ᐅᖃᓚᐅᑎᓯᐅᑏᑦ

You are here

ᐊᕐᕕᐊᕐᒥᐅᑕᖅ ᒪᒃᑯᒃᑐᖅ ᐱᕗᖅ ᐱᐅᔪᒻᒪᕆᐊᓗᖕᒥᒃ ᐃᓕᓐᓂᐊᕈᑎᒋᓂᐊᖅᑕᖓᓂᒃ

ᒪᐃ 28, 2013

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᓴᖅᑭᑎᑕᐅᓯᑲᐅᑎᒋᔭᕆᐊᓕᒃ

ᐊᕐᕕᐊᕐᒥᐅᑕᖅ ᒪᒃᑯᒃᑐᖅ ᐱᕗᖅ ᐱᐅᔪᒻᒪᕆᐊᓗᖕᒥᒃ ᐃᓕᓐᓂᐊᕈᑎᒋᓂᐊᖅᑕᖓᓂᒃ

ᐃᖃᓗᐃᑦ, ᓄᓇᕗᑦ (ᒪᐃ 28, 2013) – ᐃᓅᓵᕐ ᔮᓐ ᐃᓴᑭᐊᖅ, ᐊᔪᙱᓐᓂᖃᖅᖢᓂ 12-ᓂᒃ ᐃᓕᓐᓂᐊᖅᑎ ᐅᕙᙶᖅᖢᓂ, ᔮᓐ ᐊᕐᓈᓗᒡᔪᐊᖅ ᐊᖓᔪᖅᖠᕐᓄᑦ ᐃᓕᓐᓂᐊᕐᕕᖕᒥ ᐊᕐᕕᐊᕐᒥ, ᑕᐃᔭᐅᓯᒪᕗᖅ ᐱᑎᑕᐅᔪᒃᓴᐅᑕᐅᓪᓗᓂ 2013-ᒥ TD ᐃᓕᓐᓂᐊᕈᑎᒋᓂᐊᖅᑕᖓᓂᒃ ᓄᓇᓕᖕᓂ ᓯᕗᓕᖅᑎᐅᓂᕐᒧᑦ, ᑖᓐᓇ ᑲᓇᑕᒥᐅᓂ ᖁᑦᑎᖕᓂᖅᐹᒦᖃᑕᐅᓪᓗᓂ ᐃᓕᓐᓂᐊᕈᑕᐅᖃᑦᑕᕐᓂᐊᖅᑐᓄᑦ ᑐᓐᓂᖅᑯᑕᐅᕙᒃᑐᓄᑦ.

"ᐃᓅᓵᕐ ᖁᙱᐊᖅᑎᑦᑎᔨᐅᕗᖅ, ᐊᔪᙱᓐᓂᖃᑦᑎᐊᖅᖢᓂ ᒪᒃᑯᒃᖢᓂ ᐱᓕᕆᔨᐅᓪᓗᓂ ᐊᑭᓕᖅᓱᖅᑕᐅᓇᓂᓗ ᐱᓕᕆᐊᖃᖅᐸᒃᖢᓂ ᓄᓇᒥᓂ," ᑕᐃᒪᓐᓇ ᒥᓂᔅᑕᕆᔭᐅᔪᖅ ᐃᓕᓐᓂᐊᕐᓂᓕᕆᓂᕐᒧᑦ, ᓯᕗᓕᖅᑎ ᐄᕙ ᐋᕆᐊᒃ ᐅᖃᖅᖢᓂ. "ᐱᓕᕆᐊᖃᒻᒪᕆᒍᒪᕙᖕᓂᖓ ᓯᕗᓕᖅᑎᐅᕙᖕᓂᖓᓗ ᑲᒪᒋᔭᖃᖅᖢᓂ ᐃᓱᒪᒋᔭᒃᓴᓂᒃ ᓲᕐᓗ ᐃᓕᓐᓂᐊᕐᕕᖕᓂ ᓲᖑᓴᒃᑐᖃᖅᐸᖕᓂᖓᓄᑦ, ᐃᒻᒥᓃᖅᑐᖃᖅᐸᖕᓂᖓᓄᑦ ᐱᒻᒪᕆᐊᓘᓂᖓᓄᓪᓗ ᐃᓕᓐᓂᐊᕐᕕᖕᒦᖏᓐᓇᕐᓂᖅ ᐊᑐᕐᓂᕐᒥᓄᑦ ᖁᙱᐊᖅᑕᐅᑎᑦᑎᕙᖕᓂᕐᒥᒃ, ᖁᙱᐊᖅᑎᑦᑎᕙᖕᓂᕐᒧᑦ ᐱᓕᕆᐊᖑᕙᒃᑐᓂᒃ ᕿᓪᓕᖅᑐᓄᓪᓗ ᐱᓕᕆᔾᔪᑕᐅᕙᒃᑐᓄᑦ ᐃᓕᓴᕆᔭᐅᔭᕆᐊᖃᖅᐳᑦ ᐱᒃᑯᒋᑦᑎᐊᖅᖢᑎᒍᓪᓗ ᑲᔪᓯᑎᖃᑦᑕᖅᓯᒪᔭᖏᑦ."

ᑖᓐᓇ TD ᐃᓕᓐᓂᐊᕈᑕᐅᖃᑦᑕᕐᓂᐊᖅᑐᓂᒃ ᓄᓇᓕᖕᓂ ᓯᕗᓕᖅᑎᐅᓂᕐᒧᑦ ᐋᖅᑭᒃᓯᒪᓕᖅᑎᑕᐅᓚᐅᖅᓯᒪᕗᖅ 1995-ᖑᑎᓪᓗᒍ. ᐊᕐᕌᒍᑕᒫᑦ 20-ᓄᑦ ᑎᑭᓪᓗᒍ ᐃᓕᓐᓂᐊᖅᑏᑦ ᑭᖑᓪᓕᖅᐹᒥᒃ ᐊᕐᕌᒍᒥᒃ ᐱᓕᕆᔪᑦ ᖁᑦᑎᒃᑐᒥᐅᓂᖅᓴᖅ ᐃᓕᓐᓂᐊᕐᕕᖕᒥ ᑕᑯᒃᓴᐅᑎᑦᑎᓯᒪᔪᑦ ᓯᕗᓕᖅᑎᐅᔪᓐᓇᕐᓂᕐᒥᒃ ᐱᐅᓯᒋᐊᖅᑎᑦᑎᓂᕐᓗᑎᒃ ᓄᓇᒥᓂᒃ ᐱᒃᑯᒋᔭᐅᓪᓗᑎᒃ ᑐᓂᔭᐅᕙᒃᐳᑦ ᑖᔅᓱᒥᖓ ᐃᓕᓐᓂᐊᕈᑕᐅᓂᐊᖅᑐᓂᒃ. ᐊᑐᓂᒃ ᑐᓐᓂᖅᑯᑕᐅᔪᑦ ᐊᑭᖃᖅᑎᒋᕙᒃᐳᑦ $70,000-ᓄᑦ ᑎᑭᓪᓗᒍ ᐃᓚᖃᖅᖢᓂᓗ $10,000-ᓄᑦ ᑎᑭᓪᓗᒍ ᐃᓕᓐᓂᐊᕐᓂᕐᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ ᐊᕐᕌᒍᒧᑦ $7,500-ᓂᒡᓗ ᐊᕐᕌᒍᒧᑦ ᐆᒪᓂᕐᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ.

ᑕᒪᑐᒪᓂ ᐊᕐᕌᒍᒥ ᐱᑎᑕᐅᔪᑦ ᐅᖃᐅᓯᖃᖅᓯᒪᕗᑦ ᖃᔅᓯᑲᓪᓚᖕᓂᒃ ᐊᔾᔨᒌᙱᕈᓘᔭᖅᑐᓂᒃ ᐃᓱᒪᒋᔭᒃᓴᓂᒃ ᐃᓚᒋᔭᐅᓪᓗᑎᒃ ᐊᕙᑎᓕᕆᓂᖅ, ᐃᓕᓐᓂᐊᕐᕕᖕᒥ ᓲᖑᓴᒃᑐᖃᖅᐸᖕᓂᖅ, ᑭᓲᓂᕐᒧᑦ ᓇᓕᒧᒃᓱᖅᑎᑦᑎᓂᕐᒥᒃ ᐃᓕᓐᓂᐊᕐᐸᖕᓂᕐᒧᓪᓗ ᐊᑐᐊᒐᓂᒃ ᐋᖅᑭᒃᓱᐃᕙᓪᓕᐊᓂᕐᒧᑦ. ᐃᓴᑭᐊᖅ ᐃᓕᓴᕆᔭᐅᕗᖅ ᐱᓕᕆᖃᑦᑕᖅᓯᒪᓂᖓᓄᑦ ᐃᓕᓐᓂᐊᕐᕕᕐᒧᑦ ᓄᓇᓕᖕᒥᐅᓄᓪᓗ ᐱᓕᕆᐊᖑᕙᒃᑐᓄᑦ ᓲᕐᓗ, ᐊᕐᕕᐊᒥ ᓯᕗᓕᖅᑎᐅᓂᕐᒧᑦ ᐊᓯᔾᔨᖅᐸᓪᓕᐊᑦᑎᐊᕈᓐᓇᕐᓂᕐᒧᓪᓗ ᐱᓕᕆᐊᖑᕙᒃᑐᒧᑦ, ᐆᒧᖓᓗ, ᔮᓐ ᐊᕐᓈᓗᒡᔪᐊᖅ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥ ᖁᙱᐊᖅᑕᐅᑎᑦᑎᕙᖕᓂᕐᒧᑦ ᐱᓕᕆᖃᑎᒌᒃᐸᒃᑐᓄᑦ ᐊᕐᑯᐊᕐᒥᓗ ᐊᔾᔨᓕᐅᕆᕙᖕᓂᕐᒧᑦ ᓱᓴᐃᐊᑎᒋᔭᐅᔪᒧᑦ.

"ᖁᔭᓐᓇᒦᖅᐸᕗᑦ ᐅᑯᐊ, Toronto Dominion Bank of Canada ᐃᓕᓴᖅᓯᓂᖏᓐᓄᑦ ᐃᓅᓵᕐᒥᒃ ᑕᒪᓱᒪᓂ ᐊᕐᕌᒍᒥ ᖁᑦᑎᖕᓂᖅᐹᖑᖃᑕᐅᓪᓗᓂ 20-ᓃᖃᑕᐅᓪᓗᓂ TD-ᒧᑦ ᐃᓕᓐᓂᐊᕈᑎᒃᓴᖅᑖᖅᑎᑕᐅᓪᓗᓂ ᑕᒪᕐᒥᑦᑎᐊᕐᓗ ᖁᕕᐊᓱᖃᑎᒋᕙᕗᑦ ᑕᒪᑐᒪᓂ ᐊᕐᕌᒍᒥ ᐱᑎᑕᐅᓚᐅᖅᑐᓕᒫᑦ," ᑕᐃᒪᓐᓇ ᐋᕆᐊᒃ ᐅᖃᖅᖢᓂ.

ᑖᓐᓇ ᑐᓐᓂᖅᑯᓯᐊᖑᔪᖅ ᑐᓂᔭᐅᓪᓚᕆᓕᓛᖅᐳᖅ ᐅᕙᓂ, TD-ᑯᑦ ᐃᓕᓐᓂᐊᕈᑎᒃᓴᓄᑦ ᐱᑎᑦᑎᕙᖕᓂᕆᔭᖓᓂ ᓄᓇᓕᖕᓄᑦ ᓯᕗᓕᖅᑎᐅᓂᕐᒧᑦ ᑲᓇᑕᓕᒫᒥ ᑐᓐᓂᖅᑯᑕᐅᕙᒃᑐᓄᑦ ᖁᕕᐊᓱᖃᑎᒌᖕᓂᕐᒥ ᕿᑎᖅᑰᑕᐅᓕᖅᐸᑦ, ᔫᓂ 6, 2013-ᒥ, ᐅᕙᓂ, Art Gallery of Ontario ᑐᕌᓐᑐᒥ.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᐅᐃᓐᑎ ᕼᐋᓗᓂᓐ ᑐᓴᐅᒪᑎᑦᑎᓂᕐᒧᑦ ᐊᐅᓚᑦᑎᔨ

ᐃᓕᓐᓂᐊᕐᓂᓕᕆᔨᒃᑯᑦ

867-975-5667

whalonenedu2@gov.nu.ca