Havaktingit

You are here

Manitoba nuutiqtait COVID-19 qalagjuarnikkut aanniaqtun qaffiujaakhaita naunaitkutait Nunavunmun

Maassi 17, 2021

Tuhaqtidjutikhaq

Manitoba nuutiqtait COVID-19 qalagjuarnikkut aanniaqtun qaffiujaakhaita naunaitkutait Nunavunmun

Iqaluit, Nunavut (Maatsi 17, 2021) – Atuliqtumi ublumi, Nunavut unniutiliqtuq 12nik aannialiqtunik COVID-19 qalagjuarnikkut ilitturijauhimajunik Manitobami. Hapkuat nutaat qaffiunikkut naunaitkutit ilaliutijauniaqtun Nunavutiup unniutidjutaani, ilaqaqlunilu pingahunik tuquhimajunik Nunavunmiunnik pijun talvannga Tisaipa 2020min uvanilu Januali 2021mi.

Nunavut Kavamanga havagumania naunaiqhimaraanginnarhimaluni tamainni pidjutini kiudjutimingni COVID-19 Qalagjuarnirmun. Una ilaqaqtuq ihuaqtunik unniudjutinik aannialiqtunik talvuuna nunagijaitigun, taimaalu havagutiqarlunik unniutinikkut uvunga kavamatuqatkunni titiqqidjutainnun pijaami aanniaqtun ihuittumik-qaffiujaakhainnik tammaqtaungittaanginnilu,” uqaqtuq Nunavutip Atanilluaq Nunallaani Aanniaqtailiniq Havakti, Dr. Michael Patterson. “Ilihimalutin, hapkuat nutaangungittun aannialaqidjutit atadjutihimangittullu tadjami taapkunaniluunniit hivuagun aannialiqdjutini COVID-19 Qalagjuarnirmi nunaptikni.”

Tunirhainiit aanniaqtuni COVID-19 Qalagjuarnirmin pihimajun Nunavunmiunnin hilataanin nunaptiknin pihimmaarniaqtuq atauhiillaaqtaqlugin naunaijarutainni. Una unniudjuti havaktauniaqtuq havaqatigiigutilugin aanniaqtailinikkut havaktiinni hivuraani nunaqaqtuni. Aallakkiikniit unniutinikkut havagutini tamaani Kanadami pidjutittaaqtuq kinguvaqtidjutinik Nunavunmi aanniaqtuni qaffiujaakhainni qaritaujakkuurutikkut. Nunavut Kavamanga piniarhimaanginnaqtuq qilamiujunik ihuaqtuniklu unniudjutinik ilitturipkaidjutinik.

“Hivumuudjutigihimmaaqhugu nunarjuami aannialaqidjuti, ilihimajugun aallanguqtirutiqarniaqtuq kituni kiudjutiptikni, ilaujullu nutaat qanuqtun unniudjutikkut aanniaqtunik,” uqaqtuq Hivuliqti Joe Savikataaq. ‘Aulahimmaarniaqtugun nakuutqijaujunik havagutigilugit pipkainikkut qajangnaidjutikhainni inuuhirittiarutikhainnullu Nunavunmiunnun. Nagligidjutivun tujuqtaujuq tamainnun Nunavunmiunnun ilaijaqhimajunun COVID-19 Qalagjuarnirmin, uumatiptikniittuhi ihumaptiknilu.”

###

Tuhaqtipkainikkut Uqaqvigiyaqhaq:

Chris Puglia
Atanngujaullaktuq, Tuhaqtidjutinun
Havagviat Aanniaqtailinirmut
867-975-5949
cpuglia@gov.nu.ca

Cate Macleod
Tuhaqtitaujuqhanut Titiraqtia Hivuliqtimun Savikataaq
867-975-5059
cmacleod@gov.nu.ca