ᐅᖃᓚᐅᑎᓯᐅᑏᑦ

You are here

ᑕᕝᕚᑭ ᑕᒫᓂ ᐃᓂᒃᓴᖃᙱᓚᖅ – ᓄᖅᑲᕐᓇᖅᓯᔪᖅ

ᔭᓐᓄᐊᓕ 16, 2014

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᓴᖅᑭᑎᑕᐅᑲᐅᑎᒋᔭᕆᐊᓕᒃ

ᑕᕝᕚᑭ ᑕᒫᓂ ᐃᓂᒃᓴᖃᙱᓚᖅ – ᓄᖅᑲᕐᓇᖅᓯᔪᖅ

ᐃᖃᓗᐃᑦ, ᓄᓇᕗᑦ (ᔮᓄᐊᕆ 16, 2014) – ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᖏᑦ ᓯᒡᒐᓕᐊᑐᖅᐸᒃᑐᓂᑦ ᑕᕝᕚᑭᑐᖅᐸᒃᑐᓂᒡᓗ ᓄᓇᕗᒻᒥ ᐃᓱᒪᒋᖁᔨᒻᒪᕆᒃᐳᑦ ᐆᒥᖓ "ᓄᖅᑲᕐᓇᖅᓯᔪᖅ." ᑖᓐᓇ ᐱᖓᔪᒋᓕᖅᐸᖓ ᐊᕐᕌᒍᖓᑦ ᒐᕙᒪᐅᑉ ᖃᐅᔨᒪᖁᔨᔾᔫᒥᓪᓗᑎᒃ "ᑕᕝᕚᑭ ᑕᒫᓂ ᐃᓂᒃᓴᖃᙱᓚᖅ" ᐱᓕᕆᐊᖑᔪᒥᑦ.

ᓄᓇᓖᒃ ᓄᓇᕗᒻᒥ ᖁᕕᐊᓲᑎᖃᕐᓂᐊᖅᑐᑦ "ᑕᕝᕚᑭ ᑕᒫᓂ ᐃᓂᒃᓴᖃᙱᓚᖅ"-ᒥᑦ ᐊᒻᒪ ᑲᓇᑕᓕᒫᒥ ᓯᒡᒐᓕᐊᖅᑐᕐᓇᙱᓂᐅᑉ ᐱᓇᓱᐊᕈᓯᖓᓂ ᖃᓄᐃᑦᑐᑯᓘᔭᕐᓂᑦ ᐱᓕᕆᓗᑎᒃ ᐱᓇᓱᐊᕈᓯᖅ ᐊᑐᖅᑎᓪᓗᒍ ᔮᓄᐊᕆ 19–ᒥᑦ 25-ᒧᑦ, 2014.

"ᑕᕝᕚᑭᐅᑉ ᐊᑐᖅᑕᐅᖃᑦᑕᕐᓂᖓ ᓄᓇᕗᒻᒥ ᓱᕋᐃᑐᐃᓐᓇᙱᒻᒪᑦ ᐃᓅᑉ ᖃᓄᐃᙱᓇᓱᐊᕐᓂᖓᓂ. ‘ᑎᒡᓕᒃᑐᖅ ᓯᕗᓂᒃᓴᑦᑎᓐᓂᑦ’ ᐋᓐᓂᖅᓯᓪᓗᓂ ᐃᓚᒌᓂᒃ, ᓄᓇᓕᖕᓂᑦ, ᐱᖅᑯᓯᑦᑎᓐᓂᒃ ᑮᓇᐅᔭᑦᑎᓐᓂᒡᓗ," ᐅᖃᖅᑐᖅ ᓄᓇᕗᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄ ᒥᓂᔅᑕ ᒫᓂᑲ ᐃᐅᓪ. "ᓄᓇᕗᒻᒥᐅᑦ ᐊᒃᓱᕈᑐᐃᓐᓇᙱᒻᒪᑕ, ᐊᓯᐅᔨᕙᓪᓕᐊᖕᒥᔪᒍᑦ ᐱᒻᒪᕆᐅᔪᓂᒃ ᐃᓚᑦᑎᓐᓂᒃ ᐃᓅᔪᓐᓃᖅᓵᓕᕙᒃᖢᑎᑦ ᑕᕝᕚᑭᑐᖅᐸᖕᓂᕐᒧᑦ. ᓄᖅᑲᕐᓇᖅᓯᔪᖅ. ᓄᖅᑲᕐᓂᖅ ᓯᒡᒐᓕᐊᓂᒃ ᐊᓯᖏᓐᓂᒡᓘᓐᓃ ᑕᕝᕚᑭᓂᒃ ᐊᔪᕐᓇᖅᐳᖅ, ᑭᓯᐊᓂ ᓄᖅᑲᕆᐊᖃᖅᑐᒍᑦ. ᑕᕝᕚᑭᑐᖅᑏᑦ ᓄᖅᑲᕋᓱᐊᖁᔭᐅᕗᑦ. ᑕᒪᐅᓇᑦᑕᐅᖅ ᐅᑎᖅᑎᑦᑐᓐᓇᖅᑕᕗᑦ ᖃᓄᐃᙱᑦᑎᐊᕐᓂᕗᑦ."

ᑕᒪᑐᒪᓂ ᐊᕐᕌᒎᔪᒥᑦ, "ᑕᕝᕚᑭ ᑕᒫᓂ ᐃᓂᒃᓴᖃᙱᓚᖅ" ᖃᓄᐃᓕᐅᕈᑕᐅᔪᖅ ᑕᕝᕚᑭᑐᖅᐸᒃᑐᓂᑦ ᐊᑎᓕᐅᖁᔨᕗᑦ "ᓄᖅᑲᕐᓇᖅᓯᔪᖅ" ᐱᒡᒍᓴᐅᑎᓂᕐᒥᑦ. ᐊᑎᓕᐅᖃᑕᐅᔪᑦ ᓄᖅᑲᕋᓱᐊᕐᓂᐊᕐᓂᕐᒥᓂᒃ ᑕᕝᕚᑭᒥᑦ ᒫᔾᔨ 2014 ᑕᖅᑭᖓᓂ, ᓵᓚᖃᑐᐃᓐᓇᕆᐊᓖᒃ, ᐃᓚᐅᓪᓗᓂ ᐊᐅᓪᓚᕈᑎ ᐊᑭᖃᖅᖢᓂ $5,000-ᒥᑦ ᐊᒻᒪ ᖃᕆᑕᐅᔭᕐᒥᑦ (MacBook Pro). "ᓄᖅᑲᖃᑎᒋᓇᓱᐊᖅᑕᑎᑦ" ᐃᑲᔪᖅᓯᖃᑕᐅᔪᑦ ᓵᓚᖃᕈᓐᓇᕐᒥᔪᑦ ᖃᕆᑕᐅᔭᕋᓛᕐᒥᑦ (iPad mini). ᐃᓚᐅᖃᑕᐅᔪᑦ ᐊᑎᓕᐅᕈᓐᓇᖅᑐᑦ ᐃᑭᐊᖅᑭᕕᒃᑯᑦ www.timetoquit.ca ᐅᕝᕙᓘᓐᓃ www.nuquits.gov.nu.ca. ᐃᓚᐅᓇᓱᐊᕈᑏᑦ ᐱᒡᒍᓴᐅᑎᓂᕐᒧᓪᓗ ᑐᑭᓯᒋᐊᕈᑏᑦ ᓇᒃᓯᐅᑎᔭᐅᓂᐊᕐᒥᔪᑦ ᐃᒡᓗᖃᖅᑐᓕᒫᓄᑦ ᓄᓇᕗᒻᒥ ᐱᑐᐃᓐᓇᐅᓂᐊᖅᖢᓂᓗ ᓄᓇᓕᖕᓂ ᐋᓐᓂᐊᕕᖕᓂᑦ. ᐊᒧᓯᓛᖅᑐᑦ ᐊᐃᕐᕆᓕᐅᓕᕈᓂ.

ᑕᒪᑐᒪᓂ ᐊᕐᕌᒎᔪᒥᑦ, ᒐᕙᒪᒃᑯᑦ ᐊᖏᒡᓕᒋᐊᖅᑎᑦᑎᖕᒪᑕᑦ ᐊᑭᖃᙱᑦᑐᖅ ᐃᑲᔫᑎᒥᒃ ᐱᑐᐃᓐᓇᐅᔪᖅ ᓱᐴᖅᑐᖅᐸᒃᑐᓄᑦ ᐊᓯᖏᓐᓂᒡᓗ ᑕᕝᕚᑭᑐᖅᐸᒃᑐᓄᑦ ᓄᖅᑲᕋᓱᐊᖅᑐᓄᑦ. ᐃᓚᓪᓗᒍ ᐊᑭᖃᙱᑦᑐᖅ ᐅᖃᓘᑎᒃᑯᑦ ᐃᑲᔪᖅᑕᐅᕝᕕᒃ ᒫᓐᓇ ᐱᑐᐃᓐᓇᐅᔪᖅ 24 ᐃᑲᕐᕋᑦ ᖃᐅᑕᒫᖅ ᓄᓇᕗᒻᒥ ᓄᖅᑲᕋᓱᐊᕐᓗᓂ ᐃᑲᔪᖅᑕᐅᕝᕕᒃ, 1-866-368-7848, ᐱᓕᒻᒪᒃᓴᖅᑕᐅᓯᒪᔪᑦ ᐅᖃᓪᓚᖃᑎᖃᖅᑏᑦ ᐅᖃᖃᑎᖃᕈᓐᓇᕐᒥᔪᑦ ᐃᕐᖐᓐᓈᖅᑕᐅᒃᑯᓪᓗ ᒫᓂ www.nuquits.gov.nu.ca ᐱᒋᐊᕐᓗᓂ ᔮᓄᐊᕆ 20.

ᖃᐅᔨᔪᒪᒍᕕᑦ ᖃᓄᐃᓕᐅᕈᑕᐅᓂᐊᖅᑐᓂᒃ ᓄᓇᓕᖕᓂᑦ, ᖃᐅᔨᒋᐊᕐᕕᒋᒍᒃ ᓄᓇᓕᖕᓂᑦ ᐋᓐᓂᐊᕕᒃ ᐅᐸᒡᓗᒍᓘᓐᓃ www.nuquits.gov.nu.ca ᐅᕝᕙᓘᓐᓃ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐃᑭᐊᖅᑭᕕᒃᑰᕈᑎᖓ www.gov.nu.ca/health.

"ᓄᖅᑲᕐᓇᖅᓯᔪᖅ" ᐱᒡᒍᓴᐅᑎᓂᕐᒧᑦ ᑐᑭᓯᒋᐊᕈᑎ, ᐃᓚᐅᓪᓗᓂ ᒪᓕᒃᑕᐅᔭᕆᐊᓖᑦ, ᐱᑐᐃᓐᓇᐅᓂᐊᖅᑐᑦ ᒫᓂ www.timetoquit.ca ᐱᒋᐊᕐᓗᓂ ᔮᓄᐊᕆ 20.

###

ᑐᓴᒐᒃᓴᒧᑦ ᑐᑭᓯᒋᐊᕐᕕᒃ:

ᕌᓐ ᕙᓯᓐᒃ

ᑐᓴᒐᒃᓴᓕᕆᔨ

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ

867-975-5710

rwassink@gov.nu.ca