Havaktingit

You are here

Qalagjuarniq-19 GN Ilitturipkaidjutit - Qitiqqautijuq 29, 2020

Iipu 29, 2020

Hivuliqtiup nutaaq ilitturipkaidjutaa:

Ublukkut. Piqangittuq huli naunaiqhimajunik pinahugijaujunikluunniit COVID-19 qalagjuarnirnik Nunavunmi.

Ublumi, atauttimun amigaitilaanginni inuit ihivriuqhiqtaujun ublumimun unaujuq 580. 219 inuit tadja huli ihivriuqhiqtaujun imaalu 361 inuit ihivriuqhiqtauhuiqtun.

Kavamatkunnin tuhaumapkaidjutikkut, una inungnun aanniaqtailinikkut amirarnarhidjuti kinguvaqtitaujuummiqtuq uvunga May 14mun, 2020.

Amitaittun ilihaqtun tadja pihimaliqtun hivulliqpaangjujunik aihimavingni iliharutikhamingnik. Hapkuat iliharutikhat ilaqaqtun havaktakhanik hulidjutikhaniklu atauhirmun malruungnulluunniit havainirnun, hakugikhautikhat ajuirhimajakhanik taiguqnirni, nampaliqinirni, aanniaqtailinirni inuuhiriknirnikkullu.

Ilagiiktun niriuktukhat pijaami iliharnikkut havagutikhanik uumani nungulvikhaanun iliharnikkut ukiunganun. Itqaumaqujatka angajuqqaat ilihaqtullu hapkuat piliuqtauhimajut ajuirhaffaartittinikkut ajuiriiqhimajait ilihaqtun qaujihaqtaulimaittullu ilihaijinin taapkununga kingulliqpaangujunun iliharniup naunaitkutainnun.

Pidjutigiplugin Nunavut Kavamanga, qujagiqpiaqtatka tamaita iliharvingni havaktiit ikajurutainnun ilihaqtunik hamani naunauqtuni hivunikhani.

Kanadami, avikturhimanirniit naunaijaqliqtait hivunikhatik piijaqtirnikkut kikliqarutainnik, taimaatun apiriniaqtara Dr. Patterson uqautigilugu naittumik hunanik hulijakhanik hamani Nunavunmi taimailiuqtinnagu.

Havagumajugun pipkainikkut Nunavunmiutat qajangnaittumiittaanginni inuuhiriktaanginnilu. Tamapta huliluta hulijakhaptiknik.

Atanilluaq Inungnun Aanniaqtailinikkut Havaktimin nutaanik-ilitturipkaidjuti

Amigaittuhi ilihimajuhi, ilangin nunagijaujun Kanadami aullaqtiliqtun aullaqtirnahuaqtulluunniit qakugunnuaq ikittuujukkut piijaqtirnikkut kikliqarutimingnik atuqhimavaktun mikhilaaqtinniarhimanikkut COVID qalagjuarnirmi aktilaanganik. Ublumi uqarumajunga naunaiqpiarlugu qanuqtun hulijakhanik pijaangani taimailiuqtinnata. Pilik pingahunik qanuriliurutikhanik angumajakhavun hivuagun ihumagiliqtinnata akhuuqpallaaruiqtirnikku atuqtaujun kikliqarutiptinik nunaptikni. Hapkuat hamma:

  1. Pihimaliqtukhaujugun nunaptikniittumik qaujihainikkut angummadjutiknik. Una tukiqaqtuq pijaakhaptiknik atuqtipkailirnikkut qilamiujunik, itquumajunik, angijuniklu COVID-19 Qalagjuarnikkut ihivriuqhinikkut pinahuarutinik Nunavunmi;
  2. Piqaqtukhaq angijunik naunaitkutinik aktilaanginni COVID-19 Qalagjuarnirmi ikikliliqtun hivuraani nunagijaujuni taapkununga Nunavunmiutat aullaaraanginnarvigijainnun; imaalu
  3. Pihimaraanginnaqtukhaq piqanginnirmik COVID-19 Qalagjuarnirmik Nunavunmi.

Taimainninga hapkunani qanurittukhani pidjutili ajurhaqtumik tunihinikkut naunaiqhimajunik ublukhanik angmaqtiffaarutikkut, kihimi malingniit hapkunani qaurittukhani pijukhaq mikhilaaqtihimanikkut qajangnarutiqaqtunik inungnun aanniaqtailidjutainnun qajangnaidjutainnullu. Ilihimajukhaujugun Nununavunmiutat aullaaqtun hilataanun nunaptingnin aullaaqtaaqtun qajangnaittumik, pijukhaujugullu kiujaami qilamik ukununga qujaginnaq naunaiqhimajunik COVID-19 Qalagjuarnirmik iluani Nunavunmi.

Ilihimajunga inuit havagiaqturumaliqtun, pulaaqlugin piqpagijamingnik, ilaulutiklu inungni huliluqaarnirni. Kihimi, piijaqtiruptigin hapkuat kikliqarutit qilamivallaaq, angiklihaqtaqqut qajangnarniq Nunavunmiunnun. Qajangingitkupta qanuqtun utiuffaarutiptiknik hapkunanga kikliqarutiptiknin, taimaatut pipkaittaaqtugun piijaqtipkainikkut havakpiaqpagutin qanuriliurutiptikniklu atuqhimajavun qaangiqhimajuni 7ni havainirni.

Anginiqaqpiaqtuq aulahimmaaqtukhaujugun taimailiurnirmi: inungnin ahiqpaniilluta, aihimaluta aihimattaarupta, uaqattaqlugillu algatit. Hapkuat qanuriliurut aulahimmaaqtun nakuutqijaujun hapummidjutikhat COVID-19 Qalagjuarnirmi, nakuutqijaujullu hapummidjutinik ilaptiknik, nunallaaptiknik, nunaptikniklu.

 

Ilaupluni Nunavut Kavamangani (GN) havagutainni hapumminikkut Nunavunmiunnik uumannga qajangnaqtumin COVID-19 qalagjuarnirmin, GN-kunni Havagviit atuqtipkaliqtait hapkuat:

Aanniaqtailinikkut Havagvia

Pidjutit aanniaqtailinikkut munaqhitikhanik havagutit hailihimaraanginnarniaqtun tamainni nunallaani 7ni ubluni havainirmi. Tamaita amirakhuutaungittut takujaujumajut naunaijaqtauvangniaqtut ubluq tamaat. Qilamik piyaanirit qilamiurnikkut aaniaqjuaqtunun aanniaqtilinirmun munaqhijut kivgaqtuutait aulahimaarniaqtut piinarialgit 24ni ikaarnirni ubluni, 7ni ubluni havainirmi. Tamaita inuit apirijaujut hivajaqujaujut munaqhiliaqtinnatik.

  • Iqalungni, inungnut aanniaqtailitikhat, amigakhuqtunut igluangat unalu aanniaqtunik ihivriuqhirvik angmaqhimaniaqtuq.
  • Nutarannuanik ihivriuqhirviit, hingaijunik ihivriuqhirviit ukuallu kapuqhirniq havautikhat ikajuutikhanik aullahimmaarniaqtut huli tamainni nunani Nunavunmi.
  • Taaktit nunallaanut aquivangniaqtut huli. Una pilimaitpat, tiviikkut uqaqatigiingniaqtut hivajautikkulluunniin.

 

Qaffiujun

Tamatkiutit (Tamaita Avaliingarnirni Najurviinni)

Tingmijuq Qanurittuq

Inuit Avaliingaaqtitaujun talvannga April 28mi

Taaktiliaqnikkut Tingmidjutit

206

Inuit Inmikkuuqtut

136

Tamatkiutit

342

 

Tingmijut utiqtun naunaikutit:

Aullarvia Ublua

Amigaitilaangin Tingmijun Avaliingarvingnin

April 29

38

April 30

15

May 1

19

May 2

6

May 3

14

 

Ihariagijauqpiaqtuni Havaktini Tukhirutin

April 28min, pilik 786 tukhirutinik, 597 taapkuat ihariajijauqpiaqtunin havaktinin tukhirutiujun.

Tukhiutait Qanurinniit

#

%

Angiqtaujun (ilaujun ihariagijijauqpiaqtun ihariagijaulluangittullu)

646

82.2%

Qingijaujun

99

12.6%

Ihumaliurutaujut huli

41

5.2%

Tamatkiutit

786

100%

 

Ilinniaqtuliqijikkut Havagvianin Havagutait

Ilihaqtuni Ilihautikhait

  • Amigaittun ilihaqtun pijariiqhimaliqtun hivulliqpaanik ilihautikhanik ilihaijimingnin.
    • Amigaittun iliharutikhat ilaqaqtun iliharnikkut-aihimapluni havaktakhanik hulidjutikhanilu atauhirmun malruuknulluunniit havainirnun.
    • Iliharutikhat turaangajun hakugikharutikhakkut ajuirhimajuamingnik taiguarnikkut, nampaliqinikkut, aanniaqtailinikkut inuuhiriknikkullu.
    • Piqaqtuq ilaqaqtunik titirakkut qaritaujakkuuqtaaqtukkullu havaktakhanik, pidjutingnai ilihaqtumik qanurinninginnilu.
  • Ilihaqtun ilagiiktullu niriuktukhat pijaamingnik iliharutikhanik nungulvikhaanun iliharnikkut ukiunganun.
  • Iliharutikhat piliuqtauhimajut ajuiffaarutikhanik ajuiriiqhimajamiknik qaujihaqtauffalimaittullu ilihaijimingnin talvunga kingulliqpaangujunun iliharnikkut naunaitkutainnun.
  • Havagvi tunihimajuq aulahimmaarutikhanik iliharnikkut maliktakhanik tamainnun iliharivingni havaktinun, taimaatun naunaijaqhimajuq qaffiujunik qanuqtun iliharivngni havaktiit uqaqatigijaaqtain ilihaqtun ilaillu.
  • Havagvik qujagijumajait tamaita iliharvingni havaktiit ikajurnikkut ilihaqtunik ilainniklu uvani naunaqtumi hivunikhami.

Ilihalihaaqtut Nutaqqat Nutaqqaniklu Ikajurutinik

·       Malikhugin hivulliurutait Atanilluaq Inungni Aanniaqtailinikkut Havaktimin, tamaita nutaqqiqivin umikhimahimmaaqtukhaujun kihianun tuhaffaarutaanun.

·       Umikhimanirmi, Ilinniaqtuliqinikkut Havagvia akiliqtuihimajuq akiliuqtuihimmaarniaqtuqlu tamainnik pivaktunik O&M maniliqtuutinik taapkununga laisiqaqtunun nutaqqiqivingnun.

o   Una pidjutikhaq angijumun ilanganun uvani tatqiqhiutmi aulapkainikkut akiinnik nutaqqiqivingmi.

o   Taimainman nutaqqiqivingni umiktirviit qilamiuqpangmata niriuqtaungimatalu, ilinniaqtuliqijikkut havagvik akiliqtuivaktuq angajuqqaani akiliqtakhainnik tadjakaffuk pipkainikkut nutaqqiqiviit taimaatun akiliqhimmaaqtaamingnik havaktimingnik, pipkaijaamik pivikhanik nutaqqiqiviit uukturiamiknik kavamatuqatkunnin ikajuutikhanik, imaatun Kanadami Amirarnarnikkut Akiliuhiakhakkut Ikajuutimik. Tamatqiutikkut akiinnik uumani maniliqtuutikkut tunihimajuq imaatun $885,000.

·       Ilinniaqtuliqijikkut Havagvia havaktiit upalungaiqhimajut ikajuriami nutaqqiqivingnik uuktuutainni hapkununga kavamatuqatkut pinahuarutinun, uqaqatigihimajavullu tamaita nutaqqiqiviit uumuuna.

·       Havagvik qinirhiahimmaaqtun aallanik qanuriliurutikanik ikajurnikkut nutaqqiqivingnik, ilaujullu aturniarutikhainnik kavamatuqatkunnin maniliqtuutikhanik.

 

Pivalliajuliqijikkut Ingilrajuliqijikkullu Havagviani Havagutait

Uqaqtauhimapluni April 22mi, Pivalliajuliqijikkut Ingilrajuliqijikkullu Havagvia (EDT) havaqatigijait atauttikkut Nunavunmi Pivallialiurnikkut Katimajiit (NDC) piliurnikkut aanniangittunun matukhanik inuit atuqtakhainnik. Una pidjutijuq hivulliqpaakkut maniliurutikkut imaatun $35,000.

Nunavut Kavamanga piliurutaa aanniangittunun matukhanik aulahimmaaqtuq; ublumimun avatquhimajun 2,000 matukhat piliuqtauhimajun nunallaanin mirhuqtinin.

Turaangania uumani piniarhimadjutimi taimaatun tunijaami aularaanginnaqtunik pikhanik matuurutikhanik pipkaijaami Nunavut maliktipkaqlugu uumunga nutaangutqijaujumi Transport Canada-mi pitquidjutaani tingmijukhanun, taimaalu pipkainikkut turaangajun kituujun imaatun aanniaqtailinikkut havaktiungittunun hivulliujuni havaktinun, Inirnikhanun ukunungalu Nunavunmiunnun piqariikhimajunik aanniarutinik aturianginnik matuurutinik pidjutiujuq ikajuutimik aallamik hapummidjutikhamik.

Ajurnaittuq maliktakhaq piliuriami uaqtauttaaqtumik aanniangittunun matukhamik takujauttaaqtuq tamainni uqauhini uvani: https://gov.nu.ca/health/information/covid-19-novel-coronavirus. Maliktakhaq pihimajuq Kanadaup Kavamanganin taimailiuqtaaqtukkut matukhami iliqtirutaanin.

Pivalliajuliqijikkut Ingilrajuliqijikkullu Havagvia piliuqhimajuqlu maliktakhamik qanuqtun aturutikhainnun matukhani piliuqtauhimaliqtun Nunavut Kavamanganin. Maliktakhat pihimajun tamainni uqauhini takujauttaaqtuq uvani: https://gov.nu.ca/health/information/covid-19-novel-coronavirus. Maliktakhaq tunijauniaqtuqlu ilaliutihimaluni tujuqtaujunun matukhanik nunallaanun.

Aanniangittunun matukhat tunijun ikajuutikhanik hapummidjutinun. Himmautigingitait inungnin ungahikhimadjutinik aallanikluunniit hapumminikkut qanuriliurutinik.

 

Qulliq Alrujaqtuqtunik Ikumadjutiit

QEC hailihimapkaijuq ajurnaittunik akiliqtuidjutikhanik inungnun havagviujunullu pauwatuqpaktunun taapkuat akilimaiqtut tatqiqhiutini alrujaqtuqtukkut atukkamiknik tamaat.

QEC-kut piijaqhimajaillu tamaita hivuagun iliuraqtauhimajut pauwatuutikkut kikliqarutit.

Kuapuriisitkut kiplimaitait pauwatuutit iliuralimaittullu pauwatuutikkut kikliqarutikhanik talvunga qakugu naunaijaqtauninganun.

Aallanik ilitturikaidjutikhanik, takulugu: https://www.qec.nu.ca/

 

Nunavunmiut aanniaqtailidjutait atauttikkut munaridjutigijaqqut! Itqaumaluhi: uaqlugin algatin qaangillu hunavaluit, inuqarnirmi ahiqpaniitpaklutin, tuhaalugin uqaudjutait anniaqtailinikkut havaktinin, aihimalutillu aannialaqiguvin.