ᐅᖃᓚᐅᑎᓯᐅᑏᑦ

You are here

ᓄᑕᕋᓛᑦ ᓄᕙᒡᔪᐊᖅᑐᑐᑦ ᐳᕝᕕᕿᓂᖏᑦ −RSV

ᐳᕙᒃᑯᑦ ᓄᕙᒡᔪᐊᕐᓂᖅ ᐋᓐᓂᐊᕈᑕᐅᒐᔪᒃᑐᖅ ᐊᐃᑦᑐᕐᓘᑕᐅᓴᕋᐃᖦᖢᓂᓗ ᓄᓇᕐᔪᐊᓕᒫᒥ. ᓄᑕᕋᐃᑦ ᑕᒪᕐᒥᑲᓴᒃ ᒪᕐᕈᖕᓂᒃ ᐅᑭᐅᖃᓕᖅᖢᑎᒃ ᑖᔅᓱᒥᖓ ᓄᕙᓚᐅᖅᓯᒪᔪᑦ. ᐃᓛᓐᓂᑯᑦ, ᐳᕙᒃᑯᑦ ᐱᐅᔪᓐᓃᕈᑕᐅᔪᓐᓇᓲᖅ ᐊᑲᐅᙱᓕᐅᕈᑕᐅᓗᓂᓘᓐᓃᑦ, ᐱᓗᐊᖅᑐᒥ ᓄᑕᕋᓛᓂ. ᖃᓄᐃᑉᐸᓪᓕᐊᖕᒪᖔᑦ ᐅᔾᔨᖅᓱᕐᓗᒋᑦ ᐊᒻᒪ ᐋᓐᓂᐊᕕᓕᐊᕈᑎᒋᓗᒍ ᐱᐅᔪᓐᓃᖅᐸᓪᓕᐊᖏᓐᓇᖅᐸᑦ.

ᓄᕙᒡᔪᐊᖅᑐᑦ ᐃᒪᓐᓇᐃᓲᑦ

ᓄᕙᒡᔪᐊᖅᑐᑎᑐᑦ ᐋᓐᓂᐊᖅᖢᓂ ᐊᔾᔨᒋᐸᓗᖕᒪᒍ ᓄᕙᑐᐃᓐᓇᖅᑐᑎᑐᑦ, ᓲᕐᓗ:

  • ᖁᐃᖅᓱᖅᐸᒡᓗᓂ
  • ᑲᒃᑭᓕᑲᑕᒡᓗᓂ ᓯᒥᒃᓯᒪᑲᑕᒡᓗᓂᓘᓃᑦ
  • ᐃᒡᒋᐊᕐᓗᒡᓗᓂ
  • ᓯᐅᓯᕆᓗᓂ
  • ᐆᑎᕐᓇᕐᓗᓂ
  • ᐳᕙᖏᑦ ᑐᓴᖅᓴᐅᑲᑕᓕᕐᓗᑎᒃ ᐊᓂᖅᓵᓕᕌᖓᑦ
  • ᐊᓂᖅᓵᒡᒐᓕᖅᐸᒡᓗᓂ

ᓄᑕᕋᓛᑦ ᐳᕝᕕᕿᒍᑎᒃ ᓄᑭᑭᑦᑑᓂᐊᖅᐳᑦ, ᐅᐃᒻᒪᒃᓴᕋᐃᓪᓗᑎᒃ, ᕿᐊᑲᑕᒡᓗᑎᒃ, ᐊᒻᒪ ᑳᑲᑕᙱᓐᓂᖅᓴᐅᓗᑎᒃ ᐃᓕᖅᑯᓯᕐᒥᑑᖏᑦᑐᖅ. ᐃᓚᖏᑦ ᓄᑕᕋᓛᑦ ᐱᓱᒋᐅᖅᓯᒪᓕᖅᑐᓪᓘᓐᓃᑦ ᖃᓂᒪᓂᖅᓴᐅᔪᓐᓇᖅᐳᑦ, ᓲᕐᓗ ᐊᓂᖅᓴᑦᑎᐊᑲᑕᒍᓐᓃᕐᓗᑎᒃ, ᐋᓐᓂᐊᕐᕕᖕᒥ ᐃᖢᐊᖅᓴᖅᑕᐅᔭᕆᐊᖃᓕᕐᓗᑎᒃ.

ᓄᑕᕋᓛᑦ ᖃᓄᐃᑉᐸᓪᓕᐊᖕᒪᖔᑦ ᖃᐅᔨᓴᑦᑎᐊᖅᐸᒡᓗᒍ. ᐋᓐᓂᐊᓕᖅᐸᓪᓕᐊᑐᐃᓐᓇᖅᐸᑦ, ᐋᓐᓂᐅᓯᐅᖅᑎᒧᑦ ᑕᑯᔭᐅᔭᕆᐊᖃᖅᐳᖅ.

ᓄᑕᕋᓛᕐᒥᒃ ᓄᑕᖅᑲᒥᒡᓘᓃᑦ ᐳᕝᕕᕿᔪᖃᖅᑎᓪᓗᒍ ᐳᕙᖏᑦ ᑐᓴᖅᓴᐅᒃᐸᑎᒃ ᐊᓂᖅᓵᒡᒐᓕᖅᐸᓪᓘᓐᓃᑦ, ᐋᓐᓂᐊᕕᖕᒧᑦ ᐅᖄᓚᓗᑎᑦ ᐅᐸᒡᓗᒋᓪᓘᓃᑦ.

ᖁᐊᖅᓵᕐᓇᕈᓐᓃᕋᓱᐊᕐᓂᖅ

ᐳᕝᕕᕿᓂᖅ ᐊᐃᑦᑐᕐᓘᑕᐅᔪᓐᓇᖅᑐᖅ, ᑕᐃᒫᑦᑎᐊᖅ ᓄᕙᒃᑐᑎᑐᑦ. ᐅᓗᕆᐊᓇᖅᑐᖅ ᒥᒃᖠᕚᓪᓕᖅᑎᑦᑐᓇᕆᕗᖅ ᐊᓯᖔᖓᒍᑦ:

  • ᐊᒡᒐᑎᑦ ᐅᐊᓴᖅᐸᒡᓗᒋᑦ ᐅᐊᓴᒐᔪᒡᓗᒋᓪᓗ, ᐱᓗᐊᖅᑐᒥ ᐃᓄᒋᐊᒃᑐᓃᑲᑕᒃᑯᕕᑦ, ᐃᓄᒋᐊᓂ ᐊᐃᑦᑐᕐᓗᐃᓐᓇᕐᓂᖅᓴᐅᖕᒪᑦ.
  • ᐊᒡᒐᑎᑦ ᐅᐊᓴᐃᓐᓇᐅᔭᕐᓗᒋᑦ ᓄᑕᕋᓛᒥᒃ ᑎᒍᓯᓂᐊᕌᖓᕕᑦ ᐊᒫᒪᒃᑎᑦᑎᓂᐊᕌᖓᕕᓪᓘᓃᑦ.
  • ᓄᑕᕋᓛᕆᔭᐅᔪᒥᒃ ᑎᒍᓯᕙᙱᓪᓗᑎᑦ ᖃᓂᒪᑎᓪᓗᑎᑦ.
  • ᑕᒋᐅᒃᓴᓕᕌᖓᕕᑦ ᖁᐃᖅᓱᓕᕌᖓᕕᓪᓘᓃᑦ ᑕᓕᕐᓄᑦ ᒪᑐᐊᖅᐸᒡᓗᑎᑦ.
  • ᓯᒡᒐᓕᐊᖅᑐᙱᓐᓂᓴᐅᓗᑎᑦ ᓄᖃᕐᓗᑎᓪᓘᓐᓃᑦ. ᓄᑕᕋᓛᑦ ᓄᑕᖅᑲᐃᓪᓗ ᓱᒡᒐᓕᐊᑉ ᐳᔪᖓᓂᒃ ᓂᐅᖅᓯᑎᑦᑕᐃᓕᒪᓗᒋᑦ. ᓱᐴᖅᑐᖅᐸᙱᓪᓗᑎᑦ ᐊᒫᕐᓂᕐᓂᑦ.
  • ᕿᑐᕐᖓᕕᑦ ᑲᐴᑎᖏᑦ ᐊᖑᒻᒪᑎᒐᓗᐊᕐᒪᖔᑕ ᐊᒻᒪ ᐊᒥᒐᙱᒃᑲᓗᐊᕐᒪᖔᑕ ᖃᐅᔨᒋᐊᕐᓗᑎᑦ.
  • ᐊᓈᓇᒥ ᐊᒫᒪᑲᑕᒡᓗᓂ ᐱᐅᓂᖅᓴᐅᔪᖅ ᖁᐱᕐᕈᕐᓂᒃ ᓴᐳᑎᔪᓐᓇᕐᓂᖅᓴᐅᓂᐊᕐᒪᑦ ᐳᕝᕕᕿᔪᑯᓗᒃ.
  • ᐃᓚᖏᓐᓄᑦ ᓄᑕᕋᓛᓄᑦ ᐊᓐᓇᐅᒪᔾᔪᑎᖃᙱᓐᓂᖅᓴᓄᑦ, ᑲᐴᑎᑕᖃᖅᑐᖅ ᐊᑎᓕᖕᒥᒃ ᓯᓇᒋᔅ® ᓴᐳᔾᔨᔪᓐᓇᖅᖢᓂ ᐳᕝᕕᕿᓕᖅᑕᐃᓕᓂᕐᒥᒃ. ᓲᕐᓗ ᐆᒃᑑᑎᒋᓗᒍ, ᓄᑕᕋᓛᖅ ᐃᓄᕐᓗᓂ ᐃᓅᓵᓕᓚᐅᕐᓂᕈᓂ, ᐋᓐᓂᐊᓯᐅᖅᑎᒧᑦ ᑲᐱᔭᐅᖁᔭᐅᓇᔭᖅᑐᒃᓴᐅᔪᖅ ᓴᐳᑎᒋᔪᓐᓇᕐᓂᐊᕐᒪᒍ ᐳᕝᕕᕿᓂᕐᒥᒃ. ᓯᓇᒋᔅ® ᑕᖅᑭᑕᒫᖅ ᑲᐱᔭᐅᔾᔪᑎᒋᔭᐅᓲᖅ ᐳᕝᕕᕿᓐᓇᐅᓂᖓᓂ ᐃᓚᖏᓐᓄᑦ ᓄᑕᕋᓛᓄᑦ. ᐋᓐᓂᐊᓯᐅᖅᑎᒋᔭᓯ ᓄᓇᔅᓯᓐᓂ ᐊᐱᖅᓱᕐᓗᒍ ᓯᓇᒋᔅ® ᒥᒃᓵᓄᑦ ᑐᑭᓯᒋᐊᒃᑲᓂᕈᓐᓇᖅᐳᑎᑦ.

ᒪᒥᓴᐃᓂᖅ ᐳᕝᕕᕿᔪᒥᒃ

ᐳᕝᕕᕿᓂᖅ ᐃᒻᒥᓂ ᐊᓂᒍᕐᓂᒃᑯᑦ ᒪᒥᓲᖑᔪᖅ. ᓄᑕᕋᕐᒥᒃ ᐳᕝᕕᕿᔪᖃᖅᐸᑦ, ᐃᒪᓐᓇ ᐱᔪᓐᓇᖅᐳᑎᑦ:

  • ᐊᑭᓯᖅᑯᖅᑐᑎᓪᓗᒍ ᓂᐊᖁᖓ ᒪᑭᑕᔾᔫᒥᓂᐊᕐᒪᑦ ᑕᐃᒫᒃ ᐊᓂᖅᑎᕆᔪᓐᓇᕐᓂᖅᓴᐅᓂᐊᕐᒪᑦ ᓯᓂᑦᑎᐊᕐᓂᖅᓴᐅᓗᓂᓗ.
  • ᓂᐅᖅᑲᐃᓐᓇᖁᓗᒋᑦ ᓂᒡᓕᓇᖅᑐᓂᒃ. ᓄᑕᖅᑲᑦ ᐊᖏᓂᖅᓴᐃᑦ ᐃᒥᑲᑕᒍᓐᓇᖅᑐᑦ ᐃᒥᑐᐃᓐᓇᕐᒥ (ᐆᓇᖅᑐᒥᒃ ᓂᒡᓕᓇᖅᑐᒥᓪᓘᓐᓃᑦ, ᑏ, ᖃᔪᕐᓂᓪᓗ. ᓄᑕᕋᓛᑦ ᐊᓈᓇᒥᖕᓂᒃ ᐊᒫᒪᖃᑦᑕᐃᓐᓇᓪᓗᐊᖅᑐᑦ ᐅᕝᕙᓘᓃᑦ ᓄᑕᕋᓛᖅᓯᐅᒻᒥᒃ ᐊᒫᒪᒃᐸᒡᓗᑎᒃ.
  • ᐃᒡᓗᐃᑦ ᕿᐅᒃᑲᖓᑎᔾᔫᒥᓗᒍ. ᕿᐅᒃᑲᖓᔾᔪᑎᒥᒃ ᓄᑕᕋᓛᑉ ᐃᒡᓗᕈᓯᐊᓃᑎᑦᑎᔪᓐᓇᕆᕗᑎᑦ ᐊᓂᖅᑎᕆᑦᑎᐊᖁᓪᓗᒍ.
  • ᐱᔭᕆᐊᖃᖅᐸᑦ, ᓄᑕᕋᖅᓯᐅᑎᒥᒃ ᓂᐊᖁᖅᓯᐅᑎᑐᖅᑎᓪᓗᒍ (ᓲᕐᓗ ᑕᐃᓚᓈᓪ) ᐋᓐᓂᐊᓗᐊᔾᔭᐃᒃᑯᑎᒋᓂᐊᕐᒪᒍ. ᒪᓕᑦᑎᐊᖅᐸᓗᒋᑦ ᓇᓗᓇᐃᔭᐃᔾᔪᑏᑦ. ᐄᔭᒃᑲᑦ ᐊᒃᑐᐃᓂᖃᕈᓐᓇᕐᒪᑕ ᐱᓗᐊᕐᓗᒋᑦ.
  • ᓂᐊᖁᖅᓯᐅᒻᒥᒃ (ᐋᔅᐳᕆᓐ) 20−ᐅᑉ ᑐᖔᓂᑦ ᐅᑭᐅᓕᖕᓄᑦ ᐱᑎᑦᑎᑕᐃᓕᓗᑎᑦ. ᐊᒃᑐᐊᓂᖃᕐᒪᑦ Reye syndrome, ᐋᓐᓂᐊᓕᕐᔪᐊᖑᔪᖅ ᑎᖑᖕᒧᑦ ᖃᕋᓴᒧᓪᓗ ᐊᒃᑐᐃᓂᖃᖅᑐᖅ.
  • ᓄᑕᕋᓛᕆᔭᐃᑦ ᑕᖅᑮᑦ 6 ᑐᖔᓃᐸᑦ, ᐅᔾᔨᖅᓱᑦᑎᐊᕐᓗᒍ ᖃᐅᔨᒪᐃᓐᓇᕐᓗᒍᓗ. ᐋᓐᓂᐊᓕᖅᐸᓪᓕᐊᑐᐃᓐᓇᖅᐸᑦ, ᐋᓐᓂᐅᓯᐅᖅᑎᒧᑦ ᑕᑯᔭᐅᔭᕆᐊᖃᖅᐳᖅ.
  • ᓄᑕᕋᓛᕐᒥᒃ ᓄᑕᖅᑲᒥᒡᓘᓃᑦ ᐳᕝᕕᕿᔪᖃᖅᑎᓪᓗᒍ ᐳᕙᖏᑦ ᑐᓴᖅᓴᐅᒃᐸᑎᒃ ᐊᓂᖅᓵᒡᒐᓕᖅᐸᓪᓘᓐᓃᑦ, ᐋᓐᓂᐊᕕᖕᒧᑦ ᐅᖄᓚᓗᑎᑦ ᐅᐸᒡᓗᒋᓪᓘᓃᑦ.

ᖃᖓᑦᑎᐊᓕᓴᐃᑦ ᑐᓴᖅᑕᐅᔪᒃᓴᐃᑦ

  • ᐊᐱᖅᑯᑎᒃᓴᖃᕈᓘᔭᖃᑦᑕᕐᒪᑕ ᖃᖓᑦᑎᐊᖅ ᓄᓇᕗᒻᒥ ᓄᑕᕋᓛᑦ ᓄᕙᒡᔪᐊᖅᐸᒃᑐᑦ ᐳᕝᕕᕿᓂᖅ ᐱᔾᔪᑎᒋᓪᓗᒍ. ᑖᒃᑯᐊ ᐅᖃᐅᓯᐅᖃᑦᑕᖅᑐᑦ ᐱᕕᒡᔪᐊᕆᖃᑦᑕᖅᐸᕗᑦ.
  • ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔪᒪᓪᓚᕆᒃᐳᑦ ᓄᑕᖅᑲᑦ ᖃᓄᐃᙱᑦᑎᐊᖁᓪᓗᒋᑦ ᐃᓅᓯᖃᑦᑎᐊᖁᓪᓗᒋᓪᓗ ᓄᓇᕗᒻᒥ.
  • ᓯᓇᒋᔅ® ᓄᑕᖅᑲᓄᑦ ᑲᐴᑕᐅᒐᔪᙱᑦᑐᖅ. ᑕᖅᑭᑕᒫᑦ ᑲᐱᔭᐅᔾᔪᑎᒋᔭᐅᓲᖅ ᑐᑭᓯᐅᒫᓂᑦᑎᐊᙱᖦᖢᑎᒡᓗ ᖃᓄᖅ ᐊᑑᑎᖃᖅᑎᒋᖕᒪᖔᑦ.
  • ᐃᓱᒫᓘᑎᖃᖅᐳᒍᑦ ᐱᐊᓂᒃᓯᒪᙱᑦᑐᓂᑦ ᑕᒻᒪᖅᓯᒪᔪᓂᓪᓗ ᑐᑭᓯᒋᐊᕈᑎᒃᓴᓂᑦ ᑕᒪᑐᒥᖓ ᐱᔾᔪᑎᖃᖅᑐᓂᒃ ᑐᓂᐅᖅᑲᐅᑕᐅᔪᖃᑐᐃᓐᓇᕆᐊᖃᕐᒪᑦ ᒫᓐᓇ. 
  • ᓄᓇᕗᒻᒥ ᓯᓇᒋᔅ® ᐱᓕᕆᐊᖑᕙᒃᑐᖅ ᐊᕐᕌᒍᓄᑦ ᐅᓄᖅᑐᓄᑦ ᓴᖅᑭᓯᒪᓕᖅᐳᖅ ᒪᓕᒃᖢᓂᓗ ᐱᐅᓛᓂᒃ ᐊᑐᐃᓐᓇᐅᔪᓂᑦ ᓇᓗᓇᐃᕈᑎᒃᓴᓂᒃ ᒪᓕᒐᒃᓴᖏᓐᓂᓪᓗ ᑕᒪᑐᒥᖓ ᐱᔾᔪᑎᖃᖅᑐᓂᒃ. ᐊᕐᕌᒍᑕᒫ ᕿᒥᕐᕈᔭᐅᖃᑦᑕᖅᐳᖅ ᐊᑐᕈᒥᓇᕐᓂᖅᐹᓂᒃ ᒪᓕᑦᑎᐊᖁᓪᓗᒍ.

ᐱᐅᓛᒥᒃ ᐊᑐᖅᑕᐅᔪᓐᓇᖅᑐᒥᒃ ᑖᒃᑯᓄᖓ ᐱᓕᕆᐊᖑᔪᓄᑦ ᓱᓕ ᖃᐅᔨᓴᖅᐳᑦ ᐱᓕᕆᖃᑎᒌᒃᑐᓪᓗ ᒪᓕᑦᑎᐊᕋᓱᒃᐳᑦ ᖃᐅᔨᓴᖅᑕᐅᓇᓱᒃᑐᓂᑦ.