Havaktingit

You are here

Hivuliqtikhanut Ajuirjuummigutikhamingnut Ilihautikhaq

Hunaujuq Hivuliqtikhanut Ajuirjuummigutikhamingnut Ilihautikhaq?

Nunavut Kavamanga (GN) pidjutilihaaqtaat Hivuliqtikhanut Ajuirjuummigutikhamingnut Ilihautikhaq 2015 mi naujuummirianggani hakugingnikhainniklu hivuliqtikhanut kivraqtuijaangginnik inungnut.   Ilihautikhaq ilaliutilik amigaittunik ajuiqhajakhaujunik havaami ayuirjuummiraimingniklu pivikhaqariami hivuliqtikhanik inungnut kivraqturiamingnik tamainni havaani.  Ilihautikhaq pidjutihimajuq Inuit hivunikhaliurutikhaitatigun Nunavut Kavamangalu Hivuliqtikhanut Iniktirijaamingnik Nakuuqpiaqtumik Atuqhutik. 

Hivuliqtikhanut ilihaidjutikhaa pipkaidjutijuq amigaikjuummigahuaqhugit Inuinnait havaktikhanik GN kunni ilaliutiplutiklu kitulluanik ayuiqhaigutikhait havaamilu ayuiqjuummigutikhainnik inmik havaktaalaqijaangginni Nunavut Inuit.

Qanuqtun ilihaqtittiniaqqat Hivuliqtikhatigun?

Hivuliqtikhanut ilihaidjutikhat pipkainiaqtuq ilihariamingnik GN  havaktiit pinggahuni ilihagutikhani (series nik taivagaat):

  • Ajuiqpallialiqtukhanut Hivuliqtikhat - 7 ni pingahuni ubluni ilihagutikhat
  • Atan’ngujakhanut - 7 ni pingahuni ubluni ilihagutikhat
  • Atan’ngujalluat - 6 ni pingahuni ubluni ilihagutikhat

Hunaujuq GN Hivuliqtikhanut Nakuujumik Iniktigutikhait?

GN kut piliuqhimayut ihuaqhakhimajumik Hivuliqtikhanut Nakuujumik Ilihagutikhainnik atiqaqtuq “Uvagut Qanuqtun Pivakhimajuktukhaujugut” talvaniitunitun Inuit hivulinakhaliurutikhainni.   “Uvagut Qanuqtun Pivakhimajuktukhaujugut” takudjutaujuq niriugijaupluni hivuliqtikhanut idjuhiit atuqpaktakhainniklu atan’ngujalluat havaangginni GN kuni, talvanga atan’ngujanit atanikpakjuanut.   Ilaliutiqaqtuqlu naunaittumik idjuhikhanut taimaa itukhauyukhaungmatta tamaita GN havaktiinniit.

Kina ilauniaraluaqqa ilaujaami tamainni ilihagutikhani?

Ilaujaami piqaqtukhat tamaini ilihagutikhani imaa ittun:

  • Ajuiqpallialiqtukhanut Hivuliqtikhanut: Ilaujukhat hunamut havaamiluunniit atan’ngujaujut tikiutinggittuni malruungni ukiuni havaamingni akhuuqpaktutlu havaktiit atan’ngujangngugumajut malruungni ukiuni.   Ilaujut munarijaqaqpagungnaqhijut hivuliqtiit havaangginnik kihimi munarijanngaqhimaittuq huli aadlanik.
  • Atan’ngujat: Ilaujut atan’ngujauvaktut malruuni ukiuni havaamingni havakpakhimajutlu hunamut atan’ngujat upalunggaiktut atan’ngujaujumaplutin hivuni qilamik. Amigaitqiat ilaujut piqaqtukhat atan’ngujait havakpakhimajukhat atan’ngujat munarijaqangniitnik, havaktittilihaaliqtukhatigunlu pivakhutik munarijaqaqhunilu ukiumi atauhirmi naunaipkaqtivakhunilu qanuqtun havakpagiaqhainnik havaktiit. 
  • Atan’nguyalluat: Ilauviqaqtaaqtut aulapkaijit, avikturviinni aulapkaijit, atan’ngujalluat katimajiinni, nutaatlu ikajuqtiujut tugliujunut ministanut (ADM mik naunaittut) tugliujutlu anggijuqqaat (VP nik naunaittut).

Kina ilihaqtiuniaqqa?

Ilihaudjut kaantraaktittauniaqtuq ajuittumik havakpakhimajunitlu ilihaiviujut kampani.  Inirnikhat, Inuinnait hivuliqtiit GN kutlu kitumi ilihaqtaujumi ilauquniaqtut taapkuat uqaqtiulutik.

Qakugu Hivuliqtikhanut ilihaidjutikha aullaqtingniaqqa?

Aadlatkiiq ilihagutikhat pidjutiniaqtut ukiung’ngugaikpat. Tamaita ilihaidjutikhat ilihaqtitaujukhat titiraqtauhimayut GN kut Ilihaidjutikhanut Tatqiqhiutaanni takupkaqtitauvakhutiklu iluani GN kut havaktiinnut. 

Naunaittiagumaguvit atiliuriangni ilihaidjutikhanut, talvunggaulutin GN kut Ilihaidjutikhanut Tatqiqhiutaannut uvani http://www.gov.nu.ca/training-calendar qaritaujakvigilugitluunniit uvani training@gov.nu.ca.