ᐅᖃᓚᐅᑎᓯᐅᑏᑦ

You are here

ᕿᑭᖅᑖᓗᒻᒥᑦ ᑐᑦᑐᓕᕆᓂᕐᒧᑦ ᑲᑎᒪᓂᖅ

ᔪᓚᐃ 18, 2013

ᑐᓴᒐᑦᓴᖅ ᓴᖅᑭᑕᖅ

ᓴᖅᑭᑕᐅᑲᐅᑎᒋᔭᕆᐊᓕᒃ

ᕿᑭᖅᑖᓗᒻᒥᑦ ᑐᑦᑐᓕᕆᓂᕐᒧᑦ ᑲᑎᒪᓂᖅ

ᐃᖃᓗᐃᑦ, ᓄᓇᕗᑦ (ᔪᓚᐃ 18, 2013) – ᓄᓇᕗᑦ ᒐᕙᒪᒃᑯᖏᑦ ᐊᕙᑎᓕᕆᔨᒃᑯᑦ ᐱᓕᕆᕝᕕᖓ ᐊᒻᒪ ᐆᒪᔪᓕᕆᔨᓂᕐᒧᑦ ᐊᐅᓚᑦᓯᔨᐅᖃᑎᒌᑦᑐᑦ ᐱᓕᕆᖃᑎᒌᓪᓗᑎᑦ ᕿᑭᖅᑖᓗᒻᒥᐅᑦ ᑲᑎᓛᖅᑐᑦ ᐃᖃᓗᓐᓂ ᔪᓚᐃ 23ᒥᑦ 24ᒧᑦ, 2013 ᐅᖃᓪᓚᖃᑎᖃᕐᓂᕐᒧᑦ ᕿᑭᖅᑖᓘᑉ ᑐᑦᑐᖏᑦ ᖃᓄᐃᓕᖓᓕᕐᓂᖏᓐᓄᑦ.

"ᕿᑭᖅᑖᓗᒻᒥᑦ ᑐᑦᑐᓕᕆᓂᕐᒧᑦ ᑲᑎᒪᓂᖅ ᐱᓕᕆᓂᐅᒻᒪᑦ ᒪᑐᐃᖓᔪᒃᑯᑦ ᐅᖃᓪᓚᓐᓂᕐᒥᑦ ᐊᒻᒪ ᐱᓕᕆᖃᑎᖃᕐᓂᒃᑯᑦ ᑲᔪᓯᓂᖃᕐᓂᕐᒥᑦ ᐃᑲᔪᖃᑎᒌᓐᓂᒃᑯᑦ ᑐᑦᑐᓂᑦ ᐊᐅᓚᑦᓯᖃᑎᖃᕐᓂᕐᒥᑦ," ᐅᖃᖅᑐᖅ ᓂᕈᐊᖅᑕᐅᓯᒪᔪᖅ ᔭᐃᒥᓯ ᐋᕆᐊᒃ, ᒥᓂᔅᑕᕆᔭᐅᔪᖅ ᐊᕙᑎᓕᕆᔨᒃᑯᓐᓄᑦ. "ᐱᓕᕆᖃᑎᒋᓗᑎᒍ ᐊᐅᓚᑦᓯᔨᐅᖃᑎᒋᔭᕗᑦ, ᐅᑉᐱᕈᓱᑉᐳᖓ ᖃᓄᖅᑑᕈᑎᑦᓴᑦᑎᐊᕙᓐᓂᒃ ᑎᑭᐅᑎᓂᐊᖅᑐᒍᑦ ᐃᑲᔪᕈᒪᓂᕐᒧᑦ ᑲᔪᓯᓂᖃᖅᑐᒥᑦ ᐱᐅᖅᓱᐊᕐᓂᕐᒥᑦ ᐊᒻᒪ ᐅᖓᓯᑦᑐᒧᑦ ᑲᒪᑦᑎᐊᓂᕐᒥᑦ ᕿᑭᖅᑖᓘᑉ ᑐᑦᑐᖏᓐᓂᒃ."

ᐊᕙᑎᓕᕆᔨᒃᑯᑦ ᐊᒥᓱᓂᑦ ᓄᓇᓕᓐᓂ ᑲᑎᒪᑎᑦᓯᖃᑦᑕᓚᐅᖅᑐᑦ 2011ᒥᑦ ᐊᒻᒪ 2012ᒥᑦ ᕿᑭᖅᑖᓘᑉ ᓄᓇᓕᓕᒫᖏᓐᓂ. ᐊᒥᓱᑦ ᓄᓇᓕᓐᓂ ᑲᑎᒪᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑐᑦᑐᐃᑦ ᐊᒥᓲᓂᖏᑦ ᕿᑭᖅᑖᓗᒻᒥ ᐊᒥᓲᙱᓂᖅᓴᐅᓕᖅᑐᑦ. ᖃᖓᑕᓲᒃᑯᑦ ᖃᐅᔨᓴᕐᓂᐅᓚᐅᖅᑐᖅ ᕿᑭᖅᑖᓘᑉ ᓂᒋᐊᓂ ᑐᑦᑐᐃᑦ ᐊᒥᓲᓐᓂᖏᓐᓂᒃ ᐱᔭᕇᖅᑕᐅᓚᐅᖅᑐᖅ ᐅᐱᕐᖔᑦᓴᒥᑦ 2012ᒥᑦ. ᖃᐅᔨᓴᖅᑕᐅᔾᔪᑎᒥᓃᑦ ᓇᓗᓇᐃᖅᓯᓚᐅᖅᑐᑦ ᑐᑦᑐᐃᑦ ᐊᒥᓲᓗᐊᕈᓐᓃᖅᑐᒻᒪᕆᐅᓕᖅᑐᑦ.

ᕿᑭᖅᑖᓗᒻᒥ ᑐᑦᑐᓕᕆᓂᕐᒧᑦ ᑲᑎᒪᓂᖅ ᕿᒥᕐᕈᓂᐊᖅᑐᑦ ᖃᐅᔨᓴᖅᑕᐅᔾᔪᑎᒥᓂᕐᓂᒃ ᐊᒻᒪᓗ ᐃᓱᒫᓘᑎᒋᔭᐅᔪᓂᒃ ᕿᑭᖅᑖᓘᑉ ᓄᓇᓕᖏᓐᓂᒃ ᐊᕐᕌᒍᒐᓚᓐᓂᒃ ᐊᑐᖅᓯᒪᓕᖅᑐᓂᒃ. ᐱᐅᖅᓱᐊᕐᓂᕐᒨᖓᑐᐃᓐᓇᕆᐊᓖᑦ ᐊᑐᕈᓐᓇᖅᑐᑦ ᕿᑭᖅᑖᓘᑉ ᑐᑦᑐᖏᓐᓄᑦ ᖃᐅᔨᔭᐅᓇᓱᓐᓂᐊᖅᑐᑦ ᑲᑎᒪᓂᐅᔪᒥᑦ, ᐊᒻᒪ ᕿᓚᒥᑯᓗᒃ ᐅᖓᓯᑦᑐᒧᓪᓗ ᑲᒪᑦᓯᐊᕐᓂᕐᒧᑦ ᖃᓄᐃᓕᐅᕈᑎᑦᓴᓂᒃ ᐅᖃᓪᓚᓐᓂᐊᕐᒥᔪᑦ.

ᑲᑎᒪᒋᐊᖁᔭᐅᓯᒪᔪᑦ ᕿᑭᖅᑖᓘᑉ ᓄᓇᓕᓕᒫᖏᓐᓂᒃ, ᓄᓇᕗᑦ ᑐᙵᕕᒃᑯᓐᓂ, ᕿᑭᖅᑖᓗᒃ ᐆᒪᔪᓕᕆᔨᕐᔪᐊᒃᑯᖏᓐᓂ, ᐊᕙᑎᓕᕆᔨᒃᑯᑦ ᐃᓐᓇᐃᑦ ᐅᖃᐅᔾᔨᖅᓱᐃᔩᑦ ᑲᑎᒪᔨᕋᓛᖏᑦ, ᐊᓯᖏᓪᓗ ᐱᓕᕆᖃᑎᖃᖅᑐᑦ ᑲᑐᔾᔨᖃᑎᒌᑦ.

###

ᑕᐃᓗᕐ ᕌᔅ

ᑐᓴᒐᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ ᐊᕙᑎᓕᕆᔨᒃᑯᑦ

867-975-7720

tross1@gov.nu.ca