ᐅᖃᓚᐅᑎᓯᐅᑏᑦ

You are here

ᑎᑎᕋᕐᕕᒃᑖᓴᖅ ᐋᓐᓂᐊᕐᕕᓕᐊᖅᐸᒃᑐᓂᑦ ᐱᔾᔪᑕᐅᕙᒃᑐᓄᑦ ᑲᒪᕝᕕᒃ

ᔪᓚᐃ 11, 2013

ᑐᓴᒐᒃᓴᖅ ᓴᖅᑭᑕᖅ

ᓴᖅᑭᑕᐅᑲᐅᑎᒋᔭᕆᐊᓕᒃ

ᑎᑎᕋᕐᕕᒃᑖᓴᖅ ᐋᓐᓂᐊᕐᕕᓕᐊᖅᐸᒃᑐᓂᑦ ᐱᔾᔪᑕᐅᕙᒃᑐᓄᑦ ᑲᒪᕝᕕᒃ

ᐃᖃᓗᐃᑦ, ᓄᓇᕗᑦ (ᔪᓚᐃ 11, 2013) – ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᓕᓵᕐᒪᑕ ᓄᑖᒥᒃ ᐊᑐᖅᑕᐅᖃᑦᑕᕐᓂᐊᓕᖅᑐᒥᒃ, ᐊᔪᕐᓐᓇᖏᓐᓂᖅᓴᐅᓗᓂ ᐊᒻᒪᓗ ᐱᔨᑦᑎᕐᓂᖅᓴᐅᔪᓐᓇᕐᓂᐊᕐᓂᕐᒧᑦ ᐋᓐᓂᐊᕕᓕᐊᖅᐸᒃᑐᓄᑦ. ᑎᑎᕋᕐᕕᒃᑖᓵᖅ ᐋᓂᐊᕐᕕᓕᐊᖅᐸᒃᑐᓂᑦ ᐱᔾᔪᑎᒋᔭᐅᕙᒃᑐᓄᑦ ᐊᐅᓚᓂᖃᑦᑎᐊᓕᖅᑐᖅ ᑲᒪᔪᓐᓇᖅᓯᓪᓗᑎᒃ ᐋᓐᓂᐊᕐᕕᓕᐊᖅᐸᒃᑐᑦ ᐱᔾᔪᑎᒋᔭᖏᓐᓄᑦ, ᐃᓱᒫᓘᑕᐅᔪᓄᑦ ᐊᒻᒪᓗ ᐊᐱᖅᑯᑎᒃᓴᖃᖅᑐᖃᕐᓂᕌᖓᑦ ᓇᒧᙵᐅᕙᓪᓕᐊᑎᓪᓗᒋᑦ ᐋᓐᓂᐊᕐᕕᓕᐊᖅᓯᒪᔪᑦ.

"ᐊᔪᕐᓇᙱᓐᓂᖅᓴᒥᒃ ᐊᑐᖁᔨᓪᓗᑕ ᐋᓐᓂᐊᕐᕕᓕᐊᖅᐸᒃᑐᓄᑦ ᐊᒻᒪᓗ ᐃᓚᒋᔭᐅᔪᓄᑦ ᑲᙳᓇᖅᑑᑎᑕᐅᓗᑎᒃ ᑲᒪᒋᔭᐅᔪᓐᓇᖃᑦᑕᕐᓂᐊᓕᕐᒪᑕ ᐃᓱᒫᓘᑕᐅᔪᑦ, ᒪᓕᒋᐊᖃᖅᑎᑕᐅᓪᓗᑎᒃ ᒪᓕᒋᐊᓕᖕᓂᒃ ᑲᒪᔪᓐᓇᑦᑎᐊᖁᓪᓗᒋᑦ ᑲᒪᔨᐅᕙᒃᑐᑦ ᐋᓐᓂᐊᖅᑐᓕᕆᓂᕐᒥ ᑲᒪᔪᓐᓇᑦᑎᐊᕐᓂᐊᕐᒪᑕ ᐋᓐᓂᐊᕐᕕᓕᐊᖅᓯᒪᔪᑦ ᐃᓱᒫᓘᑎᖏᓐᓂᒃ, "ᐅᖃᖅᑐᖅ ᑮᑦ ᐲᑐᓴᓐ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᓇᓱᖕᒪᑕ ᑲᒪᑦᑎᐊᕐᓂᒃᑯᑦ ᐱᐅᓚᑎᒍᑦ ᐋᓐᓂᐊᕐᕕᓕᐊᖅᐸᒃᑐᓄᑦ ᐊᒻᒪᓗ ᑎᓕᐅᕆᕗᑦ ᖃᐅᔨᔭᒥᖕᓂᒃ ᖃᐅᔨᑎᑦᑎᖁᔨᓪᓗᑎᒃ ᐊᒻᒪᓗ ᐊᑑᑎᖃᖅᑐᓂᒃ ᑐᓴᖅᑎᑦᑎᖃᑦᑕᖁᔨᓂᕐᒧᑦ. ᐱᖓᓲᓕᖓᔪᒃᑯᑦ ᐱᓕᕆᓂᖅ ᐃᓱᒫᓘᑕᐅᔪᒥᒃ ᓴᖅᑭᑎᔪᖃᖅᐸᑦ ᐃᑲᔫᑕᐅᓂᐊᖅᑐᑦ ᓴᖅᑭᑕᐅᓯᒪᕗᑦ ᐃᑲᔪᕈᒪᓪᓗᒋᑦ ᐋᓐᓂᐊᕐᕕᓕᐊᖅᐸᒃᑐᑦ ᐃᓱᒫᓘᑎᒋᔭᖓᓂᒃ ᑲᒪᑦᑎᐊᒃᑲᓐᓂᕈᒪᓂᕐᒧᑦ ᑲᒪᒋᔭᐅᔭᕆᐊᖃᖅᑎᓪᓗᒋᑦ.

ᑖᓐᓇ ᑎᑎᕋᕐᕕᒃᑖᓵᖅ ᐋᓐᓂᐊᕐᕕᓕᐊᖅᐸᑐᓂᑦ ᐱᔾᔪᑕᐅᕙᒃᑐᓄᑦ ᑲᒪᕝᕕᒃ:

  • ᖃᐅᔨᑎᑦᑎᕙᓪᓕᐊᕕᒃ ᐃᓱᒫᓘᑕᐅᔪᓄᑦ ᐱᔾᔪᑎᓕᖕᓄᑦ;
  • ᐃᑲᔪᖃᑦᑕᕐᓂᐊᖅᑐᑦ ᐋᓐᓂᐊᕐᕕᓕᐊᖅᓯᒪᔪᓂᒃ ᐊᒻᒪᓗ ᐃᓚᒌᓂᒃ ᖃᐅᔨᒪᓇᓱᖕᓂᕐᒧᑦ ᑲᒪᒋᔭᐅᔪᑎᒋᔭᕆᐊᖃᖅᑕᓄᑦ ᐱᔾᔪᓯᕐᓂᒃ;
  • ᐅᐸᒋᐊᖃᖅᑕᖓᓄᑦ ᑕᑯᔭᐅᔭᕆᐊᓖᑦ ᐅᐸᒃᑎᑉᐸᒡᓗᒋᑦ ᐱᓕᕆᕝᕕᖕᒥ;
  • ᐃᑲᔪᖅᐸᒡᓗᒋᑦ ᐊᐱᖅᑯᑎᓖᑦ ᐊᒃᑐᐊᔪᓂᒃ ᐱᔪᓐᓇᐅᑎᓄᑦ ᐋᓐᓂᐊᖅᑐᓄᑦ, ᐅᕝᕙᓘᓐᓃᑦ ᐃᓱᒫᓘᑎᖃᖅᐸᑕ ᑲᒪᒋᔭᐅᔭᕆᐊᖃᕐᓂᕐᒧᑦ ᐊᒻᒪᓗ ᐱᔨᑦᑎᕈᑎᓄᑦ;
  • ᐅᖃᐅᔾᔨᒋᐊᖅᐸᒡᓗᑎᒃ ᐊᑲᐅᙱᓪᓕᐅᖃᑎᒌᒃᑐᖃᕐᓂᖅᐸᑦ ᐋᓐᓂᐊᕐᕕᓕᐊᖅᓯᒪᔪᓂᑦ, ᐃᓚᒌᓂᑦ ᐊᒻᒪᓗ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᓄᑦ ᐱᔾᔪᑕᐅᔪᓂᒃ;
  • ᖃᐅᔨᓴᖅᐸᒡᓗᓂ ᐋᓐᓂᐊᕐᕕᓕᐊᓯᒪᔫᑉ ᐃᓱᒫᓘᑎᖏᓐᓂᒃ ᐊᒻᒪᓗ ᑲᒪᒋᓂᕐᒧᑦ ᐃᓱᓕᑎᑦᑎᐊᕐᓗᒋᑦ ᓈᒪᓇᖅᑐᒃᑯᑦ; ᐊᒻᒪᓗ,
  • ᐊᑐᓕᖁᔨᓂᕐᒧᑦ ᐱᓕᕆᕙᒡᓗᓂ ᐱᐅᓯᑎᑦᑎᒋᐊᕐᓂᕐᒧᑦ ᐋᓐᓂᐊᕐᕕᓕᐊᖅᓯᒪᔪᖅ ᑲᒪᒋᔭᐅᔭᕆᐊᖃᕐᓂᐊᓄᑦ ᖃᐅᔨᓴᓚᐅᖅᑎᓪᓗᒋᑦ ᐃᓱᒫᓘᑕᐅᔪᒥᒃ.

ᖃᐅᔨᔭᐅᔪᓕᒫᑦ ᑐᓐᓂᖅᑯᑕᐅᔪᑦ ᑎᑎᕋᕐᕕᒃᑖᓵᕐᒨᑦ ᑲᒪᒋᔭᐅᔪᒃᓴᑦ ᑐᓐᓂᖅᑯᑕᐅᔪᑦ ᐃᓄᖕᒧᑦ ᐅᕝᕙᓘᓐᓃᑦ ᐃᓚᒌᓂᑦ ᑲᙳᓇᖅᑑᑎᑕᐅᓂᐊᖅᑐᑦ. ᑐᓴᖅᑎᑕᐅᔾᔪᑕᐅᔪᑦ ᖃᐅᔨᒪᔭᐅᖏᓐᓇᕐᓂᐊᖅᑐᑦ ᐃᒪᐃᑦᑎᐊᖁᓪᓗᒋᑦ ᐋᓐᓂᐊᕐᕕᓕᐊᖅᑐᑦ ᐊᒻᒪᓗ ᐃᓚᒋᔭᐅᔪᑦ ᑐᓴᖅᑎᑕᐅᔪᓐᓇᕐᓂᐊᕐᒪᑕ ᐱᔾᔪᑎᒋᔮᓄᑦ ᑐᓴᖅᑎᑕᐅᔭᕆᐊᖃᓕᕈᓂ ᐃᑲᕐᕋᑦ 48 ᐃᓗᐊᓂ ᐃᓱᒫᓘᑕᐅᔪᒥᒃ ᐱᑎᑕᐅᓚᐅᖅᑎᓪᓗᒋᑦ. ᖃᓄᐃᓕᐅᕐᓂᐅᔭᕆᐊᓖᑦ ᐋᖅᑭᒃᓱᖅᑕᐅᓯᒪᔪᑦ ᐃᓱᒫᓘᑕᐅᔪᑦ ᑲᒪᒋᔭᐅᔪᓐᓇᖁᓪᓗᒋᑦ ᐱᓕᕆᔾᔪᓯᖅᑎᒍᑦ ᐱᓕᕆᓗᑎᒃ ᓄᓇᕘᒥ ᐊᐅᓚᑦᑎᔩᐅᔪᖅ ᐊᓐᓂᐊᖅᑐᓕᕆᓂᕐᒧᑦ ᐊᒻᒪᓗ/ᐅᕝᕙᓘᓐᓃᑦ ᐊᐅᓚᑦᑎᔨᐅᔪᖅ, ᐅᖃᖅᑎᐅᑲᑕᒐᔭᖅᑐᖅ ᐋᓐᓂᐊᖅᑐᓄᑦ ᐅᕝᕙᓘᓐᓃᑦ ᐃᓚᒋᔭᐅᔪᓄᑦ.

ᐊᑕᖐᑦᑎᐊᖅᓯᒪᔪᓂᒃ ᑲᑎᙵᔪᓂᒃ ᖃᐅᔨᒪᔾᔪᑎᒃᓴᓂᒃ ᐱᑐᐃᓐᓇᖅᑕᓕᒃ ᖃᕋᓴᐅᔭᒃᑯᑦ, ᕿᑭᖅᑕᓂ ᐋᓐᓂᐊᕕᖕᒥ, ᐋᓐᓂᐊᕕᓗᒃᑖᓂ, ᑐᔪᕐᒥᕕᐅᕙᒃᑐᓂ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᑕᑯᔭᐅᕝᕕᐅᕙᒃᑐᓂ ᐅᑕᖅᑭᕕᖕᓂ. ᐋᓐᓂᐊᕐᕕᓕᐊᖅᓯᒪᔪᑦ ᐊᒻᒪᓗ ᐃᓚᒌᖑᔪᑦ ᐅᖃᕈᓐᓇᕐᒥᔪᑦ ᑎᑎᕋᕐᕕᒃᑖᓴᕐᒧᑦ ᑲᒪᒋᔭᐅᕕᖕᒧᑦ ᐊᑭᖃᙱᑦᑐᖅ ᐅᖄᓚᐅᑦ 1-855-438-3003 ᐅᕝᕙᓘᓐᓃᑦ ᐅᕙᓂ patientrelations@gov.nu.ca. ᖃᐅᔨᒋᐊᒃᑲᓐᓂᕈᒪᓗᓂ ᐅᕗᖓ ᖃᐅᐃᒋᐊᕐᓇᕐᒥᔪᖅ www.health.gov.nu.ca.

###

ᑐᓴᒐᒃᓴᒧᑦ ᑐᑭᓯᒋᐊᕐᕕᒃ:

ᕌᓐ ᐅᐊᐃᓯᓐᒃ ᑐᓴᒐᒃᓴᓕᕆᔨ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

867-975-5710

rwassink@gov.nu.ca