ᐅᖃᓚᐅᑎᓯᐅᑏᑦ

You are here

ᐃᖃᓗᐃᑦ ᓄᓇᕐᔪᐊᒥ ᖃᖓᑕᔫᒃᑯᕕᒃ ᓴᓇᔭᐅᒋᐊᓛᕐᓂᖓᓄᑦ ᐱᓕᕆᐊᖅ ᓯᕗᒧᒋᐊᕈᑕᐅᔪᖅ ᐊᑎᓕᐅᖅᑕᐅᓪᓗᓂ ᑳᓐᑐᕋ

ᓯᑎᐱᕆ 17, 2013

ᐱᕙᓪᓕᐊᔪᑦ ᑐᓴᕋᑦᓴᑦ

ᓴᖅᑭᖅᑎᑕᐅᑦᓴᐅᑎᒋᒋᐊᓕᒃ

ᐃᖃᓗᐃᑦ ᓄᓇᕐᔪᐊᒥ ᖃᖓᑕᔫᒃᑯᕕᒃ ᓴᓇᔭᐅᒋᐊᓛᕐᓂᖓᓄᑦ ᐱᓕᕆᐊᖅ ᓯᕗᒧᒋᐊᕈᑕᐅᔪᖅ ᐊᑎᓕᐅᖅᑕᐅᓪᓗᓂ ᑳᓐᑐᕋ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 17, 2013) – ᓄᓇᕗᑦ ᒐᕙᒪᒃᑯᖏᑦ ᐅᓪᓗᒥ ᓇᓗᓇᐃᖅᓯᖅᑲᐅᔪᑦ ᐊᑎᓕᐅᖅᓯᒪᓕᕋᒥᒃ ᑳᓐᑐᕌᒥᒃ Arctic Infrastructure Partners-ᑯᓐᓄᑦ ᑎᑎᖅᑐᒐᕐᓂᐊᕐᓗᑎᒃ, ᓴᓇᓂᐊᕐᓗᑎᒃ, ᑮᓇᐅᔭᖃᖅᑎᑦᓯᓂᐊᕐᓗᑎᒃ, ᐊᐅᓚᑦᓯᓂᐊᕐᓗᑎᒃ ᒪᑭᒪᐃᓐᓇᖅᑎᑦᓯᓂᐊᕐᓗᑎᓪᓗ ᐃᖃᓗᐃᑦ ᓄᓇᕐᔪᐊᒥ ᖃᖓᑕᔫᒃᑯᕕᒃ ᓴᓇᔭᐅᒋᐊᕐᓂᖓᓄᑦ ᐱᓕᕆᐊᒥᒃ.

ᔪᓚᐃᒥ, Arctic Infrastructure Partners ᓂᕈᐊᖅᑕᐅᓚᐅᖅᑐᑦ ᐊᐅᓚᑦᓯᒍᓐᓇᖁᔭᐅᓪᓗᑎᒃ ᐱᓕᕆᐊᒥᒃ. ᐃᓪᓗᑦᓴᐃᑦ ᓱᓇᒃᑯᑖᓪᓗ ᑎᑭᑎᑕᐅᓛᖅᑐᑦ 2013 ᐅᒥᐊᕐᔪᐊᖃᕐᓇᒥ ᓴᓇᔭᐅᒋᐊᓯᓗᓂ ᐅᐱᕐᖔᖓᓂ 2014. ᐱᓕᕆᐊᖅ ᓂᕆᐅᒋᔭᐅᔪᖅ ᐱᔭᕇᖅᑕᐅᒐᔭᕐᓂᖓᓂᒃ 2017 ᓄᙳᐊᓂ.

"ᐅᓪᓗᒥ, ᐊᑎᓕᐅᖅᑕᐅᑎᓪᓗᒍ ᑳᓐᑐᕋ Arctic Infrastructure Partners-ᑯᓐᓄᑦ, ᐅᐱᒍᓱᑦᑐᒍᑦ ᐊᑯᓂᐅᔪᒧᑦ ᑲᑐᔾᔨᖃᑎᒋᓂᐊᓕᕋᑦᑎᒍ ᐊᐅᓚᑕᐅᑦᓯᐊᖁᓪᓗᒍ ᒪᑭᒪᑎᑕᐅᖁᓪᓗᒍᓗ ᓄᑖᖅ ᖃᖓᑕᔫᒃᑯᕕᑦᓴᕗᑦ," ᐅᖃᖅᓯᒪᔪᖅ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᒥᓂᔅᑕᖓᑦ, ᐲᑕ ᑕᑉᑑᓇ. "ᑖᓐᓇ ᐊᖏᓂᖅᐹᖑᓪᓗᓂ ᐊᑭᑐᔫᓪᓗᓂ ᐱᓕᕆᐊᖑᓂᐊᖅᑐᖅ ᓄᓇᕗᒻᒥ, ᑲᑐᔾᔨᖃᑎᒌᓐᓂᒃᑯᓪᓗ ᓇᓗᓇᐃᖅᓯᓯᒪᓂᐊᖅᑐᖅ ᐱᓕᕆᐊᖅ ᐅᓗᕆᐊᓇᖅᑐᒦᙱᓂᖅᓴᐅᓂᐊᖅᑐᖅ ᐱᔭᕇᖅᑕᐅᒍᓐᓇᕐᓗᓂᓗ ᑭᖑᕙᙱᓪᓗᓂ ᑮᓇᐅᔭᐃᓪᓗ ᐊᑐᖅᑐᑦᓴᐃᑦ ᐅᖓᑖᓅᙱᓪᓗᑎᒃ."

"ᑲᓇᑕᐅᑉ ᒐᕙᒪᒃᑯᖏᑦ ᐅᐱᒍᓱᒻᒪᕆᑦᑐᑦ ᐃᑲᔪᖅᓱᐃᒍᓐᓇᕋᒥᒃ ᐱᓕᕆᐊᓂᒃ ᑖᓐᓇᑎᑐᑦ, ᐱᐅᓯᕚᓪᓕᕈᑕᐅᓂᐊᖅᑐᖅ ᐃᓅᓯᖃᑦᓯᐊᕈᓐᓇᓂᕐᒧᑦ ᖃᑭᒍᓐᓇᕐᓂᖏᓐᓄᓪᓗ ᑲᓇᑕᒥ ᐅᑭᐅᖅᑕᖅᑐᒥᐅᑕᖏᑦ ᐃᖅᑲᓇᐃᔮᑦᓴᖅᑖᖅᑎᑦᓯᓂᒃᑯᑦ ᑮᓇᐅᔭᓕᐅᕈᑎᖃᕈᓐᓇᓂᒃᑯᓪᓗ," ᐅᖃᖅᓯᒪᔪᖅ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ, ᒥᓂᔅᑕ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᕙᓪᓕᐊᔪᓕᕆᔨᒃᑯᑦ ᑎᒥᖁᑎᖏᓐᓄᑦ ᒥᓂᔅᑕᐅᓪᓗᓂᓗ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. "ᐅᓪᓗᒥᒧᑦ ᑎᑭᐅᑎᔭᕗᑦ ᐃᓚᒋᔭᐅᑐᐃᓐᓇᖅᑐᖅ ᐊᒥᓱᓄᑦ ᐅᖃᐅᓯᐅᖃᑦᑕᓚᖓᔪᓄᑦ ᒐᕙᒪᑐᖃᒃᑯᓐᓂᒃ ᐱᕙᓪᓕᕈᑎᑦᓴᐅᓗᑎᒃ ᐅᑭᐅᖅᑕᖅᑐᒥ ᓄᓇᓕᖏᓐᓂ."

"ᐅᐱᒍᓱᑦᑐᒍᑦ ᑲᑐᔾᔨᖃᑎᖃᕈᓐᓇᕋᑦᑕ ᓄᓇᕗᑦ ᒐᕙᒪᒃᑯᖏᓐᓂᒃ ᐱᒻᒪᕆᐅᔪᒧᑦ ᖁᕕᐊᓇᖅᑐᒻᒪᕆᐅᔪᒧᓪᓗ ᐱᓕᕆᐊᒧᑦ, ᐊᑦᓱᕉᑎᖃᕐᓂᐊᖅᑐᑕᓗ ᐊᐅᓚᑦᓯᖃᑕᐅᓂᕐᒧᑦ ᓄᑖᓂᒃ ᖃᖓᑕᔫᒃᑯᕕᓐᓂᒃ ᑭᖑᕙᖅᓯᒪᙱᓪᓗᑎᒃ ᑮᓇᐅᔭᐃᓪᓗ ᐊᑐᖅᑐᑦᓴᐃᑦ ᐅᖓᑖᓅᙱᓪᓗᑎᒃ ᓄᓇᕗᒻᒥᐅᓄᑦ," ᐅᖃᖅᓯᒪᔪᖅ ᐊᑎᐅᓪ ᐱᓕᒥᓪ, Arctic Infrastructure Partners-ᑯᓐᓂ. "ᓂᕆᐅᑦᓯᐊᖅᑐᒍᑦ ᐃᓚᐅᖃᑕᐅᓂᐊᓕᕐᓂᑎᓐᓂᒃ ᐃᓚᐅᖃᑕᐅᖏᓐᓇᓕᓛᕐᓂᑎᓐᓂᓪᓗ ᓄᓇᓕᓐᓂ ᐊᕐᕌᒍᕋᓴᕐᓂᒃ ᓯᕗᓂᑦᓴᑎᓐᓂ."

ᐃᖃᓗᐃᑦ ᓄᓇᕐᔪᐊᒥ ᖃᖓᑕᔫᒃᑯᕕᒃ ᓴᓇᔭᐅᒋᐊᕐᓂᖓᓄᑦ ᐱᓕᕆᐊᖅ ᐃᓚᒋᓕᐅᔾᔨᓯᒪᔪᖅ ᓄᑖᒥᒃ ᖃᖓᑕᔫᒃᑯᕕᒻᒥ ᐅᑕᖅᑭᕕᒻᒥᒃ; ᐊᖏᓪᓕᒋᐊᖅᑕᐅᓗᑎᒃ ᖃᖓᔫᓄᑦ ᓄᖅᑲᖓᕖᑦ; ᓄᑖᑦ ᖃᐅᒪᐃᑦ; ᓴᓇᔭᐅᒋᐊᕐᓗᓂ ᒥᑦᑕᕐᕕᖓ; ᓄᑖᒥᓪᓗ ᑲᑎᖅᓱᖅᓯᒪᓗᑎᒃ ᐱᔨᑦᓯᕋᐅᑎᓄᑦ ᐃᓪᓗᕐᔪᐊᖅ ᐃᓂᒋᔭᐅᒐᔭᖅᑐᖅ ᖃᑦᑎᕆᔨᒃᑯᑦ ᓄᓇᓯᐅᑎᖏᓐᓂᒃ/ᓱᓇᒃᑯᑖᖏᓐᓂᒃ ᐅᖁᒪᐃᑦᑐᕐᓂᐅᑎᓂᓪᓗ ᒥᑦᑕᕐᕕᑦᓯᐅᑎᓂᒃ ᓄᖅᑲᖓᕕᖅᓯᐅᑎᓂᓪᓗ ᓄᓇᓯᐅᑎᓂᒃ. ᐱᓕᕆᐊᖅ ᐊᑭᓕᖅᓱᖅᑕᐅᔪᖅ ᓇᖕᒥᓂᖃᖅᑎᐅᔪᓄᑦ ᒐᕙᒪᒃᑯᓄᓪᓗ ᑲᑐᔾᔭᐅᓪᓗᓂ PPP Canada Inc, ᒐᕙᒪᑐᖃᒃᑯᑦ ᑎᒥᖁᑎᖓᑦ.

ᓇᓕᒧᒌᑦᓯᐊᓕᕋᓗᐊᕐᒪᖔᑕ ᐅᖃᐅᔾᔨᒋᐊᖅᑎᒥᒃ, ᔭᐃᓐ ᓵᑯᓪ ᒪᓕᒐᓕᕆᔨ, ᑎᒃᑯᐊᖅᑕᐅᓯᒪᔪᖅ ᖃᐅᔨᓴᖅᐸᓪᓕᐊᓂᐊᕐᓗᓂ ᐊᑭᑦᑐᕋᐅᑎᑎᑦᓯᑎᓪᓗᒋᑦ ᓂᕈᐊᖅᐸᓪᓕᐊᔪᖃᓕᖅᑲᑦ ᖃᐅᔨᓚᐅᖅᑐᓂᓗ ᖃᐅᔨᓴᖅᑕᐅᓂᖓ ᐃᓚᐃᓐᓈᖅᓯᒪᙱᓐᓂᖓᓂᒃ. ᓇᓕᒧᒌᑦᓯᐊᕐᓕᕋᓗᐊᕐᒪᖔᑕ ᐅᖃᐅᔾᔨᒋᐊᖅᐅᑎᐅᑉ ᐅᓂᒃᑳᓕᐊᖓᑦ ᐊᑐᐃᓐᓇᐅᔪᖅ ᑭᒃᑯᓕᒫᓄᑦ ᐅᕙᓂ:

http://www.edt.gov.nu.ca/apps/Authoring/dspPage.aspx?page=airport_improv...

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᐹᒻ ᑰᓪᑐ

ᑐᓴᕋᑦᓴᓕᕆᓂᕐᒧᑦ ᑐᑭᒧᐊᖅᑎᑦᓯᔨ

ᒐᕙᒪᓕᕆᔨᒃᑯᑦ

ᐅᖄᓚᐅᑎᖓ: 867-975-6049

ᖃᕆᓴᐅᔭᒃᑯᑦ: pcoulter2@gov.nu.ca