻᒪᒡᓗᓂ ᐊᖑᒻᒪᑎᔪᒪᓗᓂ ᒫᓐᓇᒧᑦ ᓯᕗᓂᒃᓴᒥᓗ ᐱᔭᐅᔭᕆᐊᖃᖅᐸᒃᑐᓄᑦ.  ᑕᒪᓐᓇ ᑲᔪᓯᑎᑕᐅᖃᑦᑕᕆᐊᖃᖅᐳᖅ ᓴᓗᒪᔪᒃᑯᑦ ᖁᐱᕐᕆᓐᓇᙱᑦᑐᒃᑯᓪᓗ ᑕᐃᒪᐃᓕᐅᖅᑕᐅᕙᒡᓗᓂᓗ ᐱᑕᖃᖅᑎᑦᑎᑦᑕᐃᓕᒪᓗᓂ ᖃᓄᑐᐃᓐᓇᑦᑎᐊᖅ ᓱᕈᖅᑎᑕᐅᓂᕐᒥᒃ ᓂᕿᓂᑦ ᐃᒪᕐᒥᓪᓘᓐᓃᑦ ᐊᒻᒪᓗ ᓴᐳᔾᔨᓯᒪᓪᓗᓂ ᑭᒃᑯᑐᐃᓐᓇᓂᒃ ᐊᓯᖏᓐᓂᑦ ᐊᒃᑐᐊᓂᓕᖕᓂᑦ ᖁᐊᖅᓵᕐᓇᕈᓐᓇᖅᑐᓂᑦ.
  • ᐊᐅᓚᑦᑎᔪᒪᓗᓂ ᐊᑐᖅᑕᐅᕙᒃᑐᒥᒃ ᐃᒋᑦᑎᓂᐊᕐᓗᓂ ᐊᒃᑕᕐᓗᑯᓂᒃ ᐊᓯᖏᓐᓂᒡᓗ ᐊᑐᕈᓐᓇᐃᓪᓕᔪᓂᒃ.

 

ᑭᒃᑯᒃᑲᓐᓃᑦ ᐱᓕᕆᐊᒃᓴᖃᒃᑲᓐᓂᖅᐸᑦ ᓄᑖᓂ ᐱᖁᔭᕐᓂ ᒪᓕᒋᐊᖃᖅᐸᒃᑐᓂᓗ?

ᑕᖕᒫᖅᓯᒪᕝᕕᖕᓂ ᐊᐅᓚᑦᑎᔩᑦ CPHO−ᒥᒃ ᖃᐅᔨᑎᑦᑎᔭᕆᐊᖃᖅᐳᑦ ᑕᐃᓐᓇ ᑕᖕᒫᖅᓯᒪᕝᕕᒃ ᐋᖅᑭᒃᓱᖅᑕᐅᓚᐅᙱᓐᓂᖓᓂ ᒪᑐᐃᖅᑕᐃᓚᐅᙱᓐᓂᖓᓂᓗ.  ᑖᓐᓇ ᑕᖕᒫᖅᓯᒪᕝᕕᒃ ᐱᑎᑦᑎᔭᕆᐊᖃᖅᐳᖅ ᖁᐊᖅᓵᕐᓇᙱᑦᑐᒥᒃ ᐃᒥᖅᑕᐅᖃᑦᑕᕈᓐᓇᖅᑐᒥᒃ ᐃᒪᕐᒥᒃ, ᑭᓈᓗᖕᒥᒃ ᐃᒋᑦᑎᕙᖕᓂᕐᒧᑦ ᐊᑐᖅᑕᐅᖃᑦᑕᕋᔭᖅᑐᒥᒃ, ᐊᑐᖅᑕᐅᖃᑦᑕᕋᔭᖅᑐᒥᒡᓗ ᑲᒪᒋᔭᖃᕐᓂᐊᕐᓗᓂ ᐊᒃᑕᕐᓗᑯᓂᒃ. ᑕᖕᒫᖅᓯᒪᕝᕕᖕᒥ ᐊᐅᓚᑦᑎᔨ ᐅᖃᕆᐊᖃᖅᐸᒃᐳᖅ CPHO−ᒧᑦ ᖃᓄᑐᐃᓐᓇᖅ ᖃᓄᐃᓕᐅᖅᑕᐅᔪᒥᒃ ᐅᖃᐅᓯᐅᔭᕆᐊᓕᖕᒥᒃ ᒪᓕᒃᑕᐅᔭᕆᐊᖃᖅᑐᑎᒍᑦ.

ᐃᓄᖕᒧᑦ ᐊᑕᐅᓯᕐᒧᑦ ᐱᔨᑦᑎᕋᕐᕕᖃᕐᓂᕐᒧᑦ ᐊᐅᓚᑦᑎᔩᑦ ᐱᑎᑦᑎᖃᑦᑕᕆᐊᖃᖅᐳᑦ ᓴᓗᒪᔪᒥᒃ ᓴᓗᒪᕝᕕᐅᔪᓐᓇᑐᒥᒡᓗ ᐃᓂᒥᒃ ᐊᑐᖅᑕᐅᕙᒃᑐᓂᒡᓗ. ᑕᒪᒃᑯᐊ ᐱᔨᑦᑎᕋᕐᓂᕆᔭᐅᔪᑦ ᐃᓚᖃᖅᐳᑦ ᓄᔭᓕᕆᓂᕐᒥᒃ, ᑯᑭᓕᕆᓂᕐᒥᒃ, ᑐᓐᓂᕐᓂᒃ, ᐳᑐᓯᕙᖕᓂᕐᒥᒡᓗ, ᐅᕕᓂᒃᑯᑦ ᑲᒪᒋᔭᐅᓂᕐᒥᒃ, ᓯᓚᕆᓐᓂᕐᒥᒃ, ᐊᓯᖏᓐᓂᒡᓗ.

 

ᖃᓄᕐᓕ ᑕᒪᓐᓇ ᐃᓄᖕᒧᑦ ᐊᑕᐅᓯᕐᒧᑦ ᖃᓄᐃᙱᑦᑎᐊᕈᓐᓇᕐᓂᖓᓄᑦ ᑐᓴᖅᑕᐅᔪᒃᓴᖅ ᓴᐳᔾᔭᐅᓯᒪᕙᒃᐸ ᑖᒃᑯᓇᓂ ᓄᑖᓂ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᓂ ᒪᓕᒋᐊᖃᖅᑐᖁᑎᖏᓐᓂᓗ?

CPHO−ᒋᔭᐅᔪᖅ ᑲᑎᖅᓱᐃᔪᓐᓇᖅᐳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᓴᖅᑕᐅᔪᒃᓴᓂᒃ ᐊᔾᔨᒌᙱᑦᑐᓄᑦ ᐱᔾᔪᑕᐅᔪᓐᓇᖅᑐᓄᑦ ᓲᕐᓗ ᓇᐅᑦᑎᖅᓱᖅᓯᓂᒃᑯᑦ ᐋᓐᓂᐊᕆᔭᐅᔪᑦ ᖃᓄᐃᓕᕙᓪᓕᐊᖕᒪᖔᑕ, ᖃᐅᔨᓴᖅᓯᓂᕐᒥᒃ ᑲᒪᒋᔭᖃᕐᓂᕐᒥᒡᓗ ᖁᐊᖅᓵᕐᓇᕈᓐᓇᖅᑐᓂᒃ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ, ᐱᓕᕆᐊᒃᓴᓂᒃ ᐱᕙᒌᔭᕐᓂᕐᒧᑦ ᖃᐅᔨᓴᖅᓯᓂᕐᒧᑦ ᖃᐅᔨᓇᓱᒡᕕᖃᕐᓂᕐᒧᓪᓗ.  CPHO−ᒋᔭᐅᔪᖅ ᐱᔪᓐᓇᕐᓂᓕᒫᒥᒍᑦ ᐱᓇᔪᒋᐊᖃᖅᐳᖅ ᓇᓗᙱᑦᑎᐊᕈᒪᓂᕐᒥᓄᑦ ᑕᒪᓐᓇ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᓴᖅᑕᐅᔪᒃᓴᖅ ᑕᒻᒪᖅᑕᖅᓯᒪᙱᑦᑎᐊᕋᓗᐊᕐᒪᖔᑦ ᐱᔭᕇᖅᓯᒪᑦᑎᐊᕐᓗᓂᓗ ᐊᔪᕐᓇᙱᓐᓂᓕᒫᖓᒍᑦ ᐃᓱᓕᑦᑕᕐᕕᖃᕐᓂᖏᓪᓗ ᑐᓴᖅᑕᐅᔪᒃᓴᑦ ᑐᑭᓯᓇᖅᓯᑎᑦᑎᐊᕐᓗᒋᑦ.  ᑕᐃᒃᑯᐊᑐᐊᖅ ᓇᓗᓇᐃᖅᑕᐅᔪᓐᓇᙱᑦᑐᑦ ᑐᓴᖅᑕᐅᔪᒃᓴᐃᑦ ᓴᖅᑭᑎᑕᐅᓪᓗᐊᖅᐳᑦ ᑭᓯᐊᓂ ᐱᑐᐃᓐᓇᐅᙱᑦᑐᓂᒃ ᒪᓕᒃᑕᐅᔭᕆᐊᓕᖕᓂᒃ ᐊᖑᒻᒪᑎᔪᖃᖅᐸᑦ ᓴᖅᑭᑎᑦᑎᓂᐊᕐᓗᓂ ᐃᓄᖕᒧᑦ ᐊᑕᐅᓯᕐᒧᑦ ᖃᐅᔨᔭᐅᔾᔪᑕᐅᔪᓐᓴᖅᑐᓂᒃ ᑭᓇᐅᖕᒪᖔᑦ ᑐᓴᖅᑕᐅᔪᒃᓴᓂᒃ.   ᓇᓗᓇᐃᖅᑕᐅᔪᓐᓇᙱᑦᑐᑦ ᑐᓴᖅᑕᐅᔪᒃᓴᑦ ᐃᓚᖃᖅᐳᑦ ᐃᓄᖕᒧᑦ ᐊᑕᐅᓯᕐᒨᖓᔪᓂᒃ ᑐᓴᖅᑕᐅᔪᒃᓴᓂᒃ ᑭᓇᐅᖕᒪᖔᑦ ᓇᓗᓇᖅᑎᑦᑎᔪᓂᒃ ᓲᕐᓗ ᐃᒪᓐᓇ, ᑖᓐᓇ ᐃᓄᒃ ᑭᓇᐅᖕᒪᖔᑦ ᓇᓗᓇᐃᖅᑕᐅᔪᓐᓇᙱᓪᓗᓂ. ᑕᒪᓐᓇ ᐃᓚᖃᑐᐃᓐᓇᕆᐊᖃᖅᐳᖅ ᑐᓴᖅᑕᐅᔪᒃᓴᓂᒃ ᑲᑎᑕᐅᓯᒪᔪᓂᒃ ᑕᐃᒪᐃᒃᑯᑎᒃ ᑭᒃᑯᓐᓂᒃ ᑭᒡᒐᖅᑐᐃᓗᑎᒃ ᐃᒪᐃᙱᖔᕐᓗᑎᒃ, ᐃᓄᖕᒥᒃ ᐊᑕᐅᓯᕐᒥᒃ.

 

ᑭᓲᕙ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖅ?

ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖅ ᓴᖅᑭᓕᓲᖑᕗᖅ ᑕᒪᒃᑯᐊ ᐊᑐᖅᑕᐅᕙᒃᑐᑦ ᑭᒃᑯᑐᐃᓐᓇᓗᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᑦ ᐊᑐᖅᑕᐅᕌᓂᒃᓯᒪᓕᖅᐸᑕ ᖃᐅᔨᒪᔪᖃᓕᕐᓗᓂᓗ ᐱᑐᐃᓐᓇᐅᙱᑦᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᐱᔪᖃᕆᐊᖃᕐᓂᖓᓂᒃ.   ᑕᑯᔾᔪᑕᐅᔪᓐᓇᖅᑐᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᑦ ᐃᓚᖃᖅᐳᑦ ᑭᒃᑯᑐᐃᓐᓇᓕᒫᓄᑦ ᓄᕙᒡᔪᐊᖕᓇᐃᑦ ᐋᓐᓂᐊᕆᔭᐅᔪᖃᓕᕐᓂᖓᓄᓪᓗ ᐊᒥᓱᓂᑦ ᐆᒥᖓ, Ebola. ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᐅᖃᐅᔾᔨᖃᑦᑕᕋᔭᖅᐳᖅ ᒥᓂᔅᑕᒥᒃ ᖃᓄᐃᓕᖓᓂᕆᔭᐅᔪᒥᒃ ᑖᓐᓇᓗ ᒥᓂᔅᑕ ᐅᖃᐅᓯᖃᓪᓚᕆᓕᕋᔭᖅᐳᖅ ᑭᒃᑯᑐᐃᓐᓇᓄᑦ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖅᑕᖃᓕᕐᓂᖓᓂᒃ, ᑖᓐᓇᓗ ᑕᐃᒪᐃᓂᓕᓂᕆᔭᖓ ᐊᑐᕈᓐᓇᖅᖢᓂ 14−ᓄᑦ ᐅᓪᓗᓄᑦ, ᐊᒻᒪᓗᑦᑕᐅᖅ ᓱᓕ ᐅᖓᕙᕆᐊᖅᑎᑕᐅᒃᑲᓐᓂᕈᓐᓇᖅᐸᒃᖢᓂ14−ᑲᓐᓂᕐᓄᑦ ᐅᓪᓗᓄᑦ. 

ᐅᖃᐅᓯᐅᓪᓚᕆᖕᓂᖓ ᑭᒃᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑑᑉ ᐱᑎᑦᑎᕙᒃᐳᖅ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᒃ ᐱᔪᓐᓇᐅᑎᖃᕐᓂᕐᒥᒃ ᐱᔪᓐᓇᕐᓂᕐᒥᒃ ᐊᑐᖅᑕᐅᒃᑲᓐᓂᕈᓐᓇᖅᑐᓂᒃ ᓲᕐᓗ ᐱᓂᕐᒥᒃ ᐃᓗᐊᖅᓴᐅᑕᐅᒃᑲᓐᓂᕈᓐᓇᖅᑐᓂᒃ ᐱᖁᑎᓂᒡᓗ, ᐊᑐᕐᓗᓂ ᑭᒃᑐᐃᓐᓇᓄᑦ ᐃᓛᒃᑰᖅᑐᓄᓪᓘᓐᓃᑦ ᐱᖁᑎᓂᒃ (ᐊᖏᕐᕋᕆᔭᐅᔪᖅ ᑭᑭᑕᐅᓪᓗᓂ) ᑕᐃᒪᐃᑦᑕᕆᐊᖃᕌᖓᒥ ᐃᓚᒋᔭᐅᓪᓗᓂ ᐃᓄᑑᓕᖅᑎᑦᑎᓂᕐᒥᒃ ᐃᓄᑐᐃᓐᓇᓂᒃ, ᐃᓱᓕᑦᑕᖅᑎᑦᑎᓗᓂᓗ ᐊᐅᓪᓚᕐᓂᕆᔭᐅᕙᒃᑐᓂᒃ. 

 

ᑭᓱᑦ ᐃᓱᒪᒋᔭᐅᕙᒃᐸᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᕐᓂᖏᓐᓂᒃ?

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑐᖅ ᑭᓱᑐᐃᓐᓇᖅᓯᐅᑕᐅᓪᓗᓂ ᐅᖃᐅᓯᐅᓯᒪᕗᖅ ᐅᖃᐅᓯᖃᕈᑕᐅᓪᓗᓂ ᖃᓄᐃᓕᖓᓂᕆᔭᐅᔪᒥᒃ, ᐊᑐᖅᑕᐅᕙᒃᑐᒥᒃ, ᐱᖁᑎᒥᒃ ᐱᓕᕆᐊᖑᔪᒥᒡᓘᓐᓃᑦ ᖁᐊᖅᓵᕐᓇᖅᑎᑦᑎᑐᐃᓐᓇᕆᐊᓕᖕᒥᒃ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐸᒡᕕᓴᓕᑐᐃᓐᓇᕆᐊᖃᕐᓂᖓᓄᓪᓗ ᐱᑎᑦᑎᑦᑕᐃᓕᒪᓂᕐᒥ ᐋᓐᓂᐊᕆᔭᐅᓕᖅᐸᒃᑐᓂᒃ, ᐃᓕᙵᖕᓂᕆᔭᐅᔪᓂᒃ ᐊᓯᖏᓐᓂᒡᓘᓐᓃᑦ ᖁᐊᖅᓵᕐᓇᖅᑐᓂᒃ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ.

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑐᒧᑦ ᑎᑎᕋᖅᓯᒪᓂᖓ ᑖᒃᑯᓇᓂ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᖁᔭᕐᓂ ᑭᐅᓯᕗᖅ ᐃᓚᖏᓐᓂᒃ ᐱᑐᐃᓐᓇᐅᙱᑦᑐᓂᒃ ᐃᓂᓂ ᓲᕐᓗ, ᓂᖀᑦ, ᐃᒪᖅ, ᑭᓈᓗᒃ,ᐊᒃᑕᕐᓗᑯᓂᒃ ᐃᒋᑦᑎᕙᖕᓂᖅ, ᐃᓂᒋᔭᐅᕙᒃᑐᑦ, ᐊᒻᒪᓗ ᐃᓄᖕᒧᑦ ᐊᑕᐅᓯᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᑦ.