ᐅᖃᓚᐅᑎᓯᐅᑏᑦ

You are here

ᓄᓇᕗᒻᒧ ᐊᐱᖅᑯᑕᐅᒐᔪᒃᑐᑦ

ᓯᓚᖓ ᖃᓄᐃᖃᑦᑕᖅᑲ ᓄᓇᕗᒻᒥ?

ᓄᓇᕗᒻᒥ ᓯᓚᖓ ᐊᔾᔨᐅᖃᑦᑕᙱᑦᑐᒻᒪᕆᐅᕗᖅ ᐱᔾᔪᑎᖃᖅᑐᖅ ᖃᖓᒃᑰᕐᒪᖔᖅ ᐊᒻᒪ ᓇᒦᒻᒪᖔᖅᐱᑦ ᓄᓇᕗᒻᒥ. ᐅᑭᐅᒃᑯᑦ ᐊᒃᓱᕈᓐᓇᕐᔪᐊᕈᓐᓇᖅᑐᖅ, ᓂᓪᓚᓱᓐᓂᖃᕈᓐᓇᖅᑐᖅ -32°C-ᒥᑦ ᒥᑦᑎᒪᑕᓕᖕᒥ ᐊᒻᒪ -27°C ᐃᖃᓗᓐᓂ. ᐊᐅᔭᒃᑯᑦ ᐅᖅᑰᓇᕐᓂᖓ ᓈᒻᒪᒃᑐᖅ, ᐅᖅᑰᓇᕐᓂᖓ ᐅᕙᓃᕈᓐᓇᖅᑐᖅ 11°C ᖃᒪᓂᑦᑐᐊᕐᒥᑦ ᔪᓚᐃᒥ ᑕᕝᕗᖓ 6°C-ᒧᑦ ᓴᓂᕋᔭᖕᒥ. ᐱᐅᓂᖅᐹᖑᕗᖅ ᐸᕐᓇᕙᒌᖅᓯᒪᓗᓂ ᓯᓚᐅᑉ ᖃᓄᐃᑦᑑᔪᓐᓇᕐᓂᖓᓄᑦ ᑕᒪᐅᙵᐅᓐᓂᐊᖅᑎᓪᓗᑎᑦ ᐅᕝᕙᓘᓐᓃᑦ ᑕᒫᓂᒥᐅᑕᐅᓂᐊᖅᑎᓪᓗᑎ ᓄᓇᕗᒻᒥ.   

ᖃᐅᔨᒋᐊᕐᕕᐅᔪᖅ:  ᓯᓚᓐᓂᐊᖅᑎᒃᑯᑦ ᑲᓇᑕᒥ. ᑲᓇᑕᒥ ᓴᓚᒧᑦ ᑲᑎᖅᓱᖅᑕᐅᓯᒪᔪᑦ ᐊᒻᒪ ᑐᑭᓯᒋᐅᕈᑏᑦ. ᑲᓇᑕᒧᑦ ᓯᓚᐅᑉ ᖃᓄᐃᒐᔪᓐᓂᖏᑦ 1971-2000.

 

ᖃᓄᑎᒋ ᐃᓄᖃᖅᐸ ᐊᒻᒪ ᐃᓄᖏᑦ ᖃᓄᐃᓕᖓᕙ ᓄᓇᕗᒻᒥ?

ᓄᓇᕗᒻᒥ ᐃᓄᒋᐊᕐᓂᖓ ᑕᐃᑲᓂ ᐄᐳᕈ 1, 2013ᒥᑦ, ᐅᓇᐅᓚᐅᖅᑐᖅ 34,023 ᐃᓄᒋᐊᕐᓂᖓ (ᑲᓇᑕᒥ ᓈᓴᐃᔩᑦ). ᑕᕝᕙᙵᑦ ᐃᓄᒋᐊᕐᓂᖏᓐᓂ, 84%-ᐳᓴᓐᑎᖏᓐᓃᕈᔪᒃᑯᑦ ᐃᓅᔪᑦ. ᓄᓇᕗᒻᒥ ᐃᓅᓱᑦᑐᓂᑦ ᐃᓄᒋᐊᕐᓂᖃᕐᒥᔪᖅ - ᕿᑎᑉᐸᓯᖓᓂ ᐅᑭᐅᕆᔭᐅᔪᖅ ᓄᓇᕗᒻᒥᐅᑕᒧᑦ ᔪᓚᐃ 1, 2012ᒥᑦ ᐅᓇᐅᓚᐅᖅᑐᖅ 24.7-ᓂᒃ-ᐅᑭᐅᓕ, ᐊᔾᔨᒌᖏᓐᓂᖓ ᑕᑯᓇᓪᓗᒍ ᑲᓇᑕᒥ ᕿᑎᑉᐸᓯᖓᓂ ᐅᑭᐅᕆᔭᐅᔪᖅ ᐅᓇᐅᓪᓗᓂ 40-ᓂᒃ-ᐅᑭᐅᓕ.

ᐃᓕᓐᓂᐊᒃᑲᓐᓂᓂᕐᒧᑦ, ᑕᑯᒋᐊᕈᓐᓇᖅᑕᐃ ᖃᕆᓴᐅᔭᒃᑯᑦ ᓄᓇᕗᒻᒥ ᓈᓴᖅᑕᐅᓯᒪᔪᓄᑦ ᐊᓪᓚᕝᕕᖓ: www.stats.gov.nu.ca                  

ᖃᐅᔨᒋᐊᕐᕕᐅᔪᖅ: ᑲᓇᑕᒥ ᓈᓴᐃᔩᑦ. Table051-0005 - ᐃᓄᒋᐊᕐᓂᖏᑦ ᖃᑦᑎᖏᓐᓃᓐᓇᓱᒋᔭᐅᔪᑦ, ᑲᓇᑕ, ᐊᕕᑦᑐᖅᓯᒪᔪᑦ ᐅᑭᐅᖅᑕᖅᑐᒥᓪᓗ, ᑎᓴᒪᐃᖅᓱᕐᓗᑎᑦ (ᐃᓄᖏᑦ),  CANSIM (ᑲᑎᖅᓱᕐᕕᒃ). (ᓄᐊᑕᐅᔪᖅ: 2013-07-30)

 

ᐅᑭᐅᓕᒫᖅ ᑖᖃᑦᑕᖅᑳ ᐊᒻᒪ ᐊᐅᔭᓕᒫᖅ ᖃᐅᒪᖃᑦᑕᖅᑳ? 

ᑭᐅᔾᔪᓯᖓ ᑖᑦᓱᒧᖓ ᐱᔾᔪᑎᓕ ᓇᒥᒥᐅᑕᐅᒻᒪᖔᖅᐱᑦ. ᐊᐅᓱᐃᑦᑐᕐᒥᑦ, ᓄᓇᕗᒻᒥ , ᐃᑲᕐᕋᓄᖅ 24ᓄᑦ ᖃᐅᒪᖃᑦᑕᖅᑐᖅ ᔫᓂᒥ ᐊᒻᒪ 24ᓄᑦ ᐃᑲᕐᕋᓄᑦ ᑖᖃᑦᑕᖅᑐᖅ ᑎᓯᐱᕆᒥᑦ. ᓄᓇᕘᑉ ᓂᒋᑉᐸᓯᖓᓂ ᖃᐅᒥᓂᖅᓴᐅᖃᑦᑕᖅᑐᑦ ᐅᑭᐅᒃᑯᑦ ᐊᒻᒪ ᑖᕐᓂᖅᓴᐅᓲᖑᓪᓗᑎᑦ ᐊᐅᔭᒃᑯᑦ. ᐆᑦᑑᑎᒋᓗᒍ, ᑎᓯᐱᕆ 21ᒥᑦ, ᓇᐃᓛᖑᔪᖅ ᐅᓪᓗᖅ ᐊᕐᕌᒎᑉ ᐃᓗᐊᓂ, ᐃᖃᓗᒻᒥᐅᑕᐃᑦ ᓯᕿᓂᕐᒥᑦ ᓄᐃᔪᒥᑦ ᑕᑯᒐᔭᖅᑐᑦ 9:30-ᕈᔪᖕᒥᑦ ᐅᓪᓛᒃᑯᑦ ᐊᒻᒪ ᑖᖅᓯᕙᓪᓕᐊᓗᓂ 1-ᕈᔪᖕᒥᑦ ᐅᓐᓄᓴᒃᑯᑦ.  

ᐃᓄᐃᑦ ᐃᓚᖏᑦ ᐊᒃᓱᕉᑎᖃᓲᑦ ᖃᐅᒪᓗᐊᖃᑦᑕᕐᓂᖓᓄᑦ ᐊᒻᒪ ᑖᓗᐊᖃᑦᑕᕐᓂᖓᓄᑦ ᐊᕐᕌᒎᑉ ᐃᓗᐊᓂ. ᑕᐃᒪᐃᒐᓗᐊᖅᑎᓪᓗᒍ, ᐃᑲᔫᑎᒃᓴᖅᑕᖃᖅᑐᖅ ᐃᓕᓐᓄᑦ. ᕙᐃᑕᒥᓐ ᐄᔭᒐᐃᑦ ᐃᓕᓐᓂ ᐆᒻᒪᑦᓯᐊᕆᑎᑦᓯᔪᓐᓇᖅᑐᑦ ᖃᐅᒪᙱᓗᐊᖃᑦᑕᖅᑎᓪᓗᒍ. ᐃᒐᓛᓐᓄ ᑕᓗᐃᑦ ᖃᐅᒪᓗᐊᖅᑕᐃᓕᑎᑦᑎᔪᓐᓇᖅᑐᑦ ᓯᓂᖃᑦᑕᕐᓂᐊᕋᕕᑦ ᐊᐅᔭᒃᑯᑦ. 

 

ᖃᓄᐃᑦᑐᓂ ᐃᒡᓗᖃᕐᒪᑕ ᓄᓇᕗᒻᒥ? ᐃᒡᓗᕕᒐᕐᒥᐅᑕᐅᕚ?

ᐅᑉᐱᕆᔭᐅᒐᔪᒃᑲᓗᐊᖅᑎᓪᓗᒍ, ᓄᓇᕗᒻᒥᐅᑕᐃᑦ ᐃᒡᓗᕕᒐᕐᒥᐅᑕᐅᙱᑦᑐᑦ – ᑖᓐᓇ ᐅᖃᐅᓯᖅ ᐃᒡᓗ ᐃᓄᒃᑎᑐᑦ ᑕᐃᒎᓯᐅᒐᓗᐊᖅᑎᓪᓗᒍ ᐊᖏᕐᕋᕆᔭᐅᔪᒧᑦ. ᐃᓄᐃᑦ ᐃᒡᓗᖃᓲᑦ ᐃᓛᒃᑰᖓᔪᓂᑦ ᐃᒡᓗᓂᑦ, ᒪᕐᕉᖕᓂᒃ ᑲᑎᙵᔫᖕᓂᒃ ᐊᒻᒪ ᐊᒥᓱᓂᑦ ᑲᑎᙵᔪᓂᑦ. ᐊᐅᔭᒃᑯᑦ ᐊᒥᓱᑦ ᑐᐱᕐᒥᐅᑕᐅᖃᑦᑕᕐᒥᔪᑦ ᓄᓇᐃᓐᓇᕐᒥᑦ.

 

ᖃᓄᕐᓕ ᓄᓇᕗᒻᒧ ᐊᐅᓪᓚᕈᓐᓇᖅᐳᖓ/ᓄᓇᕘᑉ ᐃᓗᐊᓂᓗ? ᓄᓇᕘᒧᑦ ᐊᖁᑦᑐᓐᓇᖅᐳᖓ?

ᓄᓇᓕᐅᔪᑦ ᓄᓇᕘᒥᑦ ᑲᓱᖃᑎᒌᙱᑦᑐᑦ ᐊᖅᑯᑎᓄᑦ. ᖃᖓᑕᓲᒃᑯᑦ ᐃᖏᕐᕋᔾᔪᑕᐅᒐᔪᓐᓂᖅᐹᖑᔪᖅ. ᑎᓴᒪᐅᔪᑦ ᓄᓇᓕᐸᐅᔭᐃᑦ ᐃᓯᕈᑕᐅᖃᑦᑕᖅᑐᑦ ᓄᓇᕘᒧᑦ ᐅᑯᐊᖑᔪᑦ: ᒪᓐᑐᕆᐋ, ᐋᑕᕚ, ᐅᐃᓂᐸᒡ ᐊᒻᒪ ᐃᐊᑦᒪᓐᑕᓐ. ᐊᐅᔭᒃᑯᓪᓗ ᑲᓱᖃᑎᒋᔭᐅᓲᖑᒻᒥᔪᖅ ᓅᒃ, ᑲᓛᖡᑦ ᓄᓈᓐᓂ.

ᑐᑭᓯᒋᐊᕈᑎᒃᓴᒃᑲᓐᓃᑦ ᖃᖓᑕᓂᕐᒧᑦ ᓄᓇᕗᒻᒥ ᐊᒻᒪ ᓄᓇᕘᑉ ᐃᓗᐊᓂ ᖃᐅᔨᒋᐊᕐᕕᐅᔪᓐᓇᖅᑐᖅ ᓄᓇᕘᒥ ᐳᓚᕋᖅᑐᓕᕆᔨᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᓂ: 

www.nunavuttourism.com 

 

ᖃᓄᐃᑦᑐᒥᑦ ᐅᖃᐅᓯᖃᕐᒪᑕ ᓄᓇᕘᒥ? 

ᓄᓇᕗᒻᒥ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐅᑯᐊᖑᔪᑦ ᐃᓄᐃᑦ ᐅᖃᐅᓯᖓ (ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪ ᐅᐄᕖᑎᑐᑦ. ᐃᓄᐃᑦ ᐅᖃᐅᓯᖓ ᐅᖃᐅᓯᓪᓚᑦᑖᕆᔭᐅᔪᖅ 83%-ᐳᓴᓐᑎᓄᑦ ᓄᓇᕗᒻᒥᐅᓕᒫᓂ (ᑎᑎᕋᕐᕕᖓ ᐅᖃᐅᓯᕐᓄᑦ ᑲᒥᓯᓇᒋᔭᐅᔫᑉ). ᐃᓄᒃᑎᑑᕈᓐᓇᙱᒃᑯᕕᑦ ᐅᕝᕙᓘᓐᓃᑦ ᐃᓄᐃᓐᓇᖅᑐᑎᑐᑦ ᐅᖃᕈᓐᓇᙱᒃᑯᕕᑦ, ᐊᒃᓱᕉᑎᖃᔾᔮᙱᑦᑐᑎᑦ ᖃᓪᓗᓈᑎᑐᑦ ᐅᖃᓪᓚᖃᑎᖃᕐᓂᕐᒧᑦ; ᐃᓄᒋᐊᒃᑐᑦ ᖃᓪᓗᓈᑎᑑᖃᑦᑕᖅᑐᑦ ᓄᓇᕘᒥ. ᐃᓄᒋᐊᕐᒥᔪᑦ ᐅᐄᕖᑎᑐᑦ-ᐅᖃᓪᓚᐅᓯᓖᑦ ᓄᓇᕘᑉ ᓄᓇᓕᐸᐅᔭᖃᕐᕕᖓᓂ, ᐃᖃᓗᓐᓂ.  

ᖃᐅᔨᒋᐊᕐᕕᐅᔪᖅ: (ᑎᑎᕋᕐᕕᖓ ᐅᖃᐅᓯᕐᓄᑦ ᑲᒥᓯᓇᒋᔭᐅᔫᑉ. ᓄᓇᕗᒻᒥ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ. n.d. 30 ᔪᓚᐃ 2013.

ᓈᓴᐃᔩᑦ, ᓄᓇᕗᑦ ᐊᓪᓚᕝᕕᖓ. 1 ᐄᐳᕈ 2013. 29 ᐋᒡᒌᓯ 2013.

 

ᖃᓄᖅ ᐊᔾᔨᒌᙱᓐᓂᖃᕐᒪᑕ ᑲᓇᑕᒥ ᐊᕕᑦᑐᖅᓯᒪᔪᑦ ᐊᒻᒪ ᐅᑭᐅᖅᑕᖅᑐᒥᑦ ᐊᕕᑦᑐᖅᓯᒪᔪᑦ?

ᐅᑭᐅᖅᑕᖅᑐᒥᑦ ᐊᕕᑦᑐᖅᓯᒪᔪᑦ, ᓲᕐᓗ ᓄᓇᕗᑦ, ᐱᔪᓐᓇᐅᑎᑖᖃᑦᑕᖅᑐᑦ ᑲᓇᑕᐅᑉ ᒐᕙᒪᖓᓂ. ᒥᒃᓴᐅᖦᖢᒍ, ᑲᓇᑕᐅᑉ ᐊᕕᑦᑐᖅᓯᒪᓂᖏᑦ ᒐᕙᒪᖏᑦ ᐱᔪᓐᓇᐅᑎᖏᑦ ᐋᖅᑭᒃᓱᖅᑕᐅᓯᒪᔪᑦ ᑲᓇᑕᐅᑉ ᒪᓕᒐᕐᔪᐊᖏᓐᓂ. ᐅᑭᐅᖅᑕᖅᑐᒥᑦ ᐊᕕᑦᑐᖅᓯᒪᓃᑦ ᑮᓇᐅᔭᖅᑖᖅᑎᑕᐅᖃᑦᑕᖅᑐᒻᒪᕆᐊᓗᑦ ᑲᓇᑕᐅᑉ ᒐᕙᒪᖓᓂ.
ᐃᓕᓐᓂᐊᒃᑲᓐᓂᓂᕐᒧᑦ ᖃᓄᖅ ᐊᔾᔨᒌᙱᓐᓂᖃᕐᒪᖔᖅᑕ ᑲᓇᑕᒥ ᐊᕕᑦᑐᖅᓯᒪᔪᑦ ᐊᒻᒪ ᐅᑭᐅᖅᑕᖅᑐᒥᑦ ᐊᕕᑦᑐᖅᓯᒪᔪᑦ, ᑕᑯᒋᐊᕐᓗᒍ ᑲᓇᑕᐅᑉ ᒐᕙᒪᒃᑯᖏᑦ ᒐᕙᒪᓕᕆᓂᕐᒧᑦ ᐅᐸᒃᑕᐅᔪᓐᓇᖅᑐᖅ ᑖᔅᓱᒫ ᒥᒃᓵᓄᑦ: 

www.pco-bcp.gc.ca/aia/index.asp?lang=eng&page=provterr&sub=difference&doc=difference-eng.htm

 

ᑭᓲᖕᒪᑕ ᑮᓇᐅᔭᓕᐅᕈᑕᐅᓂᖅᐹᓲᑦ ᓄᓇᕘᒥ?

ᓄᓇᕗᒻᒥ ᑮᓇᐅᔭᓕᐅᕈᑕᐅᓂᖅᐹᓲᑦ ᐃᓚᖃᖅᑐᖅ ᓴᓇᙳᐊᕐᓂᕐᒥᒃ ᐊᒻᒪ ᒥᖅᓱᕐᓂᕐᒥᒃ, ᐅᔭᕋᓐᓂᐊᕐᓂᕐᒥᑦ, ᐃᖃᓪᓕᐊᓂᕐᒥᒃ ᐊᒻᒪ ᐊᖑᓇᓱᓐᓂᕐᒥᒃ ᐊᒻᒪ ᒥᑭᒋᐊᖃᕐᓂᕐᒥᒃ. ᓯᓚᕐᔪᐊᓕᒫᒥᑦ ᓄᓇᕗᑦ ᖃᐅᔨᒪᔭᐅᔪᖅ ᑎᑎᖅᑐᒐᖏᓐᓄᑦ ᐊᒻᒪ ᓴᓇᙳᐊᒐᖏᓐᓄᑦ.  ᐅᔭᕋᖕᓂᐊᒐᒃᓴᓂᑦ ᐊᒻᒪ ᐅᔭᕋᖕᓂᐊᕐᓂᖅ ᐱᕈᖅᑐᒻᒪᕆᐅᓕᖅᑐᑦ, ᑭᓯᐊᓂ ᐊᑭᑐᓂᐊᓗᐊᓄᑦ ᑕᒪᐅᖓᕋᓱᒃᑐᓂ, ᐊᒻᒪ ᐱᖁᑎᓂᑦ ᑕᒪᐅᙵᐅᔾᔨᓇᓱᓪᓗᓂ, ᐊᒃᓱᕈᓐᓇᕈᑕᐅᔪᑦ. ᓄᓇᕗᑦ ᓂᐅᕐᕈᑎᖃᓲᖅ ᐃᖃᓗᓐᓂ, ᖃᓕᕋᓕᓐᓂ ᐊᒻᒪ ᑭᖑᑉᐸᓂ. ᐃᒪᖓ ᓄᓇᕘᑉ ᓯᓚᑖᓂ ᖃᐅᔨᔭᐅᓯᒪᑦᑎᐊᖏᓐᓂᖓᓄᑦ, ᓄᓇᕗᑦ ᒐᕙᒪᖓ, ᑮᓇᐅᔭᖃᖅᑎᑕᐅᓪᓗᑎ ᒐᕙᒪᑐᖃᒃᑯᓐᓂ, ᖃᐅᔨᓴᕈᑕᐅᓂᐊᖅᑐᒥᑦ ᐅᒥᐊᕐᔪᐊᖅᑖᖅᓯᒪᔪᑦ ᓄᐊᑦᑎᓂᕐᒧᑦ ᖃᐅᔨᓴᐅᑎᐅᓂᐊᖅᑐᓂᑦ ᐃᒪᕐᒥᐅᑕᓂᑦ, ᓇᔪᖅᑕᖓᓂ, ᐊᒻᒪ ᖃᔅᓯᖏᓐᓃᒻᒪᖔᑦ ᐃᒪᕐᒥᑦ ᓄᓇᕘᑉ ᓯᓚᑖᓂ. ᐊᖑᓇᓱᖕᓂᖅ ᐊᒻᒪ ᒥᑭᒋᐊᖃᕐᓂᖅ ᐊᑭᖃᐸᓗᒃᑐᖅ $40,000,000 ᐊᕐᕌᒍᑕᒫᖅ. ᐳᓚᕋᖅᑐᓕᕆᓂᖅ ᐊᖏᓪᓕᕙᓪᓕᐊᕐᒥᔪᖅ ᓄᓇᕘᒥ, ᐳᓚᕋᖅᑏᑦ ᓯᓚᕐᔪᐊᓕᒫᒦᙶᖅᑐᑦ ᓄᓇᕘᑉ ᒥᕐᖑᐃᖅᓯᕐᕕᖏᓐᓅᖃᑦᑕᕐᓂᖏᓐᓄᑦ, ᐊᖑᓇᓱᓐᓂᕐᒧᑦ ᐊᒻᒪ ᐃᖃᓪᓕᐊᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᐊᒻᒪ ᓄᓇᑦᑕ ᐱᐅᓂᖓᓄᑦ. 

 

ᖃᓄᐃᑦᑐᓂᑦ ᐊᓐᓄᕌᒡᒋᕆᐊᖃᖅᐳᖓ ᓄᓇᕘᒧ?

ᐱᒻᒪᕆᐅᕗᖅ ᐅᖅᑯᖅᓴᐅᑎᖃᑦᑎᐊᕐᓗᑎᑦ ᐅᑭᐅᒃᑯᑦ, ᐱᓗᐊᖅᑐᒥᑦ ᓯᓚᒦᖏᓐᓇᕈᔪᓐᓂᐊᕈᕕᑦ - ᐃᓚᖃᖃᓯᐅᑎᓗᓂ ᖁᓕᑦᑕᐅᔭᕐᒥᑦ ᐊᑐᕈᓐᓇᖅᑕᕐᓂᑦ ᓂᓪᓚᓱᓐᓂᖃᖅᑎᓪᓗᓂ -40°C, ᑲᒦᒃ, ᓇᓴᖅ, ᐊᒡᒑᒃ ᐊᒻᒪ ᖁᖓᓯᕈᒻᒥᑦ. ᐊᐅᔭᒃᑯᕐᓕ, ᓵᑦᑎᒥᑦ ᔭᐃᑲᖃᕆᐊᖃᕐᓂᐊᖅᑐᑎᑦ. ᐃᔅᓴᔭᙱᑦᑐᑦ ᐊᓐᓄᕌᑦ ᐱᐅᓂᖅᐹᖑᓪᓗᑎ ᐊᕐᕌᒍᓕᒫᒧᑦ. ᐊᑲᐅᔪᓂ ᐃᓯᒐᐅᔭᖃᕐᓗᓂ ᐱᐅᑦᑎᐊᖅᐳᖅ ᐊᖅᑯᑎᐅᑉ ᓴᓂᐊᒍ ᐱᓱᕝᕕᖃᙱᒻᒪᑦ ᓄᓇᕗᒻᒥ ᓄᓇᖓᓗ ᓇᓕᒧᒌᖏᓐᓂᐅᓪᓗᓂ.  

 

ᖃᓄᐃᑦᑐᓂᓪᓕ ᓂᐅᕕᕐᕕᑕᖃᕐᒪᑦ ᓄᓇᕘᒥ? 

ᓄᓇᓕᐸᐅᔭᐅᓂᖅᓴᐅᔪᓂᑦ ᓲᕐᓗ ᐃᖃᓗᓐᓂ, ᐃᖃᓗᒃᑑᑦᓯᐊᕐᒥᑦ ᐊᒻᒪ ᑲᖏᖅᖠᓂᕐᒥᑦ, ᐊᒥᓲᓂᖅᓴᓂᑦ ᓂᐅᕕᕐᕕᑕᖃᖅᑐᖅ ᓂᕿᓄᑦ, ᐃᒡᓗᒥᓯᐅᑎᓄᑦ ᐊᒻᒪ ᐊᓐᓄᕌᕐᓄᑦ. ᓄᓇᓕᕋᓛᖑᓂᖅᓴᐅᔪᓂᑦ, ᐊᑐᐃᓐᓇᖃᕐᕕᐅᙱᓐᓂᖅᓴᐅᔪᑦ, ᐊᑐᓂ ᓄᓇᓕ ᓂᐅᕕᕐᕕᖃᕋᓗᐊᖅᑐᓂ ᓂᕿᑖᕐᕕᐅᔪᓐᓇᖅᑐᒥᑦ ᐊᒻᒪ ᖃᐅᑕᒫᖅᓯᐅᑎᒐᓚᓐᓂ. ᐃᓄᒋᐊᒃᑐᑦ ᓄᓇᕗᒻᒥᐅᑦ ᓂᕿᓂ ᐊᓯᖏᓐᓂᓪᓗ ᑕᒫᓂ ᓇᓂᔭᐅᒐᔪᙱᑦᑐᓂᑦ ᑎᑭᑎᑦᑎᖃᑦᑕᖅᑐᑦ ᐅᒥᐊᕐᔪᐊᒃᑯᑦ ᐅᓯᔭᐅᓪᓗᑎ ᓄᓇᓕᓕᒫᓅᓲᖑᓪᓗᑎ ᐊᐅᔭᒃᑯᑦ. ᖃᕆᓴᐅᔭᒃᑯᑦ ᑎᑭᓴᐃᓇᕐᒥᔪᖅ, ᓂᐅᕕᕐᕖᑦ ᐃᓚᖏᑦ ᓇᒃᓯᐅᔾᔨᔪᓐᓇᕐᒪᑕ ᓄᓇᕘᒧᑦ. 

 

ᖃᓄᐃᓕᐅᕈᑎᒃᓴᐅᔪᑦ ᖃᓄᐃᑦᑑᒻᒪᑕ ᓄᓇᕘᒥ? 

ᓄᓇᕗᑦ ᓄᓇᑦᑎᐊᕆᒃᑐᐊᓘᖕᒪᑦ ᓯᓚᒥ ᖃᓄᐃᓕᐅᕈᑎᒃᓴᓄᑦ ᓲᕐᓗ ᐱᓱᔪᖕᓂᖅ, ᖃᔭᖅᑐᕐᓂᖅ, ᐊᐅᓪᓛᓐᓂᖅ ᐊᓯᒃᑲᓐᓂᐊᓗᓂᓪᓗ! ᐃᓯᖅᓯᒪᔪᖅᓯᐅᑎᓂᑦ ᖃᓄᐃᓕᐅᕈᑎᒃᓴᓂᑦ ᐊᓕᐊᓇᐃᒍᓱᒃᑯᕕᑦ, ᐊᒥᓲᖕᒥᔪᑦ ᖃᓄᐃᓕᐅᕈᑎᒃᓴᐅᔪᑦ. ᓄᓇᓕᓕᒫᐸᓗᑦ ᓯᐊᕐᕆᔮᕐᕕᓖᑦ ᓯᐊᕐᕆᔮᕐᓂᕐᒧᑦ ᕼᐋᑭᓐᓂᕐᒧᓪᓗ. ᐊᕿᓂᖅ ᐊᒻᒪ ᕚᓕᕚ ᐊᓕᐊᓇᐃᒋᔭᐅᒐᔪᖕᒥᔪᑦ. ᓄᓇᓕᐸᐅᔭᕐᒥᑦ, ᐃᖃᓗᓐᓂ ᑕᕐᕆᔭᕐᕕᖃᕐᒥᔪᖅ ᓄᑖᓂᑦ ᑕᕐᕆᔮᒃᓴᓂᑦ ᓴᖅᑮᓲᖑᓪᓗᑎ ᐱᓇᓱᐊᕈᓯᑕᒫᑦ.  

ᖃᓄᐃᓕᐅᕈᑎᓂᑦ ᐊᒻᒪ ᖁᕕᐊᓲᑎᓂᑦ ᐊᑐᖃᑦᑕᖅᑐᑦ ᓄᓇᕘᑉ ᓄᓇᓕᓕᒫᖏᓐᓂᑦ, ᓲᕐᓗ ᑐᓂᖅ ᑕᐃᒻ ᐊᒻᒪ ᐊᓕᐊᓇᐃᒃᑯᑦ ᐃᖃᓗᓐᓂ, ᐊᒻᒪ ᓇᑦᑎᖅ ᖃᓄᐃᓕᐅᕈᓘᔭᕐᓂᖅ ᖁᕐᓗᖅᑑᕐᒥ. ᓇᓕᐊᓐᓃᒃᑲᓗᐊᕈᕕᑦ ᓄᓇᓕᐅᔪᒥᑦ ᓄᓇᕘᒥ, ᐃᓱᒪᒃᓴᖅᓯᐅᒐᓛᕈᕕᑦ ᖃᓄᐃᓕᐅᕈᑎᒃᓴᖃᐃᓐᓇᐅᔭᕐᓂᐊᖅᑐᑎᑦ.  

 

ᐃᓄᐃᑦ ᓇᒥ ᐃᖅᑲᓇᐃᔭᖃᑦᑕᕐᒪᑕ ᓄᓇᕘᒥ?

ᐊᖏᓂᖅᐹᖑᔪᖅ ᐃᖅᑲᓇᐃᔭᖅᑎᖃᖅᑐᖅ ᓄᓇᕘᒥ ᑖᒃᑯᐊᖑᔪᑦ ᓄᓇᕗᑦ ᒐᕙᒪᒃᑯᖏᑦ. ᐃᓄᒋᐊᒃᑐᑦ ᐃᖅᑲᓇᐃᔭᖅᑐᑦ ᐱᖓᓲᓕᖅᑲᖓᔪᓄᑦ ᖁᑦᑎᓐᓂᖏᑦ ᒐᕙᒪᐅᔪᑦ: ᓄᓇᓕᖕᒥ, ᓄᓇᕘᒥ ᐊᒻᒪ ᒐᕙᒪᑐᖃᒃᑯᓐᓄᑦ. ᓄᑖᓂᑦ ᐃᖅᑲᓇᐃᔮᒃᓴᓂᑦ ᓴᖅᑭᑦᑐᖃᖅᐸᓪᓕᐊᔪᖅ ᐅᔭᕋᖕᓂᐊᕐᕕᖕᓂ ᐊᒻᒪ ᐅᔭᕋᖅᓯᐅᓂᕐᒧᑦ. ᐳᓚᕋᖅᑐᓕᕆᓂᖅ ᐊᖏᓪᓕᕙᓪᓕᐊᕐᒥᔪᖅ, ᐃᓚᖏᓪᓗ ᓄᓇᕗᒻᒥᐅᑕᐅᔪᑦ ᖃᐅᔨᒪᔨᑕᐅᖃᑦᑕᖅᑐᑦ ᐊᒻᒪ ᐳᓚᕋᕐᓂᕐᒧᑦ ᐊᐅᓚᑦᑎᔨᐅᓂᕐᒧᑦ. 

 

ᖃᓄᑎᒋ ᐊᖁᓐᓇᕐᒪᑦ ᓄᓇᕘᒧᑦ?

ᐊᖅᑯᑎᑕᖃᙱᑦᑐᖅ ᓄᓇᕘᑉ ᓄᓇᓕᖏᓐᓂᑦ ᑲᓇᑕᐅᑉ ᓂᒋᐊᓄᑦ. ᖃᖓᑕᓲᒃᑯᑐᐊᖅ ᓄᓇᕘᓕᐊᕐᓇᖅᑐᖅ ᑕᖅᑭᓄᑦ 12ᓄᑦ ᐊᕐᕌᒍᑕᒫᖅ ᐊᑐᐃᓐᓇᐅᓲᖑᓪᓗᓂ. ᐊᐅᔭᒃᑯᑦ ᐅᒥᐊᒃᑯᑦ ᑎᑭᕝᕕᒃᓴᐅᖕᒥᔪᖅ. ᓄᓇᕘᑉ ᐊᖏᓂᖓ (1.9 ᒥᓕᐊᓐ km2 ᐅᕝᕙᓘᓐᓃᑦ 20%-ᐳᓴᓐᑎ ᑲᓇᑕᐅᑉ ᓄᓇᓕᒫᖓᓂ) ᑕᐃᒪᐃᓐᓂᖓᓄᑦ ᓄᓇᓕᖏᑦ ᐊᕕᑦᑐᖅᓯᒪᔪᑦ ᓄᓇᕘᓕᒫᒥᑦ, ᐊᖅᑯᑎᖃᕋᑎ ᐅᕝᕙᓘᓐᓃᑦ ᓄᓇᓯᐅᑎᑯᑖᓄᑦ ᐊᖅᑯᑎᖃᕋᑎ.  

 

ᓇᑭᙶᖃᑦᑕᕐᒪᓪᓕ ᐆᒻᒪᖅᑯᑎᓯ?

ᐆᒻᒪᖅᑯᑎᓕᒫᑦᑎᐊᑦ ᓄᓇᕘᒥ ᖁᓕᒃᑯᓐᓂᙶᓲᖅ (QEC), ᓄᓇᕘᒥᑦ ᑯᐊᐳᕇᓴᕆᔭᐅᔪᖅ ᓄᓇᕘᑦ ᒐᕙᒪᒃᑯᖏᓐᓄᑦ. ᓄᓇᕗᒻᒥᐅᑦ ᓄᓇᓕᖏᑦ ᐊᑐᓂ ᐃᑯᒻᒪᑖᓲᑦ ᐃᒐᓯᐅᑎᖕᒧᑦ ᐊᐅᓚᑕᐅᔪᓄᑦ ᐃᑯᒪᓕᐅᕈᑎᓂᑦ. ᐃᒐᓯᐅᑎ ᑎᑭᑎᑕᐅᓲᖑᓪᓗᓂ ᐅᒥᐊᕐᔪᐊᒃᑯᑦ ᐊᐅᔭᒃᑯᑦ ᐊᕐᕌᒍᓕᒫᒧᑦ ᐊᑐᖅᑕᐅᓲᖑᓪᓗᓂ ᑎᑭᕝᕕᐅᒃᑲᓐᓂᓚᐅᙱᓐᓂᖏᓐᓂ.  

ᓄᓇᕗᑦ ᐅᖅᓱᐊᓗᓕᒫᑦᑎᐊᖏᑦ ᓯᓚᑖᓃᙶᕋᓗᐊᖅᑎᓪᓗᒋᑦ, ᓄᓇᕗᑦ ᒐᕙᒪᖓ ᕿᒥᕐᕈᕙᓪᓕᐊᔫᒐᓗᐊᖅ ᐊᓯᖏᓐᓂᑦ ᐆᒻᒪᖅᑯᑕᐅᔪᓐᓇᖅᑐᓂᑦ ᓲᕐᓗ ᐃᒪᕐᒧᑦ ᐆᒻᒪᖅᑯᑎᖃᕐᓂᖅ ᐊᒻᒪ ᐊᓄᕆᒧᑦ ᐆᒻᒪᖅᑯᑎᖃᕐᓂᕐᒥᑦ.  

 

ᐃᒪᖓᓕ ᓇᑭᙶᖃᑦᑕᕐᒪᑦ ᓄᓇᕘᒥ?

ᓄᓇᓖᑦ ᐊᑐᓂ ᐃᒪᖃᖅᑎᑦᑎᓲᑦ ᓄᓇᕘᒥ. ᓄᓇᓖᑦ ᐊᑐᓂ ᐃᒥᖅᑕᕐᕕᖃᖅᑐᑦ ᐊᒻᒪ ᐃᒥᕐᒥᑦ ᑲᒪᑦᑎᐊᕆᐊᖃᕐᕕᖃᖅᑐᑎ. ᐊᖏᕐᕋᕆᔭᐅᔪᑦ ᐃᓚᖏᑦ ᓱᓪᓗᓅᑦᑐᓂᑦ ᐃᒪᖃᖅᑎᑕᐅᔪᑦ ᓄᓇᕘᒥ, ᑭᓯᐊᓂ ᐊᒥᓲᔪᑦ ᐃᒡᓗᐃᑦ ᐃᒥᖅᑕᐅᒻᒧᑦ ᐃᒻᒥᖅᑕᐅᓲᑦ ᖃᐅᑕᒫᖅ. ᓄᓇᓕᕋᓛᖑᓂᖅᓴᐅᔪᓂᑦ ᑖᓐᓇ ᐊᑐᓐᓂᖅᓴᐅᓪᓗᓂ.