Havaktingit

You are here

GN-kut havaktain ihuirutijun iqualaaqhimajumin Uqhuqtuumi

Maassi 28, 2022

Tuhaqtipkaitjutikhaq

GN-kut havaktain ihuirutijun iqualaaqhimajumin Uqhuqtuumi

Iqaluit, Nunavut (Qiqaijalirvia 28, 2022) – Ublumi, Ministangat Nunalingni Kavamatkunillu Pivikhaqautikkut David Joanasie kiujuq tammaqtumun huun’ngiqhuni uuminga NCC-kut havagviat iglukpak iqualaarman talvani Qiqaijalirvia 26, 2022, havagvigaluangin ilainnin Nunavut Kavamanga (GN) havagvigaluanginnun Uqhuqtuumi.

“Ubluinni havangnaitillugu, iqualaaqtuqaqtuqw Uqhuqtuumi huun’ngiqhuni kavamatkut iglukpaa iluaniittunullu hunavalungnun,” uqaqtuq Minister Joanasie. “Una NCC-kut iglukpaat havagviugaluaq tuhaqtidjutinun qaritaujakkuurutinullu havagvilluaq nunallaami havagviuvlunilu havaktunun ikittuni GN-kun havagviinun. Qujagijumajatka tamainnun havaktinun havakpiaktunun ihuaqhaivlutik ihariagijaujunun havaktaujakhanun nunallaamun tahapkunungalu ajuqhautiniktunun inmik pivaktainun havakpaktunun ajuqhautiqarjuaqtillugin tadja.”

Ilagivlugu GN-kut kiudjutikhamun upalungaijautainni, ihivriurutaa tamainnun iluani hilataanilu pidjutainun uumungatammaijunun iglukpangmik havagviuhimajumun atuliqtainun. Havaktiit ikajuutikhallu havaktauniaqtun tikiliqtuni ubluni Uqhuqtuumun ikajuriami ihuaqharlugin ihariagijaujunun havaktauvaktunun nunallaami. Havaktaanginni aihimalutik ihuaqharniaqtain tahapkununga GN-kuni havaktinun pittaarumik.

Una NCC-kut iglukpaat atuqtauhimajuugaluaq taimaa Nunavut Kavamangata (GN) atulluaqhimajuq tuhaqtipkaidjutinun qaritaujakkuurutinun auladjutinun havagvilluaq nunallaamun, iluaniittuugaluit qaritaujakkuurutilluat aulajaami, havagviinnun, nunallaami naunaitkutikhanun tutquumavia, qaritaujakkut auladjutikhanun, katimaviuvlunilu havaktaujanun nunallaamun ukunatun hivajautikkut piksasuutigullu katimavaktunun.

Aallat nutaanguqhimajunun naunaiqhidjuytin ajuqhautiqaliqtunun GN-kut havaktainun nunallaamiinungnun tuhaqtipkaidjutiginiaqtain pigumikkik. Naunaitkutikhanun tadja ajuqhautinun havaktaujanun Uqhuqtuumi, qaritaujakkut takujakturlugu www.gov.nu.ca.

###

Tuhaqtipkainikkut Uqarvikhat:

Sierra LeBlanc
Ikajuqtit/Aulapkaiji, Tuhaqtipkainikkut
Kavamaliqijitkut
867-975-6004
sleblanc@gov.nu.ca

Suleikha Duale
Tuhaqtipkainikkut Ajuittiaqhimajuq
Nunalingni Kavamatkunillu Pivikhakautikkut
867-975-5406
sduale1@gov.nu.ca

 

GN-kut Hanaqidjutait Nutaat Tuhaqtitaujukhat, Uqhuqtuuq

Maatsi 28, 2022

Aanniaqtailinirmut Havagvianin nutaaaq tuhaqtitaujukhaq:

  • Nunallaap Inungnun Munarivia huli hulaqutijauhimangittuiq.
  • Nunallaami Munarhitkut angmaumaniaqtun ilangit kihimi hanaqidjutit ikilihimaniaqtun pidjutainnin hivajautinun-alrujainnun, kajumiktukkuurutit alrujaqtukkuuqtullu hanaqidjutit imaatun Meditech atuliqmaiqtun.
    • Havaktiit tunihimmaarniaqtun hulidjutikhanik kiudjutigilugillu nunallaani ihariagijaunun atuqlutik nakhaqtaqtaaqtunik hivajautinik ukuninngalu titiqqainnakkut titiraqarviit.
    • Munarhiliarvikhat, kapurhiqtauvikhat munarhiliarvikhallu aulahimmaarniaqtun nutqaqhimaittumik.
    • Iksuliirutit aulahimmaaqtun, kihimi kinguvaqtinniarungnarhijun taaktiup ihivriurutainnik taapkuat alrujaqtuqtun hanaqidjutit ihuarhaqtauninginnun.
    • Aanniaqtailinirmut Havagvia tujuqliqtun mikijunik qaritaujaliqidjutinik taapkuninngalu ilitturihimajakhanik tutquumavinnuanik pijaaffaarninginni havaktiit uumunga Meditech aallanullu alrujaqtuqtunik hanaqidjutinun.

Ilinniaqtuliqijikkut Havagvianin nutaaq tuhaqtitaujukhaq:

  • Tamarmik Quqshuun Iliharvik unalu Qiqirtaq Angajukhiinnun Iliharvik aulahimmaarniaqtuk mikijumik piqangittumikluunniit aallanguqtirutinik auladjutainnun.
    • Hanaqidjutikhat hivuagun tunihimajun Uqhuqtuumi iliharvingni havaktiinnun atuqtakhat COVID-19 qalagjuarnikkut umikhimadjutini hailihimaniaqtun havaktinun pijaanginnik GN-kunni qaritaujakkut-titiqqidjutainni ukunungalu Ilihaqtunun Ilitturidjutainnun Pidjutaanun.
    • Hivajautit, tutquumaviinni pidjutait ukuallu CCTV pidjutait huli aulahimmaaqtun hulaqutauhimangittullu iliharvingni.
    • Qajangnaittukkut, Ilinniaqtuliqijikkut Havagvia paannariliqtaa Nunalingni Ilinniaqtuliqijikkut Katimajiit iliurarhutik pillaktumik ikualaaqtukhakkut amiridjutinik tamainnuk iliharvingnun, aullaqtirluni Hivulliunmi 5mungaqqat.

Maligaliqijikkut Havagvia nutaaq tuhaqtitaujukhaq:

  • Tamatqiutivajakhimajunik Maligakkut Hanaqidjutini Katimajviit auladjutait niriuktaujun aulahimmaarlutik nutqaqhimaittumik. Kinguvaktinniarungnarhijun ilanginni hanaqidjutini, ilaujun maniliqnikkut havagutait, maligakkut ikajuutikkut uuktuutit, ukuallu maligakkut ikajuutikkut angirutikkut havagutait.
  • Una Nunallaami Itiqtaliqidjutikkut Havakti Uqhuqtuumi havakhimmaarniaqtuq ungahiktukkut inungnik naunaijarnikkut qanurittaakhainnik talvunga naunaijaqhimajumik miitiqvikhaq ihuarhaqtaunianun. Hulaqutiqalimaittuq inungnun maligaqaqtittihimajunun.
  • Maligakkut Ikajuqtiit havagumajuq pipkainikkut aulahimmaaqtunik, kajumiktunik, nakuujuniklu pittaarnirnik Maligaliqijikkut Havagvianun hanaqidjutainnun Nunavunmiunnun.

Pivalliajuliqijikkut Ingilrajuliqijitkullu Havagvia nutaaq tuhaqtitaujukhaq:

  • Upautipluni Akhaluuhiqijikkut hanaqidjutait Uqhuqtuumi nutqangajun tadja, ilaujullu tuniurharniit Akhaluuhiqinikkut Laisikhanik ukuallu inungni kinaujaakhaita naunaitkutait piannannuat, ukuallu akhaluuhiqinikkut uuktuutit.
  • Uqhuqtuurmiutat takujaaqtaat www.gov.nu.ca/motorvehicles qaitaujakkulluunniit titiqqiluni MotorVehicles@gov.nu.ca pijaami hapkuninnga hanaqidjutinik:
    • Akhaluuhiqinikkut Laisikhat Nutaanguqtirnikkut.
    • Inungni Kinaujaakhaita Piannannuat Nutaanguqtirnikkut.
    • Akhaluutini Atiliurutikkut Nutaanguqtirnikkut.
    • Tukhirutit Akhaluuhiqihimavangnikkut Tititqqainnik, Akhaluutini Qinirhianirnik, Piaqqulaqinirmin Unniudjutit.

Inulirijikkut Havagvia Nutaaq Tuhaqtitaujukhaq:

  • Pijaami Inulrijikkut Havagvia Uqhuqtuumi, hivajarlugu:
    • 867-222-3906 uqaqatigijaami inuliriji havakti Uqhuqtuumi.
    • 1-844-392-4453 uqaqatigijaami nunaptikni-tamaat havakti.
  • Uqaqatigijaami Ikajuuhialiqiji havakti (IAW) Uqhuqtuuqmi, hivjaqlugu:
    • 867-202-4194 uqaqatigijaami Ikajuuhialiqiji havakti hivajaqtakhaq.
    • 1-800-661-0845 uqaqtigijaami avikturhimanirmi havagvik.
  • Aullaqtilirluni April-mi ikajuuhiarutikhat utirniaqtun atuqtauraanginnaqtunun naunaijarutinun. Inuit upaktaaqtun Ikajuuhialiqinikkut Havagvingmun uqaqatigijaami Ikajuuhialiqiji iniqtiriami ihariagijaujun titiqqat. Akiliuhiarutit tujuqtaniaqtun ungahiktukkut talvannga avikturhimanirmin havagvingmin, hailihimaniaqtuqlu talvunga-niuvvaavingmun.