ᐅᖃᓚᐅᑎᓯᐅᑏᑦ

You are here

ᐊᑯᓂᐅᔪᒥᒃ ᑲᒪᒋᔭᐅᔪᓄᑦ ᐃᓂᒋᔭᐅᕝᕕᒃᓴᖅ ᑲᖏᖅᖠᓂᖅ

 


ᓄᑖᖅ ᐊᑯᓂᐅᔪᒥᒃ ᑲᒪᔭᐅᔪᓄᑦ ᐃᓂᒋᔭᐅᕝᕕᒃᓴᖅ ᑲᖏᖅᖠᓂᕐᒥᑦ


ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᒻᒪᓗ ᓄᓇᓕᖕᒧᑦ ᐊᒻᒪᓗ ᒐᕙᒪᒃᑯᓐᓄᑦ ᐱᔨᑦᑎᕋᐅᔨᒃᑯᑦ ᖁᕕᐊᓱᒃᑐᑦ ᑐᓴᖅᑎᑦᑎᔪᖕᓇᕐᒪᑕ ᓄᑖᒥᒃ ᐃᒡᓗᕐᔪᐊᒃᓴᐅᑉ ᒥᒃᓵᓄᑦ ᐱᕈᖅᐸᓪᓕᐊᖏᓐᓇᐅᔭᖅᑐᖅ ᑲᒪᔭᖃᕐᓂᕐᒧᑦ ᐱᔨᑦᑎᕋᐅᑎᑉᑎᖕᓄᑦ: ᐸᕐᓇᐃᓂᖅ ᐊᒻᒪᓗ ᖃᓄᐃᑦᑑᓂᐊᕐᓂᖓ ᐱᕙᓪᓕᐊᓕᖅᑐᖅ ᓄᑖᒧᑦ, 24-ᓂᒃ ᐃᒡᓕᖃᖅᑐᒥᒃ ᐊᑯᓂᐅᔪᒥᑦ ᑲᒪᔭᐅᔪᓂᑦ ᐃᓂᒋᔭᐅᕝᕕᒃᓴᖅ ᑲᖏᖅᖠᓂᕐᒥᑦ.

2014-ᒥᑦ, ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᖃᐅᔨᓴᐃᒋᐊᓚᐅᖅᑐᑦ ᐱᔭᐅᔭᕆᐊᓕᖕᓂᒃ ᐊᑯᓂᐅᔪᒥᒃ ᑲᒪᔭᐅᔭᕆᐊᓕᖕᓄᑦ ᓄᓇᕗᒻᒥᑦ. ᐱᔭᐅᔭᕆᐊᓕᖕᓄᑦ ᖃᐅᔨᓴᐃᓂᖅ ᑕᐅᑐᒐᖃᓚᐅᖅᑐᖅ ᐊᑯᓂᐅᔪᒥᒃ ᑲᒪᔭᐅᔭᕆᐊᓖᑦ ᐃᓐᓇᕆᔭᐅᔪᓄᑦ ᐋᓐᓂᐊᖃᐃᓐᓇᐅᔭᖅᑐᓄᑦ ᐅᕝᕙᓘᓐᓃᑦ ᖃᐅᔨᒪᓂᖄᓂᓗᐊᖏᓕᖅᑐᓄᑦ ᐅᕝᕙᓘᓐᓃᑦ ᐋᓐᓂᐊᖅᑐᓄᑦ ᐃᓚᐅᑉᓗᑎᒃ ᐃᓱᒪᖏᑦᑎᒍᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐅᕝᕙᓘᓐᓃᑦ ᐊᔪᓕᕈᑎᖃᖅᓯᒪᔪᑦ ᑲᒪᒋᔭᐅᔪᓄᑦ. 

ᐱᔭᐅᔭᕆᐊᓕᖕᓄᑦ ᖃᐅᔨᓴᐃᓂᖅ ᓇᓗᓇᐃᓚᐅᖅᑐᖅ ᑲᒪᒋᔭᐅᖏᓐᓇᕐᓂᐊᕐᓗᑎᒃ ᐋᖅᑭᐅᒪᔪᖅ ᓄᓇᕗᒻᒥ ᐃᓂᖃᙱᑦᑐᖅ ᐊᒻᒪᓗ ᐱᔭᐅᔭᕆᐊᓕᖕᓄᑦ ᓄᓇᕗᒻᒥᐅᓂᑦ ᐱᑕᖃᙱᖦᖢᓂ. ᓄᓇᕗᒻᒥᐅᑦ ᑲᒪᖃᑦᑕᖅᑐᑦ ᐃᓐᓇᑐᖃᐅᔪᓂᒃ ᖃᑕᙳᑎᒋᔭᖏᓐᓂᒃ ᐊᖏᔫᔪᓂᒃ ᐱᔭᕆᐊᖃᕐᓂᖃᖅᑐᓂᒃ, ᐋᓐᓂᐊᖃᐃᓐᓇᖅᑐᓂᒃ, ᐊᔪᕈᑎᖃᖅᑐᓂᒡᓘᓐᓃᑦ, ᐊᔪᙱᓐᓂᓕᒫᖏᓐᓄᑦ ᐃᓄᖃᐅᓗᐊᖅᑐᓂᒃ ᐃᒡᓗᒥᐅᖃᑎᒌᓂᐅᒐᔪᒃᑐᒥᑦ. ᐊᖏᕐᕋᕆᔭᐅᔪᒥᑦ-
ᑲᒪᔭᖃᕐᓂᕐᒧᑦ ᐃᑲᔪᖅᑕᐅᖃᑦᑕᖅᑐᑦ ᐃᑲᔪᕈᖕᓇᖅᑐᒃᓂ ᒪᓂᒪᕝᕕᐅᒍᑎᒃ; ᑭᓯᐊᓂ, ᑲᒪᔭᖃᓕᕆᓂᖅ ᐊᑯᓂᐅᔪᖕᓇᖅᑐᖅ ᐊᒻᒪᓗ ᐱᔭᒃᓴᐅᑎᖃᒻᒪᕆᒡᓗᓂ.  ᐊᔪᕐᓇᖅᓯᔭᕌᖓᑦ ᑲᒪᔭᖃᕐᓂᖅ ᐊᖏᕐᕋᒥᑦ, ᐃᓄᐃᑦ ᖃᐅᔨᓴᖅᑕᐅᖃᑦᑕᖅᑐᑦ ᐊᒻᒪᓗ ᐅᑕᖅᑭᑉᓗᑎᒃ ᑲᒪᒋᔭᐅᓂᐊᕐᓗᑎᒃ ᓄᓇᕗᒻᒥᑦ ᐅᕝᕙᓘᓐᓃᑦ ᓄᓇᕗᑦ ᓯᓚᑖᓂᑦ.

ᑭᕙᓪᓕᕐᒥᑦ ᐱᑕᖃᕆᐊᖃᑦᑎᐊᖅᑐᖅ ᓄᑖᒥᒃ ᐊᑯᓂᐅᔪᒥᒃ ᑲᒪᒋᔭᐅᓂᐊᖅᑐᓄᑦ ᐃᒡᓕᕐᓂᑦ. ᐃᒡᓗᕐᔪᐊᖅ ᐊᒻᒪᓗ ᖃᓄᐃᑦᑑᓂᐊᕐᓂᖓᓄᑦ ᑕᑯᒃᓴᐅᑎᑦᑎᔭᕆᐊᖃᖅᑐᖅ ᐊᒻᒪᓗ ᐱᖅᑯᓯᒃᑰᖓᓗᓂ, ᐱᒻᒪᕆᐅᒋᔭᐅᔪᒃᑯᑦ, ᐊᑐᖅᓯᒪᓂᖓᒍᑦ, ᐊᒻᒪᓗ ᐱᖅᑯᓯᕆᔭᖓᑦᑎᒍᑦ ᓄᓇᕗᒻᒥᐅᑦ, ᐊᒻᒪᓗ ᐃᓅᔪᑦ. ᐋᖅᑭᐅᒪᔫᖕᒥᔪᖅ ᑐᓂᓯᑉᓗᓂ ᐃᓐᓇᕈᖅᐸᓪᓕᐊᕝᕕᐅᓂᐊᕐᓗᓂ ᐅᓗᕆᐊᓇᙱᑦᑐᒃᑯᑦ. ᐃᒡᓗᕐᔪᐊᑉ ᖃᓄᐃᑦᑑᓂᐊᕐᓂᖓ ᐊᖏᔪᒥᒃ ᓴᕆᒪᓲᑎᖃᕐᓂᒃᑰᖓᔪᒃᓴᐅᑕᐅᔪᖅ. ᐱᖅᑯᓯᖅ ᐃᓕᑕᕆᔭᐅᓯᒪᔭᕆᐊᖃᖅᑐᖅ ᐊᑕᐅᑎᒃᑯᓪᓗ ᖁᕕᐊᓲᑕᐅᓗᓂ ᑕᐃᑲᓂ ᐊᒻᒪᓗ ᐋᖅᑭᐅᒪᓂᕆᔭᖓᓂᑦ ᐃᒡᓗᕐᔪᐊᑉ ᐊᒻᒪᓗ ᖃᐅᑕᒫᑦ ᖃᓄᐃᓕᐅᖃᑦᑕᕐᓂᐊᖅᑎᓪᓗᒋᑦ. ᑕᒪᓐᓇ ᑎᑭᐅᑎᔭᐅᔪᖕᓇᖅᑐᖅ, ᐆᒃᑑᑎᒋᓗᒍ, ᐱᖅᑯᓯᒃᑯᑦ ᖃᓄᐃᓕᐅᖅᑎᑦᑎᖃᑦᑕᕐᓂᒃᑯᑦ, ᐃᓄᐃᑦ ᓂᕿᖏᓐᓂᒃ ᓂᕿᖃᖅᑎᓪᓗᒋᑦ. 

ᓄᑖᖅ ᐃᒡᓗᕐᔪᐊᖅ ᑐᓂᓯᔪᒃᓴᐅᑕᐅᔪᖅ ᑕᒪᐃᓐᓂᑦ ᑐᒡᓕᐊᓂᑦ ᐊᒻᒪᓗ ᐱᖓᓱᐊᓃᑦᑐᒥᒃ ᐃᑲᔪᖅᑕᐅᓗᑎᒃ ᐊᐃᓯᒪᕝᕕᒋᓗᒍ ᑲᒪᒋᔭᐅᓂᕐᒥᒃ ᐊᒻᒪᓗ ᓯᒪᑕᓃᖓᔪᒃᑯᑦ ᐊᒻᒪᓗ/ᐅᕝᕙᓘᓐᓃᑦ ᑕᓪᓕᒪᖓᓂᖓᔪᒥᒃ ᑲᒪᒋᔭᐅᓗᑎᒃ ᐃᓄᐃᑦ ᐃᑲᔪᖅᑕᐅᓂᖅᓴᐅᔭᕆᐊᓕᖕᓄᑦ, ᓲᕐᓗ ᐃᖅᑲᐅᒪᔪᖕᓇᓗᐊᖏᓕᖅᑐᑦ, ᑕᒪᑐᒧᙵ ᑐᕌᖓᔪᑦ ᐊᑯᓂᐅᓂᖅᓴᐅᓕᖅᐸᑦ. (ᑎᑎᕋᐅᔭᖅᓯᒪᖅ ᑕᑯᓗᒍ) ᐃᖅᑲᐅᒪᔪᖕᓇᓗᐊᖏᓐᓂᖃᓕᖅᑐᑦ ᐊᔾᔨᒌᙱᑦᑐᑦ ᐃᓄᖕᒥᑦ ᐃᓄᖕᒧᑦ, ᐊᒻᒪᓗ ᑐᕌᒐᐅᔪᖅ ᐊᔾᔨᐅᖏᑦᑐᓕᕆᓂᒃᑯᑦ ᐃᑲᔪᕐᓂᐊᕐᓗᑎᒃ ᐊᒻᒪᓗ ᑲᒪᒋᔭᐅᓗᑎᒃ ᑕᒡᕘᓈᖅᑎᓪᓗᒋᑦ ᑕᒡᕙᓂ ᐃᒡᓗᕐᔪᐊᕐᒥᑦ, ᑕᒪᑐᒧᙵ ᑐᕌᖓᔪᑦ ᐊᑯᓂᐅᓂᖅᓴᐅᓕᖅᐸᑦ. ᖃᑕᙳᑎᒋᔭᐅᔪᑦ ᐊᒻᒪᓗ ᑲᒪᔨᐅᖃᑦᑕᖅᑐᑦ ᐱᓕᕆᖃᑎᒌᖕᓂᐊᖅᑐᑦ ᐃᓚᐅᖃᑕᕐᓗᑎᒡᓗ ᖃᐅᑕᒫᒃᑯᑦ ᐃᓅᓯᕆᔭᐅᔪᓂᑦ ᐃᒡᓗᕐᔪᐊᕐᒦᑦᑐᓄᑦ ᐊᔪᕐᓇᙱᒃᑳᖓᑦ.

ᖃᑕᙳᑎᒋᔭᐅᔪᑦ ᑐᙵᓱᒃᑎᑕᐅᖃᑦᑕᕐᓂᐊᖅᑐᑦ ᐊᒻᒪᓗ ᐃᑲᔪᖅᑐᖅᑕᐅᓗᑎᒃ ᐃᓚᐅᖃᑕᐅᖃᑦᑕᕐᓂᕐᒥᒃ ᖃᑕᙳᑎᖓᑦ ᑲᑎᒪᒋᔭᐅᓂᖓᓄᑦ. ᓄᑖᑦ ᐊᑯᓂᐅᔪᒥᒃ ᑲᒪᔭᖃᕐᕕᐅᓂᐊᖅᑐᖅ ᑕᑯᒃᓴᐅᑎᑦᑎᔪᖅ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐱᓂᐊᕐᓂᕆᔭᖓᓐᓂᒃ ᑲᒪᔭᖃᑦᑎᐊᕐᓂᕐᒥᒃ ᓄᓇᕗᒻᒥᐅᓂᒃ ᐃᑲᔪᖅᑕᐅᖏᓐᓇᕆᐊᖃᖅᑐᓄᑦ ᐊᖏᕐᕋᖓᓐᓂᑦ, ᐃᑲᔪᖅᑕᐅᓗᑎᒃ ᐃᓅᓯᖃᕐᓗᑎᒃ ᐋᖅᑭᒃᑕᐅᓗᑎᒃ ᐅᕝᕙᓘᓐᓃᑦ 24/7 ᐃᑲᕐᕋᓄᑦ ᐅᑉᓗᓄᑦ ᓇᔭᙳᐊᓄᑦ ᑲᒪᒋᔭᐅᖃᑦᑕᕐᓗᑎᒃ ᐊᒻᒪᓗ ᐃᑲᔪᖅᑕᐅᖃᑦᑕᕐᓗᑎᒃ.

ᖃᓄᐃᑦᑑᓂᐊᕐᓂᖓᓄᑦ ᑐᑭᓯᐅᒪᔾᔪᑏᑦ