Havaktingit

You are here

Inungnun aanniaqtailinikkut kikliqarutit ajurnaivjaktun Kivallirmi

Iipu 06, 2021

Tuhaqtidjutikhaq

Inungnun aanniaqtailinikkut kikliqarutit ajurnaivjaktun Kivallirmi

Iqaluit, Nunavut (April 6, 2021) –Ublumi, Nunavutip Atanilluaq Nunalaani Aanniaqtailinikkut Havakti, Dr. Michael Patterson, uqaqtait aallanguqtirniit inungnun aanniaqtailinikkut qanuriliurutinun Kivallirmi.

“Avatquhimaliqtuq pingahuni havainirni talvannga aannialaqidjutimik COVID-19 qalagjuarnirmik naunaiqtainingani Arviani. Piqangittuq aanniaqtumik nunallaami talvannga Maatsi 20min taimaalu piittuq COVID-19 qalagjuarnirmik naunaiqtauhimajuq avikturhimanirmi,” uqaqtuq Dr. Patterson. “Pidjutaanin tadja qanurinninginnin, qajangnaittuq ajurnaijaffaarutigijaami inungnun aanniaqtailinikkut qanuriliurutinik tamainni nunallaani Kivallirmi. Taimaatun ilangin inungnun aanniaqtailinikkut pitquidjutit atulirniaqtun aqagu, apirijavun nunallaamiut qilanaaruiqlutik haamlatkut timiqutiillu havaktaujukhanik havagiamingnik ihuarhanikkut atuqtipkainikkullu nutaanik qanuriliurutinik.”

Arviani, ivjarutit atuqtauraanginnaqtukhaujun, iglum iluani katimaniit tallimaujukhaujun inuit, ilaujullu iglumiutaqatigiit. Atulirluni April 7, 2021, ajunaijarhimajun qanuriliurutit nunallaami ilaqaqtun:

  • Iglun iluani katimaniit inungnun nunallaani katimaviinnik, ilaujullu haakirviit angaadjuvillu, pipkaqtaaqtun 50nik inungnik imaaluunniit 50% avvaani igluqpaup naamadjutinganun, naliak ikitqijaujuq.
  • Hilami katimajut talvunga 50nun inungnun ahiqpaniillutik pittaaqtun.
  • Atauhiinnarnik iqaijarutinik atimalutik ivjarutinik pittaaqtun humilu iqairhainikkut piviit pipkaivingni.
  • Hivitujumik munaqtauviit, aulraanginnaqtuni munaqtauviit, aanniaqtunullu najurviit munarhitkullu pipkaqtaaqtun kikliqaqtumik malruuknik pulaaqtinik qanitqijaujunin ilagijaminin atauhirmun tahamanittumun. Ivjarutik atuqtaujukhat pulaaqtinin; nutaqqat ukiulgit 2-4 atuqujaujuugaluat ivjarutinik.

Atulirluni April 12, 2021, iliharviit Arviani nuutirniaqtun Qanurinninganun 2mun uvani 2020-21 Angmaqtirnikkut Hivunikhami Nunavunmi Iliharvingnun.

Nutaat inungnun aanniaqtailinikkut qanuriliurutinun ilainnun Kivallirmi nunallaanun atulirniaqtun April 7, 2021 aajjikkiigutiniaqtun Nunavunnun, tukiqarluni:

  • Iglum iluani nanminikkut katimaniit amigaiqjuummiqtun 15nun ilaujullu iglumiutaqatigijain; iglun iluani katimaniit inungnun nunallaani katimaviinnik, ilaujullu angaadjuviit, pipkaqtaaqtun 100nik inungnik imaaluunniit 75% avvaani igluqpaup naamadjutinganun, naliak ikitqijaujuq.
  • Inungnun naluujarviit, iqaijarviit, ulapqiviit, qunngiarviit, ingilrarnitanik tutqumaviit makpiraaqarviillu angmaqtaaqtun amigainnikkut kikliqarluni 25nik inungnik imaaluunniit 50% avvaani igluqpaup naamadjutinganun, naliak ikitqijaujuq. Katimalutik katimadjutit kikliqaqtun 25nun inungnun.
  • Haakirviit angmaqtaaqtun amigainnikkut kikliqarluni 50nik inungnik imaaluunniit 50% avvaani igluqpaup naamadjutinganun, naliak ikitqijaujumi.
  • Igluqpait, tamaita hilami ulapqiviit, nunallaami minnguiqhirviit, nunamilu minnguiqhirviit angmaqtaaqtun.

Kapurhirnikkut kapurhiriaqturviit angmaumajun Nunavunmi. Hivajaqlugin munarhitkut takujaujumaguvin. Kapuuti qajangnaittuq, nakuujuq nakuutqijaujuqlu ikajuutikhaqqut COVID-19 qalagjuarnirmin.

Nutaanun kangiqhidjutinun tadjam kavamatkunnin aanniaqtailinikkut kikqarutainni, takulugu: https://www.gov.nu.ca/health/information/nunavuts-path

Nutaanun kangiqhidjutinun COVID-19 qalagjuarnirmi kapuqhirnirmun pipkaidjutainni, takulugu: https://gov.nu.ca/health/information/covid-19-vaccination.

###

Tuhaqtipkainikkut Uqaqatigiviqhaq:

Chris Puglia
Atanngujaullaktuq Tuhaqtipkaijiit
Aanniaqtailinirmun Havagvia
867-975-5949
cpuglia@gov.nu.ca