ᐅᖃᓚᐅᑎᓯᐅᑏᑦ

You are here

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ

 

ᐃᑲᔪᖅᑕᐅᔭᕆᐊᖃᖅᐱᑦ?

ᐃᒻᒥᓃᕈᒪᓂᕐᒥᒃ ᐃᓱᒪᖃᑐᐊᕈᕕᑦ ᐃᓱᒫᓘᑎᖃᕈᕕᓪᓘᓐᓃᑦ ᐊᓯᖕᓂ ᐊᑦᑕᕐᓇᖅᑐᒦᑦᑐᒥᒃ, ᑐᓴᖅᑎᖃᑦᑕᖅᓯᐅᒃ ᐸᓖᓯᒃᑯᑦ ᓄᓇᔅᓯᓐᓂ ᐅᖃᓘᑎᓯ ᓯᕗᓪᓕᖏᑦ ᓇᕿᑦᑕᖅᑳᕐᓗᒋᑦ ᐊᒻᒪ -1111 (ᓲᕐᓗ ᑭᙵᕐᓃᒃᑯᕕᑦ ᐃᒪᓐᓇ ᓇᕿᑦᑕᐃᓇᔭᖅᐳᑎᑦ 897-1111).

ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᒃ (ᖃᓪᓗᓈᑐᑦ, ᐃᓄᒃᑐᑦ)

ᐊᑭᖃᙱᑦᑐᒃᑯᑦ, 24/7: 1-800-265-3333 ᐅᕝᕙᓘᓐᓃᑦ ᐃᖃᓗᖕᒥᐅᑕᑦ ᐅᖃᓗᒍᓐᓇᖅᑐᑦ ᐅᕗᖓ 979-3333

ᓄᑕᖅᑲᓄᑦ ᐃᑲᔪᖅᑕᐅᔪᒪᔪᓄᑦ ᐅᖃᓗᒡᕕᒃ (ᖃᓪᓗᓈᑐᑦ, ᐅᐃᕖᑐᑦ)

ᐊᑭᖃᙱᑦᑐᒃᑯᑦ, 24/7: 1-800-668-6868 ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᑎᑎᕋᕐᓗᑎᑦ ᐅᕗᖓ www.kidshelpphone.ca

ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᐅᐃᕆᓯᒪᔪᓄᑦ, ᓄᓇᕗᑦ ᒐᕙᒪᒃᑯᑦ

ᐃᓅᓯᓕᕆᔨᒧᑦ ᐅᖃᓪᓚᖃᑎᖃᕈᒪᒍᕕᑦ, ᐅᖃᓗᒡᕕᒋᕙᒡᓗᒋᑦ ᓄᓇᔅᓯᓐᓂ ᐋᓐᓂᐊᕕᖕᒧᑦ ᐅᕝᕙᓘᓐᓃᑦ ᐃᖃᓗᖕᒥᐅᑦ ᐅᖃᓗᒍᓐᓇᖅᑐᑦ ᐃᖃᓗᖕᓂ ᐃᓱᒪᓕᕆᔨᓄᑦ ᐅᕗᖓ 975-5999

ᐃᖅᑲᓇᐃᔭᕐᕕᖕᒥ ᐋᖅᑭᑕᐅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᑕᐅᕕᖕᒥ ᐱᓕᕆᐊᑦ

ᑲᓇᑕᒥ ᑲᑉᐱᐊᓇᖅᑐᖃᑦᑎᓪᓗᒍ ᐅᖃᓗᒡᕕᒃᓴᖅ (ᐃᓄᒃᑐᑦ, ᖃᓪᓗᓈᑐᑦ, ᐅᐃᕖᑐᑦ), ᐊᑭᖃᙱᑦᑐᒃᑯᑦ, ᐃᑲᕐᕋᓄᑦ 24−ᓄᑦ/7-ᓄᑦ ᐅᓪᓗᕐᓄᑦ: 1-866-925-4419

ᐃᓕᓴᖅᓯᕕᒃ ᐃᓅᓯᓕᕆᔭᐅᔪᒪᔪᓄᑦ ᐅᖃᓗᒡᕕᒃ (ᐃᓄᒃᑐᑦ, ᖃᓪᓗᓈᑐᑦ), ᐊᑭᖃᙱᑦᑐᒃᑯᑦ: 1-888-331-4433

ᖃᓄᐃᑦᑐᓐᓃᕈᒪᔪᓄᑦ ᐅᖃᓗᒡᕕᒃᓴᖅ

ᐊᑭᖃᙱᑦᑐᒃᑯᑦ, 24/7: 1-855-242-3310

ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᓚᖏᓐᓄᓪᓗ ᐃᑲᔪᖅᑕᐅᕕ

ᐊᑭᖃᙱᑦᑐᒃᑯᑦ, 24/7 (ᖃᓪᓗᓈᑐᑦ, ᐅᐃᕖᑐᑦ, ᐃᓄᒃᑐᑦ ᑐᓵᔨᖃᕐᓗᑎᒃ): 1-800-663-1142

 

ᑭᒃᑰᖕᒪᖔᑦᑕ

ᐃᓚᒋᔭᐅᓪᓗᓂ ᐱᓕᕆᐊᖑᖃᑕᐅᔪᒧᑦ ᓴᖅᑭᑕᐅᓇᓱᒃᑎᓪᓗᒍ ᐃᒻᒥᓃᖃᑦᑕᕐᓂᖅ, ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᓴᖅᑭᑕᐅᓚᐅᖅᓯᒪᕗᖅ 2015−ᒥ ᐊᐅᓚᑦᑎᔨᐅᖁᔭᐅᓪᓗᑎᒃ ᓄᓇᕗᑦ ᒐᕙᒪᒃᑯᑦ ᐊᑐᓕᖅᑕᐅᖁᔭᖏᑦ ᓄᓇᕗᒻᒥ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᒪᐅᑎᒃᓴᓂᒃ ᐊᑐᐃᓐᓇᕈᖅᑎᓪᓗᒋᓪᓗ ᐊᑕᖏᕐᓗᒋᑦ ᐊᐅᓚᑦᑎᓂᕐᒧᑦ ᐃᑲᔪᖅᓱᐃᔾᔪᑎᑦ ᐊᒻᒪ ᓯᕗᓕᖅᑎᐅᓂᖅ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ.

ᓇᓗᓇᐃᖅᓯᕗᒍᑦ ᐱᓕᕇᓐᓇᖅᐳᒍᓪᓗ ᑕᐅᑐᖅᑰᖅᑕᕗᑦ ᑐᕌᕆᓪᓗᑎᒍᑦ ᓄᓇᕗᒻᒥ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᒪᐅᑎᒃᓴᑦ, ᐃᒪᓐᓇ ᐅᖃᖅᓯᒪᔪᑦ:  

ᐃᓄᐃᑦ ᓂᕆᐅᒋᔭᖃᓲᖑᙱᒻᒪᑕ ᑭᒃᑯᑦ ᐃᒻᒥᓃᕈᒪᓪᓗᑎᒃ ᐊᑦᑕᕐᓇᖅᑐᒦᒃᑲᓗᐊᕐᒪᖔᑕ ᐃᓅᙱᑦᑐᑦ ᐊᔾᔨᒌᙱᓐᓂᑦᑎᓐᓄᑦ.  ᑎᓕᐅᕆᔾᔪᑕᐅᓪᓗᓂ ᓱᓕᔪᒥᒃ, ᐱᓕᕆᖃᑎᒌᑦ ᑕᐅᑐᖅᑰᖅᑕᖃᖅᐳᑦ ᓄᓇᕗᒻᒥ ᐃᒻᒥᓃᖃᑦᑕᕐᓂᖅ ᓈᒻᒪᒍᓐᓃᖅᑎᑕᐅᕙᒃᖢᓂ, ᐃᒻᒥᓃᖃᑦᑕᖅᑐᑦ ᐅᓄᕐᓂᖏᑦ ᑲᓇᑕᒥᐅᓕᒫᑦ ᐃᒻᒥᓃᖃᑦᑕᖅᑐᑦ ᐅᓄᕐᓂᖏᑦ ᐊᔾᔨᒋᑐᐃᓐᓇᕐᒪᒍ−ᐅᕝᕙᓘᓐᓃᑦ ᐅᓄᙱᓐᓂᖅᓴᐅᓗᑎᒃ.  ᓄᓇᕗᒻᒥ ᓄᑕᖅᑲᑦ ᐊᒻᒪ ᒪᒃᑯᒃᑐᑦ ᐱᕈᕐᕕᖓ ᐊᑦᑕᕐᓇᙱᓐᓂᖅᓴᖅ ᐱᕈᑦᑎᐊᕐᓇᕐᓂᖅᓴᒥᒡᓗ ᐊᕙᑎᖃᖅᖢᓂ, ᐃᓄᖕᓄᓪᓗ ᐃᓅᕝᕕᐅᔪᓐᓇᖅᖢᓂ ᖃᓄᐃᙱᑦᑎᐊᕐᓗᑎᒃ, ᐃᕐᓂᐅᕈᓐᓇᑦᑎᐊᕐᓗᑎᒡᓗ ᐱᔭᕆᐊᖃᖅᑕᖏᑦ ᓈᒻᒪᖕᒪᑕ ᐊᓂᒍᕈᑕᐅᒋᐊᒃᓴᖅ ᐊᒃᓱᕈᕐᓇᖅᑐᓄᑦ, ᐱᐅᔪᓂᒃ ᐱᓕᕆᔪᓐᓇᖅᖢᑎᒃ, ᐊᐃᑉᐸᖅᑖᑦᑎᐊᕈᓐᓇᖅᖢᑎᓪᓗ.  ᐃᒪᐃᑦᑑᓂᐊᕐᒥᔪᖅ ᓄᓇᕗᒻᒥ, ᐃᓚᒌᑦ, ᓄᓇᖅᑲᑎᒌᑦ, ᐊᒻᒪ ᒐᕙᒪᒃᑯᑦ ᐱᓕᕆᖃᑎᒌᒃᐸᒡᓗᑎᒃ ᐊᑐᐃᓐᓇᕈᖅᑎᑦᑎᓇᓱᒡᓗᑎᒃ ᐱᓕᕆᐊᒃᓴᕐᔪᐊᓂᒃ ᐊᒻᒪ ᐃᓕᖅᑯᓯᒃᑯᑦ ᓈᒻᒪᒃᑐᓂᒃ ᐱᔨᑦᑎᕋᖅᐸᒡᓗᑎᒃ ᑕᐃᒃᑯᓄᖓ ᐃᑲᔪᖅᑕᐅᔭᕆᐊᓕᖕᓄᑦ.

 

ᖃᓄᖅ ᐱᓕᕆᓲᖑᖕᒪᖔᑦᑕ

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᐱᑕᖃᖅᐳᖅ ᓴᖅᑭᑉᐸᓪᓕᐊᖁᓪᓗᒋᑦ ᓯᕗᓕᖅᑎᑦ ᐊᐅᓚᑦᑎᔾᔪᑏᓪᓗ ᐃᑲᔪᖅᓱᕐᓗᒋᑦ ᐊᑐᓕᖅᑎᑕᐅᕙᓪᓕᐊᔪᑦ ᓄᓇᕗᒻᒥ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑕᐅᔪᒪᔪᑦ.  ᐱᓕᕆᐊᕗᑦ ᐃᓚᖃᖅᑐᑦ ᐅᑯᓂᖓ:

  • ᐊᑐᐃᓐᓇᕈᖅᑎᑉᐸᒡᓗᒋᑦ ᐊᑐᖅᑕᐅᔪᓐᓇᖅᑐᑦ ᐊᒻᒪ ᑮᓇᐅᔭᓄᑦ ᐃᑲᔫᑎᑦ ᐱᕙᓪᓕᐊᔾᔪᑎᒃᓴᑦ ᐊᒻᒪ ᐱᓕᕆᔾᔪᑎᒃᓴᑦ ᐃᒻᒥᓃᖅᑕᐃᓕᑎᑦᑎᓂᕐᒧᑦ ᐱᓕᕆᐊᖑᔪᒃᓴᓂᒃ ᓄᓇᓕᖕᓂ ᐊᐅᓚᑕᐅᔪᓂᒃ ᑐᙵᕕᓕᖕᓂᓪᓗ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐅᖃᐅᓯᖏᓐᓂᒃ;
  • ᐱᓕᕆᕝᕕᖕᒥᐅᑕᐅᖃᑎᒌᙱᑦᑐᑦ ᑲᑎᒪᑎᑉᐸᒡᓗᒋᑦ ᐃᑲᔪᕐᓗᒋᑦ ᖃᐅᔨᓴᕆᐊᓕᖕᓂᒃ, ᐊᐅᓚᑦᑕᕆᐊᓕᖕᓂᒃ, ᐊᒻᒪ ᐊᑐᓕᖅᑎᑕᐅᒋᐊᓕᖕᓂᒃ ᓄᓇᕗᒻᒥ ᐃᒻᒥᓃᖅᑕᐃᓕᑎᑦᑎᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᒃ ᑭᖑᓂᐊᒍᓪᓗ ᐱᓕᕆᐊᒃᓴᓂᒃ ᐸᕐᓇᐃᔪᓐᓇᕐᓂᕐᒥᒃ;
  • ᓴᙱᒃᑎᒋᐊᕐᓗᒋᑦ ᑐᓴᖅᑕᐅᔪᒃᓴᑦ ᑐᓴᖅᑕᐅᑎᑉᐸᒡᓗᒋᑦ ᐃᑲᔪᖅᓱᑦᑎᐊᕐᓂᖅᓴᐅᓕᕐᓗᒋᑦ ᐃᓄᐃᑦ ᐊᑦᑕᕐᓇᖅᑐᒦᑦᑐᑦ;
  • ᐱᕙᓪᓕᐊᑎᑕᐅᔪᑦ ᓯᕗᓕᖅᑎᐅᕝᕕᒋᓗᒋᑦ ᓄᓇᕘᒥ ᐅᐃᕆᓯᒪᔪᓄᑦ ᐊᒻᒪ ᖁᐋᖅᓵᖅᓯᒪᔪᓄᑦ ᒪᒥᓴᕐᕕᒃ;
  • ᐃᓯᕐᕕᐅᔪᓐᓇᖅᑐᑦ ᐅᓄᖅᓯᑎᑉᐹᓪᓕᕐᓗᒋᑦ ᐃᓕᖅᑯᓯᕐᒧᑦ ᐊᑭᒻᒪᑎᔪᑦ ᐱᓕᒻᒪᒃᓴᖅᑕᐅᒋᐊᓕᑦ; ᐊᒻᒪ
  • ᐊᐅᓚᑉᐸᒡᓗᒋᑦ ᐱᕚᓪᓕᖅᓯᒪᔪᑦ ᐃᖏᕐᕋᔾᔪᑎᓄᑦ ᖁᐋᖅᓵᖅᓯᒪᔪᑦ ᑭᐅᔾᔪᑎᒃᓴᖏᓐᓂᒃ ᐱᔨᑦᑎᕋᐅᑎᓂᒃ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ.

 

ᖃᓄᖅ ᐃᑲᔪᕈᓐᓇᕐᒪᖔᖅᐱᑦ

ᑲᑐᔾᔨᖃᑎᒌᑦ ᐃᓄᑑᓗᑎᒃ ᑲᒪᒋᔭᒃᓴᖃᙱᑦᑐᑦ ᐃᒻᒥᓃᖅᑎᑦᑎᑦᑕᐃᓕᓂᕐᒥᒃ − ᐊᑕᖏᖅᖢᑕ ᐱᓕᕆᐊᒃᓴᖃᖅᑐᐃᓐᓇᐅᕗᒍᑦ.  ᐃᓄᐃᑦ ᐱᓕᕆᐊᒃᓴᓖᑦ ᐊᔾᔨᒌᙱᑦᑐᓂᒃ ᓄᓇᖏᓐᓂᒃ ᐊᒻᒪ ᒐᕙᒪᒃᑯᑦ ᐃᒪᐃᑦᑐᓐᓇᖅᑐᑦ ᐊᒻᒪ ᐃᑲᔪᕆᐊᖃᖅᑐᑦ ᓄᖅᑲᖅᑎᑦᑎᓂᕐᒧᑦ ᐊᒃᓱᕉᑕᐅᔪᓂᒃ.  ᐅᑯᐊ ᑎᑎᕋᖅᓯᒪᔪᑦ ᐱᓕᒻᒪᒃᓴᖅᑕᐅᔪᓐᓇᖅᑐᑦ ᓇᓂᕈᓗᔭᖅ ᓄᓇᕘᒥ:

ᐃᓅᓯᕐᒥᒃ ᑭᐱᓯᑎᑦᑎᑦᑕᐃᓕᓂᕐᒧᑦ ᐅᖃᖃᑎᖃᕈᓐᓇᖅᓯᓂᕐᒥᑦ ᐱᓕᒻᒪᒃᓴᕐᓂᖅ

ᐃᓅᓯᕐᒥᒃ ᑭᐱᓯᑎᑦᑎᑦᑕᐃᓕᒪᓂᕐᒧᑦ ᐅᖃᖃᑎᖃᕈᓐᓇᖅᓯᓂᕐᒥᑦ ᐃᓕᓐᓂᐊᕐᓂᖅ ᐅᓪᓘᖕᓄᑦ ᒪᕐᕉᖕᓄᑦ ᐊᑦᑕᕐᓇᖅᑐᖃᖅᑎᓪᓗᒍ ᐃᑲᔪᖅᑐᐃᔾᔪᑕᐅᓇᓱᒃᖢᓂ ᐱᓕᒻᒪᒃᓴᕈᑕᐅᕗᖅ ᐱᓕᒻᒪᒃᓴᖃᑕᐅᔪᑦ ᐱᑐᐃᓐᓇᕆᐊᖃᓕᖅᑎᖦᖢᒋᑦ ᑭᐅᔪᓐᓇᖅᓯᓗᑎᒃ ᖃᐅᔨᒪᕚᓪᓕᕐᓗᑎᒃ ᖁᓱᒍᓐᓃᕐᓗᑎᒡᓗ ᐃᓄᖕᓄᑦ ᐃᒻᒥᓃᕐᓂᕐᒧᑦ ᐊᑦᑕᕐᓇᖅᑐᒦᑦᑐᓄᑦ.  ᐃᓚᐅᔪᑦ ᐃᓕᑦᑎᖃᑦᑕᖅᐳᑦ ᐊᔪᕈᓐᓃᖅᓴᖃᑦᑕᖅᐳᓪᓗ ᓇᓗᓇᐃᖅᓯᓂᕐᒥᒃ ᑭᐅᔪᓐᓇᕐᓂᕐᒥᒡᓗ ᐃᓄᖕᓄᑦ ᐊᑦᑕᕐᓇᖅᑐᒦᓪᓚᕆᒃᑐᓄᑦ ᐃᒻᒥᓃᕐᓂᕐᒥᒃ.

SafeTALK

ᐅᓪᓘᑉ ᓇᑉᐸᖓᓂ ᐱᓕᒻᒪᒃᓴᖅᑕᐅᓲᑦ ᐃᓕᓴᖅᓯᔪᓐᓇᖅᓯᓗᑎᒃ ᐃᓄᖕᒥ ᐃᓱᒪᒋᔭᓕᖕᒥᒃ ᐃᒻᒥᓃᕐᓂᕐᒥᑦ ᐃᑲᔪᕈᓐᓇᖅᑐᓄᓪᓗ ᑐᓐᓂᖅᑯᑎᒋᓗᒋᑦ ᐃᓅᔭᕆᐊᖃᕐᓂᖏᓐᓂᒃ ᑲᔪᖏᖅᓴᐃᔨᓄᑦ. ᐃᓚᐅᓂᐊᖅᑐᑦ ᐱᕙᒌᔭᕆᐊᓕᖕᓂ ᐊᑐᕆᐊᖃᙱᑦᑐᑦ ᐱᓕᒻᒪᒃᓴᖃᑕᐅᓂᐊᖅᑎᓪᓗᒋᑦ.

ᐃᓱᒪᒥᒍᑦ ᐊᔪᕈᑎᓕᖕᓄᑦ ᐋᓐᓂᖅᑐᖅᓯᐅᑎᓕᕆᓂᖅ ᐃᓄᖕᓄᑦ

ᐅᓪᓗᓄᑦ ᐱᖓᓱᓄᑦ ᐃᓕᓐᓂᐊᖅᑕᐅᔪᒃᓴᖅ ᑐᕌᖓᔪᖅ ᐃᓄᖕᓄᑦ ᑕᐃᒃᑯᓄᖓᓗ ᐃᖅᑲᓇᐃᔭᖅᑎᓄᑦ ᓄᓇᖃᖅᑐᓄᓪᓗ ᐃᓄᐃᑦ ᓄᓇᖏᓐᓂᒃ.  ᐊᔪᕈᓐᓃᕐᓇᖅᑐᖅ ᖁᓱᙱᓪᓗᑎᒃ ᐃᓚᐅᔪᓐᓇᖅᓯᓗᑎᒃ ᐅᖃᒪᔭᒍᑕᐅᔪᓂᒃ ᐃᓱᒪᒥᒍᑦ ᖃᓄᐃᙱᑦᑎᐊᕈᑎᒃᓴᓂᒃ, ᐃᓕᑕᖅᓯᔪᓐᓇᖅᓯᓗᑎᒃ ᐃᓱᒪᒥᒍᑦ ᐊᔪᕈᑕᐅᒐᔪᒃᑐᓂᒃ ᐊᒻᒪ ᖃᓄᐃᙱᑦᑎᐊᕈᓯᕐᓂᒃ, ᐱᑕᖃᕈᓐᓃᖅᑎᑉᐹᓪᓕᕐᓗᒍ ᓈᒻᒪᙱᓪᓕᐅᕈᑕᐅᔪᑦ ᐊᒻᒪ ᐊᔾᔨᒌᙱᑎᑦᑎᓂᖅ ᐃᓱᒪᒥᒍᑦ ᐊᔪᕈᑎᓕᑦ ᐱᔾᔪᑎᒋᓗᒋᑦ.

ᓄᓇᖃᖅᑳᖅᓯᒪᔪᑦ ᐃᓕᖅᑯᓯᕐᒥᓂ ᐱᓕᕆᔪᓐᓇᑦᑎᐊᖅᑐᑦ

ᐅᓪᓘᖕᓄᑦ ᒪᕐᕉᖕᓄᑦ ᐱᓕᒻᒪᒃᓴᖅᑕᐅᔪᒃᓴᖅ ᓴᖅᑭᔾᔪᑕᐅᔪᖅ ᑲᓇᑕᒥ ᓇᓗᓇᐃᖅᑕᐅᓯᒪᙱᑦᑐᓂᒃ ᐱᓕᕆᖃᑎᒌᒍᓯᕐᓂᒃ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ ᓇᓗᓇᐃᖅᓯᓯᒪᓪᓗᓂᓗ ᑐᓗᖅᑕᕈᑕᐅᓲᓂᒃ ᐋᖅᑭᒋᐊᕈᑎᒃᓴᓄᑦ.  ᑖᓐᓇ ᐱᓕᒻᒪᒃᓴᕐᓂᖅ ᑐᕌᖓᙱᒃᑲᓗᐊᖅᑎᓪᓗᒍ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ, ᐃᓚᐅᔪᓂᒃ ᖃᐅᔨᕚᓪᓕᕈᑕᐅᓐᓇᖅᑐᖅ ᓄᓇᖃᖅᑳᖅᓯᒪᔪᑦ ᐱᐅᓯᑐᖃᖏᓐᓂᒃ, ᓴᖅᑭᑕᐅᓪᓗᑎᒃ ᐅᕕᓂᖃᖃᑎᒋᙱᑕᒥᓂᒃ ᐊᑭᕋᖅᑐᖃᑦᑕᕐᓃᑦ, ᖃᓄᕐᓗ ᐱᓕᕆᖃᑎᒋᔭᐅᑦᑎᐊᓕᕈᓐᓇᕐᒪᖔᑕ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᒻᒪ ᓄᓇᖅᑲᑎᒌᑦ.

ᖃᐅᔨᔪᒪᒍᔅᓯ ᖃᖓ ᐊᒻᒪ ᓇᓂ ᐱᓕᒻᒪᒃᓴᖅᑐᖃᓛᕐᒪᖔᑦ, ᐅᕗᖓ ᖃᐅᔨᒋᐊᕈᓐᓇᖅᐳᓯ training@gov.nu.ca ᐅᕝᕙᓘᓐᓃᑦ embracelife@inuusiq.com.

 

ᖃᓄᐃᓕᐅᕆᐊᖃᕐᒪᖔᑦ

ᐅᑯᐊ ᑎᑎᕋᖅᓯᒪᔪᑦ  ᐃᓕᑦᑎᕝᕕᒋᔪᓐᓇᖅᑕᑎᑦ ᐅᖃᓪᓚᒍᓐᓇᖅᓯᓗᑎᑦ ᐃᒻᒥᓃᕐᓂᖅ ᐊᑦᑕᕐᓇᖅᑐᒃᑰᖅᑎᙱᓪᓗᒍ, ᓇᓗᓇᐃᕐᓗᒋᑦ ᐅᔾᔨᖅᓱᕆᐊᖃᕐᓃᑦ ᐃᒻᒥᓃᕐᓂᕐᒥᒃ ᐃᓱᒪᔪᖃᖅᑎᓪᓗᒍ, ᖃᓄᐃᓕᐅᕆᐊᖃᕐᒪᖔᓪᓗ ᓇᓗᓇᕈᓐᓃᖅᑐᖃᖅᐸᑦ ᐃᒻᒥᓃᕐᓂᕐᒥᒃ ᐃᓱᒪᒋᔭᖃᖅᑐᓂᒃ.

 

ᐅᕙᑦᑎᓐᓄᑦ ᖃᐅᔨᒋᐊᖃᑦᑕᕆᔅᓯ

ᑮᓇᐅᔭᓂᒃ ᐱᓇᔪᖕᓂᐊᕈᔅᓯ ᓄᓇᓕᖕᓂ ᐊᐅᓚᑕᐅᔪᒥᒃ ᐱᓕᕆᐊᒃᓴᒥᒃ, ᐃᕐᖐᓐᓈᖅᑕᐅᒃᑯᑦ ᐅᑯᐊ ᑎᑎᕋᕐᕕᒋᕙᒡᓗᒋᑦ: inuusivutanninaqtuq@gov.nu.ca.

ᐱᓕᕆᖃᑕᐅᑎᑦᑎᔪᒪᒍᔅᓯ ᐱᓂᕐᓗᒃᑐᓄᑦ ᐱᓕᕆᑎᑦᑎᔨᓂᒃ ᐅᕝᕙᓘᓐᓃᑦ ᑐᑭᓯᒃᑲᓐᓂᕈᒪᒍᔅᓯ ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᖕᒥ, ᐅᕙᑦᑎᓐᓄᑦ ᖃᐅᔨᒋᐊᖃᑦᑕᕆᔅᓯ ᐅᑯᓄᖓ ᑎᑎᕋᕐᓗᓯ:

 

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᑦ ᒐᕙᒪᖓ ᑎᑎᖅᑲᒃᑯᕕᐊ 1000, ᐃᓂᖓ 1000 ᐃᖃᓗᐃᑦ, ᓄᓇᕗᑦ X0A 0H0   ᐅᖄᓚᐅᑦ: 867-975-5742

 

ᐃᑲᔫᑎᒃᓴᑦ

ᓄᓇᕗᒻᒥ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᑦ (2010)

ᐃᓅᓯᕗᑦ ᐊᓐᓂᕐᓇᖅᑐᖅ (2017)

ᑲᓇᑕᒥ ᐃᓄᐃᑦ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᑦ (2016)

ᐅᐃᕆᓯᒪᔪᓄᑦ ᐊᒻᒪ ᖁᐋᖅᓵᖅᓯᒪᔪᓄᑦ ᑲᒪᒋᔭᐅᔾᔪᑎᑦ ᓄᓇᕗᒻᒥ ᐅᓂᒃᑳᓕᐊᑦ (2018)